ඔබගේ ක්‍රිස්තියානි නිදහස ඥානවන්ත ව පාවිච්චි කරන්න
“නිදහස් අය මෙන් ජීවත් වන්න. එහෙත් ඒ නිදහස, . . . දෙවියන් වහන්සේගේ දාසයන් මෙන් එය භාවිතා කරන්න.”—1 ප්තෘස් 2:16, නව අනුවාදය.
1. ආදම් අහිමි කර ගත්තේ කිනම් නිදහස ද, යෙහෝවඃ වහන්සේ මිනිස් වර්ගයා නැවත පිහිටුවනු ඇත්තේ කිනම් නිදහසට ද?
අපගේ පළමු දෙමාපියන් ඒදන් උයනේ දී පව් කළ විට, ඔවුන් තමන්ගේ දරුවන් හට තිබූ මහිමාන්විත උරුමයක්—එනම් පාපයෙන් හා නපුරෙන් නිදහස අහිමි කළෝ ය. ප්‍රතිඵලයක් වශයෙන්, අප සියලු දෙනා ම ඉපදී ඇත්තේ නපුරට හා මරණයට වහල් වෙමිනි. එනමුත්, ඇදහිලිවන්ත මිනිසුන් ව පුදුමාකාර නිදහසකට නැවත පිහිටුවීමට යෙහෝවඃ වහන්සේ විසින් අරමුණු කොට තිබීම සන්තෝෂයට කාරණයකි. අද දින, හරි හෘදයක් ඇති අය, “දෙවියන්වහන්සේගේ පුත්‍රයන්ගේ එළිදරව්වීම” ඉතා උනන්දුවෙන් බලා සිටින අතර, මෙහි ප්‍රතිඵලයක් වශයෙන්, “ජරාවේ වහල්කමින් නිදහස්වී, දෙවියන්වහන්සේගේ දරුවන්ගේ මහිමයේ නිදහස්කමට පැමිනෙන්නේය.”—රෝම 8:19-21.
‘දේශනා කිරීමට ආලේප කරනු ලැබ’
2, 3. (අ) “දෙවියන්වහන්සේගේ පුත්‍රයෝ” කවරහු ද? (ආ) ඔවුන් භුක්ති විඳින්නේ කිනම් පුදුමාකාර තත්ත්වයක් ද, එයින් ඔවුන් හට උර දෙන්නට සිදු වන වගකීම කුමක් ද?
2 මෙම “දෙවියන්වහන්සේගේ පුත්‍රයන්” කවුරුන් ද? ඔවුහු වනාහි යේසුස් වහන්සේ සමඟ ස්වර්ගික රාජ්‍යයේ පාලකයන් වනු ඇති ආත්මයෙන් ආලේප ලත් උන් වහන්සේගේ සහෝදරයන් ය. මේ අයගේ පළමු අය පෙනෙන්ට සිටියේ පො.යු. පළමු සියවස තුළ දී ය. යේසුස් වහන්සේ ඉගැන්වූ විමුක්තිදායක සත්‍යය ඔවුන් පිළිගත් අතර, පො.යු. 33 පෙන්තකොස්ත දවසේ සිට, පේතෘස් විසින් මෙසේ කථා කරනු ලැබූ මහිමාන්විත වරප්‍රසාදවලට පංගුකාරයන් වූහ: “නුඹලා වනාහි තෝරාගත් වංශයක්ද රාජකීය පූජකයෝද ශුද්ධවූ ජාතියක්ද දෙවියන්වහන්සේ සන්තක සෙනගක්ද වන්නහුය.”—1 පේතෘස් 2:9ආ; යොහන් 8:32.
3 දෙවියන් වහන්සේ සතු විශේෂ සෙනඟක් වීම—මොනතරම් පුදුමාකාර ආශීර්වාදයක් ද! තව ද අද දින සිටින, දෙවියන් වහන්සේගේ මෙම ආලේප ලත් පුත්‍රයන්ගේ ඉතිරි කොටස, දෙවියන් වහන්සේගේ මෙම ආශීර්වාද ලත් තත්ත්වය භුක්ති විඳිති. එහෙත් එවන් උසස් වරප්‍රසාද සමඟ වගකීම ද පැමිණෙයි. පේතෘස් මෙසේ පවසන්නට ගත් කල, මේවායින් එකක් ගැන අවධානය යොමු කළේ ය: “අන්ධකාරයෙන් තමන්ගේ විස්මපත් ආලෝකයට නුඹලා කැඳවාගත් තැනන්වහන්සේගේ උත්කෘෂ්ටතාවන් [දැක්විය යුතුයි].”—1 පේතෘස් 2:9අ.
4. තම ක්‍රිස්තියානි නිදහස සමඟ පැමිණෙන වගකීම ආලේප ලත් ක්‍රිස්තියානින් ඉටුකර ඇත්තේ කෙසේ ද?
4 දෙවියන් වහන්සේගේ උත්කෘෂ්ඨතාවයන් ප්‍රකාශ කිරීමට තිබෙන මෙම වගකීම ආලේප ලත් ක්‍රිස්තියානින් විසින් ඉටුකර තිබේ ද? එසේ ය. වර්ෂ 1919 පටන් සිටි ආලේප ලත් අය සම්බන්ධයෙන් යෙසායා අනාවැකිමය ලෙස පැවසුවේ මෙසේ ය: “ස්වාමිවූ දෙවියන්වහන්සේගේ [පරමාධිපති ස්වාමිවූ යෙහෝවඃ වහන්සේගේ] ආත්මය මා කෙරෙහිය; මක්නිසාද දිළිඳුන්ට ශුභාරංචිය දේශනා කරන්ට ස්වාමීන්වහන්සේ [යෙහෝවඃ වහන්සේ NW ] මා ආලේපකළසේක; බිඳුණු සිත් [හදවත් NW ] ඇත්තන් සුව කරන්ටද, වහලුන්ට නිදහසත් හිරකාරයන්ට හිරගෙයින් මිදීමත් [පුළුල් ව දැකීමත් NW ] ප්‍රකාශකරන්ටද, ස්වාමීන්වහන්සේගේ [යෙහෝවඃ වහන්සේගේ NW ] කරුණාවේ අවුරුද්ද සහ අපේ දෙවියන්වහන්සේගේ පළිගැනීමේ දවසත් ප්‍රකාශකරන්ටද, . . . මා එවූසේක.” (යෙසායා 61:1-3) අද දින, ආලේප ලත් ඉතිරි කොටස, මෙම ශුද්ධ ලියවිලි පදය ප්‍රාථමික ව අදාළ වූ තැනැත්තාණන් වන යේසුස් වහන්සේගේ ආදර්ශය අනුගමනය කරන අතර, අන්‍යයන් හට නිදහසේ ශුභාරංචිය ජ්වලිත ව දේශනා කරමින් සිටිති.—මතෙව් 4:23-25; ලූක් 4:14-21.
5, 6. (අ) ආලේප ලත් ක්‍රිස්තියානින්ගේ උද්‍යෝගිමත් දේශනා කිරීමෙන් ප්‍රතිඵල වී ඇත්තේ කුමක් ද? (ආ) මහත් සමූහයේ අය භුක්ති විඳින්නේ කිනම් වරප්‍රසාදයන් සහ වගකීම් ද?
5 මෙම උද්‍යෝගිමත් දේශනා කිරීමේ ප්‍රතිඵලයක් වශයෙන්, මෙම අන්තිම දවස්වල, වෙනත් බැටළුවන්ගේ මහත් සමූහයක් ලෝක දර්ශනයේ පෙනෙන්ට සිටිති. යෙහෝවඃ වහන්සේට සේවය කිරීම සඳහා සියලු ජාතීන්ගෙන් පැමිණි මෙම අය, ආලේප ලත් අය හා සම්බන්ධ වී තිබෙන අතර, සත්‍යය විසින් මොවුන් ව ද නිදහස් කර තිබේ. (සෙකරියා 8:23; යොහන් 10:16) ආබ්‍රහම් මෙන්, ඔවුන් ව ද ඇදහිල්ලේ පදනම මත ධර්මිෂ්ඨ බවට ප්‍රකාශ කරනු ලබන අතර, යෙහෝවඃ දෙවියන් වහන්සේ සමඟ කිට්ටු සම්බන්ධතාවයකට පැමිණ සිටිති. රාහබ් මෙන් ඔවුන් ව ධර්මිෂ්ඨ බවට ප්‍රකාශ කරනු ලැබීම, ඔවුන් බේරී ජීවත්වීම සඳහා සුදුසු තත්ත්වයක සිටින බවට ඔප්පුවකි—ඔවුන් සම්බන්ධයෙන් නම්, මෙය අර්මගෙදොන්වලින් බේරී ජීවත්වීමයි. (යාකොබ් 2:23-25; එළිදරව් 16:14, 16) එහෙත් එවැනි උසස් වරප්‍රසාදයන් ලැබීම තුළ, දෙවියන් වහන්සේගේ මහිමතාවයන් ගැන අන්‍යයන්ට පැවසීමේ වගකීමට උර දීම ද ඇතුළත් වෙයි. ඔවුන් යෙහෝවඃ වහන්සේට ප්‍රසිද්ධියේ ප්‍රශංසා කරමින්, “ ‘සිංහාසනයෙහි වැඩහිඳින අපේ දෙවියන්වහන්සේටත් බැටළුපැටවාණන්ටත් ගැළවීම අයිතිය’ කියා මහත් ශබ්දයකින් [හඬගසනවා]” යොහන් දුටුවේ එබැවිනි.—එළිදරව් 7:9, 10, 14.
6 පසුගිය වසරේ, දැනට මිලියන හතරකට වඩා වැඩි සංඛ්‍යාවකින් සමන්විත මෙම මහත් සමූහය, ආලේප ලත් ක්‍රිස්තියානින්ගේ ඉතිරි කොටසේ කුඩා කණ්ඩායම සමඟ අත්වැල් බැඳගෙන, යෙහෝවඃ වහන්සේගේ උත්කෘෂ්ඨතාවයන් ප්‍රකාශ කිරීමෙහි පැය බිලියනයකට ආසන්න සංඛ්‍යාවක් වැය කොට තිබේ. මෙය, ඔවුන්ගේ ආත්මික නිදහස පාවිච්චි කළා වූ හොඳ ම ක්‍රමයයි.
“රජ්ජුරුවන්ට ගෞරව කරන්න”
7, 8. ක්‍රිස්තියානි නිදහසට ඇතුළත් වන්නේ, ලෞකික අධිකාරීන් කෙරෙහි වූ කිනම් වගකීමක් ද, මේ සම්බන්ධයෙන්, කිනම් වැරදි ආකල්පයෙන් අප වැළකිය යුතු ද?
7 අපගේ ක්‍රිස්තියානි නිදහස නිසා වෙනත් වගකීම්වලට උර දෙන්නට ද අපට සිදුවේ. පේතෘස් මෙසේ ලියන විට ඒවා සමහරකට හුවා දැක්වී ය: “සියල්ලන්ටම [සියලු ආකාර මිනිසුනට NW ] ගෞරවකරපල්ලා. සහෝදර සමාගමට ප්‍රේමකරපල්ලා. දෙවියන්වහන්සේට භයවෙයල්ලා. රජ්ජුරුවන්ට ගෞරවකරපල්ලා.” (1 පේතෘස් 2:17) “රජ්ජුරුවන්ට ගෞරව කරපල්ලා” යන ප්‍රකාශයෙන් අදහස් කරන්නේ කුමක් ද?
8 “රජ්ජුරුවන්” නියෝජනය කරන්නේ ලෞකික පාලකයන් ය. අධිකාරිත්වයට අගෞරව කිරීමේ ස්වභාවයක් අද දින ලෝකයේ ගොඩ නැගී තිබෙන අතර, මෙය ක්‍රිස්තියානින් හට පහසුවෙන් බලපෑම් ඇති කළ හැකි ය. “මුළු ලෝකය නපුරාගේ බලය තුළ පවතින” නිසා, “රජ්ජුරුවන්” හට ගෞරව කළ යුත්තේ මන්දැයි ක්‍රිස්තියානිවරයෙකු කල්පනා කරනවා විය හැකි ය. (1 යොහන් 5:19, NW) මෙම වචන හේතුවෙන්, අපහසු නීතිවලට අකීකරු වීමට සහ හැකි නම් බදු නොගෙවා සිටීමට ඔහුට හැඟී යනවා විය හැකි ය. එහෙත් මෙය යේසුස් වහන්සේ ප්‍රකාශ කළ, “කායිසර්ගේ දේ කායිසර්ටත් . . . දීපල්ලා” යන පැහැදිලි නියෝගයට එරෙහි ව යාමකි. මින් සිදු වනු ඇත්තේ, ‘ඔහුගේ නිදහස නපුර වසා ගැනීමට මඟක් ලෙස පාවිච්චි කිරීමයි.’—මතෙව් 22:21; 1 පේතෘස් 2:16.
9. ලෞකික අධිකාරිත්වයට කීකරු වීමට තිබෙන හේතු දෙකක් සඳහන් කළ හැකි ද?
9 අධිකාරිත්වයට ගෞරව කර, සාපේක්ෂ වශයෙන් වුවද එයට යටත්වීමට ක්‍රිස්තියානිහු බැඳී සිටිති. (ක්‍රියා 5:29) මන්ද? පළමුවෙනි පේතෘස් 2:13 හි, “නපුර කරන්නන්ට දඬුවම පිණිසත් යහපත කරන්නන්ට ප්‍රශංසාව පිණිසත්” ආණ්ඩුකාරයන් ව “[දෙවියන් වහන්සේ] විසින් එවනලද්දාවූ” අය බවත් පවසන විට, පේතෘස් හේතු තුනක් පෙන්වයි. දඬුවමට භය වීම අධිකාරිත්වයට කීකරු වීමට ප්‍රමාණවත් හේතුවකි. පහර දීමක්, සොරකම් කිරීමක්, හෝ යම් වෙනත් අපරාධයක් සම්බන්ධයෙන් යෙහෝවඃ වහන්සේගේ සාක්ෂිකරුවෙකුට දඩ ගැසීම හෝ සිරගත කරනු ලැබීම මොනතරම් පිළිකුල් සහගත අවමානයක් ද! සමහරුන් මොනතරම් සතුටින් එවැන්නක් ප්‍රචාරය කරාවිදැයි සිතා බලන්න! අනෙක් අතට, රටේ නීතියට කීකරු වීම සම්බන්ධයෙන් අප හොඳ නාමයක් ගොඩ නඟනවාත් සමඟ ම, සාධරණ ව කල්පනා කරන පාලකයන්ගෙන් අපි ප්‍රශංසාව ලබන්නෙමු. ශුභාරංචිය දේශනා කිරීමේ අපගේ වැඩය කරගෙන යාමට අපට වඩාත් නිදහසක් දෙනු ලබනවා විය හැකි ය. එපමණක් ද නොව, ‘යහපත කිරීමෙන් අසාධාරණ මිනිසුන්ගේ අඥාන කටවල් අපි වසා දමන්නෙමු.’ (1 පේතෘස් 2:15) අධිකාරිත්වයට කීකරු වීමට මෙය දෙවෙනි හේතුවක් වෙයි.—රෝම 13:3.
10. ලෞකික අධිකාරීන්ට කීකරුකම දැක්විය යුතු ප්‍රබලතම හේතුව කුමක් ද?
10 එහෙත් වඩාත් ප්‍රබල හේතුවක් තිබේ. මෙම අධිකාරීන් පවතින්නේ යෙහෝවඃ වහන්සේගේ අවසරය පිට ය. පේතෘස් පවසන්නාක් මෙන්, දේශපාලන පාලකයන්, යෙහෝවඃ වහන්සේ විසින් “එවන ලද” අතර, ක්‍රිස්තියානින් ඔවුන් හට යටත්වීම “දෙවියන්වහන්සේගේ කැමැත්තය.” (1 පේතෘස් 2:15ආ) මීට සමාන ව, ප්‍රේරිත පාවුල් මෙසේ පවසයි: “පවතින අධිකාරීන් ව සිය සාපේක්ෂ ස්ථානවල සිටීමට තබා ඇත්තේ දෙවියන් වහන්සේ විසින් ය.” මෙබැවින්, අධිකාරීන්ට කීකරු වීමට බයිබලය මගින් පුහුණු කරන ලද අපගේ හෘදය සාක්ෂිය අප ව පොලඹවයි. ඔවුන් හට අප ව ම යටත් කරවා ගැනීම අපි ප්‍රතික්ෂේප කරන්නෙමු නම්, අප, “ස්ථාවරයක් ගෙන තිබෙන්නේ දෙවියන් වහන්සේගේ විධිවිධානයට එරෙහිව ය.” (රෝම 13:1, 2, 5, NW ) දෙවියන් වහන්සේගේ විධිවිධානයට එරෙහි ව හිතාමතා ම ස්ථාවරයක් ගැනීමට අපගෙන් වුවමනා වන්නේ කාට ද? එය ක්‍රිස්තියානි නිදහස මොනතරම් වැරදි ලෙස පාවිච්චි කිරීමක් වනු ඇත් ද!
‘සහෝදරයන් කෙරෙහි ප්‍රේමය ඇතුව සිටින්න’
11, 12. (අ) අපගේ ක්‍රිස්තියානි නිදහස සමඟ සෙසු ඇදහිලිවන්තයන් වෙත අප හට පැමිණෙන වගකීම කුමක් ද? (ආ) විශේෂයෙන් ම අපගේ ප්‍රේමනීය සැලකිල්ල ලැබිය යුත්තේ කවුද, ඒ මන්ද?
11 ක්‍රිස්තියානින්, මුළු “සහෝදර සමාගමට ප්‍රේම” කළ යුතු බව ද පේතෘස් පැවසුවේ ය. (1 පේතෘස් 2:17) මෙය ක්‍රිස්තියානි නිදහස සමඟ පැමිණෙන තවත් වගකීමකි. අපගෙන් බොහෝ දෙනෙක් සභාවකට අයත් වෙති. සැබවින් ම, අප සියලු දෙනා ම අයත් වන්නේ සහෝදරයන්ගෙන් සමන්විත ජාත්‍යන්තර සංගමයකට ය, නැතහොත් සංවිධානයකට ය. මේ අය කෙරෙහි අපගේ ප්‍රේමය පෙන්වීම අපගේ නිදහස ඥානවන්ත ව පාවිච්චි කිරීමක් වෙයි.—යොහන් 15:12, 13.
12 අපගේ ප්‍රේමය විශේෂයෙන් ම ලැබීමට වටිනා ක්‍රිස්තියානි කණ්ඩායමක් ප්‍රේරිත පාවුල් විශේෂ කොට හුවා දැක්වී ය. ඔහු මෙසේ පැවසුවේ ය: “නුඹලාගේ ප්‍රධානියෝ [ඔබ අතරේ පෙරමුණ ගන්නා අය NW ] ගණන්දෙන්ට සිටින්නන් මෙන් නුඹලාගේ ආත්ම ගැන රැකබලා සිටිති. ඔවුන් සුසුම්ලමින් එසේ කළොත් නුඹලාට අලාභ බැවින්, සුසුම්ලමින් නොව ප්‍රීතියෙන් එසේ කරන පිණිස ඔවුන්ට කීකරුව යටත්වෙයල්ලා.” (හෙබ්‍රෙව් 13:17) සභාවේ පෙරමුණ ගන්නා අය නම් වැඩිමහල්ලන් ය. මෙම පුරුෂයන් පරිපූර්ණ නොවන බව සැබෑවකි. එහෙත්, ඔවුන් ව පත් කොට තිබෙන්නේ පාලක මණ්ඩලයේ අධීක්ෂණය යටතේ ය. ඔවුන් සැලකිල්ලෙන් යුතු ව ආදර්ශයෙන් පෙරමුණ ගන්නා අතර, අපගේ ආත්ම ගැන රැකබලා ගැනීම ඔවුන් හට පවරා තිබේ. මොනතරම් බරපතළ පැවරුමක් ද! (හෙබ්‍රෙව් 13:7) බොහොමයක් සභාවන්හි කදිම, සහයෝගිතාවයේ ස්වභාවයක් තිබීම සන්තෝෂයට කරුණකි, තව ද ඔවුන් සමඟ වැඩ කිරීම වැඩිමහල්ලන් හට ප්‍රීතියකි. පුද්ගලයන් සහයෝගය දැක්වීමට අකමැති වන විට, එය වඩාත් අසීරු ය. වැඩිමහල්ලා තවදුරටත් තමන්ගේ වැඩය කරගෙන යයි, නමුත් පාවුල් පවසන්නාක් මෙන්, ඔහු එය කරන්නේ, “සුසුම්ලමිනි.” ස්ථිර ව ම, වැඩිමහල්ලන් සුසුම්ලන තත්ත්වයකට පත් කිරීමට අපට වුවමනා නොවේ! ඔවුන්ගේ වැඩවල දී ඔවුන් ප්‍රීතිය ලැබීමට අපට වුවමනා ය, අප ව නංවාලීමට ඔවුන්ට හැක්කේ එවිට ය.
13. වැඩිමහල්ලන්ට සහයෝගය දැක්විය හැකි සමහරක් ක්‍රම මොනවා ද?
13 වැඩිමහල්ලන් වෙත සහයෝගය දැක්විය හැකි සමහරක් මාර්ග මොනවා ද? එක ක්‍රමයක් නම්, රාජ්‍යය ශාලාව හොඳින් නඩත්තු කර, පිරිසිදු ව තබා ගැනීමට උපකාර කිරීම ය. තවත් දෙයක් නම්, අසනීපවූවන් බැහැදකින්නට යාමේ දී, හා ආබාධිතයන්ට උපකාර කිරීමේ දී, සහයෝගය දැක්වීම ය. යළිත් කිවයුතු දෙයක් නම්, ඔවුන්ට බරක් බවට පත් නොවීම සඳහා අප ආත්මික ව ශක්තිමත් ව සිටින්නට උත්සාහ කිරීමයි. සහයෝගය දැක්වීමට තිබෙන වැදගත් පැත්තක් නම්, අපගේ ම හැසිරීමෙන් හා අපගේ අවධානයට හසුවන්නා වූ යම් බරපතළ පාපයන් ගැන වාර්තා කිරීමෙන්, සභාවේ සදාචාරමය හා ආත්මික පිරිසිදුකම පවත්වා ගැනීම ය.
14. වැඩිමහල්ලන් විසින් ගනු ලබන හික්මවීමේ ක්‍රියා මාර්ගයන්ට අප සහයෝගය දැක්විය යුත්තේ ඇයි?
14 සමහර අවස්ථාවන්හි දී, සභාව පවිත්‍ර ව තබා ගැනීම සඳහා, පසුතැවිලි නොවන වැරදිකරුවෙකු ව සභා ඇසුරෙන් කපා හැරීමට වැඩිමහල්ලන්ට සිදුවේ. (1 කොරින්ති 5:1-5) මින් සභාව ආරක්ෂා වෙයි. එය වැරදිකරුවාට ද උපකාරවත් විය හැකි ය. එවන් හික්මවීමක් මගින් වැරදිකරුවා ව ඔහුගේ හොඳ සිහියට පැමිණ වීමට බොහෝ විට උපකාරවත් වී තිබේ. එනමුත්, සභා ඇසුරෙන් කපා හැර දමනු ලැබූ තැනැත්තා සමීප මිතුරෙකු හෝ කිට්ටු ඥාතියෙකු නම් තත්ත්වය කුමක් ද? මෙම පුද්ගලයා, අපගේ පියා හෝ මව හෝ අපගේ පුතා හෝ දුව යයි සිතන්න. එසේ වුවත්, වැඩිමහල්ලන් විසින් ගනු ලැබූ ක්‍රියා මාර්ගයට අපි ගෞරවය දක්වන්නෙමු ද? එය දුෂ්කර දෙයක් විය හැකි බව සැබෑ ය. නමුත් වැඩිමහල්ලන්ගේ තීරණය ගැන ප්‍රශ්න කොට, සභාවට දූෂිත බලපෑමක් ඇති කළ බවට ඔප්පු වී ඇති යමෙකු සමඟ ආත්මික වශයෙන් දිගට ම ආශ්‍රය කිරීම අපගේ නිදහස මොනතරම් වැරදි ලෙස පාවිච්චි කිරීමක් වනු ඇත් ද! (2 යොහන් 10, 11) එවැනි කාරණාවල දී සහයෝගය දක්වන ආකාරය නිසා, සමස්තයක් වශයෙන් යෙහෝවඃ වහන්සේගේ ජනයා ප්‍රශංසා කටයුතු ය. ප්‍රතිඵලයක් වශයෙන්, යෙහෝවඃ වහන්සේගේ සංවිධානය, මේ අපිරිසිදු ලෝකය තුළ කිලිටි නොවී සිටියි.—යාකොබ් 1:27.
15. යම් පුද්ගලයෙක් බරපතළ පාපයක් කරයි නම්, ඔහු ඉක්මනින් ම කුමක් කළ යුතු ද?
15 අපි බරපතළ පාපයක් කරමු නම් කුමක් ද? යෙහෝවඃ වහන්සේගේ ප්‍රසාදය ඇත්තා වූ අය ගැන දාවිත් රජ විස්තර කළේ මෙසේ පවසන විට ය: “ස්වාමීන්ගේ [යෙහෝවඃ වහන්සේගේ NW ] කන්දට නගින්නේ කවුද? උන්වහන්සේගේ ශුද්ධස්ථානයෙහි සිටින්නේ කවුද? පවිත්‍ර අත් සහ පිරිසිදු සිතක් [හදවතක් NW ] ඇත්තාවූ, [මාගේ] ආතම්ය නිෂ්ඵලකමට යොමු නොකළාවූ වංචාවෙන් නොදිළාවූ තැනැත්තේමය.” (ගීතාවලිය 24:3, 4) යම් හේතුවක් නිසා අපි තවදුරටත්, ‘අහිංසක අත්වලින් හා පිරිසිදු හදවතකින්’ නොසිටින්නෙමු නම්, අප ඉතා ඉක්මනින් ක්‍රියාත්මක විය යුතු ය. අපගේ සදාකාල ජීවනය තිබෙන්නේ අනතුරකයි.
16, 17. බරපතළ පාපයකට වරදකරුවෙකු වී සිටින කෙනෙක්, එම කාරණය තමා විසින් ම විසඳා නොගත යුත්තේ ඇයි?
16 ‘මම යෙහෝවඃ වහන්සේට වරද ගැන කියා, පසුතැවිලි වී තිබෙනවා, ඉතින් වැඩිමහල්ලන් ව මෙයට ගාව ගන්නේ ඇයි?’ යනුවෙන් සමහරවිට සිතමින්, බරපතළ වැරදි සඟවා ගැනීමේ පරීක්ෂාවට ඇතමුන් හසුවී තිබේ. වැඩිමහල්ලන් කුමක් කරනු ඇති ද කියා වැරදිකරුවා ව්‍යාකූලත්වයට හෝ බියට පත් ව සිටිනවා වෙන්නට පුළුවන. කෙසේ වුවද, අපගේ පාප පිරිසිදු කිරීමට හැක්කේ යෙහෝවඃ වහන්සේට පමණක් වුවත්, සභාවේ නිර්මලත්වය සඳහා උන් වහන්සේ මූලික වශයෙන් වැඩිමහල්ලන් ව වගකිව යුත්තන් කර තිබෙන බව ඔහු මතක තබා ගත යුතු ය. (ගීතාවලිය 51:2) ඔවුන් එහි සිටින්නේ, සුව කිරීමට ය, “ශුද්ධ අය ව යළි සකස් කිරීම” සඳහා ය. (එපීස 4:12, NW ) අපට ආත්මික උපකාර අවශ්‍ය වූ විට, ඔවුන් වෙතට නොයාම, හරියට, අප අසනීප වී සිටින විට වෛද්‍යවරයෙකු වෙතට නොයාම හා සමාන ය.
17 කාරණා තනි ව ම හැසිර වීමට උත්සාහ කරන සමහරුන්ට, මාස හෝ අවුරුදු ගණනකට පසු ව, දැනෙන්නේ, ඔවුන්ගේ හෘදය සාක්ෂිය තවමත් ඔවුන්ට තද බල ලෙස කරදර කරන බවයි. මීටත් වඩා තිබෙන දරුණු ම දේ නම්, බරපතළ වරදක් සැඟවීමට උත්සාහ කරන තවත් අය, දෙවැනි වරට, සමහරවිට තුන් වෙනි වරට පාපයට වැටීමයි. අවසානයේ දී, මෙම කාරණය වැඩිමහල්ලන්ගේ අවධානයට හසු වන විට, එය වරද නැවත නැවත කිරීම හා සම්බන්ධ කාරණයක් වී තිබේ. යාකොබ්ගේ උපදේශය පිළිපැදීම මොනතරම් හොඳ ද! ඔහු මෙසේ ලීවේ ය: “නුඹලා අතරෙහි යමෙක් රෝගාතුරව සිටින්නේද? ඔහු සභාවේ වැඩිමහල්ලන්ට හඬගසාවා; ඔව්හු ස්වාමීන්වහන්සේගේ [යෙහෝවඃ වහන්සේගේ NW ] නාමයෙන් ඔහුට තෙල් ආලේප කොට, ඔහු උදෙසා යාච්ඤාකරත්වා.” (යාකොබ් 5:14) සුව වීම සඳහා එය තවමත් කාලය ව තිබෙන විට, වැඩිමහල්ලන් වෙතට යන්න. අපි තවත් බල බලා සිටින්නෙමු නම්, අප පාපතර ක්‍රියා මාර්ගයේ දැඩි විය හැකියි.—දේශනාකාරයා 3:3; යෙසායා 32:1, 2.
පෙනුම සහ විනෝදය
18, 19. එක් පූජකවරයෙක්, යෙහෝවඃ වහන්සේගේ සාක්ෂිකරුවන් ගැන ප්‍රසාදයෙන් යුතු ව කථා කළේ ඇයි?
18 වසර පහකට පෙර, ඉතාලියේ එක් කතෝලික පූජකවරයෙක්, යෙහෝවඃ වහන්සේගේ සාක්ෂිකරුවන් ගැන මීසමේ සඟරාවක උණුසුම් අන්දමින් ප්‍රකාශනයක් කළේ ය.a ඔහු මෙසේ පැවසුවේ ය: “පුද්ගලික ව මා යෙහෝවඃ වහන්සේගේ සාක්ෂිකරුවන්ට කැමතියි; . . . මා දන්නා අය ඉතා ශිෂ්ටසම්පන්න, මෘදු ලෙස කථාකරන . . . [සහ] අතිශයින් ඒත්තුගන්වන සුලු අය බව මා අවංක ව පිළිගන්නවා. සත්‍යයට පිළිගත හැකි ඉදිරිපත් කිරීමක් අවශ්‍ය බව අප වටහා ගනු ඇත්තේ කවදා ද? සත්‍යය ප්‍රචාරය කරන අය, උදාසීන වූ, දුඟඳ හමන්නා වූ, අවුල් වූ හිසකෙස් ඇත්තා වූ, පිළිවෙළක් නැති අය නොවිය යුතු බව අප වටහා ගනු ඇත්තේ කවදා ද?”
19 මෙම වචනවලින් පැවසෙන පරිදි, වෙනත් දේවල් අතර, මෙම පූජකවරයාගේ සිත් ගත්තේ, සාක්ෂිකරුවන් ඇඳ පැළඳ ගෙන සිටි ආකාරය සහ ඔවුන් තමන් ව ම ඉදිරිපත් කළ ආකාරයයි. ඔහුට හමු වූ අය, වසර ගණනාවක් පුරා, “විශ්වාසවූ නුවණ ඇති දාසයා” විසින් දෙනු ලැබූ උපදෙස්වලට සවන් දී සිටි අයයි. (මතෙව් 24:45) ස්ත්‍රියක් ‘විනීත භාවයෙන් යුක්තව ඔබින වස්ත්‍රවලින්’ සැරසී සිටිය යුතු බව බයිබලය පවසයි. (1 තිමෝති 2:9) පරිහානියකට ලක් ව තිබෙන මෙම කාලයේ දී, එම උපදෙස පුරුෂයන්ට ද අවශ්‍ය ය. දෙවියන් වහන්සේගේ රාජ්‍යය නියෝජනය කරන්නන් විනීත ලෙස පිටත සිටින අය ඉදිරියෙහි තමන් ව ම ඉදිරිපත් කිරීම තර්කානුකූල නොවේ ද?
20. ක්‍රිස්තියානිවරයෙක් තමාගේ ඇඳුම් පැළඳුම් පිළිබඳ ව සෑම අවස්ථාවක දී ම සාවධාන ව සිටිය යුත්තේ ඇයි?
20 රැස්වීම්වල දී, සහ ක්ෂේත්‍ර සේවයේ දී, තමන් ඇඳ පළඳින ආකාරය ගැන ප්‍රවේසම් විය යුතු යයි ඇතමෙක් එකඟ වනවා විය හැක, නමුත් වෙනත් වේලාවන්හි දී බයිබල් ප්‍රතිපත්ති අදාළ නොවන බව ඔවුන්ට හැඟී යා හැකි ය. එනමුත්, අප දෙවියන් වහන්සේගේ රාජ්‍යයේ නියෝජිතයන් මෙන් පෙනී සිටීමෙන් අපි කිසිවිටෙකත් නවතින්නෙමු ද? ඇත්ත ය, තත්ත්වයන් වෙනස් වෙයි. අපි රාජ්‍යය ශාලාවක් ගොඩනැගීමට උපකාර කරමින් සිටින්නෙමු නම්, අප එම රාජ්‍යය ශාලාවේ ම රැස්වීමකට පැමිණෙන විට ඇඳ පැළඳගෙන සිටින ආකාරයට වඩා වෙනස් ආකාරයකට ඇඳ පැළඳ සිටිනු ඇත. අප විවේක සුවය ලබන විට, පෙනෙන ලෙස, අප ඇඳගෙන සිටින්නේ වඩාත් නිස්කලංක ආකාරයකට ය. නමුත් අප අන්‍යයන් විසින් දකිනු ලබන මොනයම් වේලාවක දී වුවත්, අපගේ ඇඳුම් හොඳ පිළිවෙළකින් යුත් විනීත ඇඳුම් විය යුතුයි.
21, 22. හානිකර විනෝදාංශවලින් අප ව ආරක්ෂා කරනු ලැබ තිබෙන්නේ කෙසේ ද, එවන් කාරණා සම්බන්ධයෙන් දෙනු ලබන උපදෙස් දෙස අප බැලිය යුත්තේ කෙසේ ද?
21 වඩාත් අවධානයක් ලැබී තිබෙන තවත් පැත්තක් නම්, විනෝදයයි. මිනිසුන්ට—විශේෂයෙන් යෞවන අයට—විනෝදය අවශ්‍ය ය. පවුලේ අයගේ විනෝදය සඳහා කාලය මිඩංගු කිරීම පාපයක් වත් කාලය නාස්ති කිරීමක් වත් නොවේ. යේසුස් වහන්සේ පවා උන් වහන්සේගේ ගෝලයන්ට “ටිකක් පහසු ගනිල්ලා” කියා ආරාධනා කළ සේක. (මාර්ක් 6:31) එහෙත් විනෝද වීම, ආත්මික කෙලෙසීමකට දොර විවෘත නොකරන බවට ප්‍රවේසම් වන්න. අප ජීවත් වන්නේ, විනෝදාංශ මගින් ලිංගික දුරාචාරය, බලවත් ප්‍රචණ්ඩතාවය, ත්‍රාසය, සහ භූත විද්‍යාවේ ක්‍රියා හුවා දක්වන ලෝකයක ය. (2 තිමෝති 3:3; එළිදරව් 22:15) විශ්වාස වූ නුවණ ඇති දාසයා එවන් අන්තරායන් ගැන සුපරීක්ෂාවෙන් සිටින අතර, ඒවා ගැන නිරතුරු ව ම අනතුරු අඟවයි. මෙම සිහිගැන්වීම් ඔබගේ නිදහසේ අයිතිය පැහැර ගැනීමක් යයි ඔබට හැඟෙනවා ද? නොඑසේනම්, එවන් අන්තරායන් ගැන නිරතුරු ව ම ඔබගේ අවධානයට යොමු කරවීම මගින් යෙහෝවඃ වහන්සේගේ සංවිධානය ඔබ ගැන එතරම් ම සැලකිලිමත්වීම ගැන ඔබ කෘතඥ වෙනවා ද?—ගීතාවලිය 19:7; 119:95.
22 අපගේ නිදහස පැමිණෙන්නේ යෙහෝවඃ වහන්සේ තුළින් බව කිසිවිටෙකත් අමතක නොකරන්න. අප එය පාවිච්චි කරන ආකාරය ගැන අපි වගකිව යුතු වෙමු. අපි යහපත් උපදෙස් නොසලකා හැර වැරදි තීරණ ගන්නෙමු නම්, වෙන කිසිවෙකුට වරද පටවන්නට අපට නොහැක. ප්‍රේරිත පාවුල් පවසන්නේ: “අප එක් එක්කෙනා තම තමා ගැන දෙවියන්වහන්සේට ගණන්දෙනවා ඇත” යනුවෙනි.—රෝම 14:12; හෙබ්‍රෙව් 4:13.
දෙවියන් වහන්සේගේ පුත්‍රයන්ගේ නිදහස කෙරෙහි බලා සිටින්න
23. (අ) අප දැන් භුක්ති විඳින නිදහස සම්බන්ධයෙන් තිබෙන ආශීර්වාදයන් මොනවා ද? (ආ) අප ඉතා උනන්දුවෙන් බලා සිටින්නේ කිනම් ආශීර්වාදයන් ද?
23 ඇත්ත වශයෙන් ම, අපි ආශීර්වාද ලත් සෙනඟක් වෙමු. අප බොරු ආගමෙන් සහ මිථ්‍යා විශ්වාසවලින් නිදහස් ය. මිදීමේ මිලයේ පූජාවට ස්තුති වන්නට, පිරිසිදු කරනු ලැබූ හෘදය සාක්ෂියකින් යුතු ව අපට යෙහෝවඃ වහන්සේ වෙතට එළැඹිය හැක. පාපයේ සහ මරණයේ වහල්කමින් ආත්මික අයුරකින් නිදහස් ව සිටිමු. තව ද, “දෙවියන්වහන්සේගේ පුත්‍රයන්ගේ එළිදරව්වීම” ඉතා ඉක්මනින් පැමිණෙනු ඇත. අර්මගෙදොන් හි දී, යේසුස් වහන්සේගේ සහෝදරයෝ, යෙහෝවඃ වහන්සේගේ සතුරන් ව විනාශ කරන්නන් ලෙස තමන්ගේ ස්වර්ගීය මහිමයෙන් යුතු ව මිනිසුන් හට එළිදරව් වෙනවා ඇත. (රෝම 8:19; 2 තෙසලෝනික 1:6-8; එළිදරව් 2:26, 27) ඉන් පසු ව, දෙවියන් වහන්සේගේ මෙම පුත්‍රයන්, ස්වකීය සිංහාසනයේ සිට මිනිස් වර්ගයා වෙත ආශීර්වාද ගලා එන මාධ්‍යයන් වශයෙන් එළිදරව් වනවා ඇත. (එළිදරව් 22:1-5) අවසානයේ දී, දෙවියන් වහන්සේගේ මෙම පුත්‍රයන්ගේ එළිදරව් වීම, තමන් වහන්සේගේ දරුවන්ගේ නිදහස්කමේ මහිමය සමඟ ඇදහිලිවන්ත මිනිස් වර්ගයා හට ආශීර්වාදයක් වීමට හේතු වනු ඇත. එම කාලය එන තෙක් ඔබ ආශාවෙන් බලා සිටින්නෙහි ද? එසේ නම්, ඔබගේ ක්‍රිස්තියානි නිදහස ඥානවන්ත ව පාවිච්චි කරන්න. දැන් දෙවියන් වහන්සේට වහල්කම් කරන්න, සදාකාලයෙන් සදාකාලය දක්වා ඔබ එම පුදුමාකාර නිදහස භුක්ති විඳිනවා නොඅනුමාන ය! w92 6/1
[පාදසටහන්වල]
a මෙම පූජකවරයා පසු ව මෙම ප්‍රසාදාත්මක ප්‍රකාශනය ඉල්ලා අස්කර ගත්තේ ය, පෙනෙන ලෙස පීඩනය යටතේ ය.
විශේෂයෙන් වැඩිමහල්ලෝ අපගේ ප්‍රේමය සහ සහයෝගය ලැබීමට වටින්නෝ ය
ක්‍රිස්තියානිවරයෙකුගේ ඇඳුම් පැළඳුම්, හොඳ පිළිවෙළකින් යුත්, විනීත, අවස්ථාවට ගැලපෙන සේ තිබිය යුතුයි
පුනරීක්ෂණ පෙට්ටිය
◻ ආලේප ලත් අය හා වෙනත් බැටළුවන් යෙහෝවඃ වහන්සේ ව මහිමවත් කර තිබෙන්නේ කෙසේ ද?
◻ ක්‍රිස්තියානින් ලෞකික අධිකාරිත්වයට ගෞරව කළ යුත්තේ ඇයි?
◻ ක්‍රිස්තියානිවරයෙකුට වැඩිමහල්ලන් සමඟ සහයෝගයෙන් කටයුතු කළ හැක්කේ කිනම් ආකාරවලින් ද?
◻ ඇඳුම් පැළඳුම් සම්බන්ධයෙන්, යෙහෝවඃ වහන්සේගේ සාක්ෂිකරුවන්, ලෝකයේ සිටින බොහෝ දෙනෙකුගෙන් වෙනස් අය වශයෙන් කැපී පෙනෙන්නේ මන්ද?
◻ විනෝදාංශ සම්බන්ධයෙන් අප වැළකිය යුත්තේ කුමකින් ද?