අපගේ උත්තරීතර මැවුම්කරුවාණන් සමඟ එඬේරකම් කිරීම

“ස්වාමීන්වහන්සේ [යෙහෝවඃ වහන්සේ NW] මාගේ එඬේරාය; මට හිඟයක් නොවන්නේය. උන්වහන්සේ මාගේ ආත්මය ප්‍රාණවත්කරනසේක. ස්වකීය නාමය නිසා ධර්මිෂ්ඨකමේ මාවත්වල මා ගෙනයනසේක.”—ගීතාවලිය 23:1, 3.

1. යෙහෝවඃ වහන්සේ සපයන ප්‍රේමනීය නැවුම් බව කුමක් ද?

විසි තුන්වෙනි ගීතිකාව, එනම් “දාවිත්ගේ ගීතය,” විඩාවට පත් වූ බොහෝ ආත්මයන්ට නැවුම්බවක් ගෙන දී තිබේ. එය, 6 වෙනි පදයේ ප්‍රකාශ කොට ඇති නිසැකකම ඇතුව සිටීමට දිරිගන්වා ඇත: “සැබවින් යහපත්කමත් කරුණවත් [ප්‍රේමනීය කරුණාවත් NW] මාගේ ජීවිතයේ සියලු දවස්වල මා අනුව එන්නේය. මම සදාකල්ම ස්වාමින්ගේ [යෙහෝවඃ වහන්සේගේ NW] ගෘහයෙහි වාසය කරන්නෙමි.” පොළොවේ සියලු ජාතීන්ගෙන් දැන් එක්රැස් කරනු ලබන, යෙහෝවඃ වහන්සේගේ සෙනඟ සමඟ එක්සත් වී, උන් වහන්සේගේ නමස්කාර ගෘහයේ සියලු කාලවලට ම වාසය කිරීම, ඔබගේ ආශාව වී තිබේ ද? “නුඹලාගේ ආත්මවල එඬේරාද රැකවලාද [අවේක්ෂක ද NW]” වන, අපගේ උත්තරීතර මැවුම්කරුවාණන්, යෙහෝවඃ දෙවියන් වහන්සේ, එම ඉලක්කය අත්කර ගැනීම සඳහා ඔබට උපකාර කරනවා ඇත.—1 පේතෘස් 2:25.

2, 3. (අ) යෙහෝවඃ වහන්සේ ස්වකීය ජනයා කෙරෙහි ප්‍රේමනීය ලෙස එඬේරකම් කරන්නේ කෙසේ ද? (ආ) යෙහෝවඃ වහන්සේගේ “රැළ” චමත්කාරජනක ලෙස වැඩි වී තිබෙන්නේ කෙසේ ද?

² ‘අලුත් අහසේ ද අලුත් පොළොවක ද’ මැවුම්කරුවාණන් වහන්සේ, “දෙවියන්වහන්සේගේ ගෘහයෙහි” එනම්, ක්‍රිස්තියානි සංවිධානයේ සංවිධායක සහ උතුම් අවේක්ෂකයාණන් වන සේක. (2 පේතෘස් 3:13; 1 තිමෝති 3:15) යෙසායා 40:10, 11 හි පැහැදිලි ව පවසන්නාක් මෙන්, උන් වහන්සේ ස්වකීය ජනයා කෙරෙහි එඬේරකම් කිරීමට ගැඹුරු උනන්දුවක් දක්වන සේක: “බලව, [පරමාධිපති NW] ස්වාමිවූ දෙවියන්වහන්සේ [යෙහෝවඃ වහන්සේ NW] බලවන්තයෙකු මෙන් එනසේක. [බලව NW] උන්වහන්සේගේ හස්තයද උන්වහන්සේ උදෙසා ආණ්ඩුකරන්නේය. උන්වහන්සේගේ බැළය [විපාකය NW]; උන්වහන්සේ සමගය; උන්වහන්සේගේ විපාකය උන්වහන්සේ ඉදිරියේය. [උන් වහන්සේගේ ගෙවන කුලිය උන් වහන්සේ ඉදිරියේ ය NW] එඬේරෙකු මෙන් උන්වහන්සේ තමන්ගේ රැළ පෝෂ්‍ය කරනසේක, බැටළුපැටවුන්ද තමන්ගේ හස්තයෙන් රැගෙන, තමන්ගේ ළයේ [තුරුල්ලේ NW] දරමින්, කිරිදෙන බැටළුදෙනුන් හෙමින් [සැලකිලිමත් ව NW] ගෙනයනසේක.”

³ පුළුල් අර්ථයකින් ගත් කල, ක්‍රිස්තියානි සත්‍යතාවය තුළ බොහෝ කලක් තිස්සේ ගමන් කර ඇති අය සහ මෑත කාලවල දී එකතු කරනු ලැබූ—එනම්, අප්‍රිකාවේ සහ නැගෙනහිර යුරෝපයේ දැන් බව්තීස්මය ලබමින් සිටින—“බැටළුපැටවුන්,” මෙම “රැළ” තුළට ඇතුළත් වෙත්. යෙහෝවඃ වහන්සේගේ ශක්තිමත්, ආරක්ෂිත හස්තය ඔවුන් ව ස්වකීය තුරුලට එක්රැස් කරයි. ඔවුහු මංමුළාවී ගිය බැටළුවන් වී සිටිය ද, දැන් තමන්ගේ ප්‍රේමභරිත දෙවියන් වහන්සේ සහ එඬේරාණන් සමඟ සමීප සම්බන්ධතාවයකට පැමිණ සිටිත්.

යෙහෝවඃ වහන්සේගේ සහකාර එඬේරාණෝ

4, 5. (අ) “මාහැඟි එඬේරාණන්” කවුද, අනාවැකි උන් වහන්සේ වෙත යොමු දැක්වූයේ කෙසේ ද? (ආ) යේසුස් වහන්සේ අධීක්ෂණය කරමින් සිටින වෙන් කිරීමේ වැඩය කුමක් ද, කුමන කැපී පෙනෙන ප්‍රතිඵල සහිත ව ද?

⁴ ස්වර්ගයේ, සිය පියාණන්ගේ දකුණු පැත්තේ සේවය කරන, “මාහැඟි එඬේරාණන්” වූ යේසුස් ක්‍රිස්තුස් වහන්සේ ද, “බැටළුවන්ට” දයානුකම්පිත අවධානය යොමු කරන සේක. උන් වහන්සේ පළමු ව ආලේප ලත් අයගේ “කුඩා රැළේ” ප්‍රයෝජනය සඳහා ද ඊළඟට අද දින සිය “වෙනත් බැටළුවන්” හට අයත් මහත් සමූහය සඳහා ද සිය ජීවිතය දුන් සේක. (ලූක් 12:32; යොහන් 10:14, 16) ශ්‍රේෂ්ඨ එඬේරාණන් වන යෙහෝවඃ දෙවියන් වහන්සේ, මෙසේ පවසමින් මෙම සියලු බැටළුවන් ව අමතන සේක: “බලව, මමම . . . සිව්පාවුන් [බැටළුවන් NW] අතරේ විනිශ්චය කරන්නෙමි; ඔවුන් පෝෂ්‍යකිරීමට එකම එඬේරෙක් වන මාගේ සේවකයාවූ දාවිත් නැගුටුවා ඔවුන් කෙරෙහි පත්කරන්නෙමි; හෙතෙම ඔවුන් පෝෂ්‍ය කොට ඔවුන්ගේ එඬේරා වන්නේය. ස්වාමීන්වහන්සේ [යෙහෝවඃ වහන්සේ NW] වන මම ඔවුන්ගේ දෙවියන්වහන්සේ වන්නෙමි, මාගේ සේවකයාවූ දාවිත්ද ඔවුන් අතරේ අධිපතියා වන්නේය; ස්වාමීන්වහන්සේ [යෙහෝවඃ වහන්සේ NW] වන මම ඒක කීමි.”—එසකියෙල් 34:20-24.

⁵ “මාගේ සේවකයාවූ දාවිත්” යන පදවි නාමය අනාවැකිමය ලෙස යොමු දක්වන්නේ, දාවිත්ගේ සිංහාසනය උරුමකර ගන්නාවූ “වංශය” වන යේසුස් ක්‍රිස්තුස් වහන්සේට ය. (ගීතාවලිය 89:35, 36) ජාතීන්ගේ විනිශ්චය සිදු කෙරෙන මෙම දවස්වල දී, යෙහෝවඃ වහන්සේගේ සහකාර එඬේරාණන් සහ රජාණන් වන, දාවිත්ගේ පුත්‍රයාණන්, එනම් ක්‍රිස්තුස් යේසුස් වහන්සේ, “බැටළුවන්” යයි කියා සිටින නමුත්, ඇත්තට ම “එළුවන්” වන මිනිස් වර්ගයා අතුරින් “බැටළුවන්” ව දිගට ම වෙන් කරමින් සිටින සේක. (මතෙව් 25:31-33) මෙම “එකම එඬේරාණන්” ඔසවා තිබෙන්නේ, බැටළුවන් ව පෝෂණය කිරීමටත් ය. අද දින අප දකින්නේ මෙම අනාවැකියේ මොනතරම් මහිමාන්විත ඉටු වීමක් ද! දේශපාලන නායකයන්, නව ලෝක ක්‍රමයක් තුළින් මිනිස් වර්ගයා ව එක්සත් කිරීමට කථා කරන අතරේ දී, එක ම එඬේරාණෝ, පොළොව මත දෙවියන් වහන්සේගේ සංවිධානයට පමණක් කිසි කලෙක පවරා ගත හැකි වැනි යමක් වූ බහු භාෂා සාක්ෂි දැරීමේ යෝධ ප්‍රයත්නයක් තුළින් සියලු ජාතීන්ගේ බැටළුවන් ව ඇත්තට ම එක්සත් කරමින් සිටින සේක.

6, 7. “විශ්වාසවූ නුවණ ඇති දාසයා,” බැටළුවන් හට “නියම වේලාවට කෑම දෙන්ට” වග බලා ගෙන ඇත්තේ කෙසේ ද?

⁶ රාජ්‍යය පණිවුඩය නිරතුරුව ම නව ප්‍රදේශ කරා ව්‍යාප්ත වී යාමත් සමඟ, එක ම එඬේරාණන් විසින් බලය පවරා තිබෙන ආලේප ලත් ක්‍රිස්තියානින්ගේ “විශ්වාසවූ නුවණ ඇති දාසයා,” “නියම වේලාවට කෑම දෙන්ට” අවශ්‍ය කරන සියලු ම සැපයුම් සිදු කෙරෙන බවට වග බලා ගනී. (මතෙව් 24:45) වඩාත් වැඩියෙන් හා වඩාත් හොඳ බයිබල් පොත් හා සඟරා සඳහා වැඩි වෙමින් පවතින ඉල්ලුමට සරිලන සේ නිෂ්පාදනය වැඩි කිරීම සඳහා ලොව වටා පිහිටුවා ඇති වොච් ටවර් සමිතියේ මුද්‍රණ ශාඛා 33න් බොහොමයක් තම ප්‍රයත්නයන් වැඩි කොට තිබේ.

⁷ භාෂා 200ක පමණ පරිවර්තනයේ ගුණය ඉහළ නැංවීම සඳහා ද මුළු ලෝක ක්ෂේත්‍රය පියවීමට අවශ්‍ය පරිදි අමතර භාෂාවන්ගේ පරිවර්තනයන් දියත් කිරීම සඳහා ද යෙහෝවඃ වහන්සේගේ සාක්ෂිකරුවන්ගේ පාලක මණ්ඩලය තමන්ට කළ හැකි සෑම දෙයක් ම කරමින් සිටී. මෙය ක්‍රියා 1:8 හි යේසුස් වහන්සේ සිය ගෝලයන්ට කළ බල පැවරුමට අනුබල දීමක් ය: “ශුද්ධාත්මයාණන්වහන්සේ [ශුද්ධාත්මය NW] නුඹලා කෙරෙහි පැමිණි කල නුඹලා බලය ලබන්නහුය. එවිට නුඹලා . . . පොළොවේ සීමාව දක්වාද මාගේ සාක්ෂිකාරයෝ වන්නහුය.” එපමණක් ද නොව, දැනටමත් මුළුමනින් ම හෝ කොටස් වශයෙන් මුද්‍රණය කර ඇති න වර්ල්ඩ් ට්‍රාන්ස්ලේෂන් ඔෆ් ද හෝලි ස්ක්‍රිප්චර්ස් නමැති බයිබල් පරිවර්තනය යුරෝපයේ, අප්‍රිකාවේ හා පෙරදිගේ වෙනත් භාෂාවන් 16කට පරිවර්තන කරනු ලබමින් තිබේ.

“දෙවියන්වහන්සේගේ සමාදානය” භුක්ති විඳීම

8. යෙහෝවඃ වහන්සේ බැටළුවන් සමඟ කර තිබෙන සාමයේ ගිවිසුම මගින් ඔවුන්ට බහුල ලෙස ආශීර්වාද ලැබ තිබෙන්නේ කෙසේ ද?

⁸ යෙහෝවඃ වහන්සේ, ස්වකීය එක ම එඬේරාණන් වන ක්‍රිස්තුස් වහන්සේ කරණ කොට ගෙන, හොඳින් පෝෂ්‍ය කරනු ලබන ස්වකීය බැටළුවන් සමඟ ‘සමාදාන ගිවිසුමක්’ කරන සේක. (යෙසායා 54:10) යේසුස් වහන්සේගේ වගුරවන ලද රුධිරය කෙරෙහි ඇදහිල්ල දක්වමින්, ආලෝකයේ ගමන් කිරීමට බැටළුවන් හට හැකි කරවා තිබේ. (1 යොහන් 1:7) ඔවුහු, ‘සියලු සිතිවිලි අභිබවා යන්නාවූ, එමෙන් ම ක්‍රිස්තුස් යේසුස් වහන්සේ මාර්ගයෙන් ඔවුන්ගේ හෘදයන් හා මානසික බලයන් ආරක්ෂා කරන්නා වූ දෙවියන් වහන්සේගේ සමාදානය’ භුක්ති විඳිති. (පිලිප්පි 4:7, NW) එසකියෙල් 34:25-28 හි විස්තර කරන්නාක් මෙන්, යෙහෝවඃ වහන්සේ ස්වකීය බැටළුවන් ව, සුරැකි බවේ, නැවුම් බවින් යුත් සමෘද්ධියේ, හා ඵලදායිත්වයෙන් පිරිපුන් ප්‍රීතිමත් තත්ත්වයකින් යුත් ආත්මික පාරාදීසයකට එඬේරෙකු මෙන් ගෙන එන සේක. මෙම ප්‍රේමනීය එඬේරාණෝ ස්වකීය බැටළුවන් ගැන මෙසේ කියන සේක: “ඔව්හු මා විසින් ඔවුන්ගේ වියගස් කඩා, ඔවුන් වාල්කරගත් අයගේ අත්වලින් ඔවුන් ගළවාගත්තාම, මා ස්වාමීන්වහන්සේ [යෙහෝවඃ වහන්සේ NW] බව ඔවුන් දැනගන්නවා ඇත. ජාතීන්ට තවත් ඔව්හු කොල්ලයක් නොවන්නෝය, . . . කිසිවෙක් ඔවුන් භයගන්වන්නේ නැතුව, ඔව්හු සුවසේ වාසයකරන්නෝය.”

9. ‘වියගස් කැඩීම’ මගින් දෙවියන් වහන්සේගේ සෙනඟට උදා වී ඇති ප්‍රස්තාවන් මොනවා ද?

⁹ මෑත වර්ෂවල දී, දැනටමත්, බොහෝ රටවල සිටින යෙහෝවඃ වහන්සේගේ සාක්ෂිකරුවෝ, ‘තමන්ගේ වියගස්වල කැඩීමක්’ අත්දැක සිටිත්. වෙන කවරදාටත් වඩා නොවූ අයුරින් දේශනා කිරීමට ඔවුහු නිදහස් ව සිටිති. වැඩ ඉටු කර ගැනීම සඳහා සෑම රටක ම සිටින අපි සියලු දෙනා ම, දැඩි වීර්යයකින් යුතු ව ඉදිරියට ඇදෙනවාත් සමඟ ම, යෙහෝවඃ වහන්සේ සපයන ආරක්ෂාවෙන් හොඳින් ප්‍රයෝජන ගනිමු. මිනිස් වර්ගයා කවර කලෙක හෝ දකින මහත් ම පීඩාවේ කාලයට අප එළඹෙනවාත් සමඟ ම, යෙහෝවඃ වහන්සේ අපට දෙන සහතිකය මොනතරම් ද!—දානියෙල් 12:1; මතෙව් 24:21, 22.

10. මාහැඟි එඬේරාණන් වන ක්‍රිස්තුස් යේසුස් වහන්සේට සහය වීම සඳහා යෙහෝවඃ වහන්සේ සපයා තිබෙන්නේ කවුරුන් ද, තව ද මේ අයගෙන් සමහරක් ව ප්‍රේරිත පාවුල් විසින් අමතනු ලැබ ඇත්තේ කෙසේ ද?

¹⁰ දුෂ්ටයන්ට එරෙහි ව ස්වකීය පළිගැනීමේ දවසට සූදානම් කිරීමක් වශයෙන්, රැළ රැකබලා ගැනීම පිණිස, යෙහෝවඃ වහන්සේ, මාහැඟි එඬේරාණන් වන ක්‍රිස්තුස් වහන්සේට සහය වීම සඳහා උප එඬේරුන් සපයා ඇත. ඔවුන් ව, එළිදරව් 1:16 හි විස්තර කොට තිබෙන්නේ, යේසුස් වහන්සේගේ දකුණු අතේ තිබෙන “තාරකා සතක” සම්පූර්ණ සංඛ්‍යාවක් වශයෙනි. පළමු සියවසේ දී, ප්‍රේරිත පාවුල් මෙසේ පවසමින්, මෙම උප එඬේරුන්ගේ නියෝජිත මණ්ඩලයක් ඇමතී ය: “දෙවියන්වහන්සේ විසින් තමන්ගේම [ස්වකීය පුත්‍රයාණන්ගේ ම NW] රුධිරයෙන් මිලේට ගත් තමන්ගේ සභාව පෝෂණයකරන්ට ශුද්ධාත්මයාණන්වහන්සේ [ශුද්ධාත්මය NW] යම් රැළෙක්හි නුඹලා නායකයන් [අවේක්ෂකයන් NW] කොට නියමකළ සේක්ද, ඒ මුළු රැළ ගැනත් නුඹලාම ගැනත් ප්‍රවේසම්වෙයල්ලා.” (ක්‍රියා 20:28) අද දින, පොළොව පුරා, සභා 69,558ක සේවය කරන උප එඬේරුන් දස දහස් ගණන් පමණ සිටිත්.

උප එඬේරුන් පෙරමුණට!

11. ඇතැම් එඬේරුන් නිතර නිතර පියවනු ලබන ප්‍රදේශවල සාර්ථක ව පෙරමුණ ගෙන ඇත්තේ කෙසේ ද?

¹¹ බොහෝ රටවල, මෙම අන්තිම දවස්වල දී, නැවත නැවත පියවනු ලැබ ඇති ප්‍රදේශයන්හි මෙම එඬේරුන් පෙරමුණ ගත යුතු ය. රැළේ උද්‍යෝගය උසස් මට්ටමකින් පවත්වා ගෙන යාමට ඔවුන්ට හැක්කේ කෙසේ ද? මෙම එඬේරුන් බොහෝ ප්‍රශංසාත්මක අන්දමින් කටයුතු කර තිබෙන අතර, ඔවුන් සාර්ථක වී තිබෙන ක්‍රමවලින් එකක් නම්, උපකාරික සහ ස්ථාවර පුරෝගාමි සේවය සඳහා පෙලඹීම මගිනි. බොහෝ එඬේරුන් ම මෙම සේවයේ හවුල් වී තිබෙන අතර, මෙසේ කිරීමට නොහැකි ප්‍රචාරකයන් පවා ප්‍රීතියෙන් යුතු ව සේවය කරමින් පුරෝගාමි ස්ප්‍රීතුවක් විදහා දක්වා ඇත්තේ, ප්‍රදේශය තුළ තිබෙන උදාසීන භාවයෙන් ගොඩ ඒමට උපකාරවත් වන ලෙසිනි. (ගීතාවලිය 100:2; 104: 33, 34; පිලිප්පි 4:4, 5) මෙසේ, දුෂ්ටකම සහ නිසි ආණ්ඩුමය පාලනයක් නොමැතිකම නිසා අවුල් වියවුල් සහගත තත්ත්වයක් හේතුවෙන් ලෝකය ගිලෙනවාත් සමඟ ම, බොහෝ බැටළු ගුණැති ජනයා ව, රාජ්‍යය බලාපොරොත්තුව කෙරෙහි පුබුදුවමින් සිටිනු ලැබේ.—මතෙව් 12:18, 21; රෝම 15:12.

12. සීඝ්‍රයෙන් වර්ධනය වන ක්ෂෙත්‍රයන්හි පවතින බැරෑරුම් ගැටලුව කුමක් ද, මෙය සමහර අවස්ථාවන්හි දී හසුරවනු ලබන්නේ කෙසේ ද?

¹² තවත් ගැටලුවක් නම්, බොහෝ විට රැළ රැකබලා ගැනීම සඳහා ප්‍රමාණවත් සුදුසුකම් ලත් එඬේරුන් නැති වීමයි. නැගෙනහිර යුරෝපයේ මෙන්, සීඝ්‍ර වර්ධනයක් තිබෙන ප්‍රදේශවල පත් කරන ලද වැඩිමහල්ලන් කොහෙත් ම නැති නව සභාවන් බොහොමයක් තිබේ. කැමැත්තෙන් ඉදිරිපත් වන බැටළුවෝ බරට උර දෙති, නමුත් ඔවුන් ඉතාමත් අත්දැකීම්වලින් අඩු අය ය, සභාව වෙතට එක් රොක් වෙන බැටළුවන් ව පුහුණු කිරීම සඳහා උපකාරය අවශ්‍ය ය. බ්‍රසීලය, මෙක්සිකෝව, සහ සයිරේ වැනි සීඝ්‍රයෙන් වර්ධනය වන රටවල, සේවය සංවිධානය කිරීමේ හා වෙනත් නවකයන් ව පුහුණු කිරීමේලා සන්සන්දනාත්මක වශයෙන් යෞවන සාක්ෂිකරුවන් ව යොදා ගැනීමට සිදු වී තිබේ. පුරෝගාමින් ඉතා කදිම උපකාරයක් දෙන අතර, සහෝදරියන්ට නවක සහෝදරියන් ව පුහුණු කළ හැකි ක්ෂේත්‍රයෙකි මෙය. යෙහෝවඃ වහන්සේගේ ස්වකීය ආත්මය මගින් ප්‍රතිඵලවලට ආශීර්වාද කරන සේක. වර්ධනය දිගට ම සිදු වෙමින් පවතී.—යෙසායා 54:2, 3.

13. (ආ) අස්වැන්න මෙතරම් මහත් බැවින්, සියලු ම සාක්ෂිකරුවන් කුමක් උදෙසා යාච්ඤා කළ යුතු ද? (ආ) දෙවෙනි ලෝක යුද්ධයට පෙර හා එය අතරතුරේ දී දෙවියන් වහන්සේගේ ජනයාගේ යාච්ඤාවලට පිළිතුරු ලැබුණේ කෙසේ ද?

¹³ දේශනා වැඩය හොඳින් ප්‍රතිශ්ඨාපනය කරනු ලැබ ඇති, මෑතක දී තිබූ තහංචි ඉවත් කොට තිබෙන, සහ අලුතෙන් ආරම්භ වූ ප්‍රදේශවල හා රටවල, මතෙව් 9:37, 38 හි සඳහන් යේසුස් වහන්සේගේ වචන තවමත් අදාළ වෙයි: එසේ ය, “ගොයම නම් බොහෝය, නුමුත් ගොවියෝ ස්වල්ප දෙනෙක්ය. එබැවින් තමන් ගොයම් කැපීමට ගොවියන් එවන ලෙස ගොයමේ ස්වාමියාට යාච්ඤාකරපල්ලා.” එමෙන් ම, තවත් එඬේරුන් නැගිටුවන [එවන] ලෙසට ද යෙහෝවඃ වහන්සේට යාච්ඤා කිරීමට අපට අවශ්‍ය ය. උන් වහන්සේට මෙය කිරීමට හැකි බවට උන් වහන්සේ විදහ පෙන්වා ඇත. දෙවන ලෝක යුද්ධයට පෙර හා ඒ අතරතුරේ දී, අසිරියානුවන් බඳු කුරිරු ඒකාධිපතියෝ, යෙහෝවඃ වහන්සේගේ සාක්ෂිකරුවන් ව විනාශ කිරීමට උත්සාහ කළහ. එහෙත් ඔවුන්ගේ යාච්ඤාවලට පිළිතුරු දුන් යෙහෝවඃ වහන්සේ, ඔවුන්ගේ සංවිධානය, සැබෑ දිව්‍යාණ්ඩු එකක් කරවමින්, අවශ්‍ය “එඩේරුන්” සැපයූ සේක.a මෙය මෙම අනාවැකියට අනුකූල විය: “අෂූරියයා අපේ දේශයට එන කලත් අපේ මාළිගාවලට ඇතුල්වන කලත් අපි ඔහුට විරුද්ධව එඬේරුන් සත්දෙනෙකුත් ශ්‍රේෂ්ඨ මනුෂ්‍යයන් අට දෙනෙකුත් නැගුටුවන්නෙමුව”—එසේ ය, පෙරමුණ ගැනීම සඳහා කැප වූ වැඩිමහල්ලන් අවශ්‍ය තරමටත් වඩා වැඩි ප්‍රමාණයකි.—මීකා 5:5.

14. සංවිධානය තුළ පවතින කැපී පෙනෙන අවශ්‍යතාවය කුමක් ද, තව ද සහෝදරයන්ට දී ඇති දිරිගැන්වීම කුමක් ද?

¹⁴ බව්තීස්ම ලත් සියලු පිරිමි සාක්ෂිකරුවන්ට වැඩිදුර වරප්‍රසාද සඳහා වීර්ය කිරීමේ කැපී පෙනෙන සුලු අවශ්‍යතාවයක් තිබේ. (1 තිමෝති 3:1) තත්ත්වය හදිසි ය. මේ පිළිවෙළේ අවසානය වේගයෙන් එළැඹෙයි. හබක්කුක් 2:3 [NW] මෙසේ සඳහන් කරයි: “දර්ශනය තවමත් නියමිත කාලයට පැමිණීමට තිබේ, එය අවසානය දක්වා දැඩි ආයාසයකින් යයි. එය බොරු නොකියනු ඇත. . . . එය නොවරදවා ම සැබෑවක් වනු ඇත. එය ප්‍රමාද නොවනු ඇත.” සහෝදරයෙනි, අවසානය පැමිණීමට පෙර, මෙම එඬේර වැඩය තුළ තවදුරටත් වරප්‍රසාද සඳහා සුදුසුකම් අත්කර ගැනීමට ඔබට වීර්ය කළ හැකි ද?—තීතස් 1:6-9.

දිව්‍යාණ්ඩු එඩේරකම්

15. යෙහෝවඃ වහන්සේගේ ජනයා දිව්‍යාණ්ඩුවක් වන්නේ කුමන ආකාරයෙන් ද?

¹⁵ යෙහෝවඃ වහන්සේගේ සංවිධානයේ ව්‍යාප්තියෙහි මුළුමනින් ම හවුල්වීම සඳහා, උන් වහන්සේගේ සෙනඟට තමන්ගේ මුළු ස්වභාවයෙන් ම දිව්‍යාණ්ඩු වීමට අවශ්‍ය ය. ඔවුන්ට මෙය ඉටු කර ගත හැක්කේ කෙසේ ද? හොඳයි, “දිව්‍යාණ්ඩු” යන යෙදුමෙන් අදහස් කරන්නේ කුමක් ද? වෙබ්ස්ටර්ස් න ට්වෙන්ටියත් සෙන්චරි ඩික්ෂනරි, “තියොක්‍රසි” [දිව්‍යාණ්ඩුව] යන වචනය අර්ථ දක්වන්නේ, “දෙවියන් වහන්සේ විසින් පාලනය කරනු ලබන රාජ්‍යයක්” ලෙස ය. යෙහෝවඃ වහන්සේගේ ජනයාගේ “ශුද්ධ ජාතිය” දිව්‍යාණ්ඩුවක් වන්නේ මේ අර්ථයෙන් ය. (1 පේතෘස් 2:9; යෙසායා 33:22) එම දිව්‍යාණ්ඩු ජාතියේ ආශ්‍රිතයන් හෙවත් සාමාජිකයන් වශයෙන්, සැබෑ ක්‍රිස්තියානින් ජීවත් විය යුත්තේ ද සේවය කළ යුත්තේ ද දේව වචනයේ හා එහි ප්‍රතිපත්තිවලට කීකරු වෙමිනි.

16. මූලික වශයෙන්, අප දිව්‍යාණ්ඩු බව අප විසින් ම පෙන්විය හැක්කේ කෙසේ ද?

¹⁶ ප්‍රේරිත පාවුල්, ක්‍රිස්තියානින් දිව්‍යාණ්ඩු විය යුත්තේ කෙසේ ද කියා පැහැදිලි ව පහදා දෙයි. පළමුව, ඔවුන්, “සැබෑ ධර්මිෂ්ඨකමින් හා පක්ෂපාතකමින් යුතු ව දෙවියන් වහන්සේගේ කැමැත්තට අනුකූල ව මවන ලැබූ නව පුද්ගලිකත්වයක් පැළඳ ගත” යුතු බව ඔහු පවසයි. ක්‍රිස්තියානියෙකුගේ පුද්ගලිකත්වය, දෙවියන් වහන්සේගේ වචනයේ පනවා ඇති උන් වහන්සේගේ ධර්මිෂ්ඨ ප්‍රතිපත්තිවලට එකඟ ව අඹනු ලැබිය යුතුයි. ඔහු, යෙහෝවඃ වහන්සේට සහ උන් වහන්සේගේ නීතිවලට පක්ෂපාත විය යුතු ය. මෙය කරන්නට පුළුවන් විය හැකි ආකාරය නිරූපනය කළායින් පසු ව, පාවුල් උදක් ම ඉල්ලා සිටියේ: “ප්‍රිය දරුවන් මෙන් දෙවියන්වහන්සේ අනුවයන්නෝ වෙයල්ලා.” (එපීස 4:24-5:1, NW) අප කීකරු දරුවන් මෙන් දෙවියන් වහන්සේ ව අනුකරණය කළ යුතු ය. අප ව ඇත්තට ම දෙවියන් වහන්සේ විසින් පාලනය කරන බවට පෙන්විය හැකි, ක්‍රියාවට නංවන ලද සෑබෑ දිව්‍යාණ්ඩු භාවය එයයි.—කොලොස්සි 3:10, 12-14 ද බලන්න.

17, 18. (අ) දිව්‍යාණ්ඩු ක්‍රිස්තියානින් අනුකරණය කරන්නේ දෙවියන් වහන්සේගේ කුමන කැපී පෙනෙන ගුණාංගය ද? (ආ) මෝසෙස්ට වදාළ ස්වකීය වචනවල, යෙහෝවඃ වහන්සේ ස්වකීය ප්‍රධාන ගුණාංගය අවධාරණය කළේ කෙසේ ද, නමුත් උන් වහන්සේ ඊට එකතු කළ අනතුරු ඇඟවීම කුමක් ද?

¹⁷ අප අනුකරණය කළ යුතු දෙවියන් වහන්සේගේ ප්‍රධානතම ගුණාංගය කුමක් ද? ප්‍රේරිත යොහන් 1 යොහන් 4:8 හි මෙසේ පවසන විට ඊට පිළිතුරු දෙයි. “දෙවියන්වහන්සේ ප්‍රේමයය.” පද අටකට පසු, 16 වෙනි පදයේ ඔහු මෙම අති වැදගත් ප්‍රතිපත්තිය යළි සඳහන් කරයි: “දෙවියන්වහන්සේ ප්‍රේමයය; ප්‍රේමයෙහි පවතින්නා දෙවියන්වහන්සේ තුළ සිටී [ඔහු දෙවියන් වහන්සේ හා සමගියෙන් සිටී NW], දෙවියන්වහන්සේද ඔහු තුළ සිටින සේක.” ශ්‍රේෂ්ඨ එඬේරාණන් වන, යෙහෝවඃ වහන්සේ ප්‍රේමයේ පුද්ගලාරෝපණය වන සේක. යෙහෝවඃ වහන්සේගේ බැටළුවන් කෙරෙහි ගැඹුරු ප්‍රේමයක් පෙන්වීම මගින්, දිව්‍යාණ්ඩු එඬේරු උන් වහන්සේ ව අනුකරණය කරති.—සසඳන්න 1 යොහන් 3:16, 18; 4:7-11.

¹⁸ උත්තරීතර දිව්‍යාණ්ඩු තැනැන් වහන්සේ මෝසෙස්ට තමන් වහන්සේ ව ම හෙළි කළේ මෙසේ ය: “ස්වාමීන්වහන්සේය [යෙහෝවඃ වහන්සේ ය NW], ස්වාමීන්වහන්සේය [යෙහෝවඃ වහන්සේ ය NW] උන්වහන්සේ අනුකම්පාවෙන් පූණීවූ දයාවන්තවූ උදහස්වීමට ප්‍රමාදවන්නාවූ අධිකතර කරුණාව [ප්‍රේමනීය කරුණාව NW] සහ සැබෑකමද ඇත්තාවූ දෙවි කෙනෙක්ය. උන්වහන්සේ දහස් ගණනකට කරුණාව [ප්‍රේමකීය කරුණාව NW] පවත්වනසේක, අයුතුකමත් අපරාධයත් පාපයත් ක්ෂමාකරනසේක. වරදකරුවන් කවර ප්‍රකාරයකින් වත් නිදහස් නොකරනසේක; තුන්වෙනි සතරවෙනි පරම්පරාව දක්වා දරුවන්ටත් දරුවන්ගේ දරුවන්ටත් පියවරුන්ගේ අධර්මිෂ්ඨකම ගැන ප්‍රතිඵල දෙන සේක.” (නික්මයාම 34:6, 7) මෙසේ යෙහෝවඃ වහන්සේ තමන් වහන්සේගේ කැපී පෙනෙන දිව්‍යාණ්ඩු ගුණාංගය වන ප්‍රේමයෙහි විවිධ පැති ගැන අවධාරණය කරන්නේ, වරදට දඬුවම් ලැබිය යුතු අයට එසේ කරන බවට අනතුරු අඟවමිනි.

19. ඵරිසිවරුන් මෙන් නොවී, ක්‍රිස්තියානි එඬේරුන් දිව්‍යාණ්ඩු ආකාරයකින් ක්‍රියා කළ යුත්තේ කෙසේ ද?

¹⁹ සංවිධානයේ වගකීම් දරන තත්ත්වයන්හි සිටින අයට දිව්‍යාණ්ඩු වීම කීමෙන් අදහස් කරන්නේ කුමක් ද? යේසුස් වහන්සේ සිය දවස්වල වූ ලියන්නන් සහ ඵරිසිවරුන් ගැන මෙසේ කථා කළ සේක: “ඔව්හු උසුලන්ට අමාරු මහත් බර බැඳ මනුෂ්‍යන්ගේ කරේ තබති; නුමුත් තමුන්ගේ ඇඟිල්ලවත් ඒවාට තබන්ට කැමති නොවෙති.” (මතෙව් 24:3) මොනතරම් පීඩාකාරී ද, මොනතරම් ප්‍රේමයෙන් තොර ද! සෑබෑ දිව්‍යාණ්ඩු භාවයට හෝ දෙවියන් වහන්සේ විසින් පාලනය කරනු ලැබීමට අවශ්‍ය කරවන්නේ, බයිබලයේ ප්‍රේමනීය ප්‍රතිපත්ති අදාළ කරමින්, රැළ කෙරෙහි එඬේරකම් කිරීම මිස, මිනිසුන් විසින් සාදන ලද නිමාවක් නැති නීති සමඟින් බැටළුවන් කෙරෙහි බර පැටවීම නොවේ. (මතෙව් 15:1-9 සසඳන්න.) මේ අතරතුර ම, සභාවේ නිර්මලත්වය පවත්වා ගැනීම සඳහා, තමන්ගේ ප්‍රේමයට ස්ථිර බවක් එකතු කිරීම මගින් දිව්‍යාණ්ඩු එඬේරුන් දෙවියන් වහන්සේ ව අනුකරණය කළ යුතු ය.—සසඳන්න රෝම 2:11; 1 පේතෘස් 1:17.

20. දිව්‍යාණ්ඩු එඬේරුන් පිළිගත්තේ කුමන සංවිධානාත්මක විධිවිධාන ද?

²⁰ මෙම අන්තිම දවස් අතරතුරේ දී, යේසුස් වහන්සේ තමන්ට අයත් දේවල් කෙරෙහි සිය විශ්වාසවන්ත නුවණ ඇති දාසයා ව පත් කොට තිබෙන බවත්, වැඩිමහල්ලන් ව පත් කිරීමේ ලා සහ බැටළුවන් කෙරෙහි එඬේරකම් කිරීමෙහි ලා මෙම දාසයාට ශුද්ධාත්මය මගින් මඟ පෙන්වා තිබෙන බවත් සැබෑ එඬේරු පිළිගනිත්. (මතෙව් 24:3, 47; ක්‍රියා 20:28) මෙබැවින්, මෙම දාසයා කෙරෙහි ද, මෙම දාසයා පිහිටුවා තිබෙන සංවිධානාත්මක විධිවිධානය මෙන් ම සභාව තුළ තිබෙන වැඩිමහල්ලන්ගේ විධිවිධානය උදෙසාත් ගැඹුරු ගෞරවයක් තිබීම, දිව්‍යාණ්ඩු වීම යන්නට ඇතුළත් වෙයි.—හෙබ්‍රෙව් 13:7, 17.

21. යේසුස් වහන්සේ උප එඬේරුන් සඳහා තැබූ කදිම ආදර්ශය කුමක් ද?

²¹ මඟ පෙන්වීම ලබා ගැනීම සඳහා යෙහෝවඃ වහන්සේ සහ උන් වහන්සේගේ වචනය කෙරෙහි නිරතුරුව ම බැලීමෙන් යේසුස් වහන්සේ ම කදිම ආදර්ශයක් තැබූ සේක. උන් වහන්සේ මෙසේ පැවසූ සේක: “මට තනියම කිසිවක් කරන්ට නුපුළුවන. මම අසන පරිද්දෙන්ම විනිශ්චය කරමි. මාගේ විනිශ්චය ධර්මිෂ්ඨය; මක්නිසාද මාගේම කැමැත්ත නොව මා එවූ තැනැන්වහන්සේගේ කැමැත්ත සොයමි.” (යොහන් 5:30) ස්වාමියා වන යේසුස් ක්‍රිස්තුස් වහන්සේගේ උප එඬේරුන් ද මෙවැනි ම යටහත් පහත් ආකල්පයක් වර්ධනය කළ යුතුයි. යේසුස් වහන්සේ කළාක් මෙන්, වැඩිමහල්ලෙක් සෑම විට ම මඟ පෙන්වීම සඳහා දේව වචනය දෙස බලනවා නම්, එවිට ඔහු සැබෑ දිව්‍යාණ්ඩු පුද්ගලයෙකි.—මතෙව් 4:1-11; යොහන් 6:38.

22. (අ) සියලු දෙනා ම දිව්‍යාණ්ඩු වීමට දැඩි ප්‍රයත්න දැරිය යුත්තේ කුමන ආකාරයකින් ද? (ආ) යේසුස් වහන්සේ බැටළුවන්ට දෙන කාරුණික ආරාධනය කුමක් ද?

²² බව්තීස්ම ලත් පුරුෂයෙනි, සභාවේ වරප්‍රසාද අත්කර ගැනීමට වීර්ය කරන්න! හිතෛෂි බැටළුවන් වන ඔබ සියල්ලෙනි, ප්‍රේමය පෙන්වීමේ දී දෙවියන් වහන්සේ සහ ක්‍රිස්තුස් වහන්සේ ව අනුකරණය කිරීමේ ලා දිව්‍යාණ්ඩු වීමට ඉලක්ක කර ගන්න! යේසුස් වහන්සේගේ ආරාධනයට පිළිතුරු දී ඇති හෙයින් එඬේරුන් හා රැළ එක සමාන ලෙස සතුටු වෙත්වා: “වෙහෙසවෙන්නාවූ, බර උසුලන්නාවූ සියල්ලෙනි, මා වෙතට වරෙල්ලා, මම නුඹලාට සහනය දෙමි. මම සිතින් මෘදුව යටත්ව [හදවතින් නිහතමානි ව NW] සිටින බැවින්, මාගේ වියගහ නුඹලා පිටට ගෙන, මාගෙන් ඉගෙනගනිල්ලා, එවිට නුඹලාගේ ආත්මවලට සහනය ලැබෙන්නේය. මක්නිසාද මාගේ වියගහ පහසුය, මාගේ බරද සැහැල්ලුය.”—මතෙව් 11:18-30.

[පාදසටහන්වල]

ඔබට පැහැදිලි කළ හැකි ද?

◻ යෙහෝවඃ වහන්සේගේ “රැළ” කුමක් ද, තව ද එයට ඇතුළත් වන්නේ කාවද?

◻ පළමු සියවසේ දී සහ අද දින “මාහැඟි එඬේරා” වශයෙන් යේසුස් වහන්සේ ක්‍රියා කළේ සහ කරන්නේ කෙසේ ද?

◻ රැළ රැකබලා ගැනීමට උප එඬේරුන් ඉටු කරන්නා වූ අති වැදගත් කාර්ය භාරය කුමක් ද?

◻ “දිව්‍යාණ්ඩු” යන වචනයේ විශේෂ අර්ථය කුමක් ද?

◻ දිව්‍යාණ්ඩු වීම සඳහා ක්‍රිස්තියානියෙක්—විශේෂයෙන් ම උප එඬේරෙක්—ක්‍රියා කළ යුත්තේ කෙසේ ද?

[20වන පිටුවේ පින්තූරය]

කැප වූ එඬේරෙකු මෙන්, යෙහෝවඃ වහන්සේ ස්වකීය රැළ රැකබලා ගන්නා සේක

[23වන පිටුවේ පින්තූරය]

දිව්‍යාණ්ඩුව ක්‍රියාවට නැංවීම යනු යෙහෝවඃ දෙවියන් වහන්සේගේ ප්‍රේමයේ ගුණාංගය අනුකරණය කිරීමයි