“ආලෝකය දරන්නෝ” දිස්ත්‍රික්ක සමුළුවට පැමිණෙන්න
“එසේය, පොළොව අන්ධකාරයෙන්දජනයෝ තද අන්ධකාරයෙන්ද වසනු ලබන්නෝය.” (යෙසායා 60:2) අද දින එම වචන කොතරම් සැබෑ ද! කිසි ප්‍රශ්නයක්නොමැති ව, දෙවියන් වහන්සේ ප්‍රසන්නවන්නේ කුමන ආකාරයේ නමස්කාරයකට ද යන්න වටහා ගත නොහැකි පරිදි බොරු ආගම ජනයා ව අඳුරේ තබා ගෙන සිටී. ඒ මන්ද? මන්දයත් සාතන්, එනම් මේ දේවල පිළිවෙළේ දෙවියා, “නොඇදහිලිකාරයන්ගේ මනස් අන්ධ කොට ඇති” නිසා ය.—2 කොරින්ති 4:4, NW.
සාතන් විසින් අන්ධ කරනු ලැබූවන්ට වඩා හාත්පසින් වෙනසක් ඇති අය නම් යෙහෝවඃ වහන්සේගේ සාක්ෂිකරුවන් ය. අනාගතවක්තෘ යෙසායාගේ වචන අදාළ කළ හැක්කේ ඔවුන්ට ය: “නුමුත් නුඹ කෙරෙහි ස්වාමීන්වහන්සේ [යෙහෝවඃ වහන්සේ NW] උදාවනසේක, උන්වහන්සේගේ තේජසද නුඹ කෙරෙහි පෙනෙන්නේය.” අන්ධකාරයෙන් පිට වී දෙවියන් වහන්සේගේ පුදුමාකාර ආලෝකය කරා එන්නට ලැබීම ගැන ඔවුහු කොතරම් ස්තුතිවන්ත වෙත් ද! එය ආත්මික ආලෝකයකි, මනස ආලෝකවත් කරන දෙවියන් වහන්සේගේ වචනයේ සත්‍යතාවය ය, එවිට ඇත්තට ම අන්ධ වී සිටින අයට පවා සත්‍යය දැකිය හැක.
ඇත්ත වශයෙන් ම, උපකාරය අවශ්‍ය ය. දිව්‍යමය ලෙස සපයන ලද ආධාරකයන් ප්‍රයෝජනයට නොගෙන නිකම් ම බයිබලය කියවන යමෙක් ආලෝකය වටහා ගනීවි ය කියා සිතන්නට බැරි ය. යෙහෝවඃ දෙවියන් වහන්සේ, මතෙව් 24:45-47 දක්වා සඳහන් කර තිබෙන “විශ්වාසවූ නුවණ ඇති දාසයා” සපයා ඇත්තේ ඒ නිසා ය. අද දින එම “දාසයා” ව නියෝජනය කරන්නේ යෙහෝවඃ වහන්සේගේ සාක්ෂිකරුවන්ගේ පාලක මණ්ඩලය විසිනි. “ආලෝකය දරන්නෝ” දිස්ත්‍රික්ක සමුළුව පිළියෙළ කර ඇත්තේ මෙම මණ්ඩලයේ මඟ පෙන්වීම යටතේ ය.
මෙම සමුළුවේ අරමුණ නම්, පිලිප්පි 2:15 හි සඳහන් පාවුල්ගේ වචන පිළිපදිමින්, වඩාත් හොඳින් ආලෝකය දරන්නන් බවට පත්වීමට යෙහෝවඃ වහන්සේගේ සියලු ජනයාට උපකාර කිරීමයි. එහි, ක්‍රිස්තියානින්ට අනුශාසනා කර ඇත්තේ, “ලෝකයේ ආලෝකවල්” මෙන් බැබලීමට ය.—මතෙව් 5:14, 16.
ශ්‍රී ලංකාවේ, සිංහල භාෂාවෙන් පැවැත්වෙන “ආලෝකය දරන්නෝ” දිස්ත්‍රික්ක සමුළු මාලාව පටන් ගැනීමට සැලසුම් යොදා ඇත්තේ අගෝස්තු 21දා පෙ.ව. 10:20ට ය. ඉදිරියට පැමිණෙන්නට නියමිත ව තිබෙන ආත්මික වැඩසටහනට සූදානම් කරනු වස්, මනසේ හා හෘදයේ හරි ස්වභාවයක් ඇති කර ගැනීමට සියල්ලන් හට උපකාර කිරීම සඳහා සංගීත වැඩසටහනක් තිබෙනු ඇත. එක් එක් දවසට එයට ම අදාළ තේමාවක් තිබේ, සිකුරාදා දින තේමාව නම්: “ඔබගේ ආලෝකය ද සත්‍යය ද පතුරුවන්න” යනුයි.—ගීතාවලිය 43:3, NW.
සිකුරාදා වැඩසටහනේ මූලික ඇමතුම වනු ඇත්තේ: “අලෝකය දරන්නෝ—කිනම් අරමුණක් සඳහා ද?” යන්නයි. නිසැක ව ම, ක්‍රිස්තියානින් ආලෝකය දරන්නන් වන්නේ, කිසියම් පුද්ගලික, ආත්මාර්ථකාමී චේතනාවකින් නොවේ. එසේ නොව, ඔවුන් සේවය කරන්නේ, ප්‍රධාන ආලෝකය දරන්නා වූ යේසුස් ක්‍රිස්තුස් වහන්සේ පොළොවට පැමිණි හේතුව එනම්, සත්‍යයට සාක්ෂි දැරීමට හා මැවුම්කරුවාණන්ගේ නාමය මහිමවත් කිරීම උදෙසා ම ය. “මම ලෝකයෙහි සිටින තුරු ලෝකයේ ආලෝකය වෙමි” යනුවෙන් යේසුස් වහන්සේ තමන් වහන්සේ ගැන ම යෝග්‍ය ලෙස කී සේක. (යොහන් 9:5, නව අනුවාදය) මෙසේ, උන් වහන්සේ තමාගේ අඩිපාර ළඟින් අනුගමනය කිරීමට අප හට ආදර්ශයක් තැබූ සේක. (1 පේතෘස් 2:21) එම ප්‍රථම දින පස් වරුවේ, යෞවනයන් හට විශේෂ උනන්දුවක් ඇති කරවන, යොෂියා රජ සම්බන්ධ කථාවක් සහ බයිබල් නාට්‍යයක් කැපී පෙනෙනු ඇත.
සෙනසුරාදා තේමාව වනුයේ, “ඔබ ලෝකයේ ආලෝකය ය. . . . ඔබගේ ආලෝකය බබළවන්න.” (මතෙව් 5:14, 16, NW) උදෑසන වැඩසටහනේ, “ඔබගේ ආලෝකය බැබළවීම” යන තේමාව රැගත් කථා මාලාවක් තිබෙනු ඇත. යෙහෝවඃ වහන්සේට කැප වී සිටින අයට බව්තීස්මය ගැනීම සඳහා ප්‍රස්තාවක් සලසා දෙනු ලැබේ. පස්වරු වැඩසටහනේ, “ක්‍රිස්තුස් වහන්සේගේ පැමිණ සිටීමේ සහ එළිදරව් වීමේ ආලෝකය පැතිර වීම” යන මැයෙන් ආලෝකවත් කරවන කථා මාලාවක් ඉදිරිපත් කෙරෙනු ඇත.
සමුළුවේ තුන් වන සහ අවසාන දින වන ඉරිදා සඳහා තෝරා ගෙන ඇති තේමාව වන්නේ, “ආලෝකයේ දරුවන් මෙන් දිගට ම හැසිරෙන්න” යන්න ය. (එපීස 5:8, NW) උදෑසන වැඩසටහනේ, පවුල් යුතුකම් ගැන සලකා බැලෙන “ක්‍රිස්තියානි නිවෙස තුළ එකිනෙකා ගැන සැකිලිමත්වීම” යන තේමාවෙන් යුත් කථා මාලාවක් ඇතුළත් වනු ඇත. දෙවියන් වහන්සේට සහ ක්‍රිස්තුස් වහන්සේට යටත්වීම යනුවෙන් අදහස් කරන්නේ කුමක් ද යන්න ගැන පහදා දෙන කථාවක් ද තිබෙනු ඇත.
ඉරිදා පස් වරුවේ, “ලෝකයේ ආලෝකය අනුගමනය කරන්න” යන තේමාවෙන් යුත් ප්‍රසිද්ධ කථාව සමඟින් සමුළුව එහි උච්චාවස්ථාවට පත් වනු ඇත. මෙම අනුශාසනාව තුළ, යොහන් 1:1-16 හි සාකච්ඡාවක් අඩංගු වන අතර. යේසුස් ක්‍රිස්තුස් වහන්සේ ලෝකයේ ආලෝකය බව අවධාරණය කරමින් බයිබල් දැනුමේ ඇති අවශ්‍යතාවය ගැන පෙන්වනු ඇත. “ආලෝකය තුළ දිගට ම හැසිරෙන්න” යන ආයාචනාත්මක අනුශාසනාව සමඟින් සමුළුව අවසන් වනු ඇත.
යෙහෝවඃ වහන්සේ ස්වකීය දෘශ්‍යමාන සංවිධානය තුළින් සපයන මෙම ආත්මික මංගල්‍යයට ඔබගේ අගය කිරීම පෙන්වන්න. සිකුරාදා උදෑසන ආරම්භක යාච්ඤාවේ සිට ඉරිදා පස් වරුවේ අවසාන යාච්ඤාව තෙක් පැමිණ සිටින්න. වේදිකාවෙන් පවසනු ලබන සියල්ලට ම කිට්ටු අවධානය යොමු කරන්න. මෙනෙහි කිරීමට සහ පසු ව සලකා බැලීමට ඔබට උපකාරවත්වීම සඳහා සටහන් ගන්න. අවසන් වශයෙන්, යම් ආකාරයක ස්වේච්ඡා සේවයක හවුල්වීමට සැලසුම් කරන්න. මෙමගින්, ලැබීමේ පමණක් නොව, දීමේ ද වඩාත් මහත් ආශීර්වාද ඔබ භුක්ති විඳිනු ඇත.—ක්‍රියා 20:35. w92 5/1