එලියාගේ මෙන් ඇදහිල්ලක් ඔබට තිබෙනවා ද?

අද දින මිනිස් සමාජය ඇදහිල්ල සුළු කොට සලකයි. බුද්ධිමත්හු යයි කියන අය දෙවියන් වහන්සේගේ පැවැත්ම ගැන සමච්චල් කරති. ආගමික කුහකයෝ දෙවියන් වහන්සේ ව අවමානයට ලක් කරති. තව ද බාහිර ලෝකය එන්ට එන්ට ම කටයුතු කරන්නේ, දෙවියන් වහන්සේ ව එතරම් සැලකිල්ලට නොගනිමිනි. මෙම ආකල්පයන් පුද්ගලයෙකු ව තර්ජනයෙන් භය ගන්වනවා වේවා, නැතහොත් ඔහු ව අධෛර්යයට පත් කරවනවා වේවා, ඔහු තුළ උදාසීන බවක් කාවද්දනවා වේවා, මේ ඕනෑ ම තත්ත්වයක දී ඇති වන ප්‍රතිඵලය එක ම ය: එනම් ඇදහිල්ල සෝදා පාළුවට ලක්වීම ය. ඇදහිල්ලේ ඌනතාවය “පහසුවෙන් අප අසුකරන පාපය” බව ප්‍රේරිත පාවුල් විසින් පැවසීම පුදුමයක් නොවේ!—හෙබ්‍රෙව් 12:1.

සමහරවිට, ශක්තිමත් ඇදහිල්ලකින් හෙබි පුරුෂයන්ගේ හා ස්ත්‍රීන්ගේ ජීවිතවලට අපගේ අවධානය යොමු කරවන්නට පාවුල් විශේෂ ප්‍රයත්නයක් ගත්තේ එමනිසා ය. (හෙබ්‍රෙව්, 11වන පරිච්ඡේදය) එවන් ආදර්ශයන්වලට අප ව ක්‍රියාවට පෙලඹ විය හැකි අතර, අපගේ ඇදහිල්ලට පිටුවහලක් විය හැකි ය. නිදසුනක් වශයෙන්, ප්‍රොපේත එලියා ගැන සලකා බලමු. මෙහි දී අප අවධානය යොමු කරන්නේ, දිගු කලක් මුළුල්ලේ නිරත වී සිටි පූර්ණ බවින් යුක්ත වූ ඔහුගේ අනාවැකිමය ජීවිත කාලයේ මුල් කොටස පමණි. ඔහු ජීවත් වූයේ ආහබ් රජ සහ ඔහුගේ මිථ්‍යාදෘෂ්ටික භාර්යාව වූ යෙසබෙල් බිසවගේ පාලන සමයේ ය, අද දින මෙන්, එම කාලයේ දී ද සැබෑ දෙවියන් වහන්සේ පිළිබඳ වූ ඇදහිල්ල හීන වී ගොස් තිබිණි.

දූෂිත වූ ගෝත්‍ර දසයේ රාජ්‍යය

ඔවුන් මොනතරම් දරුණු යුවළක් වී ද! ආහබ්, ගෝත්‍ර දසයේ ඊශ්‍රායෙල් රාජ්‍යයේ සත්වෙනි රජ විය. ඔහුට පෙර සිටි රජවරු හයදෙනා දුෂ්ට ව සිටියත්, ආහබ් ඊටත් වඩා දරුණු වූයේ ය. දේශය දූෂණය කළ වසු නමස්කාරය වැඩි වර්ධනය කළා පමණක් නොව, නමුත් ඔහු විදේශීය රජ දුවක වූ යෙසබෙල් ව සරණ පාවා ගත්තේ ය. මේ මගින්, ඊට පෙර කවරකලෙකවත් තිබුණාට වඩා බොරු දෙවියෙකු වූ බාල් වන්දනාවේ තද බල ආකාරයක් හඳුන්වා දුන්නේ ය.—1 රාජාවලිය 16:30-33.

යෙසබෙල් ළදරු අවදියේ සිට බාල් වන්දනාවේ ගිලී සිටියා ය. ඇස්ටොරෙත්ගේ (බාල්ගේ බිරිඳ) පූජකයෙකු ව සිටි, ඇගේ පියා වූ එත්බාල්, ඊශ්‍රායෙලයට මදක් උතුරින් පිහිටි සීදොන් සිංහාසනයට පැමිණ තිබුණේ බොහෝ දෙනෙකු අතරමග මරමින් ය. යෙසෙබෙල්, ඊශ්‍රායෙල් හි බාල් වන්දනාව පිහිටුවන්නට සදාචාරමය අතින් දුර්වල වී සිටි ඇගේ සැමියාට බලපෑම් කළා ය. වැඩිකල් යන්නට මත්තෙන්, එම බොරු දෙවියාගේ ප්‍රොපේතවරු 450ක් ද, අෂේරා දේවතාවියගේ ප්‍රොපේතවරු 400ක් ද එම දේශයේ වූ අතර, ඔවුන් සියලු දෙනා ම රාජකීය මේසයෙන් අනුභව කළෝ ය. ඔවුන්ගේ නමස්කාර ක්‍රමය, සැබෑ දෙවියන් වහන්සේ වන යෙහෝවඃ වහන්සේගේ ඇස් හමුවෙහි මොනතරම් පිළිකුල් වූවා ද! පුරුෂ ලිංග රූප සංකේත, සශ්‍රීකත්වයේ වත් පිළිවෙත්, දේව මාළිගාවේ වේෂ්‍යාවන් (පිරිමි සහ ගැහැණු දෙකොට්ඨාශය ම), දරුවන් ව පූජා කිරීම පවා ඔවුන්ගේ මෙම අතිශයින් පිළිකුල් ආගමේ අංග ලක්ෂණයන් විය. ආහබ්ගේ ආශීර්වාදය සමඟින්, එය කිසි බාධාවකින් තොර ව රාජ්‍යය පුරා ව්‍යාප්ත වී ගියේ ය.

ඊශ්‍රායෙල්වරු මිලියන ගණනක්, පොළොව සහ එහි ජල චක්‍රයේ මැවුම්කරුවාණන් වන යොහෝවඃ වහන්සේ ව අමතක කළෝ ය. ඔවුන්ගේ ඇස්වලට පෙනුණේ, වියළි සමය අවසන් වන විට, වැසි වස්වා දේශයට ආශීර්වාද කළේ බාල් කියා ය. සෑම වසරක ම, ඔවුහු බලාපොරොත්තුව සහිත ව මෙම ‘වලාකුළු වාහකයා,’ සශ්‍රීකත්වයේ සහ වියළි කාලය අවසන් කරමින් වැසි සමය ගෙනෙනවා යයි කියනු ලැබූ මේ දෙවියා දෙස බලා සිටියෝ ය. වසරක් පාසා වසරක් වර්ෂාව ලැබිණි, වසරක් පාසා වසරක් බාල් ප්‍රශංසාව ලබා ගත්තේ ය.

එලියා නියඟයක් ප්‍රකාශයට පත් කරයි

වැහි නැති දීර්ඝ ග්‍රීෂ්ම කාලයකට පසු ව, එනම් ජීවන දායක වර්ෂාව සමඟ දැන් බාල් පෙරටුව ගමන් කරයි කියා ජනයා බලාපොරොත්තුවෙන් සිටින්නට පටන් ගත් අවස්ථාවේ දී, එලියා ජවනිකාවට පිවිසියේ ය.a ඔහු බයිබල් වාර්තාව තුළට වේගයෙන් ඇතුල් වන්නේ මේඝ ගර්ජනාවක් මෙන් ක්ෂණික ව ය. ඔහුගේ පසුබිම පිළිබඳ ව අප හට පවසා ඇත්තේ මඳ වශයෙනි, ඔහුගේ දෙමාපියන් ගැන කිසිවක් පවසා නැත. එහෙත් ගර්ජනාවක් මෙන් නොව, එලියා වනාහි වැහි කුණාටුවක පෙරනිමිත්තක් නොවී ය. ඔහු ආහබ් හට මෙසේ නිවේදනය කළේ ය: “මා සේවයකරන [ඉදිරිපිට මා ඇත්තට ම සිටගෙන සිටින NW] ඉශ්‍රායෙල්ගේ දෙවිවූ ස්වාමීන්වහන්සේ [යෙහෝවඃ වහන්සේ NW] ජීවමාන බව සැබෑවා සේම මාගේ වචනය ලෙස මිස මේ අවුරුදුවල පිනිවත් වැස්සවත් නොවන්නේය”!—1 රාජාවලිය 17:1.

චාම් ලොම් ඇඳුමින් සැරසීගත් මෙම මිනිසා ගැන සිතින් මවා ගන්න. ඔහු රළු ගිලියඩ් කඳුකරයේ ස්වදේශිකයෙකු වූ අතර, පෙනෙන හැටියට ඔහු හැදී වැඩුණේ රැළවල්වල යටහත් පහත් එඬේරුන් අතර ය. දැන් ඔහු පෙනී සිටින්නේ බලවත් ආහබ් රජ ඉදිරියේ ය, සමහරවිට, සුප්‍රසිද්ධ ඇත් දත් මන්දිරයෙන් යුත්, අගනා වෛවර්ණ සැරසිලිවලින් හා මවිත උපදවන රූපවලින් යුත් ආහබ්ගේ අතිවිශාල මාළිගය තුළ එලියා සිටිනවා විය හැක. යෙහෝවඃ වහන්සේගේ නමස්කාරය මුළුමනින් ම පාහේ අමතක ව ගොස් ඇති බලකොටුවලින් වට වී ඇති ජනාකීර්ණ සමාරියෙහි සිටින මෙම ආහබ්ට ඔහු කියනුයේ, ඔහුගේ මෙම දෙවියා, මේ බාල්, කිසි බලයක් නැති, කිසි වැදගැම්මකට නැති දෙවියෙකු කියා ය. මේ අවුරුද්දේ සහ මින් මතු අවුරුදුවල වැසිවත් පිනිවත් නොතිබෙන බව එලියා ප්‍රකාශ කරයි!

ඔහු එවන් ඇදහිල්ලක් ලබා ගත්තේ කොහෙන් ද? මෙම උද්දච්ච, ධර්මභේදී රජු ඉදිරියේ පෙනී සිටින්නට ඔහුට බිය සුලු ගතියක් දැනුණේ නැත් ද? සමහරවිට එසේ වන්නට තිබුණි. වසර දහස් ගණනකට පසු ව, යේසුස් වහන්සේගේ අර්ධ සහෝදරයා වූ යාකොබ් අපට සහතික ලෙස කියා සිටින්නේ, එලියා වනාහි, “අප සමාන ගති ඇති මනුෂ්‍යයෙක්” වූ බව ය. (යාකොබ් 5:17) එහෙත්, එලියාගේ වදන් කල්පනාවට ගන්න: ‘[ඉදිරිපිට මා ඇත්තට ම සිට ගෙන සිටින NW] ඉශ්‍රායෙල්ගේ දෙවිවූ යෙහෝවඃ වහන්සේ, ජීවමාන බව සැබෑවාක් මෙන් ම, . . . ’ යනුවෙනි. යෙහෝවඃ වහන්සේගේ සේවකයෙකු වශයෙන් තමා සිට ගෙන සිටියේ, ආහබ්ගේ සිංහාසනයට වඩා බොහෝ සෙයින් උසස්, එනම් විශ්වයේ පරමාධිපති ස්වාමියාණන්ගේ සිංහාසනය ඉදිරිපිට බව එලියා මනසේ තබා ගෙන සිටියේ ය! ඔහු එම සිංහාසනයේ නියෝජිතයෙකු, හෙවත් දූතයෙකු විය. මෙම කාරණය මුලින් ම කල්පනාවට ගෙන තිබූ ඔහුට, යෙහෝවඃ වහන්සේගේ ආශීර්වාද අහිමි කර ගෙන තිබූ මේ පුංචි මිනිස් අධිපතියාට බිය වන්නට තිබුණේ කුමකට ද?

යෙහෝවඃ වහන්සේ එලියා හට එතරම් ම සැබෑවක් වූයේ අහම්බෙන් නොවේ. මෙම ප්‍රොපේතවරයා, දෙවියන් වහන්සේ ස්වකීය සේවකයන් සමඟ කටයුතු කර තිබූ ආකාරය ගැන අධ්‍යයනය කර තිබුණාට කිසිදු සැකයක් නැත. යුදෙව්වන් බොරු දෙවිවරුන් නමස්කාර කිරීමට හැරුණොත් ඔවුන්ට නියඟයෙන් ද සාගතයෙන් ද දඬුවම් කරන බව යෙහෝවඃ වහන්සේ ඔවුන් හට අනතුරු අඟවා තිබුණි. (ද්විතීය කථාව 11:16, 17) යෙහෝවඃ වහන්සේ සෑම විටක ම ස්වකීය වචනය ඉටු කරන බවට නිසැකකමක් තිබූ එලියා, “වැසි නොවසින පිණිස . . . යාව්ඤා කළේය.”—යාකොබ් 5:17.

මඟ පෙන්වීම අනුගමනය කිරීමෙන් ඇදහිල්ල ප්‍රකාශ කරනු ලැබීම

එහෙත්, එම අවස්ථාවේ දී යම් කලකට, එලියාගේ මෙම ප්‍රකාශය, ඔහු ව මාරාන්තික අන්තරායකට ඇද දැමුවේ ය. එය, ඔහුගේ ඇදහිල්ලේ තවත් පැත්තක් ක්‍රියාත්මක වීමට අවශ්‍ය ව තිබූ වේලාව වූයේ ය. ජීවත් ව සිටින්නට නම්, යෙහෝවඃ වහන්සේගේ මෙම උපදෙස් අනුගමනය කිරීමේ ලා ඇදහිලිවන්ත වන්නට ඔහුට තිබිණි: “මෙතැනින් පිටත්ව පූර්ව [නැගෙනහිර NW] දිශාවට ගොස් යොර්දාන් ඉදිරිපිට තිබෙන කෙරිත්නම් ඔය ළඟ සැඟවී සිටපන්න. ඒ ඔයෙන් නුඹට බොන්නට පුළුවන; එහිදී නුඹට කෑම දෙන්ට කපුටුවන්ට මම අණකළෙමි [අණ කරන්නෙමි NW].”—1 රාජාවලිය 17:3, 4.

එලියා එවෙලේ ම කීකරු වූයේ ය. තම දේශය මතට පැමිණෙන නියඟය හා සාගතයෙන් බේරී ජිවත් වන්නට ඔහුට වුවමනා වූයේ නම්, යෙහෝවඃ වහන්සේ සැලැස් වූ ඕනෑ ම සැපයුමක් කෙරෙහි රඳා සිටින්නට ඔහුට තිබිණි. මෙය කොහෙත් ම පහසු කාර්යයක් නොවී ය. තමා ම සැඟවී, නොකඩවා මාස ගණනක් ම සම්පූර්ණ හුදෙකලාවේ ජීවත්වීම මින් අදහස් කරවී ය. මෝසෙස්ගේ ව්‍යවස්ථාවේ අපවිත්‍ර යයි සලකනු ලැබූ, කුණු මස් බුදින කළු කපුටන් විසින් ගෙන එනු ලැබූ මස් සහ රොටි කෑම ද, එවන් මස් කුණු මස් නොව, නමුත් ව්‍යවස්ථාව අනුව, නිසි අයුරින් ලේ ඉවත් කරනු ලැබූ මස් බවට යෙහෝවඃ වහන්සේ කෙරෙහි දැඩි විශ්වාසයක් තැබීම ද ඉන් අදහස් කළේ ය. දිගු කලක් තිස්සේ සිදු වූ මෙම ප්‍රාතිහාර්ය, වෙන්නට නොහැකි යයි සමහරක් බයිබල් විවේචකයන්ගේ ඇස්වලට කොතරම් පෙනුණේ ද යත්, මෙහි සඳහන් වී ඇති මුල් වචනයෙන්, “කළු කපුටන්” යයි කොහෙත් ම අදහස් නොකරන බවත්, එයින් අදහස් කළා විය යුත්තේ “අරාබිවරුන්” බවත් ඔවුහු යෝජනා කරති. එහෙත් කළු කපුටන් නියම තෝරා ගැනීමක් වූයේ ය. ආහබ් සහ යෙසබෙල් තමන් වටා තිබූ සියලු රාජ්‍යයන් පීරා බලමින් සෙවූ එලියා ව පෝෂණය කරන්නට ආහාර කැබලිත් රැගෙන, මෙම පහත් අපවිත්‍ර කුරුල්ලන් කාන්තාරයට පියාසර කළ බව කිසිවෙක් සැක කරන්නට යන්නේ නැත.—1 රාජාවලිය 18:3, 4, 10.

නියඟය නොකඩවා පැවතුනාත් සමඟ ම, කෙරිත් ඔයෙන් තමාට ලැබෙන වතුර සැපයුම ගැන එලියා වඩාත් සැලකිලිමත් වූවා විය හැකි ය. ඊශ්‍රායෙල් දේශයේ බොහෝ වතුර ඔයවල් නියං කාලයට වියළී යන අතර, “කලකට පසු” මෙය ද සිඳී ගියේ ය. වතුර පහර ක්‍රමක්‍රමයෙන් ඉතා සුළු ප්‍රමාණයකට අඩු වී ගොස් දිය කඩිත්ති දවසින් දවස සිඳී යද්දී, එලියාට ඇතිවුණු හැඟීම් ගැන ඔබට සිතා ගන්නට පුළුවන් ද? ජලය සියල්ල හමාර වූ පසු කුමක් වනු ඇත්දැයි ස්ථිර වශයෙන් ම ඔහු කල්පනා කරන්නට ඇත. ඒ මොනවා වුවත්, ඔහු ඇදහිලිවන්ත ව ස්ථිර ව එතැන සිටියේ ය. ඔයේ ජලය සිඳී යන තෙක්, යෙහෝවඃ වහන්සේ, උන් වහන්සේගේ ඊළඟ උපදෙස් මාලාව දුන්නේ නැත. ශාරෙපත්ට යන්න, යයි ප්‍රොපේතවරයා හට පවසන ලදි. එහි දී, වැන්දඹුවකගේ නිවසක දී, ඔහුගේ ආහාර පාන ඔහු ලබා ගනු ඇත.—1 රාජාවලිය 17:7-9.

ශාරෙපත්! එම නගරය අයත් වූයේ සීදොන් පුරයට ය, තව ද යෙසබෙල් පැමිණියේ ද, ඇගේ පියා රජ වශයෙන් පාලනය කළේ ද මෙම පුරවරයේ ය! එහි ආරක්ෂාව තිබෙනු ඇත් ද? එලියා එසේ කල්පනා කළා විය හැක. එහෙත් “ඔහු නැගිට ගියේ ය.”—1 රාජාවලිය 17:18, NW.

යෙහෝවඃ වහන්සේ අවශ්‍ය පෝෂණය හා ජීවනය දෙන සේක

වැඩිකල් යන්නට මත්තෙන්, ඔහුගේ කීකරුකමට විපාක ලැබිණි. පුරෝකථනය කර තිබූ පරිදි, වැන්දඹුව ඔහුට හමු වූ අතර, ඔහුගේ රටවැසියන් අතර එතරම් ම ගිලිහී ගොස් තිබුණු ආකාරයේ ඇදහිල්ලක් ඈ තුළ තිබෙන බවට ඔහුට සම්බවිණි. මෙම දුප්පත් වැන්දඹුවට තිබුණේ, ඈට සහ ඇගේ තරුණ පුත්‍රයාට අවසාන කෑම වේලට අවශ්‍ය තරම් පිටි සහ තෙල් පමණි. එහෙත්, ඇගේ මෙම උග්‍ර අවශ්‍යතාවය මැද පවා, පළමුවෙන් ම එලියාට රොටි දීමට කැමැත්තෙන් සිටියේ, අවශ්‍යතාවය පවතින තාක්කල්, ඇගේ තෙල් කුලාව සහ ඇගේ පිටි මුට්ටිය අඩු නොවී යෙහෝවඃ වහන්සේ විසින් පවත්වනු ඇති බවට ඔහු දුන් පොරොන්දුව කෙරෙහි දැඩි සේ විශ්වාස කරමිනි. යේසුස් වහන්සේ සිය දවසේ සිටි ඇදහිල්ලක් නැති ඊශ්‍රායෙලිතයන් ව දෝෂාරෝපණයට ලක් කළ විට, මෙම වැන්දඹුවගේ ඇදහිලිවන්ත ආදර්ශය සිහි කිරීම ගැන පුදුම වන්නට දෙයක් නැත!—1 රාජාවලිය 17:13-16; ලූක් 4:25, 26.

එනමුත්, මෙම ප්‍රාතිහාර්ය සිදුවුවත්, වැන්දඹුවගේ මෙන් ම එලියාගේ ඇදහිල්ල ද ඉක්මනින් ම තද බල පරීක්ෂණයකට භාජනය වන්නට තිබිණි. ඇගේ පුත්‍රයා හදිසියෙන් ම මිය ගියේ ය. මහත් කැළඹීමකට පත් වැන්දඹුව, මේ දුඃඛදායක පහර ලැබුණේ “සැබෑ දෙවියන් වහන්සේගේ මනුෂ්‍යයා” වන එලියා සම්බන්ධ කාරණයක් නිසා යයි සිතුවා ය. තමා අතීතයේ කරන ලද යම් පාපයක් නිසා තමාට දඬුවම් පැමිණෙනවා ද කියා ඈ කල්පනා කළා ය. එහෙත්, ඇගේ පණ ගොස් සිටි පුත්‍රයා ව දෝතින් ගත් එලියා, ඉහළ කාමරයකට ඔහු ව ගෙන ගියේ ය. පෝෂණයට වඩා යමක් සපයන්නට යෙහෝවඃ වහන්සේට හැකි බව ඔහු දැන සිටියේ ය. යෙහෝවඃ වහන්සේ ජීවිතයේ ම උල්පත වන සේක! එබැවින්, දරුවාගේ ජීවිතය යළි පැමිණෙන මෙන් එලියා නැවත නැවත යාච්ඤා කළේ ය.

නැවත නැගිටීම ගැන එවන් ඇදහිල්ලක් තැබූ ප්‍රථම තැනැත්තා එලියා නොවේ, නමුත් බයිබල් වාර්තාව තුළ, එවැන්නක් සිදු කිරීමට යොදා ගන්නා ලද ප්‍රථම තැනැත්තා ඔහු විය. “දරුවා නැවත ජීවත් වුණේ ය”! එලියා දරුවාත් රැගෙන ඔහුගේ මව කරා පැමිණ මෙම වචන පවසනවාත් සමඟ ම, ඔහුගේ මවට ඇති වූ ප්‍රීතිය දැකිය යුතු දර්ශනයක් විය යුතු ව තිබුණි: “මෙන්න, නුඹේ පුතා ජීවත්ව සිටී”! ඈ කඳුළු සල සලා මෙසේ පැවසූ බවට කිසි සැකයක් නැත: “ඔබ දෙවියන්වහන්සේගේ මනුෂ්‍යයෙක් බවත් ඔබගේ මුඛයෙහි තිබෙන ස්වාමීන්වහන්සේගේ [යෙහෝවඃ වහන්සේගේ NW] වචනය සැබෑ බවත් දැන් දනිමි.”—1 රාජාවලිය 17:17-24.

“මාගේ දෙවියන් වහන්සේ යෙහෝවඃ වහන්සේ ය”

එලියාගේ නමේ අර්ථය, “මාගේ දෙවියන් වහන්සේ යෙහෝවඃ වහන්සේ” වීම කොතරම් හද දනවන සුලු ද, එමෙන් ම කොතරම් සුදුසු ද! නියඟය සහ සාගතය තිබූ කාලයක දී, යෙහෝවඃ වහන්සේ ඔහුට ආහාර හා පානය දුන් සේක; සදාචාරමය වියවුල් තත්ත්වයක් තිබූ කාලයක දී, යෙහෝවඃ වහන්සේ ඔහුට හරි මඟ පෙන්වීම දුන් සේක; මරණය සිදුවුණු මොහොතක දී, ජීවිතය යළි ලබා දීමට යෙහෝවඃ වහන්සේ ඔහු ව පාවිච්චි කළ සේක. තමාට දේවල් සැපයීමට තම දෙවියන් වහන්සේ කෙරෙහි දැඩි විශ්වාසය තැබීම මගින්, උන් වහන්සේගේ මඟ පෙන්වීම අනුගමනය කිරීම මගින්, උන් වහන්සේගේ නාමය පරිශුද්ධවත් කිරීමට උන් වහන්සේ කෙරෙහි රඳා පැවතීම මගින්, තම දෙවියන් වහන්සේ කෙරෙහි ඔහුගේ ඇදහිල්ල ක්‍රියාවට නංවන්නට එලියාගෙන් ඉල්ලා සිටි සෑම අවස්ථාවක දී ම, යෙහෝවඃ වහන්සේ කෙරෙහි ඇදහිල්ල තබන්නට තවත් හේතු සමඟින් ඔහුට විපාක ලැබුණු බව පෙනී යයි. ඔහුගේ දෙවියන් වහන්සේ වන යෙහෝවඃ වහන්සේගෙන් ලැබුණු අසීරු සහ තැතිගන්වන සුලු පවා පැවරුම් ඔහු නොකඩවා භාර ගන්නවාත් සමඟ ම, මෙම රටාව සත්‍යයක් ව පැවතුණි; ඇත්තෙන් ම, ඔහුගේ සමහරක් වඩාත් විශිෂ්ට කැපී පෙනෙන ප්‍රාතිහාර්යන් තවමත් ඔහු ඉදිරිපිට තිබිණි.—1 රාජාවලිය 18වන පරිච්ඡේදය බලන්න.

අද දින යෙහෝවඃ වහන්සේගේ සේවකයන්ට ද බොහෝ දුරට තත්ත්වය ඒ හා සමාන ය. අප ව ප්‍රාතිහාර්යමය ලෙස පෝෂණය කරනු නොලබනවා විය හැක, නැතහොත් නැවත නැගිටීමක් සිදු කරන්නට පාවිච්චි කරනු නොලබනවා විය හැකි ය; මෙය එවන් ප්‍රාතිහාර්ය සඳහා යුගයක් නොවේ. කෙසේ වෙතත්, එලියාගේ දවසේ පටන් යෙහෝවඃ වහන්සේ අබමල් රේණුවක තරමින්වත් වෙනස් වී නැත.—1 කොරින්ති 13:8; යාකොබ් 1:17.

අපට ද සමහරක් දුෂ්කර පැවරුම් ලැබෙනවා වන්නට පුළුවන, දෙවියන් වහන්සේ අපට දී ඇති පණිවුඩය සමඟ අසීරු සහ බිය උපදවන සුලු ප්‍රදේශවල වැඩ කිරීම විය හැක. අපට පීඩාවලට මුහුණ දීමට සිදු විය හැක. අප කුසගින්නේ පවා ද සිටිය හැක. එහෙත්, ඇදහිලිවන්ත පුද්ගලයන්ට හා සමස්තයක් වශයෙන් ස්වකීය සංවිධානයට, යෙහෝවඃ වහන්සේ යළි යළිත් ඔප්පු කොට ඇත්තේ උන් වහන්සේ තවමත් ස්වකීය සේවකයන්ට මඟ පෙන්වා ඔවුන් ව ආරක්ෂා කරන බව ය. තමන් වහන්සේ ඔවුන්ට පවරා තිබෙන මොනයම් පැවරුමක් හෝ කරගෙන යාමට උන් වහන්සේ ඔවුන්ට තවමත් බලය දානය කරන සේක. තව ද, මේ වියවුල් සහිත ලෝකය තුළ ඔවුන්ට මුහුණ පාන්නට සිදු වන මොනයම් පරීක්ෂාවක දී වුවද විඳදරා ගැනීමට තවමත් උන් වහන්සේ උපකාර කරන සේක.—ගීතාවලිය 55:22. w92 4/1

[පාදසටහන්වල]

[18වන පිටුවේ පින්තූරය]

යෙහෝවඃ වහන්සේ ස්වකීය සේවකයන්ගේ අවශ්‍යතාවයන් ගැන සැලකිල්ල දක්වන බවට එලියාට මෙන් ඔබට ඇදහිල්ල තිබෙනවා ද?