රාජ්‍යය ප්‍රකාශකයන්ගේ වාර්තාව
ඇදහිලිවන්ත භාවය නිසා ආශීර්වාද ලැබූ නයිජීරියානු පාසල් ළමෝ
ප්‍රේරිත පාවුල්, මෙසේ ලීවේ ය: “පුළුවන් නම්, නුඹලාගෙන් විය හැකි ප්‍රමාණයට, සියලු මනුෂ්‍යයන් සමග සමාදානයෙන් සිටපල්ලා.” (රෝම 12:18) නයිජීරියාවේ සිටින යෙහෝවඃ වහන්සේගේ සාක්ෂිකාර පාසල් ළමෝ, පීඩා කරනු ලබන විට පවා මෙම උපදෙස අදාළ කර ගනිති. එහි ප්‍රතිඵලයක් වශයෙන්, යෙහෝවඃ වහන්සේ ඔවුන්ට ආශීර්වාද කරන සේක.
◻ එක් පාසල් ගුරුවරයෙක්, යෙහෝවඃ වහන්සේගේ සාක්ෂිකරුවන් හට බලවත් අකමැත්තක් දැක්වී ය. එක් උදෑසනක රැස්වීමක දී, සියලු ම සාක්ෂිකරුවන්ට ඉදිරියට පැමිණෙන ලෙස කියා සිටි ඔහු, ජාතික ගීය ගායනා කරන ලෙස ඔවුනට අණ කළේ ය. දෙවියන් වහන්සේට තනි භක්තිය දීමට තමන්ට වුවමනා බව කියමින් ඔවුහු එය ප්‍රතික්ෂේප කළෝ ය. ගුරුවරයා ඔවුන් සියලු දෙනා ව ම පිටතට ගෙන ගිය අතර, තණ කොළ කපන ලෙස ඔවුන්ට පැවසුවේ ය. මේ අතරතුර, අනෙක් සිසුවෝ තමන්ගේ පංතිවල වැඩකටයුතු දිගට ම කරගෙන ගියහ.
එක් වැඩිහිටි සාක්ෂිකරුවෙක්, ස්කූල් ඇන්ඩ් ජෙහෝවාස් විට්නසස් නමැති විවරණිකාව රැගෙන ගුරුවරයා වෙත ගොස්, යෙහෝවඃ වහන්සේගේ සාක්ෂිකරුවන්ගේ මධ්‍යස්ථ ස්ථාවරය ගැන පැහැදිලි කළේ ය. කෙසේ වෙතත්, කාරණය සාකච්ඡා කිරීම හෝ විවරණිකාව පිළිගැනීම ගුරුවරයා විසින් ප්‍රතික්ෂේප කරන ලදි. ඇත්තෙන් ම, ඔහු ඉක්මනින් කළේ, ළමුන්ට දුන් දඬුවම තවත් වැඩි කිරීමයි.
මෙම සාක්ෂිකාර ළමෝ, ගුරුවරයා තමන් අසල නොසිටි විට පවා තණ කොළ කපමින්, මෙම දඬුවම දිගට ම විඳදරා ගත්හ. එක් දිනක් මෙම ළමුන් රාජ්‍යය ගීතිකා ගායනා කරමින් දිගට ම වැඩෙහි නියැලී සිටින විට, මෙම ගුරුවරයා සැඟවී, ඔවුන්ට නොදැනෙන ලෙස ඔවුන් දෙස බලා සිටියේ ය. ඔහු කොතරම් ඔවුන් ගැන පැහැදුණා ද කිවහොත්, ඔවුන්ගේ ආකල්පය ගැන තම මවිතය පළ කරමින් ඔහු ඔවුන් ව ආපසු පංතිය වෙත යැවී ය. ප්‍රතිඵලය වූයේ කුමක් ද? මෙම ගුරුවරයා දැන් යෙහෝවඃ වහන්සේගේ සාක්ෂිකරුවන් සමඟ බයිබලය පාඩම් කරමින් සිටීම ය!
යෙහෝවඃ වහන්සේ සහ උන් වහන්සේගේ ප්‍රතිපත්තිවලට ඔවුන් දැක්වූ ඇදහිලිවන්තකම නිසා මෙම පාසල් ළමුන් ආශීර්වාද ලැබූ බවට සහතික ය.—හිතෝපදේශ 10:22.
◻ “රූත් සහ ඇගේ මිතුරියෝ ලෝකයේ කොටසක් නොවීමට” තිබෙන යෙහෝවඃ වහන්සේ ඇතිකර තිබෙන අවශ්‍යතාවයට තම ඇදහිලිවන්තකම පෙන්වීම නිසා ද ආශීර්වාද ලැබුවෝ ය. (යොහන් 17:16, NW ) දහ අට හැවිරිදි රූත් පුරෝගාමි සේවය කරන්නට පටන් ගත්තේ ඇයට වයස අවුරුදු 12 දී ය. ජාතික ගීය ගායනා කිරීම ප්‍රතික්ෂේප කිරීම නිසා, ඈ සහ වෙනත් සාක්ෂිකාරියෝ පාසලේ ආචාර්ය මණ්ඩලයෙන් පීඩා ලැබුවෝ ය. මෙම ගැහැණු ළමුන්ගේ දෙමාපියන් හමුවීමට තමා කැමති යයි එක් ගුරුවරයෙක් පැවසී ය. ස්කූල් විවරණිකාව උපයෝගි කර ගනිමින්, ඔවුන් විසින් පැහැදිලි කිරීමක් කරනු ලැබුවායින් පසු, ගුරුවරයා ඒ ගැන සෑහීමකට පත් වූ අතර, තවදුරටත් සිසුවියන්ට කරදර කළේ නැත.
කෙසේ වෙතත්, එක් දිනක්, ඉන්දියානු ජාතික ගුරුවරියක් මෙම එක් ගැහැණු ළමයෙක් ජාතික ගීය ගායනා නොකිරීම නිසා, ඈට පංතිය ඉදිරිපිට අවමන් කර, දඬුවම් කළා ය. මේ ගැහැණු ළමයා නිර්භීත ලෙස තම ඇදහිල්ල රැක ගත් අතර, එම ගුරුවරිය ඇය ව විදුහල්පතිනිය වෙත කැඳවා ගෙන ගියා ය. ඔවුන් එහි ගිය විට, උප විදුහල්පතිනිය ද එහි සිටින බව සාක්ෂිකාර දැරිය දුටුවා ය. විදුහල්පතිනිය සහ උප විදුහල්පතිනිය සිනාසීමට පටන් ගත්තෙන් ඈ මවිතයට පත්වූවා ය. ගුරුවරිය දෙසට හැරුණු විදුහල්පතිනිය මෙසේ පැවසුවා ය: මහත්මිය, මේ ළමයි ගැන ඔබ කරදර වෙන්නට එපා. ඔබ ඔවුන් ව මරා දැමුවත්, ජාතික ගීය කියනවාට වඩා, මිය යන්නට ඔවුන් කැමති වේවි. ඔබ ඔවුන් ගැන අසා නැද්ද?” ඉන් පසු, ඈ සහ ඇගේ සහයිකාව යෙහෝවඃ වහන්සේගේ සාක්ෂිකරුවන්ගේ ඇදහිල්ල සහ ඔවුන්ගේ ධෛර්යවන්ත භාවය ගැන කථා කළහ. ගැහැණු ළමයා ව ඇමතූ විදුහල්පතිනිය, ඈට සිදු වූ කරදරය ගැන තමා කනගාටු වෙන බව පැවසුවා ය. ඊට පසු ඈ තවදුරටත් පැවසුවේ මෙසේ ය: “ඔබගේ ඇදහිලිවන්ත ක්‍රියාවන් නොකඩවා කරගෙන යන්න. මම ඔබගේ ආගම සහ පිටත දී සහ පාසලේ දී ඔබ දක්වන ධෛර්ය සම්පන්න ස්ථාවරය ගැන ප්‍රශංසා කරනවා.” පසු ව, තමා දැන් සාක්ෂිකරුවන් විසින් ගනු ලබන මධ්‍යස්ථ ස්ථාවරය ගැන වටහා ගෙන සිටින බව පැවසූ විරුද්ධවාදිකම් පෑ ගුරුවරිය, සාක්ෂිකාර දැරියගෙන් සමාව ඉල්ලා සිටියා ය.
මෙම දරුවන් අනුගමනය කළේ, රූපයකට වැඳ වැටීමෙන් දෙවියන් වහන්සේ වෙත තමන් දක්වන අඛණ්ඩතාවය බිඳ ගැනීමට අකමැති වූ හෙබ්‍රෙව්වන් තිදෙනාගේ, සහ යෙහෝවඃ වහන්සේට යාච්ඤා කිරීම නැවැත්වීමට ප්‍රතික්ෂේප කළා වූ දානියෙල්ගේ ආදර්ශයයි. දෙවියන් වහන්සේගේ ධර්මිෂ්ඨ නීතිවලට ඇදහිලිවන්ත භාවය පෙන්වීම නිසා, මෙම පුරුෂයෝ යෙහෝවඃ වහන්සේ විසින් ආශීර්වාද ලැබුවෝ ය.—දානියෙල්, 3 සහ 6 වන පරිච්ඡේද. w92 6/1