“සුභ උදෑසනක්! ඔබ දෙවියන් වහන්සේගේ නම කුමක් ද කියා දන්නවා ද?”
බ්‍රසීලයේ යෙහෝවඃ වහන්සේගේ සාක්ෂිකරුවන්ගේ ශාඛා කාර්යාලයට, ෆෝර්ටාලේසා නුවර සිට 12 වයසැති නිඹුල් සහෝදරියන් දෙදෙනෙකු වෙතින් පහත සඳහන් ලිපිය ලැබුණි:
“වර්ෂ 1990 දී, අපි පස් වෙනි ශ්‍රේණියේ ඉගෙනුම ලබන විට, අපගේ පාසල විද්‍යා, කලා, සංස්කෘතික සල්පිළක් සංවිධානය කළා. අනෙක් සිසුන් විසින් සූදානම් කිරීමට සැලසුම් කරමින් තිබෙන දේවලට වඩා අපගේ ඉදිරිපත් කිරීම වෙනස් එකක් වීමට අපට වුවමනා බව අපි ගුරුවරයාට කීවා. අපි යෙහෝවඃ වහන්සේ සහ බයිබලය ගැන කථා කරනවා ඈ අසා තිබුණ නිසා ඈ අපට මෙසේ යෝජනා කළා: ‘ඔබට පුළුවන් ඔබගේ දෙවියන් ගැන ලියන්න!’
“මෙය සාක්ෂියක් දීමට ප්‍රස්තාවක් බව දුටු අපි, යෙහෝවඃ වහන්සේගේ නාමය අවධානයට ලක්කරවා තිබූ බයිබල් පොත් පත් එකට ප්‍රදර්ශනයට තැබීමට තීරණය කළා. ගීතාවලිය 83:18 [සිංහල බයිබලයේ 83:17] හි විශාල කරන ලද අකුරුවල නිපැයුමක් අපි මේ සඳහා සූදානම් කළ අතර, විවෘත කරන ලද බයිබලයක පින්තූරයකට එය ඇලවූවා. තව ද, යෙහෝවඃ වහන්සේගේ නම අඩංගු වෙන බයිබල් පරිවර්තන කිහිපයක් අපි මේසයක් මත තැබුවා. එම මේසය මත ම, අපි බයිබල් පොත් පත් වර්ග කිහිපයක් තැබුවා. ඉතා ප්‍රසිද්ධ චිත්‍රපටයක යෙහෝවඃ වහන්සේගේ නාමය සඳහන් වූ එක් උදාහරණයක් පෙන්වීමට අපි වීඩියෝ කැසට් යන්ත්‍රයක් සහ රූපවාහිනි යන්ත්‍රයක් මේසයේ කෙළවරේ තැබුවා.
“සල්පිළ පැවැත්වෙන අතරේ දී, පුද්ගලයෙක් අපේ මේසය කරා එන විට, අපි මෙසේ කියනවා: ‘සුභ උදෑසනක්! ඔබ දෙවියන් වහන්සේගේ නම කුමක් ද කියා දන්නවා ද?’ ප්‍රතිචාරය දැක්වීමට අමුත්තා හට ප්‍රස්තාවක් දුන්නායින් පසු, අපි තවදුරටත් මෙසේ කියනවා: ‘මේ බලන්න! උන් වහන්සේගේ නාමය යෙහෝවඃ බව බයිබල් පරිවර්තන කිහිපයක් පෙන්වනවා.’ විවිධ බයිබල් කිහිපයක, එනම් හොවාඕ ෆෙරේරා ඩි අල්මෙයිඩාගේ පරිවර්තනය, ද ජෙරුසලම් බයිබල්, සහ ද න වර්ල්ඩ් ට්‍රාන්ස්ලේෂන් වැනි පරිවර්තනවලින් නාමය පෙන්වනවා. ඊට පසු, චිත්‍රපටයේ ප්‍රධාන නළුවා, දෙවියන් වහන්සේගේ නාමය වශයෙන් යෙහෝවඃ යන නාමය කැපී පෙනෙන්ට සලස්වන දර්ශනය අපි වාදනය කළා. මිනිසුන් උනන්දුවක් පෙන් වූ විට, අපි ඔවුනට තවත් තොරතුරු සමඟ සඟරාවක් හෝ පත්‍රිකාවක් දුන්නා.
“අපගේ මේසය කරා පැමිණි යෞවනයෙක්, ක්වෙස්චන්ස් යං පීපල් ආස්ක්—ආන්සර්ස් දැට් වර්ක් නමැති පොත අපෙන් ඉල්ලා සිටියා. අපගේ ගුරුවරයා ඔබගේ පවුල් ජීවිතය සන්තෝෂවත් කරගැනීම යන පොත පරීක්ෂා කොට, පුදුමයෙන් මෙන් මෙසේ කීවා: ‘ශා! මොනතරම් සිත්ගන්නා පොතක් ද!’ සල්පිළ අවසන් වන විට, අපි පොත් 7කුත්, පත්‍රිකා 18කුත්, සඟරා 67කුත් බෙදා දී තිබුණා. අපිට සල්පිළේ තුන් වෙනි ත්‍යාගය දිනා ගැනීමට පුළුවන් වුණා. එහෙත් සියල්ලට ම වඩා යෙහෝවඃ වහන්සේ යන දිව්‍ය නාමය ප්‍රසිද්ධ කිරීමට සැලැස්වීමේ වරප්‍රසාදය ලැබීම ගැන අපි බොහෝ සෙයින් සතුටු වුණා.”