බයිබලය කලින් පැවසූ දෑ කොතරම් විශ්වාසදායක ද?
අද දින ඉතිහාස පොත් සුලභ ය. පෙර සිද්ධීන් පිළිබඳ වූ මෙම වාර්තාවන් ඇත්තෙන් ම බොහෝ විට සිත් ඇදගන්නා සුලු බව තහවුරු වී ඇත. අප ඒවා කියවන විට, පුරාතන සිද්ධීන්හි අපත් සිටිනවා යන්න සේ අප සිතින් මවා ගන්නවා විය හැක. නිහඬ පිටු තුළින් ජනයා, ස්ථාන, හා සිද්ධීන් පිළිබඳ ව ඇති පුවත් ප්‍රාණවත් වනවාත් සමඟ ම, අපගේ සිතින් මවා ගැනීමේ ශක්තිය දෙගුණ තෙගුණ වනවා ද විය හැක.
බයිබලය ද—පුදුමාකාර වූ ඓතිහාසික වාර්තාවන්ගෙන් පූර්ණ—මෙවන් පොතකි. එහි පිටු තුළින් අපට ආබ්‍රහම්, ඔහුගේ භාර්යාව වන සාරා, දාවිත් රජ, එස්තර් රැජින, හා ශ්‍රේෂ්ඨ ගුරුතුමා වන, යේසුස් ක්‍රිස්තුස් වහන්සේ වැනි පුරුෂයන් හා ස්ත්‍රීන් ව හොඳින් හඳුනා ගන්නට පුළුවන. අපට ඇත්ත වශයෙන් ම, ඔවුන් සමඟ ගමන් කරන්නට පුළුවන, ඔවුන් කී දේ අසන්නට පුළුවන, එමෙන් ම ඔවුන් දුටු දේ දකින්නට පුළුවන. එහෙත් බොහෝ දෙනෙක් බයිබලය ඉතිහාස පොතකට වඩා වැඩි යමක් වන බව කල්පනා කරති. කල් ඇති ව ලියන ලද ඉතිහාසය යයි හඳුන්වනු ලබන දෙය එහි අඩංගු වී ඇති බව ඔවුහු විශ්වාස කරති. ඒ මන්ද? ඊට හේතුව බයිබලය කලින් පැවසූ දෑ නොහොත් අනාවැකිවලින් පිරී තිබීම ය.
එහෙත්, බයිබලයේ පුරෝකථන කොතරම් විශ්වාසදායක ද? බයිබලයේ අනාවැකි අතීතයේ සිද්ධීන් තුළ ඉෂ්ට වූයේ නම්, අනාගතික සිද්ධීන් සම්බන්ධයෙන් වූ එවන් පුරෝකථන ඉෂ්ට වනු ඇතැයි අප අපේක්ෂා කළ යුතු නොවේ ද? බයිබල් අනාවැකි විශ්වාසදායක දැයි බැලීමට අපි දැන් උදාහරණ කීපයක් සලකා බලමු.
ලෝක වේදිකාව මත ඉශ්‍රායෙලය හා අෂූරිය
පොදු යුගයට පෙර 778 දී පමණ අනාවැකි ඵල කරන්නට පටන් ගත්, දෙවියන් වහන්සේගේ දිවැස්වර යෙසායා, මෙසේ පුරෝකථනය කළේ ය: “එප්‍රායිම්හි [ඉශ්‍රායෙලයේ] බේබද්දන්ගේ උදාරතර ඔටුන්න පයින් පාගාදමනු ලබන්නේය. සාරවත් මිටියාවතේ මුදුන මත්තෙහි තිබෙන අලංකාර දීපිතමත්කම වන පරවෙන මල නියඟ කලට පෙර පළමුවෙන් ඉදෙන අත්තික්කා ගෙඩියක් මෙන් වන්නේය; ඒක දකින අය එය දුටුවාම අතට ගත් කෙණෙහිම ගිලගන්නේය.” (යෙසායා 28:3, 4) පොදු යුගයට පෙර අටවන ශතවර්ෂයේ මැද භාගයේ, අනාවැකි ඵල කරන ලද ආකාරයට, ඉශ්‍රායෙලයේ අගනුවර වූ සමාරිය, අෂූරීය හමුදා බලඇණි විසින් කඩා ගිල දැමීමට සූදානම් ව තිබූ ඉදුනු අත්තික්කා ගෙඩියක් බවට පත් විය. පොදු යුගයට පෙර 740 දී අෂූරිය විසින් සමාරිය පරාජය කරන ලද අවස්ථාවෙහි සිදු වූයේ ද ඒ දෙය ම ය.—2 රාජාවලිය 17:6, 13, 18.
කල්යත් ම ඉතිහාසයට එකතු වීම සඳහා අෂූරිය හට අවස්ථාව එළඹුණි. එහි අගනගරය වූ නිනිවය, වහලුන්ට කෲර ලෙස සැලකීම වෙනුවෙන් කොතරම් අපකීර්තිමත් නමක් දැරුවේ ද යත් එය “ලේ වගුරුවන නුවර” යනුවෙන් ද හඳුන්වනු ලැබී ය. (නාහුම් 3:1) යෙහෝවඃ දෙවියන් වහන්සේ ම නිනිවයේ විනාශය නියම කර තිබුණි. උදාහරණයක් වශයෙන්, දිවැස්වර නාහුම් තුළින් දෙවියන් වහන්සේ මෙසේ වදාළ සේක: “බලව, මම නුඹට විරුත්ටධය . . . පිළිකුල් දේවල් නුඹ පිට හෙළා, නුඹට අගෞරව කර, නුඹ කෝලමක් කරන්නෙමි. නුඹව දකින සියල්ලෝද නුඹ වෙතින් පලා ගොස් කථාකොට: නිනිවය නාස්තිවිය . . . [යයි] කියන්නෝය.” (නාහුම් 3:5-7) අෂූරියේ විනාශය හා නිනිවයේ පාළු කිරීම ශෙපනියා ද පුරෝකථනය කළේ ය. (ශෙපනියා 2:13-15) පුදුමය දනවන අයුරින්, බබිලෝනීය රජ වූ නාබෝපොලාසර්ගේත්, මේදියාවේ රජ වූ සයියැක්සාරීස්ගේත් ඒකාබද්ධ හමුදා නිනිවය කොල්ල කා එය සහමුලින් ම බිඳ හෙලූ අවස්ථාවෙහි, එනම්, පො.යු.පෙ. 632 දී මෙම අනාවැකි ඉෂ්ට විය—එය කොතරම් පූර්ණ ආකාරයකට කරනු ලැබුවේ ද කියතොත් වසර 2,000කට වැඩි කාලයකට එම නගරය පිහිටි ස්ථානය පවා සොයා ගත නොහැකි විය. ඉන් අනතුරුව බබිලෝනීය අධිරාජ්‍යය ලෝක වේදිකාවට පිවිසුණේ ය.
බබිලෝනියේ විනාශය කලින් පවසන ලදි
බයිබලයේ බබිලෝනීය අධිරාජ්‍යය පරාජය කරනු ලබන බවට කලින් පවසන ලද අතර එහි අගනුවර වන, බබිලෝනිය විනාශ වන ආකාරය ද පුරෝකථනය කරන ලදි. ඊට ශතවර්ෂ දෙකකට පමණ පෙර, දිවැස්වර යෙසායා එප්‍රාත් ගංගාව හිඳී යනු ඇතැයි අනතුරු ඇඟවී ය. එය බබිලෝනිය තුළින් ගලා ගිය අතර ගඟ දිගේ තිබූ ගේට්ටු නගරයේ ආරක්ෂාව සඳහා ඉතා වැදගත් කාර්යයක් ඉටු කළේ ය. එම අනාවැකි කෝරේෂ් ව ජයග්‍රාහකයා හැටියට නම් කළ අතර බබිලෝනියේ “දොරවල්” ආක්‍රමිකයන්ට වසා තබනු නොලබන බවත් සඳහන් කළේ ය. (යෙසායා 44:27–45:7) ඒ අනුව, මහා කෝරෙෂ්ගේ හමුදාවන් සිය ප්‍රහාරය දියත් කළ එම රාත්‍රියේ පැවති උත්සවයක් තුළ දී එප්‍රාත් ගංගා දිගේ තිබූ බබිලෝනියේ දොරවල් විවෘත ව තැබෙන බවට දෙවියන් වහන්සේ වගබලා ගත් සේක. එනිසා, දුෂ්කරත්වයකින් තොර ව, ඔවුහු ගං පත්ල දිගේ ගොස් නගරයට ඇතුල් වී බබිලෝනිය අල්ලා ගත්හ.
ඉතිහාසඥ හෙරොඩෝටස් මෙසේ ලීවේ ය: “කෝරෙෂ් . . . සිය හමුදාවන්ගෙන් කොටසක් එප්‍රාත් ගංගාව [බබිලෝනිය] තුළට ගලා යන ස්ථානයෙහිත් තවත් බලඇණියක් එය පිටතට ගලා යන ස්ථානයෙහිත් රඳවා තැබී ය. ජලය අවශ්‍ය පමණට නොගැඹුරු තත්ත්වයකට පත් වූ බව ඔවුන් දුටු වහා ම ගං පතුල දිගේ බලෙන් ඇතුල් වන ලෙස මේ දෙකොටසට ම අණ දී තිබුණි. . . . හාරන ලද ඇලක් දිගේ ඔහු එම ගංගාව (එවිට වගුරු බිමක් ව තිබූ) විලක් තුළට හරවා යැවූ අතර මෙයාකාරයෙන් ගං පත්ලේ ජලය කොතරම් අඩු කරනු ලැබුවේදයත් ඒ දිගේ පයින් ගමන් කළ හැකි තත්ත්වයක් ඇති විය. එම අරමුණ සඳහා බබිලෝනියේ රඳවා තිබූ පර්සීය හමුදා, මේ වන විට මනුෂ්‍යයෙකුගේ කලවා මැද හරියට පමණ ගැඹුරු ව තිබූ, ගඟට ඇතුල් වී, ඒ දිගේ ගමන් කොට, නගරයට ඇතුල් වූහ. . . . එහි ප්‍රීති උත්සවයක් පැවැත්වෙමින් තිබූ අතර භයානක වූ අවසාන ප්‍රතිඵලය මගින් ඔවුන් ප්‍රකෘති සිහියට පැමිණෙන තුරු සතුරන්ගේ ග්‍රහණයට නගර ගොදුරු වන විට පවා ඔවුහු නටමින් විනෝද වෙමින් සිටියහ.”—ඔබ්‍රි ඩි සෙලින්කෝට් විසින් පරිවර්තනය කරන ලද හෙරොඩෝටස්—ද හිස්ටරීස්.
එය සිදු වූ රාත්‍රියේ ම, දෙවියන් වහන්සේගේ දිවැස්වර දානියෙල් සිදු වෙන්නට තිබෙන විනාශයක් පිළිබඳ ව බබිලෝනියේ පාලකයාට අනතුරු ඇඟවී ය. (දානියෙල්, 5වන පරිච්ඡේදය) එවක් පටන් යම් කාලයක් ගත වන තුරු දුර්වල වූ බබිලෝනියක් පැවතුණි. උදාහරණයක් හැටියට, ප්‍රේරිත පේතෘස් පො.යු. පළමුවන ශතවර්ෂයේ සිය පළමු ආනුභාවය ලත් ලිපිය ලීවේ එතැන් සිට ය. (1 පේතෘස් 5:13) එහෙත්, යෙසායාගේ අනාවැකියෙහි, “බබිලෝනිය දෙවියන්වහන්සේ විසින් නාස්තිකළ සොදොමටද ගොමොරාවටද සමානවන්නේය. එහි කවදාවත් වැසියෙක් නොවන්නේය” යයි ද පවසා තිබුණි. එමෙන් ම, දෙවියන් වහන්සේ, “මම . . . බබිලෝනියෙන් නාම මාත්‍රයද ඉතිරි අයද දරුමුනුබුරන්ද සිඳදමන්නෙමි” යයි වදාරා තිබුණි. (යෙසායා 13:19-22; 14:22) කලින් පවසා තිබුණු ආකාරයට, බබිලෝනිය අවසානයේ දී සුන්බුන් ගොඩක් බවට පත් විය. එම පුරාතන නගරය ප්‍රතිසංස්කරණය කිරීමෙන් සංචාරකයන් ඒ කරා ආකර්ෂණය විය හැකිමුත්, එයට “ඉතිරි අයද දරුමුනුබුරන්ද” කවරදාකවත් නොසිටිනු ඇත.
බබිලෝනිය අල්ලා ගන්නා ලද අවස්ථාවෙහි එහි සිටි යෙහෝවඃ වහන්සේගේ අනාගතවක්තෘ—එනම් දානියෙල්, ආක්‍රමණය කරන්නා වූ මේදවරුන් හා පර්සිවරුන් සම්බන්ධ දර්ශනයක් දුටුවේ ය. ඔහු අං දෙකක් ඇති බැටළුවෙක් ද, තමාගේ ඇස් අතරේ මහත් අඟක් ඇති එළුවෙක් ද දුටුවේ ය. එම එළුවා එම බැටළුවාට පහර දී උගේ අං දෙක බිඳ දමමින් ඌ ව බිම හෙලුවේ ය. ඉන් පසු ව එළුවාගේ මහත් අඟ බිඳිණ ලදුව, ඒ වෙනුවට අං සතරක් හට ගත්තේ ය. (දානියෙල් 8:1-8) බයිබලය කලින් පැවසූ පරිදි, එමෙන් ම ඉතිහාසය සනාථ කර ඇති ආකාරයට, අං දෙකක් ඇති බැටළුවා මේදය හා පර්සියාව නියෝජනය කළේ ය. එළුවා ග්‍රීසිය නියෝජනය කළේ ය. එමෙන් ම උගේ “මහත් අඟ” ගැන කුමක් කිව හැකි ද? මෙය මහා ඇලෙක්සැන්ඩර් බව සනාථ විය. සංකේතාත්මක මහත් අඟ කඩා දමනු ලැබූ විට, සංකේතවත් අං (නැතහොත් රාජ්‍යයන්) සතරක් ඒ වෙනුවට හට ගත්තේ ය. අනාවැකි සනාථ කරමින්, ඇලෙක්සැන්ඩර් මිය යාමෙන් පසු, ඔහුගේ සේනාධිපතියන් සතරදෙනෙක්—මිසරයේ හා පලස්තීනයේ ටොලමි ලාගස් ද, මෙසපොටේමියාවේ හා සිරියාවේ සෙලූෂස් නිකටෝර් ද, මකිදෝනියේ හා ග්‍රීසියේ කසැන්ඩර් ද, ත්‍රාස් හා සුළු ආසියාවේ ලයිසිමැකස් ද—බලය තහවුරු කළහ.—දානියෙල් 8:20-22.
දීප්තිමත් අනාගතයක් පිළිබඳ කලින් පැවසීම්
බබිලෝනියේ විනාශය හා මේද-පර්සියාවේ බිඳ වැටීම වැනි සිද්ධීන් සම්බන්ධ බයිබලයේ කලින් පවසන ලද දෑ අතීතයේ ඉෂ්ට වූ ශුද්ධ ලියවිලිමය අනාවැකි බොහොමය අතරින් උදාහරණ කීපයක් පමණි. දෙවියන් වහන්සේගේ ආලේප ලත් තැනැත්තා වන, මෙසියස් වහන්සේ හේතුවෙන් සැබෑ වන්නා වූ දීප්තිමත් අනාගතයක් පිළිබඳ කලින් පැවසීම් ද බයිබලයේ අඩංගු ව ඇත.
හෙබ්‍රෙව් ශුද්ධ ලියවිල්ලේ ඇති මෙසියස් වහන්සේ පිළිබඳ ව ඇතැම් කලින් පැවසීම් ක්‍රිස්තියානි ග්‍රීක් ශුද්ධ ලියවිල්ලේ ලේඛකයන් විසින් යේසුස් ක්‍රිස්තුස් වහන්සේ සම්බන්ධයෙන් අදාළ කරනු ලැබී ය. දිවැස්වර මීකා විසින් පුරෝකථනය කර ඇති ආකාරයට, යේසුස් වහන්සේ බෙත්ලෙහෙමේ උපන් බව ශුභාරංචියේ ලේඛකයෝ පෙන්නා දුන්හ. (මීකා 5:2; ලූක් 2:4-11; යොහන් 7:42) යෙරෙමියාගේ අනාවැකිය ඉෂ්ට කරමින්, යේසුස් වහන්සේගේ උපතට පසු ළදරුවෝ මරා දමනු ලැබූහ. (යෙරෙමියා 31:15; මතෙව් 2:16-18) ක්‍රිස්තුස් වහන්සේ කොටළු පැටවෙක් පිට නැගී යෙරුසලමට ඇතුල් වූ අවස්ථාවේ දී සෙකරියාගේ වදන් (9:9) ඉෂ්ට විය. (යොහන් 12:12-15) තව ද යේසුස් වහන්සේ ව වධ කණුවේ ඇණ ගැසීමෙන් පසු හේවායෝ උන් වහන්සේගේ වස්ත්‍ර බෙදා වෙන් කළ විට, “මාගේ වස්ත්‍ර ඔවුන් අතරේ බෙදා ගනිති, මාගේ සළුව පිණිස පසඇට දමති” යන ගීතිකාකරුගේ වදන් එමගින් ඉටු කරන ලදි.—ගීතාවලිය 22:18.
මෙසියස් වහන්සේ පිළිබඳ කලින් පවසන ලද වෙනත් දෑ වෙනත් මනුෂ්‍ය වර්ගයා සඳහා වූ සන්තෝෂවත් කාලයක් වෙත යොමු දක්වයි. “පුරාතන තැනන්වහන්සේ” වන යෙහෝවඃ වහන්සේගෙන් “මනුෂ්‍ය පුත්‍රයෙකුට සමාන කෙනෙක්” “ආණ්ඩු බලයද ගෞරවයද රාජ්‍යයක්ද” ලබනු දානියෙල් දර්ශනයක දී දුටුවේ ය. (දානියෙල් 7:13, 14) එම ස්වර්ගීය රජාණන් වන, යේසුස් ක්‍රිස්තුස් වහන්සේගේ මෙසියානු පාලනය සම්බන්ධයෙන් යෙසායා මෙසේ ප්‍රකාශ කළේ ය: “උන්වහන්සේගේ නාමය අපූර්වය, මන්ත්‍රීවරයාය [අපූර්ව මන්ත්‍රීවරයා ය NW], පරාක්‍රමවත් දෙවියන්වහන්සේය, සදාකාල පියාණෝය, සමාදානයේ කුමාරයායයි කියනු ලබන්නේය. මෙතැන් පටන් සදාකාලයටම දාවිත්ගේ සිංහාසනයත් ඔහුගේ රාජ්‍යයත් යුක්තියෙන්ද ධර්මිෂ්ඨකමෙන්ද ස්ථිරකර පිහිටුවන පිණිස ඒවා කෙරෙහි උන්වහන්සේගේ ආණ්ඩුවේ විශාලත්ටයටත් සමාදානයටත් කෙළවරක් නොවන්නේය. සේනාවල ස්වාමීන්වහන්සේගේ [යෙහෝවඃ වහන්සේගේ NW] ජ්වලිතය මෙය ඉෂ්ටකරන්නේය.”—යෙසායා 9:6, 7.
මෙසියස් වහන්සේගේ ධර්මිෂ්ඨ පාලනය පූර්ණ ආධිපත්‍යයක් පැවැත්වීමට පෙරාතුව, යම් අති වැදගත් දෙයක් සිදු විය යුතු ම ය. මේ පිළිබඳවත් බයිබලයේ කලින් පවසා තිබුණි. මෙසියානු රජ සම්බන්ධයෙන්, ගීතිකාකරු මෙසේ ගායනා කළේ ය: “බලවන්තයාණෙනි, ඔබගේ . . . කඩුව ඉඟටියෙහි බැඳගත මැනව. සැබෑකමත් මොළොක්කමත් ධර්මිෂ්ඨකමත් සඳහා . . . වැඩිය මැනව.” (ගීතාවලිය 45:3, 4) අපගේ දවසට යොමු දක්වමින්, ශුද්ධ ලියවිල්ල මෙසේ ද පුරෝකථනය කළේ ය: “ඒ රජුන්ගේ දවස්වලදී ස්වර්ගයේ දෙවියන්වහන්සේ කිසිකලක නැති නොවන්නාවූ රාජ්‍යයක් පිහිටුවනසේක, ඒකේ ආණ්ඩුව අන් සෙනගකට අත්අරිනු නොලබන්නේය; . . . ඒක ඒ සියලු රාජ්‍යවල් පොඩිකර නැතිකරන්නේය, එයද සදාකාලේටම පවතින්නේය.”—දානියෙල් 2:44, 45.
හැත්තෑ දෙවන ගීතාවලිය මෙසියානු පාලනය යටතේ පවතින්නට යන තත්ත්වයන් පිළිබඳ පූර්ව දර්ශනයක් සපයයි: නිදසුනක් වශයෙන්, “උන්වහන්සේගේ දවස්වලදී ධර්මිෂ්ඨයා සඵලවන්නේය; සඳ නැතිවන තෙක්ම බොහෝ සමාදානයද වන්නේය,” යන්න ගත හැකියි. (7වන වගන්තිය) එවිට පීඩා හෝ ප්‍රචණ්ඩතාවය නොතිබෙනු ඇත. (14වන වගන්තිය) “පොළොව මත බොහෝ ධාන්‍ය ඇති වන්නේ ය; කඳු මුදුන් මත ඒවා පිරී ඉතිරි යන්නේ ය.” මෙනිසා කිසිවෙක් සාගින්නෙන් නොසිටිනු ඇත. (16වන වගන්තිය NW) නිකම් සිතා බලන්න! ඔබට මේවාත් වෙනත් ආශීර්වාදයනුත් භූමික පාරාදීසයක ප්‍රීතියෙන් භුක්ති විඳින්නට ලැබෙන්නේ, වත්මන් දේවල පිළිවෙළ වෙනුවට දෙවියන් වහන්සේගේ පොරොන්දු වූ නව ලෝකය පිහිටුවනු ලබන විට ය.—ලූක් 23:43; 2 පේතෘස් 3:11-13; එළිදරව් 21:1-5.
එසේ නම්, නිසැක ව ම, බයිබලයේ කලින් පවසන දේ ඔබ විසින් පරීක්ෂා කර බැලීම උචිත දෙයකි. එනිසා යෙහෝවඃ වහන්සේගේ සාක්ෂිකරුවන්ගෙන් වැඩි විස්තර නොවිමසන්නේ මන්ද? බයිබල් අනාවැකි පරීක්ෂාවට ලක් කිරීම, කාල ප්‍රවාහයේ අප සිටින ස්ථානය බැලීමට ඔබට උපකාරවත් වන්නට පුළුවන. එය යෙහෝවඃ දෙවියන් වහන්සේ සඳහාත්, උන් වහන්සේට ප්‍රේම කරන හා කීකරු වන සියල්ලන් කෙරෙහි සදාකාලික ආශීර්වාදයන් උදෙසා වූ උන් වහන්සේගේ පුදුමාකාර විධිවිධානය සඳහාත් ගැඹුරු අගැයීමක් ඔබගේ හෘදයේ ප්‍රවර්ධනය කළ හැකි ය.
[5වන පිටුවේ පින්තූරය]
එළුවෙක් හා බැටළු පැටියෙක් සම්බන්ධ දානියෙල්ගේ දර්ශනයේ තේරුම ඔබ දන්නෙහි ද?
[7වන පිටුවේ පින්තූරය]
පාරාදීස පොළොවක් මත සන්තෝෂවත් ජීවිතයක් පිළිබඳ බයිබලයේ කලින් පැවසීම්වල ඉෂ්ට වීම ප්‍රීතියෙන් භුක්ති විඳින්නට ඔබ එහි සිටිනු ඇත් ද?