“දෙවියන්වහන්සේගේ ගෘහය” දෙස අගය කිරීමෙන් යුක්තව බැලීම
“යෙහෝවඃවහන්සේගෙන් මම එක් දෙයක් ඉල්ලුවෙමි—එය මම සොයන්නෙමි, එනම් යෙහෝවඃවහන්සේගේ ශෝභාලංකාරය දකින පිණිසත් උන්වහන්සේගේ මාලිගාව දෙස අගය කිරීමෙන් යුක්තව බලන පිණිසත් මාගේ ජීවිතයේ සියලු දවස්වලදී යෙහෝවඃවහන්සේගේ ගෘහයෙහි වාසය කිරීමය.”—ගීතාවලිය 27:4, NW.
අගයෙන් පූර්ණ වූ දාවිත් රජ යෙහෝවඃවහන්සේගේ මාලිගාව දෙස බැලුවේ සතුටින්, නැතහොත් මහත් සොම්නසින් යුක්තවය. අද දවසේ සැබෑ නමස්කාරයේ මධ්‍යස්ථාන ගැන ඔබටත් හැඟෙන්නේ ඒ හා සමානවද? වොච් ටවර් සමිතියේ ශාඛා කාර්යාලයන්හි තිබෙන බෙතෙල් නිවාස 95කට වැඩි සංඛ්‍යාව, අපගේ කාලයේ යෙහෝවඃවහන්සේගේ නමස්කාරය හා සම්බන්ධ වන්නාවූ පහසුකම් අතර පවතී.
“මගේ වසර ගණනාවක බෙතෙල් සේවය දෙස හැරී බැලීමේදී, වසරක් පාසා වර්ධනය වූ ගැඹුරු කෘතඥතාවෙන් හා මහත් අගය කිරීමකින් එය මාව පුරවයි” යයි 1948දී ජර්මනියේ බෙතෙල් නිවසේ සේවය ආරම්භ කළ, හෙල්ගා පැහැදිලි කරන්නීය. හෙල්ගා වනාහි 1993 සේවා වසරේ “යෙහෝවඃවහන්සේගේ ශෝභාලංකාරය” දුටු ලෝක ව්‍යාප්ත ප්‍රීතිමත් බෙතෙල් සේවකයන් 13,828දෙනාගෙන් කෙනෙක් වන්නීය. බෙතෙල් යන නාමයෙන් හරියටම අදහස් කරන්නේ කුමක්ද? දෙවියන්වහන්සේට තමන් කරන සේවය බෙතෙල් ඇතුළත හෝ පිටත කළත්, යෙහෝවඃවහන්සේගේ සෑම සාක්ෂිකරුවෙකුටම මෙම විධිවිධානය දෙස අගය කිරීමෙන් යුක්තව බැලිය හැක්කේ කෙසේද?
භක්තිය ඉල්ලා සිටින නාමයක්
බෙහ්ත්-’එල්ʹ යන හෙබ්‍රෙව් වදන “දෙවියන්වහන්සේගේ ගෘහය” අදහස් කරන බැවින්, “බෙතෙල්” බෙහෙවින් උචිත නාමයක් වන්නේය. (උත්පත්ති 28:19, NW පාද සටහන) එසේය, බෙතෙල් සාදෘශ්‍ය කොට දක්වනුයේ මනාව-සංවිධානය වූ නිවසක්ය, එසේත් නැතහොත් දෙවියන්වහන්සේ හා උන්වහන්සේගේ කැමැත්ත කේන්ද්‍රගතව පවතින ‘ප්‍රඥාවෙන් ගොඩනගන ලද ගෙයක්ය.’ (හිතෝපදේශ 24:3) “ඒක හරියටම පවුලක් තුළ ජීවත් වෙනවා වගෙයි. මනාව-සංවිධානය කරන ලද දෛනික වැඩ පිළිවෙළක් අපට තිබෙනවා” යයි හර්ටා පවසන්නේ අගය කිරීමෙන් යුක්තවය. ඇය එම බෙතෙල් නිවසේම හෙල්ගා මෙන් වසර 45කට වැඩි කාලයක් සේවය කර ඇත. මෙම විශාල පවුලේ සෑම සාමාජිකයෙකුටම සතුට හා සුරක්ෂිතභාවය දනවමින්, තමාට නියම වූ වැඩ කොටසක් හා තමාට නියම වූ ස්ථානයක් ඇත. බෙතෙල් යන නාමයට ගැළපෙමින්, මනා පිළිවෙළක් හා සංවිධානයක් තිබීම සෑම අංශයකම ලක්ෂණයකි. මෙය සාමය පොලඹවයි, ශුභාරංචිය කාර්යසාධකව දේශනා කිරීමට හැකි කරවයි, එමෙන්ම “දෙවියන්වහන්සේගේ ගෘහය” ඉතා උසස් කොට සැලකීමට සභාවන්ට හොඳ හේතුවක් ලබා දෙයි.—1 කොරින්ති 14:33, 40.
මෙවන් පහසුකම් අවශ්‍ය වන්නේ මක්නිසාද? උදාහරණයක් වශයෙන්, මෙවන් සඟරා නිෂ්පාදනය කරනු ලැබුවේ බෙතෙල් මුද්‍රණාලයකය. යේසුස් ක්‍රිස්තුස්වහන්සේ විසින් කලින් දක්නා ලද අංග දෙකක් වන, රාජ්‍යයේ පණිවුඩය දේශනා කිරීම හා ආත්මික ආහාර බෙදා හැරීම සඳහා—ස්ව කැමැත්තෙන් ඉදිරිපත් වන සේවකයන්ගෙන් අනුබලය ලබන්නාවූද, යෙහෝවඃවහන්සේගේ සියලු නමස්කාරකයන් විසින් මහත් සේ ගෞරව කරනු ලබන්නාවූද—බෙතෙල් නිවාස වැනි සංවිධානාත්මක වැඩ පිළිවෙළවල් නැතිවම බැරි ඒවා වීමට සලස්වයි.—මතෙව් 24:14, 45.
මෙහි සේවා දිනයක වැඩ පිළිවෙළ ගැන ඔබට වැඩියෙන් දැනගන්නට කැමතිද? හෙල්ගා හා හර්ටා ජීවත්වන තැන, ඇමතුමක් කරන මධුර සීනු නාදයක් පෙ.ව. 6.30ට සියලුම නේවාසික ගොඩනැගිලිවල නාද වෙතත්, නිත්‍ය සේවකයන් 800දෙනාගෙන් වැඩිදෙනෙක් එම දිනයට සූදානම් වීම සඳහා ඊටත් පෙර අවදි වෙති. සඳුදා සිට සෙනසුරාදා දක්වාවූ දිනයන්හි පෙ.ව. 7.00 වනවිට, දින පදයේ සාකච්ඡාවක්, නැතහොත් උදෑසන නමස්කාරය සඳහා එම පවුල කෑම ශාලාවේ එක්රැස් වී සිටී. ඉන් අනතුරුව පෝෂ්‍යදායී උදෑසන ආහාරයක් අනුභව කෙරේ. සෑම වැඩ කරන දිනයක්ම පෙ.ව. 8.00ට පටන්ගෙන පැය අටක් පුරා පවතින අතර දහවල් ආහාරය සඳහා පමණක් වැඩකටයුතු නවත්වනු ලැබේ. (පවුල සෙනසුරාදා දිනයේ සාමාන්‍යයෙන් වැඩ කරන්නේ වරුවක් පමණි.) මුළුතැන් ගෙයි වේවා, මුද්‍රණාලයේ වේවා, ලොන්ඩරියේ වේවා, කාර්යාලයේ වේවා, වැඩපොළවල වේවා, පොත් බැඳුම් හලේ වේවා, නැතහොත් වෙනත් ඕනෑම අංශයක වේවා කිරීමට බොහෝ දෑ ඇත.
සන්ධ්‍යාවන් හා සති අන්තවල, එම පවුලේ සාමාජිකයෝ රැස්වීම් හා ප්‍රසිද්ධ දේශනා සේවය සඳහා ප්‍රාදේශීය සභාවන් සමඟ එක්ව කටයුතු කරති. බෙතෙල් සහෝදරයෝ බොහෝ දෙනෙක් මෙම සභාවන්හි වැඩිමහල්ලෝ හෝ උපස්ථා සේවකයෝ වෙති. ප්‍රදේශයේ සාක්ෂිකරුවන් මෙම සහයෝගිතාව සැබවින්ම අගය කරන අතර, මෙම කණ්ඩායම් දෙකම අන්‍යෝන්‍ය ගෞරවයෙන් හා අවබෝධයෙන් යුක්තව, එක ශරීරයක් ලෙස එක්ව එකඟත්වයෙන් කටයුතු කරයි. (කොලොස්සි 2:19) සෑම බෙතෙල් සේවකයෙක්ම ‘දෙවියන්වහන්සේගේ ගෘහයේ’ සිය වැඩ පැවරුම වෙනත් ක්‍රියාකාරකම්වලට වඩා ප්‍රමුඛත්වයක් ගන්නා බව දනී. කෙසේවෙතත්, සමතුලිත ආකල්පයකින් එකට සම්බන්ධ කරන ලද දේශනා කිරීම සඳහා වූ උද්‍යෝගය හා සභාව සමඟ හොඳින් සම්බන්ධ වී කටයුතු කිරීම බෙතෙල් සේවකයාගේ ආත්මිකත්වය ශක්තිමත් කරයි, ඔහුගේ ප්‍රීතිය වැඩි කරයි, එසේම ඔහුව පවුලේ වඩාත් ඵලදායී සාමාජිකයෙක් කරවයි. පූර්ණ-ආත්මයේ කැපවීම හා සම්බන්ධ නාමයක් දරන ‘ගෘහයක’ සේවය කරන විට, මෙම ගුණාංග කොතරම් වැදගත් වන්නේද!
බෙතෙල් සේවය සාර්ථක කරගැනීම
අසංඛ්‍යාත යෙහෝවඃවහන්සේගේ සාක්ෂිකරුවන්ට බෙතෙල් සේවය සාර්ථක කරගැනීමට උපකාර කර ඇත්තේ කුමක්ද? වසර ගණනාවක් අතීතයට දිවයන අද්දැකීම් ඇති ප්‍රංසයේ බෙතෙල් පවුලේ සාමාජිකයෝ මතු දැක්වෙන ආකාරයට අදහස් දක්වති: “යෙහෝවඃවහන්සේ සඳහා ප්‍රේමයයි. උන්වහන්සේ අපව තබන ඕනෑම ස්ථානයක නොපසුබට උත්සාහයෙන් කටයුතු කරන්නට තිබෙන අධිෂ්ඨානය; නිහතමානිකම, යටත්වීම හා සමිතියෙන් අපට දෙනු ලබන මඟ පෙන්වීමට කීකරුවීම. (ඩෙනීස්) පාවුල් විසින් රෝම 12:10හි සඳහන් කර ඇති ප්‍රතිපත්තියට, එනම් ‘ගෞරවයෙන් තම තමාට වඩා අනික් අය උතුම්කොට සලකාපල්ලා’ යන්නට ගෞරව කිරීම කොතරම් වැදගත්දැයි මා සැලකිල්ලට ගෙන තිබෙනවා. මෙම ශුද්ධ ලියවිලි පදය අපට පෙන්වන්නේ, අපගේ පෞද්ගලික මතය පිළිගන්නා හැටියට තරයේ කියා සිටිනවා වෙනුවට, අන්‍යයන්ගේ මතයන් සැලකිල්ලට ගැනීමේ වැදගත්කමයි. වෙනත් වචනවලින් කියතොත්, ප්‍රකටව සිටීමට නොසෙවීමයි.” (ජාන් ජාක්) “අප කාරණා දෙස මාංසිකවූ, මනුෂ්‍ය දෘෂ්ටියකින් බලන්නේ නම් බෙතෙල් සේවය සඳහා තිබෙන අපගේ ගෞරවය නැති වී යන්නට පුළුවන. මන්දයත් මෙය අපව යොමු කළ හැක්කේ යෙහෝවඃවහන්සේ සිය සංවිධානයට මඟ පෙන්වන බවට වූ සත්‍යය අමතක කිරීමටයි. අප අන්‍යයන්ගේ අසම්පූර්ණකම් මත පැකිලෙන්නේ නම් එවන් ගෞරවය නැතිවී යන්නට පුළුවන්” යයි බාබාරා පවසන්නීය.
බෙතෙල්හි සිටින සියල්ලන්ම අසම්පූර්ණ බැවින්, ආශ්‍රය මනා කල්පනාවෙන් යුක්තව කළ යුතුය. යෞවනයන් නැතහොත් මෑතක පැමිණි අය සිය තුල්‍යයන්ට පමණක් තමන්ගේ ඇසුර සීමා කර නොගැනීම වඩාත් හොඳය. චෝදනා කිරීමට නැතහොත් නිෂේධාත්මකව කල්පනා කිරීමට නැඹුරු වන අය බෙතෙල්හි හෝ සභාවේ වර්ධනය ගෙන දෙන ආශ්‍රයට දායක නොවෙති. අනෙක් අතට, යාකොබ් 3:17හි විස්තර කර ඇති, “ඉහළින් පැමිණෙන ප්‍රඥාව” අනුකරණය කිරීම, ආශීර්වාද ගෙන දෙයි. මෙය “පළමුකොට පිරිසිදුව, ඊළඟට සමාදානව, ඉවසිලිවන්තව [සාධාරණව, NW], යටහත්ව [කීකරුවීමට සූදානම්ව, NW], දයාවෙනුත් යහපත් ඵලවලිනුත් පූර්ණව, අපක්ෂවාදිව, අවංකව [කුහකකමින් තොරව, NW] තිබේ.” බොහෝ ඉවසිලිවන්තකම හා කරුණාවන්තකම සමඟින් වූ, මෙවන් ගුණාංග ‘දෙවියන්වහන්සේගේ ගෘහයෙහි’ කෙනෙකුගේ විසීම ප්‍රසන්න හා පොලඹවනසුලු කරවමින් එහි දක්නට ලැබෙන්නකි. සාක්ෂිකරුවන් නොවන ආගන්තුකයෝ පවා, බොහෝ විට එහි සේවකයන්ගේ යහපත් හැසිරීම, මිත්‍රශීලීත්වය හා ප්‍රීතිමත් ස්වභාවය වෙනුවෙන් ප්‍රශංසාව පළ කරති.
වසර 70කට වඩා වයස්ව සිටින එමෙන්ම 1956 පටන් ජර්මනියේ බෙතෙල් පවුලේ සාමාජිකයෙක්ව සිටි, ආනී, සේවය කිරීමට තමන් නිතර සූදානමින් සිටින ආකාරය පැහැදිලි කරන්නේ මෙසේය: “මගේ ආත්මික සුභසාධනය උදෙසා, සමිතියේ ප්‍රකාශනවල අලුත්ම තොරතුරු දැනගෙන සිටීමටත්, රැස්වීම්වලට නිතිපතා යෑමටත්, එමෙන්ම දේශනා සේවයේ නිතිපතා හවුල් වීමටත් මම මහත් වෑයමක් දරන්නෙමි. හැකිතාක් ආරෝහකය පාවිච්චි කිරීමෙන් වැලකී සිටීමෙන්, සෑම උදෑසනකම ව්‍යායාම කිරීමෙන්ද, විශේෂයෙන්ම ක්ෂේත්‍ර සේවයේ, නිතර නිතරම ඇවිදීමෙන් මම මනා ශරීර සෞඛ්‍යයක් පවත්වා ගන්නටද වෑයම් කරන්නෙමි.”
බෙතෙල් ජීවිතයේ අද්දැකීම් ලබා සිටින බොහෝ දෙනෙකු ආනී සමඟ එකඟ වනු ඇත. ඔවුන් කිසි දිනක ඉගෙන ගැනීම නවත්වන්නේ නැත, වැඩ කිරීම නවත්වන්නේ නැත. හොඳ ශරීර සෞඛ්‍යයක් පවත්වා ගැනීමට ප්‍රමාණවත් නින්දක්ද, යම් ප්‍රමාණයක ව්‍යායාමද, ආහාර අනුභවයෙහි හා පානයෙහි පමණ දැන ක්‍රියා කිරීමට ඕනෑ කෙරේ. මේ සියල්ලටම වඩා වැදගත් ලෙසින්, ඔවුන් පෞද්ගලික යාච්ඤාව හා බයිබල් පාඩම අතපසු කරන්නේ නැත.
බෙතෙල්හි පරිශුද්ධ සේවය සඳහා මහත් ගෞරවයක්
“ඔබ සේවය කරන්නේ මොන අංශයේද?” යන්න සාමාන්‍යයෙන් බෙතෙල් සාමාජිකයන්ගෙන් අසනු ලබන ප්‍රශ්නයකි. වැඩ පැවරුම් විවිධාකාර වුවත්, ඒ එක් එක් පැවරුම සෑම කෙනෙකු විසින්ම ඉතා වැදගත් කොට සැලකිය යුතුය. ඒ මන්ද? ඊට හේතුව ඒ සෑම පැවරුමක්ම—එනම් ආත්මික ආහාර මුද්‍රණය කරන්නාවූ යන්ත්‍රයක් ක්‍රියා කරවීම, රෙදි සේදීම, පවුල සඳහා ආහාර පිසීම හා පවිත්‍ර කිරීම, නැතහොත් කාර්යාල වැඩ ඉටු කිරීම යනාදි කුමක් හෝ වේවා—පරිශුද්ධ සේවයට අයත් වන බැවිනි. ඉහත සඳහන් කළ ආකාරයට, ක්‍රිස්තියානින් ඇතැම් වැඩ පැවරුම් අනෙක් ඒවාට වඩා උසස් හෝ පහත් යයි වෙනස්ව සලකන්නේ නැත. දේව මාළිගාවේ, එහි මළුවේ හා ඇතුල් භෝජන ශාලාවලදී පූජකයන් හා ලෙවීවරුන් විසින් කරන ලද අනිවාර්ය කටයුතු සියල්ල යෙහෝවඃවහන්සේට පරිශුද්ධ සේවයක් හැටියට සලකනු ලැබූ බව මතක තබා ගන්න. සත්ත්වයන්ව මරා පූජාව සඳහා සූදානම් කිරීම, තෙල් පහන් නැවත පිරවීම, පවිත්‍ර කිරීම හා මුරකරුවන්ගේ කටයුතු ඉටුකිරීම යනාදිය පවා එයට අයත් විය. ඒ හා සමානව, බෙතෙල්හි සෑම පැවරුමක්ම “ස්වාමීන්වහන්සේගේ මෙහෙයෙහි” තෘප්තිකර මෙන්ම වටිනා ක්‍රියාවක් වන්නේය, එබැවින් එය විශිෂ්ට වරප්‍රසාදයකි.—1 කොරින්ති 15:58.
“දෙවියන්වහන්සේගේ ගෘහය” කෙරෙහි අගය කිරීමෙන් යුක්තව අප බැලීම වැළැක්විය හැකි එක් ලක්ෂණයක් කෙටියෙන් සලකා බලන්න. බෙතෙල්හි මෙන්ම ඉන් පිටත සිටින ක්‍රිස්තියානින්, “ඇටවලට දිරවීමක්” වන උසූයාවට හා ඊර්ෂ්‍යාවට එරෙහිව ආරක්ෂා විය යුතුය. (හිතෝපදේශ 14:30) බෙතෙල් සේවකයන්ගේ සේවා වරප්‍රසාදයන් ගැන ඊර්ෂ්‍යා කිරීමට කිසිවෙකුට හේතුවක් නැත. මීට අමතරව, බෙතෙල් පවුලක් තුළ මාංසයේ ක්‍රියාවන්ගෙන් එකක් වන, ඊර්ෂ්‍යාව සඳහා ඉඩක් නැත. නිහතමානීව බලා සිටින්න—එය වනාහි අන්‍යයන්ට උතුම් වරප්‍රසාද දෙනු ලබන අතර, තමාව නොසලකා හරිනු ලැබුවේ යයි පෙනෙන්නට ඇති කෙනෙකු සඳහා වටිනා උපදේශයකි. එපමණකුදු නොව, බෙහෙවින් එකිනෙකට වෙනස්වන්නාවූ මූල්‍ය පසුතලයන්ගෙන් පැමිණෙන පුද්ගලයෝ එකට සමීපව ජීවත්වෙති. කෙනෙක් තමාගේ තත්ත්වයන් ‘අනෙක් තැනැත්තා සමඟ සැසඳීමෙන් යුක්තව’ බලන්නේ නම්, කොතරම් බලාපොරොත්තු භංගත්වයක් ඇති විය හැකිද! “කෑම ඇඳීම” සමඟින් සෑහීමකට පත්වීම බොහෝ දෙනෙකුට ‘දෙවියන්වහන්සේගේ ගෘහයේ’ දශක ගණනාවකට විශ්වාසනීයව සේවය කිරීමට උපකාරවත් වී ඇත.—ගලාති 5:20, 26; 6:4; 1 තිමෝති 6:8.
යෙහෝවඃවහන්සේගේ සාක්ෂිකරුවන් මෙන්ම මිලියන සංඛ්‍යාත වෙනත් අය බෙතෙල්හි ඉටු කරනු ලබන වේතනයෙන් තොර සේවාවන්ගෙන්—එනම් දෙවියන්වහන්සේ මෙන්ම අසල්වැසියා සඳහා වූ ප්‍රේමයෙන් කරන පරාර්ථකාමී වැඩවලින්—මහත්සේ ප්‍රයෝජන ලබති. වෙනත් දිව්‍යාණ්ඩු පහසුකම් හා සමානව, වොච් ටවර් සමිතියේ බෙතෙල් නිවාස හා මුද්‍රණාලවලට මූල්‍යාධාර ලැබෙන්නේ ස්වෙච්ඡා සම්මාදම්වලිනි. (2 කොරින්ති 9:7) සමිතියට සදාචාර හා මූල්‍ය අනුබලය ලබා දීමෙන්, දාවිත් රජ මෙන්ම ඉශ්‍රායෙලයේ අධිපතීන් හා ප්‍රධානීන් මෙන්, අපට “දෙවියන්වහන්සේගේ ගෘහය” සඳහා ගෞරවය හා අගය කිරීම පෙන්විය හැකිය. (1 ලේකම් 29:3-7) බෙතෙල්හි “යෙහෝවඃවහන්සේගේ ශෝභාලංකාරය” දැකිය හැක්කේ කෙසේදැයි අපි දැන් බලමු.
‘දෙවියන්වහන්සේගේ ගෘහය තුළ ආශීර්වාද
එක්රැස්වීමකට සහභාගි වන විට, එහි යෙහෝවඃවහන්සේගේ සන්තෝෂවත් නමස්කාරකයන් ඔබ පිරිවරා සිටින බැවින්, ගැඹුරු සෑහීමේ හැඟීමක් ඔබට දැනෙන්නේද? මොහොතකට කල්පනා කර බලන්න, බෙතෙල් සේවකයෙකුට ඇත්තේ සෑම දිනකම සහෝදරයන් සමූහයක් මධ්‍යයේ යෙහෝවඃවහන්සේට සේවය කිරීමේ වරප්‍රසාදයකි! (ගීතාවලිය 26:12) ආත්මික වර්ධනය සඳහා එය කොතරම් මාහැඟි බලාපොරොත්තුවක් පිරිනමයිද! එක් සහෝදරයෙක් ප්‍රකාශ කළේ, තමාගේ පෞද්ගලිකත්වය හැඩගස්වා ගැනීමට වෙනත් ස්ථානයක තමා තෙවසරක් පුරා ලද පුහුණුවට වඩා පමණට වැඩි පුහුණුවක් බෙතෙල්හි වසරක් තුළ ලද බවය. ඒ මන්ද? හේතුව වෙනත් කිසිදු ස්ථානයක මේරූ ක්‍රිස්තියානින් මෙතරම් සංඛ්‍යාවක් නිරීක්ෂණය කිරීමට හා ඔවුන්ගේ ඇදහිල්ල අනුකරණය කිරීමට ඔහුට ප්‍රස්තාවක් නොලැබීමය.—හිතෝපදේශ 13:20.
එක් විධියකින් කියනවා නම්, බෙතෙල්හිදී පුද්ගලයෙකු වටවී සිටින්නේ අද්දැකීම් ලත් උපදේශකයන්ගෙනි. මීට අමතරව, උදෑසන නමස්කාරය තුළද, බෙතෙල් පවුලේ මුරටැඹ පාඩමෙහිද හොඳින් සූදානම් කර ඇති අදහස් ප්‍රකාශයන්ට සවන් දීමෙහි හා සඳුදා සන්ධ්‍යාවන්හි දේශනවලට සවන් දෙන විටද ප්‍රයෝජනය තිබේ. අලුතෙන් පැමිණෙන අයට බෙතෙල් සඳහා ඇතුල්වීමේ පාසලෙන් උපදෙස් ලැබෙන අතර, පළමු මාස 12 ඇතුළත මුළු බයිබලයම කියවීමට පැවරුමක් ලැබේ.
වෙනත් රටවල්වලින් පැමිණෙන ආගන්තුකයන්ගේ වාර්තා හා අද්දැකීම්වලින් වැඩිමනත් දිරිගැන්වීම් ලැබේ. එපමණක්ද නොව, පාලක මණ්ඩලයේ සාමාජිකයන් නැතහොත් ඔවුන්ගේ නියෝජිතයන් ශාඛා කාර්යාල බැහැදකිනු ඇත. “ඔවුන්ට කරන්නට බොහෝ දේ පැවරී තිබුණත්, එම සහෝදරයෝ මිත්‍රශීලී අදහස් ප්‍රකාශයකට හෝ මද සිනහවක් පෑමට හැමවිටම කාලය සොයනවා” යයි හෙල්ගා සිහිපත් කරන්නීය. එවන් පක්ෂපාතී පුරුෂයන්ගේ ප්‍රබෝධවත් මෙන්ම විනීත ස්වභාවය පෞද්ගලිකව නිරීක්ෂණය කිරීම කොතරම් දිරිගැන්වීමක්ද!
දෙවියන්වහන්සේගේ සංවිධානය ක්‍රියා කරන ආකාරයත්, උන්වහන්සේගේ ශුද්ධාත්මය කැමති හෘදයන් හා අත් ක්‍රියාවට පොලඹවන ආකාරයත් විශේෂාකාරයෙන් බෙතෙල්හි කෙනෙකුට සමීපව නිරීක්ෂණය කළ හැකිය. “බෙතෙල්හි කෙනෙකුට ක්‍රියාකාරකම් සිදුවන කේන්ද්‍රස්ථානයට වඩාත් සමීප භාවයක් දැනේ” යයි 1949 පටන් ප්‍රංශ බෙතෙල්හි සේවය කර ඇති සහෝදරයෙක් පැහැදිලි කරයි. ඔහු තවදුරටත් මෙසේද පවසයි: “මා සම්බන්ධයෙන් ගත් කල, මගේ උපරිම කාලය හා ශක්තිය යෙහෝවඃවහන්සේගේ සේවයට කැප කිරීමටත්, එමෙන්ම වැඩිම සහෝදරයන් සංඛ්‍යාවකට සේවය පිරිනැමීමටත් මට ප්‍රස්තාව සලසන පූර්ණ-කාලීන සේවා ක්‍රමය බෙතෙල් යයි මට සැබවින්ම පැවසිය හැකියි.” එමෙන්ම එය ජීවිතයේ අපගේ සැබෑ අරමුණ—එනම් දෙවියන්වහන්සේගේ කැමැත්ත කිරීම—නොවේද? බෙතෙල්හිදී කෙනෙකුට “දවස මුළුල්ලේම . . . වර්ණනා” ඉදිරිපත් කළ හැකිය. කොතරම් ආශීර්වාදයක්ද!—ගීතාවලිය 44:8.
අප සොයාගෙන තිබෙන ආකාරයට, බෙතෙල් නිවසක සේවය කරන්නෙකුට යෙහෝවඃවහන්සේගේ ශෝභාලංකාරය දැකීමටත් ආශීර්වාදයන් විශාල ප්‍රමාණයක් අත්කර ගැනීමටත් පුළුවන. (හෙබ්‍රෙව් 6:10) ‘දෙවියන්වහන්සේගේ ගෘහයේ’ සේවය කිරීම ඔබට වටිනා යමක් විය හැකිද? යෙහෝවඃවහන්සේගේ සාක්ෂිකරුවන් අතර සිටින අඩුතරමින් අවුරුදු 19වත් වයසැති, මනා ආත්මික හා කායික ශරීර සෞඛ්‍යයක් භුක්ති විඳින්නාවූද, තිමෝති මෙන්, “සහෝදරයන් අතරේ යහපත්යයි [හොඳ වාර්තාවක් ඇති බව, NW]” ප්‍රසිද්ධවූද අයට, බෙතෙල්හි සේවය කිරීමට අයදුම් කළ හැකිය. (ක්‍රියා 16:2) ඉහත උපුටා දක්වන ලද අය මෙන්, බොහෝ දෙනෙක් බෙතෙල් සේවය තමන්ගේ ජීවන වෘත්තිය කරගෙන ඇත. ඔවුන්හට ගීතිකාකරුගේ මහත් ආශාව—එනම් ‘තමාගේ ජීවිතයේ සියලු දවස්වලදී යෙහෝවඃවහන්සේගේ ගෘහයෙහි වාසය කිරීම’—සැබෑවක් වී ඇත.
කැමැත්තෙන් හා ප්‍රීතියෙන් තම පැවරුම් ඉටු කරන බෙතෙල්හි සිය සහෝදර සහෝදරියන් විසින් පෙන්වනු ලබන ආත්ම-පරිත්‍යාගී ස්වභාවය සඳහා යෙහෝවඃවහන්සේගේ සාක්ෂිකරුවන් තුළ ඇත්තේ මහත් ගෞරවයකි. අප බෙතෙල්හි හෝ වෙනත් ස්ථානයක යෙහෝවඃවහන්සේට සේවය කළත්, අප සෑම කෙනෙකුටම දාවිත් රජට දැනුණ ආකාරයට—එනම් “දෙවියන්වහන්සේගේ ගෘහය” කෙරෙහි අගය කිරීමෙන්, නැතහොත් සොම්නසින් බලන්නට—හොඳ හේතු ඇත.
[31වන පිටුවේ පින්තූරය]
මෙම ක්‍රිස්තියානින් ජර්මනියේ බෙතෙල්හි දශක ගණන් පුරා පරිශුද්ධ සේවයෙන් සතුටක් ලබා ඇත