දෙවියන් වහන්සේ, “ස්වකීය නාමයට ඔබ පෙන්වූ ප්‍රේමය” අමතක නොකරන සේක
“නුඹලාගේ වැඩයද නුඹලා ශුද්ධවන්තයන්ට කළාවූ, කරන්නාවූ උපස්ථානයෙන් දෙවියන්වහන්සේගේ නාමයට පෙන්නූ ප්‍රේමයද මතකනැති කරන්ට උන්වහන්සේ අධර්මිෂ්ඨ නැත.” (හෙබ්‍රෙව් 6:10) ප්‍රේරිත පාවුල්ගේ එම වචන නැගෙනහිර යුරෝපයේ සිටින යෙහෝවඃ වහන්සේගේ සාක්ෂිකරුවන් සම්බන්ධයෙන් සත්‍යය වෙයි. දෙවියන් වහන්සේගේ නාමය සම්බන්ධ වැඩකටයුතුවල ඇදහිලිවන්ත ව සේවය කරමින්, දශක ගණනාවක් පුරා ඔවුහු, කලින් සෝවියට් දේශය පාලනය කළ ආණ්ඩු මගින් පනවා තිබූ තහංචි යටතේ දිගු කලක් තිස්සේ වෙහෙස මහන්සි වී වැඩ කළෝ ය. යෙහෝවඃ වහන්සේ ඔවුන්ගේ යහපත් ක්‍රියා සිහි කරන අතර, ඔවුන් මත රාජ්‍යය ආශීර්වාද වගුරු වන සේක. නිදසුනක් වශයෙන්, එම ප්‍රදේශයන් තුනකින් පමණක් පැමිණෙන පසුගිය වසරේ සේවා වාර්තාව දෙස අපි බලමු.
කලින් සෝවියට් සංගමයට අයත් ප්‍රදේශ
පසුගිය 1992 සේවා වර්ෂය තුළ දී, රාජ්‍යය ප්‍රචාරකයන්ගේ උපරිම සංඛ්‍යාව සියයට 35කින්—එනම් 49,171 සිට 66,211 දක්වා වැඩි වූ බව කලින් සෝවියට් සංගමයට අයත් ප්‍රදේශ වාර්තා කරයි! එහෙත් සියල්ල ම එපමණක් නොවේ, මන්දයත්, සඟරා ඇතුළු බයිබල් පොත් පත් බෙදා දීමේ ලා ඇති වී තිබෙන කදිම වර්ධනයෙන් පෙනී යන පරිදි, එම ප්‍රචාරකයෝ ඉතා ක්‍රියාශීලී ව සිටියෝ ය. විවරණිකා සහ පොත් පිංච 16,54,559ක් බෙදා හැරීමෙන් ඔවුන් ඒවායින් ද හොඳ ප්‍රයෝජන ගෙන තිබේ. මෙය පසුගිය වසරේ 4,77,235ක් වූ එම සංඛ්‍යාවෙන් වඩා තුන්ගුණයකටත් වඩා වැඩි වෙයි! මෙම බෙදා හැරීම් සියල්ලට ම ඇති වී තිබෙන ප්‍රතිචාරය කුමක් ද? නිවාස බයිබල් පාඩම්වල සංඛ්‍යාව දෙගුණ වීමයි. දැන් බයිබල් පාඩම් 38,484ක් පවත්වනු ලබමින් තිබේ.
එමෙන් ම, උපකාරික පුරෝගාමි සේවයේ හවුල් වීම සියයට 94කින් වැඩි විය. පැහැදිලි ව ම මෙය, නව බව්තීස්ම ලත් ගෝලයන්ගේ 26,986ක කැපී පෙනෙන එකතුවකට දායක වූ අතර, පසුගිය වර්ෂයේ එම සංඛ්‍යාව වූ 6,570 සමඟ සසඳන කල, එය සියයට 311ක පුදුමාකාර වර්ධනයකි!
අලුතෙන් බව්තීස්ම වූ සමහරක් අය පළමු වතාවට ශුභාරංචිය ගැන උනන්දුවක් දැක්වූයේ කෙසේ ද? ඇතැම් අවස්ථාවල දී, ඊට හේතු වූ කාරකය වූයේ පාඩම පවත්වන සාක්ෂිකරුවා විසින් දැක්වූ ගැඹුරු සැලකිල්ලයි. මොල්ඩෝවා හි මුලසුන අවේක්ෂකයෙක් මෙසේ සඳහන් කරයි:
“මගේ භාර්යාව සහ මම, බයිබල් සත්‍යය කෙරෙහි කලින් උනන්දුවක් පෙන්වා තිබූ ස්ත්‍රියක් ව බැහැදකින්න ගියා. ඈ සමඟ බයිබල් පාඩමක් පටන් ගැණුනා. කෙසේ වෙතත්, ඇගේ ස්වාමිපුරුෂයා කිසි උනන්දුවක් කොහෙත් ම දැක්වූයේ නැහැ. එක් දවසක් ඇගේ පාඩම දිගට ම කර ගෙන යාම සඳහා අප ඇගේ නිවසට යමින් සිටිය දී, කාලගුණය කටුක වී සීතල හා හිමෙන් වැසී තිබුණා, කිසිවෙක් පාරේ සිටියේ නැති තරම් ය. නමුත් අපි නියමිත වේලාවට ඇගේ නිවසට ළඟා වුණා. ඈ ඇගේ ස්වාමිපුරුෂයාට මෙසේ කීවා: ‘බලන්න, මේ අය අප ගැන මොනතරම් උනන්දුවක් දක්වනවා ද? හිම වැටී තිබුණට ඔවුන් නියම වේලාවට ආවා.’ මේ සිද්ධිය ඇගේ සැමියාට සිතන්නට හේතුවක් වුණා. ඔහු තමාගේ මනස වෙනස් කර පාඩමට සම්බන්ධ වුණා, දැන් ඔහු සහ ඔහුගේ භාර්යාව බව්තීස්ම ලත් සාක්ෂිකරුවෝ.”
වෙනත් අවස්ථාවල දී, සාක්ෂිකරුවාගේ ආචාරශීලී බව ශුභාරංචිය කෙරෙහි උනන්දුවක් ඇති කරවයි. මොල්ඩෝවා හි ම තවත් වැඩිමහල්ලෙකුට මෙම අත්දැකීම තිබුණි:
“මා ශුභාරංචිය දේශනා කළ ප්‍රදේශයේ මා හමු වීමට ගිය එක් මිනිසෙක් යෙහෝවඃ වහන්සේගේ සාක්ෂිකරුවන් ගැන උනන්දුවක් දැක්වූයේ නැහැ. ඔහු තමාගේ පියා සහ සීයා මෙන් ම ඕතඩොක්ස් පල්ලියේ සාමාජිකයෙකු ව සිටි බව කීවා. ඒ නිසා නිවසෙන් පිට ව යන ලෙස ඔහු මගෙන් ඉල්ලා සිටියා. කෙසේ වෙතත්, මා පිටවීමට පෙර, මා එහි ගිය හේතුව පැවසීමට ඔහු මට ප්‍රස්තාවක් දුන්නා. මෙසේ සඳහන් වන මතෙව් 28:19 මා ඔහුට ගෙන හැර දැක්වූවා: ‘එබැවින් නුඹලා ගොස්, සියලු ජාතීන් ගෝලයන් කරපල්ලා, පියාණන්ගෙත් පුත්‍රයාණන්ගෙත් ශුද්ධාත්මයාණන්ගෙත් [ශුද්ධාත්මයෙත් NW ] නාමයට ඔවුන් බව්තීස්මකරපල්ලා.’ ඉන් අනතුරුව මා ඔහුට අපගේ රැස්වීම් පැවැත්වෙන ස්ථානයේ ලිපිනය දී පිට වී ආවා. මා ව පුදුමයට පත් කරවමින්, සතියකට පසු ව මේ මිනිසා අපගේ රැස්වීමට ආවා! වැඩසටහන අවසන් වන තෙක් ඔහු එහි සිටියා. මා කෙරෙහි මිත්‍රශීලී බවක් නොපෙන්වූ නිසා සතිය පුරා ම තමා කනගාටුවෙන් සිටි බව ඔහු පැහැදිලි කළා. ඒ මොහොතේ දී ම බයිබල් පාඩමක් පටන් ගැණුනා, දැන් ඔහු අපගේ සහෝදරයෙක්.”
සේවා වසරේ කැපී පෙනෙන තවත් අංගයක් වී ඇත්තේ, එම ප්‍රදේශයේ සිටින අපගේ සහෝදරයන්ගේ අවශ්‍යතාවයන්ට අතිමහත් ලෙස දක්වන ලද ප්‍රතිචාරයයි. වර්ෂ 1991⁄92 සීත කාලය තුළ, ආහාර තොග ටොන් 400ක් සහ පුරුෂයන්, ස්ත්‍රීන් හා දරුවන් සඳහා විශාල ඇඳුම් ප්‍රමාණයක් අවශ්‍යතාවය ඇති අය වෙත යවන ලදි. මෙම සැපයුම්, කලින් සෝවියට් සංගමයට අයත් ප්‍රදේශයේ සියලු කොටස්වලට ම වාගේ, එපමණක් ද නොව සයිබීරියාවේ පිහිටි ඉර්කුට්ස්ක් හා ජපානය අසල වූ ඛාබොරොව්ස්ක් තරම් දක්වා ද බෙදා හරිනු ලැබිණි. ඇත්තෙන් ම, අපගේ සහෝදරයන් යෙහෝවඃ වහන්සේගේ නාමයට පෙන්වූ ප්‍රේමය උන් වහන්සේ විසින් අමතක නොකළ බවට සිත්ලගන්නා සාක්ෂියකි! යෙහෝවඃ වහන්සේගේ ආත්මය මගින් පොලඹවනු ලැබූ සහෝදර ප්‍රේමයේ මෙම සාක්ෂිය, ඔවුන්ගේ ලෝක ව්‍යාප්ත පවුල එක්සත් කිරීමට ද ඉවහල් වී තිබේ. නිදසුනක් වශයෙන්, යුක්රේන් හි එක් සහෝදරියක් ශාඛා කාර්යාලයට මෙසේ ලීවා ය:
“ඔබ අප වෙත දැක්වූ උපකාරය අපගේ හද පත්ලට ම කිඳා බැස්සා. අපගේ නෙත්වලින් කඳුළු ගලා ආවා, අප ව අමතක නොකිරීම ගැන අපි යෙහෝවඃ දෙවියන් වහන්සේට ස්තුති කළා. අපට දැන් ද්‍රව්‍යමය දේවල් අතින් දුෂ්කරතා තිබෙන බව ඇත්ත, නමුත් ද්‍රව්‍යමය අතින් අපට කෙළින් හිට ගන්නටවත් පුළුවන් වුණේ අපගේ බටහිර සහෝදරයන්ගෙන් අපට ලැබුණු උදව්වලට ස්තුති වන්නටයි. දැන්, ඔබගේ උපකාරය නිසා, යෙහෝවඃ වහන්සේගේ සේවයට වැඩි වේලාවක් කැප කරන්ට අපගේ පවුලට හැකි වේවි. යෙහෝවඃ වහන්සේ කැමති සේක් නම්, මගේ දුව සහ මම ග්‍රීෂ්ම ඍතුවේ මාසවල දී උපකාරික පුරෝගාමි සේවය කරන්න යනවා.”
මීට අමතර ව, සහනාධාර සැපයීමේ ප්‍රයත්නය මගින් පිටත සිටින්නන් හට සාක්ෂියක් සැපයිණි, මන්දයත් සාක්ෂිකරුවන් ප්‍රේමය තම ක්‍රියාවන් මගින් විදහා දක්වන බව බලාසිටින්නන්ට දැක ගත හැකි විය. වෙනත් සභාවක පවුලක් ලීවේ මෙසේ ය: “ආහාර හා රෙදිපිළි සහිත ද්‍රව්‍යමය උපකාර අපට ලැබුණා. එය ඒතරමට තිබුණා! ඔබගේ අනුබලය හා දිරිගැන්වීම, අපත් වෙනත් අයට යහපත කළ යුතු බවට පාඩමක්. මේ ප්‍රේමයේ ක්‍රියාව, නොඇදහිලිකාරයන්, මෙන් ම උනන්දු පුද්ගලයන් හා ඔවුන්ගේ පවුල්වල අයට නොපෙනී ගියේ නැහැ; එය, සැබෑ සහෝදරත්වය ගැන මහත් සාක්ෂියක් වී තිබෙනවා.”
පසුගිය ජූනි සහ ජූලි මාසවල දී, “ආලෝකය දරන්නෝ” තේමාවෙන් යුතු ව පවත් වන ලද දිස්ත්‍රික්ක සමුළු පහ සහ ජාත්‍යන්තර සමුළුව, ස්වකීය සාක්ෂිකරුවන් වෙහෙස මහන්සියෙන් කළ වැඩකටයුතුවලට සහ ස්වකීය නාමය දැනුම් දීමට සැලැස්වීමේ ලා ඔවුන් පෙන්වූ ප්‍රේමයට යෙහෝවඃ වහන්සේ විසින් ආශීර්වාද කිරීම ගැන තවත් සාක්ෂියක් විය. සමුළුවලට 91,673ක් පැමිණි අතර, 8,562ක් බව්තීස්ම කරන ලදි. වැඩියෙන් ම පැමිණ සිටියේ සා. පීටස්බර්ග් හි ජාත්‍යන්තර සමුළු භූමිය වෙතට ය, කිරෝව් ක්‍රීඩාංගනයේ පැවැත්වුණු මෙයට, ලොව වටා රටවල් 30කින් පැමිණි නියෝජිතයන් ඇතුළු 46,214ක් පැමිණ සිටියහ.
සයිබීරියාවේ වයස අවුරුදු 60ක පමණ තැනැත්තෙක්, ඉර්කුට්ස් නගරයේ සමුළු බිමට පැමිණියේ හුදෙක් එය බැලීමට ය. ඔහු මෙසේ පැවසුවේ ය: “ඇවිත් සිටි සියල්ලන් ම සිනහ මුසු මුහුණින් යුතු ව හොඳට ඇඳ පැළඳ ගෙන සිටියා, ඔවුන් එකිනෙකා සමඟ කටයුතු කළේ කාරුණික ව. මේ මිනිසුන් හරියට එක ම එක්සත් පවුලක් වගේ. ඔවුන් ක්‍රීඩාංගනයේ දී පමණක් නොවේ, එදිනෙදා ජීවිතයේ දී පවා මිත්‍රයෝ බව යමෙකුට හැඟිය හැක. අනගි බයිබලය ආශ්‍රිත පොතක් මට ලැබුණා, මෙය මොන වගේ සංවිධානයක් ද කියා මම වඩාත් හොඳින් ඉගෙන ගත්තා. බයිබලය පාඩම් කිරීමට සහ යෙහෝවඃ වහන්සේගේ සාක්ෂිකරුවන් සමඟ සම්බන්ධකම් පවත්වන්නට මම කැමතියි.”
මෙහි ම, එනම් 5051ක් පැමිණි ඉර්කුට්ස් හි සමුළුවේ ම, සයිබීරියාවේ යකුට් ජනරජයෙන් පැමිණි එක් ස්ත්‍රියක් මෙසේ පළ කළා ය: “මට මිනිසුන් ව පේනවා, මට ප්‍රීතියෙන් කෑ ගහන්ට සිතෙනවා. මේ වගේ මිනිසුන් ව දැනගැනීමට ලැබීම ගැන මම යෙහෝවඃ වහන්සේට බොහෝ සෙයින් ස්තුති කරනවා. මට මේ සමුළුවේ දී, පොත් පත් ලැබුණා, මේ ගැන අන්‍යයන්ට කථා කිරීමට මට වුවමනායි. යෙහෝවඃ වහන්සේසේට නමස්කාර කරන්නියක් වීමට මට බොහෝ සෙයින් වුවමනායි.”
කසාක්ස්තාන් හි අල්මා අටා හි මධ්‍යම ක්‍රීඩාංගනයට 6,605ක් පැමිණි අතර, එහි අධ්‍යක්ෂකවරයා මෙසේ පැවසුවේ ය: “ඔබගේ ආකල්පය ගැන මම අතිශයින් සතුටු වෙනවා. බාල මහලු ඔබ සියලු දෙනා ම ගරුකටයුතු මිනිසුන් කියා මට දැන් ඒත්තු ගොස් තිබෙනවා. මා දෙවියන් ව විශ්වාස කරනවා කියා මට කියන්ට බැහැ, නමුත් ඔබගේ සහෝදරත්වය තුළින්, ආත්මික හා ද්‍රව්‍යමය සාරධර්මයන් කෙරෙහි ඔබගේ ආකල්පය මගින් විදහා දැක්වෙන පරිශුද්ධ දේවල් කෙරෙහි නම් මට ඇත්තට ම විශ්වාසක් තිබෙනවා.”
එක් පොලිස් නිලධාරියෙක්, අල්මා අටා සමුළුවේ දී මෙසේ නිරීක්ෂණය කළේ ය: “මා ඔබගේ මිනිසුන් ව දෙවතාවක් මුණ ගැසී තිබෙනවා, ඒ වතා දෙකේ ම සමුළුවක දී. යෙහෝවඃ වහන්සේගේ සාක්ෂිකරුවන් සමඟ වැඩ කිරීම ඇත්තෙන් ම බොහෝ ප්‍රසන්න බවක් ගෙන දෙන්නක්.”
රුමේනියාව
රුමේනියාවේ සිටින සහෝදරයන් ද යෙහෝවඃ වහන්සේගේ නාමය උදෙසා පෙන්වා ඇති ප්‍රේමය උන් වහන්සේ විසින් අමතක කර නැත. මෙම පසුගිය වසර තුළ සාක්ෂිකරුවන්ට සන්තෝෂය ගෙන දුන් සිද්ධීන් බොහොමයක් තිබිණි. පළමුව, ශාඛා කාර්යාලයක් නැවත වරක් බුකාරෙස්ට් නගරයේ පිහිටුවන ලදි. රුමේනියානු ආණ්ඩුවේ නීතියට අනුව අවසාන නීතික ක්‍රියාකාරකම 1949 දී අවසන් විය. කාර්යාලයේ නව පහසුකම්වල සේවය කරන සහෝදර සහෝදරියන් 20ක් පමණ සිටිත්. මෙම ශාඛා කාර්යාලය ප්‍රචාරකයන් 24,752කට සේවය කරන අතර, මෙය මෙතෙක් තිබූ උපරිමය වෙයි. තව ද මෙය පසුගිය වසරේ සාමාන්‍යයට වඩා සියයට 21ක වැඩි වීමකි.
වසර ගණනක් මුළුල්ලේ රහසිගත ව දේශනා කිරීමෙන් පසු, ප්‍රචාරකයෝ, ගෙයින් ගෙට ප්‍රසිද්ධියේ සාක්ෂි දැරීමට වඩාත් හොඳින් සකස් වෙමින් සිටිති. අනෙක් අයට දේශනා කිරීමට, ඇතැම් සාක්ෂිකරුවන් ඔවුන් ගමන් කරන විට දී මෙන් ම තමනට හමුවෙන සෑම ප්‍රස්තාවකින් ම ප්‍රයෝජන ගන්නා ආකාරය ම්‍යූරෙෂ් ප්‍රාන්තයෙන් පැමිණෙන එක් අත්දැකීමකින් පෙන්නුම් කරයි. ශාඛා කාර්යාලය මෙසේ ලියයි:
“දුම්රියක එක් මැදිරියකින් තවත් මැදිරියකට දේශනා කිරීමට එක් ප්‍රචාරකයෙක් තීරණය කළේ ය. මිනිසුන් දැක්වූ ප්‍රතික්‍රියාව සාමාන්‍යයෙන් සතුටුදායක විය, නමුත් අන්තිම මැදිරියේ දී, යම් ගැටලු සහගත තත්ත්වයක් පැණ නැඟිණි. එහි ගමන් ගත් කිසිවෙකුට අපගේ සඟරාවලින් පිටපතක් ලබා ගැනීමට වුවමනා වුණේ නැහැ. අවසානයේ දී, තරමක් කුපිත ගතියකින් යුත් මිනිසෙකු, සිට ගෙන මෙසේ කෑගැසී ය: ‘මම දැන් නුඹේ සියලු ම සඟරා ජනේලයෙන් පිටතට වීසි කරන්නයි යන්නේ! නුඹේ ආගම සමඟ නුඹ අපට මෙතරම් කරදර කරන්නේ ඇයි?’ ඔබ සඟරා පිටතට වීසි කළත්, තවත් කෙනෙක්—එනම් ඒවා අහුලා ගන්නා අය ඒවායින් ප්‍රයෝජන ගනු ඇතැයි යනුවෙන් ප්‍රචාරකයා කාරුණික ව පිළිතුරු දුන්නේ ය. ප්‍රචාරකයාගේ සන්සුන්කම දුටු එම තැනැත්තාගේ සිත එයින් කොතරම් කාවැදී ගියේ ද යත්, ඔහු සඟරා ගෙන මැදිරියේ ගමන් කරමින් සිටි අය හට ඔහු විසින් ම සඟරා බෙදන්නට පටන් ගත්තේ ය. පුදුමයට පත් කරවමින්, ඔවුන් සියලු දෙනා ම සඟරා ලබා ගත්තෝ ය. ඒවා බෙදා දුන්නායින් පසු, එම තැනැත්තාට එක ම සඟරාවක්වත් තිබුණේ නැත. එමනිසා, ප්‍රචාරකයා, ‘මහත්මයා, ඔබට සඟරාවක් ලබා ගන්නට වුවමනා නැද්ද?’ යයි ඔහුගෙන් ඇසුවේ ය. ඒ අවස්ථාවේ දී, කලාප දෙකක් තිබූ මගියෙකුගෙන් ඔහු සඟරාවක් උදුරා ගෙන මෙසේ පැවසී ය: ‘දැන් එක් පිටපතක් මා ළඟට ආවා!’ ”
බොහෝ රටවල, යෙහෝවඃ වහන්සේගේ සාක්ෂිකරුවන්ගේ දේශනා වැඩකටයුතු, ක්‍රිස්තියානි ලෝකයේ පූජකයන්ගේ විරුද්ධත්වය ඇවිස්සීමට හේතු වී තිබේ. රුමේනියාවේ, ඕතඩොක්ස් පල්ලියේ පූජකයෝ, බොහෝ විට සාක්ෂිකරුවන් ගැන අතිශයින් කිපී සිටිත්. එහෙත් යෙහෝවඃ වහන්සේගේ නාමය උදෙසා ස්වකීය ජනයා පෙන්වා ඇති ප්‍රේමයට උන් වහන්සේ විසින් ආශීර්වාද කිරීම නවත්වන්නට මෙයට හැකි වී නැත. එක් චාරිකා අවේක්ෂකයෙක් මෙසේ ලියයි:
“ඈත පළාත්වල සේවය කිරීම සඳහා ප්‍රදේශයේ සභාව සමඟ අප ගියා. සහෝදරයන් සිය ගණනක් එහි සිටියා. අපි බසයක් කුලියට ගත් අතර, එය අප ව සැතපුම් 35ක් පමණ, රට මැද පිහිටි ගම්බද ප්‍රදේශයේ කුඩා නගරයක් වෙත ගෙන ගියා. සංස්කෘතික නිකේතනයේ පවත්වන්නට නියමිත ව තිබූ ප්‍රසිද්ධ කථාවට අපි බොහෝ දෙනෙකුට ආරාධනා කළා. රැස්වීම පටන් ගත් විගස ම, ඕතඩොක්ස් පල්ලියේ පූජකයා, අපගේ රැස්වීමට බාධා කිරීමට එහි පැමිණියා. පූජකයා ව නවත්වන්නට පොලිස් නිලධාරින් උත්සහ ගත්තා. එහෙත්, සන්සුන්වීමට ඔහු ප්‍රතික්ෂේප කළා. ඔහු රැස්වීම නැවැත්වීම සඳහා කළ උත්සහය සාර්ථක කර ගත්තේ, ඔහු ප්‍රධාන දොරටුවේ වීදුරුවක් කඩා දැමූ විටයි. කෙසේ වෙතත්, පූජකයාගේ හැසිරීම ගැන ප්‍රදේශයේ වාසය කළ බොහෝ දෙනෙක් එකඟ වුණේ නැහැ. පැමිණි සිටි සියල්ලන්ට ම හොඳ සාක්ෂියක් දෙන්නට ඒ අවස්ථාවේ දී හැකි වුණා. පොත් පත් විශාල ප්‍රමාණයක් බෙදා හැරියා.”
අභාග්‍යයකට, රටේ ඇතැම් පළාත්වල සාක්ෂිකරුවන් සිටින්නේ ඉතා සුළු පිරිසක් පමණි. එක් ස්ථාවර පුරෝගාමියෙක්, ඕල්ට් නමැති ප්‍රාන්තයට පළමු වතාවට පැමිණි කල, දේශනා කිරීමට විශාල ක්ෂේත්‍රයක් සහිත ව එම ප්‍රාන්තයේ ඔහුට හමුවූයේ සහෝදරයන් නව දෙනෙකු පමණයි. වසරකට පසු ව, සාක්ෂිකරුවන්ගේ සංඛ්‍යාව 27 දක්වා ඉහළ ගිය අතර, මේ අයගෙන් පස් දෙනෙක් ම, යළි ක්‍රියාශීලී වූ ප්‍රචාරකයන් ය. මෙම පුරෝගාමියා, සාක්ෂිකරුවන් කොහෙත් ම නොසිටි කොරාබියා නුවරේ තමාගේ නවාතැන පිළියෙළ කර ගත්තේ ය. සාක්ෂිකරුවන් එහි ගොස් දවස් 45ක් ගත වූවා පමණයි, මීසම් පාලක, ඔවුන්ගේ වැඩකටයුතු ගැන ක්‍රායෝවා ගුවන් විදුලියෙන් විරුද්ධත්වය පළ කළේ ය. මිනිසුන්ගේ ආගම වෙනස් කරන්නට උත්සාහ කරමින්, ඔවුන් කොරාබියා නුවර “ආක්‍රමණය” කර ඇතැයි ඔහු පැවසුවේ ය. වැඩකටයුතු නවත්වා, එම ප්‍රදේශයේ සිටින සාක්ෂිකරුවන්ගේ කීර්තිය විනාශ කර දැමීමේ අදහසින් යුතු ප්‍රහාරයන් දිගට ම පැවතිණි. එය උච්චාවස්ථාවට පැමිණියේ, බුකාරෙස්ට් හි සහෝදරයන් දිස්ත්‍රික්ක සමුළුවට පැමිණි අවස්ථාවේ දී ය. ඕතඩොක්ස් පල්ලියේ මීසම් පාලක, ඔහු පැවැත්වූ පූජාවෙන් පසු, මෙසේ තද බල නිවේදනයක් කළේ ය: “සාක්ෂිකරුවන්ට එරෙහි ව යම් ක්‍රියා මාර්ගයක් ගැනීම සඳහා පොලිසිය පෙලඹ වීමට අපි සියල්ලන් ම පාරේ පෙළපාලියක් පැවැත්විය යුතුයි. සාක්ෂිකරුවන් සිය පොත්පත් තුළින් මුළු ප්‍රදේශයේ මිනිසුන්ට විස කවා තිබෙනවා.” එහෙත් රැස්වීම පැවැත්වීමට නියමිත ව තිබූ එම රාත්‍රියේ ම අසාමාන්‍ය දෙයක් සිදු වුණි. කොල්ලකරුවන් පිරිසක් පල්ලිය හා නගරයේ සංස්කෘතික නිකේතනය විනාශ කර දැමුවා. එමනිසා, උද්ඝෝෂණ රැස්වීම කිසිවිටකත් පැවැත්වුණේ නැත!
කලින් යුගෝස්ලාවියානු ප්‍රදේශ
වර්ෂ 1992 සේවා වසර, යුගෝස්ලාවියාවේ සහෝදරයන්ට වඩාත් අසීරු වසරක් වී තිබුණි. කෙසේ වුවද, ඒ අතරතුරේ ම, යම් ප්‍රීතිමත් අත්දැකීම් ඔවුනට තිබුණි. යෙහෝවඃ වහන්සේ ඔවුන්ගේ වැඩ සහ ස්වකීය නාමය උදෙසා ඔවුන් පෙන්වා තිබූ ප්‍රේමය අමතක නොකිරීම ගැන ස්තුතිවන්ත විය හැක.
පළමුව, ස්ලෝවේනියාවේ ද, ඊළඟට ක්‍රොවේෂියාවෙහි ද, පසු ව බොස්නියාවේ සහ හෙට්සගෝවීනියාවේ ද යුද්ධය පටන් ගැණිනි. වසරක් ඇතුළත, එක් මහජන සමූහාණ්ඩුවකින්, නව ජනපද පහක්, තමන්ගේ ම දේශ සීමාවන්, නීති, සහ මුදල් වර්ගයන් පිහිටුවා ගන්නට දැඩි වෑයමක් දරමින් සිටියහ. සාක්ෂිකරුවන් සිය ගණනකට තමන්ගේ නිවෙස්වලින් පලා ගොස්, තම සහෝදරයන්ගේ ස්ථානවල ආරක්ෂාව සොයා ගන්නට සිදු විය. නැගෙනහිර යුරෝපයේ වෙනත් රටවල මෙන්, වඩා විශාල නගරවල හදිසි අවස්ථා කමිටු පත් කරන ලද අතර, ඒවා විසින් අපගේ අවශ්‍යතා ඇති සහෝදරයන් හට නවාතැන්, ආහාර, සහ රෙදි පිළි සැපයීම බලා කියා ගන්නා ලදි. පසුගිය සේවා වසරේ, ගැටලු පැන නැග ඇති ප්‍රදේශවල වූ සභාවන්හි සහෝදරයන් හට ආහාර ටොන් 55ක් පමණ බෙදා හරින ලදි. අගය කිරීම පෙන්වා ඇති ලිපි රාශියක් ලැබී තිබේ.
ඩුබ්රෝවින්ක් ප්‍රාන්තයේ සහෝදරයෝ තමන්ට ලැබුණු උපකාරය ගැන කෙතරම් ස්තුති වන්ත වෙනවාදැයි සඳහන් කළහ. එක් සහෝදරියක් ආහාර පාර්සලයක් අතැතිව තම නිවස වෙත යමින් සිටි අතර, ඈ බිත්තර මිල දී ගත්තේ කොහෙන්දැයි එක් අසල්වැසි තැනැත්තියක් ඇගෙන් විචාලා ය. වෙනත් ප්‍රදේශයක සිටි තම ආත්මික සහෝදරයන් ඒවා එවා තිබුණු බව ඈ කීවා ය. අසල්වැසි තැනැත්තිය පුදුම වූවා ය. වෙනත් ප්‍රදේශයක දී, ස්ලෝවේනියාවේ එක් නාඳුනන මිනිසෙක් වැඩිමහල්ලකු ව අමතා, මෙසේ පැවසී ය: “යෙහෝවඃ වහන්සේගේ සාක්ෂිකරුවන් තමන්ගේ සහෝදරයන්ගෙන් ලැබුණු ආහාර සාධාරණ විදිහට බෙදා හරින බව මට දැන ගන්ට ලැබුණා. මම පාර්සල් කිහිපයක් මිනිසුන් වෙත යවා තිබෙනවා; කෙහොම වුණත්, ඒවා යැවුව තැන්වලට ලැබී නැහැ. එවැනි සහනාධාර ආහාර ඔබ වෙත එවන්නට මට පුළුවන් ද, එතකොට ඔබට පුළුවන්නේ ඒවා බෙදා දෙන්ට?” එමෙන් ම, පුවත් පත් හා ගුවන් විදුලිය ද අපගේ සහනාධාර සේවය ගැන අනුග්‍රහාත්මක අන්දමින් වාර්තා කළේ ය.
වර්ෂ 1991 දී, සාග්‍රෙබ් හි පැවැති ජාත්‍යන්තර සමුළුවේ දී බව්තීස්ම වූ සහෝදරයෙක්, පැන නැඟෙමින් තිබෙන්නාවූ දුෂ්කරතාවය තේරුම් ගෙන මුළු ආහාර ගබඩාවක් ම මිලට ගත්තේ ය. යුද්ධය පවතින ප්‍රදේශය සමීපයෙන් පිහිටි තම නිවස වෙත ඔහු ආහාර තොගය ගෙන ගියේ ය. ආහාර හිඟය වඩාත් දරුණු අතට හැරෙනවාත් සමඟ ම, මෙම තොගය සහෝදරයන් හට සැබෑ ආශීර්වාදයක් බවට ඔප්පු විණි.
වටලන ලද සරායේවෝ හි සහෝදරයන් සඳහා විශාල ට්‍රක්රථයකින් අත්‍යවශ්‍ය ආහාර ද්‍රව්‍ය රැගෙන යාමට අවසරයක් ලබා ගැනීමට හැකි විය. මෙය සාර්ථක ලෙස ප්‍රවාහනය කළ බව අප දන්වන්නේ සතුටිනි.
පැවැති සටන් මගින් පුරවැසියන් ගණනාවකගේ ජීවිත බිලි ගෙන ඇත. මෙම සේවා වසරේ අවසානය වන විට, අපගේ සහෝදර සහෝදරියන් හය දෙනෙක් සහ උනන්දුව දැක්වූ පුද්ගලයන් දෙදෙනෙකුට තම ජීවිත අහිමි වූ බව ද, ඇතමෙක් තුවාල ලද බව ද කනගාටුවෙන් පළ කරන්නෙමු.
කෙසේ වුවද, සමස්තයක් වශයෙන් ගත් කල, යෙහෝවඃ වහන්සේගේ සාක්ෂිකරුවෙකු වීම ආරක්ෂාවක් බව බොහෝ අත්දැකීම්වලින් පෙන්වයි. එක් අවස්ථාවක දී, සහෝදරයන් බෙල්ග්‍රේඩ් හි පැවැති සමුළුවකට බසයෙන් ගමන් කරන කල, බසය නැවැත්වූ හමුදා භටයෝ, එක්තරා ආගමකට අයත් අය ඔවුන් අතරේ සිටිනවාදැයි විචාළහ. ඔවුන් අතරේ එවැනි කිසිවෙක් නැති බව සහෝදරයෝ පිළිතුරු දුන්හ. ඔවුන්ට තම හැඳුනුම් පත් පෙන්වීමට සිදු වූ අතර, තමන් එම ආගමට අයත් වේ යයි අඟවන නාම ඔවුන්ගෙන් ඇතමෙකුට තිබිණි. ඔවුන් බොරු කීවා යයි සොල්දාදුවන් චෝදනා නැඟූ නමුත්, එම පල්ලියෙන් අස් වූ බවට පෙන්වන සටහන් පත් සහෝදරයන් ළඟ තිබිණි. ඔවුන් එම ආගමට අයත් ව ඉපදුණත්, දැන් තමන් යෙහෝවඃ වහන්සේගේ සාක්ෂිකරුවන් බවත්, තම සමුළුව කරා යමින් සිටින බවත් සඳහන් කළහ. මේ සමඟ ම හමුදා භටයෝ ඔවුනට යාමට ඉඩ හැරියෝ ය.
පුරෝගාමින් තමන්ගේ සේවය නොපිරිහුණු ජ්වලිතයකින් යුතු ව දිගට ම කර ගෙන යන අතර, මෙය වැඩකටයුතු සඳහා සැබෑ පෙලඹ වීමක් බවට ඔප්පු වී තිබේ. මුරටැඹ සඟරාව, එහි උද්‍යෝගිමත් කවරයෙන් යුතු ව පූර්ණ වර්ණ ගැන් වී, ප්‍රදේශයේ ප්‍රධාන භාෂා සියල්ලට ම සමගාමී ව පරිවර්තනය කරනු ලැබේ. එය, සත්‍යය හා ධර්මිෂ්ඨකමට ප්‍රේම කරන සෑම දෙනාට ම ඔවුන්ගේ ආත්මික ‘කෑම කොටස නියම වේලාවට’ සපයමින් තිබේ. (ලූක් 12:42) වර්ෂ 1992 සේවා වසර තුළ දී, නව සහෝදර සහෝදරියන් 674ක් බව්තීස්ම වූහ.
සහතික ව ම, නැගෙනහිර යුරෝපයේ සහෝදරයන් දෙවියන් වහන්සේගේ නාමය උදෙසා ඔවුන් විසින් පෙන්වන ලද ප්‍රේමය සහ ඔවුන් කරන ලද වැඩ උන් වහන්සේ විසින් අමතක කර නැත. එපමණක් නොව, ස්වකීය නමස්කාරකයන්, කොතැනක ජීවත් වුවත්, හෙබ්‍රෙව් 6:11 හි පාවුල් ඊළඟට දුන් කදිම උපදෙස අනුගමනය කරනවාට උන් වහන්සේ ආශා කරන සේක, එහි මෙසේ සඳහන් වෙයි: “නුඹලාගෙන් එකිනෙකා අන්තිම දක්වා බලාපොරොත්තුවේ නිසැකකම සඳහා එම උත්සාහවන්තකම පෙන්වනවාට අපි ආශා ඇත්තෙමුව.”