යෙහෝවඃවහන්සේව තෝරා ගන්ට ඔබ ඔබගේ දරුවාට උපකාර කරමින් සිටින්නෙහිද?

“බයිබලය ඉගෙන ගැනීම මට හැඟුණේ සැබවින්ම නීරස හා වෙහෙසකර දෙයක් හැටියටයි. රහසිගතව, මම මගේ හෘදයෙන් තීරණය කළේ, මා වැඩුණාම යෙහෝවඃවහන්සේගේ සාක්ෂිකරුවන්ගෙන් කෙනෙක් නොවන බව” යයි එක් යෞවනයෙක් ප්‍රකාශ කළේය. ක්‍රිස්තියානි නිවාසවල ජීවත්වන දරුවන්ගෙන් බහුතරයක් අවසානයේ යෙහෝවඃවහන්සේගේ පැත්තේ සිටින්ට තෝරා ගනු ඇතැයි බලාපොරොත්තු විය හැකි වුවත්, ඔහු වැනි බාලයන් තමන්ගේ දෙවියන් හැටියට යෙහෝවඃවහන්සේව තෝරා ගැනීමේදී දුෂ්කර කාලපරිච්ඡේදයක් පසු කරන්ට පුළුවන.

සිය දරුවන් බලපෑමෙන් යුක්තව කෙසේ හැසිරවිය යුතුද යන්න පිළිබඳව අස්ථිර තත්ත්වයක් ඇතැම් අවස්ථාවන්හි මව්පියන්ට හැඟේ. මහත් උනන්දුවක් පෙන්වූ මෙම පියා වරක් පැවසූ ආකාරයට, ඔවුහු බොහෝ වර ආත්ම-සෝදිසියේ යෙදෙති: “අවංකව කියතොත්, බලාපොරොත්තු රහිතභාවයේ කඳුළු තවදුරටත් තමන්ගේ කම්මුල්වල තිබියදී, නිදා සිටින මගේ දරුවන්ගේ මුහුණු මා බලා, මා තවත් ලිහිල් වන්ට තිබුණා නොවේදැයි කල්පනා කළ අවස්ථා තිබුණි.” ඔහුගේ දරුවන් දෙදෙනා වැඩුණාට පසු තෝරා ගත්තේ යෙහෝවඃවහන්සේට සේවය කරන්ටයි.

එහෙත් සාතන්ගේ ලෝකය උදෙසා ක්‍රිස්තියානි රැළෙන් ඉවත්වී යෙහෝවඃවහන්සේව අත්හරින යෞවනයෝද සිටිති. එබැවින්, යෙහෝවඃවහන්සේව තෝරා ගැනීමට සිය දරුවන්ට උපකාර කිරීමෙහිලා මව්පියන්ට සාර්ථක විය හැක්කේ කෙසේද? එම පැනයට පිළිතුරු දීම පිණිස, යෞවනයන්ගේ මව්පියන් යෙහෝවඃ වහන්සේ සමඟ සිටින්ට ඔවුන්ට මහත් බලපෑමක් කරන විට පවා ඇතැමුන් උන්වහන්සේව අත්හරින්නේ මන්දැයි අපි මුලින් සොයා බලමු.

ඇතැම් යෞවනයන් යෙහෝවඃවහන්සේව අත්හැරීමට හේතුව

වඩාත් පොදු සාධකයන්ගෙන් එකක් වනුයේ ඇතැම් යෞවනයන්ට යෙහෝවඃවහන්සේ හා උන්වහන්සේගේ මාර්ග හරිහැටි දැනගැනීමට නොලැබීමයි. බිළිඳු කාලයේ පටන් ක්‍රිස්තියානි රැස්වීම්වලට ගියත්, ඔවුන් නිකම්ම යාන්ත්‍රිකව එසේ කරන අතර යෙහෝවඃවහන්සේ සඳහා සැබෑ සෙවිල්ලක් එහිදී සිදු නොවේ. (යෙසායා 55:6; ක්‍රියා 17:27) ඉහත සඳහන් කරන ලද පිරිමි ළමයාට වේදිකාව මත සිටි කථිකයා විසින් පවසන ලද දෙය නොතේරුණ බැවින්, ඔහුට ක්‍රිස්තියානි රැස්වීම් නිරස යමක් විය.

සත්‍යයේ බීජ ඇතැම් දරුවන් තුළ පැළ කරනු ලැබුවත්, ඔවුහු සාතන්ගේ ලෝකයේ බාහිර පෙනුමේ හැටියට කරදරවලින් නිදහස්, ද්‍රව්‍යවාදී ජීවිත-රටාව මගින් තමන්ගේ හෘදයන් ඇද ගනු ලැබීමට ඉඩ හරිති. ඇතැමෙක් තමන්ගේ තුල්‍යයන්ගේ ඇසුරේ සිටීමටත්, ඔවුන්ට සමානව සිටීමටත් තිබෙන අතිමහත් ආශාව මැඩපැවැත්වීමට අසමත්ව සිටිති.—1 ලේකම් 28:9; ලූක් 8:12-14; 1 කොරින්ති 15:33.

කෙසේ වෙතත්, ලොව පුරා, ක්‍රිස්තියානි නිවාසවල වසන බොහෝ දරුවන් තෝරාගෙන ඇත්තේ යෙහෝවඃවහන්සේගේ පැත්තේ සිටින්ටයි. ඔවුන්ගේ මව්පියන් ගත් ඒකාන්ත පියවරවලින් යමක් ඉගෙන ගත හැකිද?

කල් ඇතිව අරඹන්න

ඔබගේ දරුවන්ට යෙහෝවඃවහන්සේ තෝරා ගැනීමට උපකාර කිරීමෙහිලා වැදගත්වන මූලික අවශ්‍යතාවක් වනුයේ කල් ඇතිව ආරම්භ කිරීමය. බොහෝ අවස්ථාවන්හි, හෘදය නොමේරු එමෙන්ම ඉක්මනින් වැටහෙන තත්ත්වයක තිබියදී ලැබූ හැඟීම් හා ඉගෙන ගත් පාඩම් ජීවිත කාලයක් පුරා පවතිනු ඇත. (හිතෝපදේශ 22:6) එබැවින් යෙහෝවඃවහන්සේ සඳහා ප්‍රේමයකුත්, යෙහෝවඃවහන්සේ ඔවුන් සඳහා කර ඇති දෙය වෙනුවෙන් අගයකුත් ඔබගේ දරුවන්ගේ හෘදයන්හි ගොඩනැගීමට යත්න දැරීමක් වශයෙන් යෙහෝවඃවහන්සේගේ යහපත්කම, උන්වහන්සේගේ ප්‍රේමය හා ගරුබිය සහිත තත්ත්වය ගැන ඔවුන්ට කල් ඇතිව කථා කරන්ට පටන්ගන්න. මෙය කිරීමට, යෙහෝවඃවහන්සේගේ මැවීම පිළිබඳව මුරටැඹ සමිතියේ ප්‍රකාශනවල පළ කරන ලද ලිපි සම්බාරය බොහෝ මව්පියෝ සාර්ථකව යොදාගෙන ඇත්තාහ.

කීකරුකමත් යෙහෝවඃවහන්සේ සහ උන්වහන්සේගේ නමස්කාරය සඳහා ගෞරවයත් ජීවිතයේ මුල් අවදියේදී සිතට කාවැද්දිය යුතු වෙනත් ගුණාංග වන්නේය. පෙර පාසැල් වියේ දරුවන් ක්‍රිස්තියානි රැස්වීම්වලදී සරල සටහන් ගැනීමටත් වගන්ති තමන්ගේම බයිබල්වලින් සොයා ගැනීමටත් වෑයම් දැරීම නැතහොත් තමන්ට නිදිමත දැනෙන විට සිසිල් දියෙන් සිය මුහුණු සෝදා ගැනීමට තමන්ගේ මව්පියන් සමඟ වතුර පයිප්පයක් වෙත යෑමත් දැකීම හද උණුසුම් කරවන්නකි. මේවා සරල දේවල් විය හැකි වුවත්, යෙහෝවඃවහන්සේට ගෞරවය හා කීකරුකම පෙන්විය යුතු බව යෞවන මනස්වලට කාවැද්දීමට ඒවා කොතරම් වැදගත්වේද!

දැඩි පෞද්ගලික බයිබල් උපදෙස් දීම ඇරඹිය යුත්තේද කල් ඇතිවය. සිය පිරිමි දරුවන් අවුරුදු දෙකක් වයස්ව සිටි විට, එක් යුවළක් ලිස්නිං ටු ද ග්‍රේට් ටීචර් නම් පොත ඔවුන් සමඟ කියවන්ට පටන් ගත්හ.a අනතුරුව, එම පිරිමි දරුවන් පාසැල් යන්නට පටන් ගත් විට, ඔවුන් කල් ඇතිව අවදි වී සිය මව සමඟ සෑම උදෑසනකම මගේ බයිබල් කතන්දර පොත සහ පාරාදීස පොළොවක සදාකල් ජීවත්වන්ට ඔබට හැක යන පොත්වලින් පාඩම් කරන්ට වූහ.* ඉන්පසුව උදෑසන ආහාරයට පෙර පියා විසින් පවත්වන ලද දින පදයේ සාකච්ඡාව සිදුවනු ඇත. එම මව්පියන්ගේ වෑයම්වලට මහත්සේ විපාක ලැබුණේ, සිය පුත්‍රයන්ගේ වයස අවුරුදු 10 සහ 11ක්ව තිබියදී ඔවුන් වතුර බව්තීස්මයෙන් සිය කැපවීම සංකේතවත් කරමින්, මෑතක යෙහෝවඃවහන්සේට සේවය කිරීමට තේරීමක් කළ විටය.

ජපානයේ වොච් ටවර් සමිතියේ ශාඛා කාර්යාලයේ සේවය කරන කදිම යෞවනයෙක්, තමා ළාබාලව සිටියදී, යාච්ඤා කිරීමට තමාට උපකාර කරමින්, රාත්‍රියේ ඔහු අසල සිටීමෙන්, යෙහෝවඃවහන්සේ සමඟ සම්බන්ධතාවක් වර්ධනය කර ගැනීමට සිය මව උපකාර කළ බව සිහිපත් කළේය. උගන්වනු ලැබූ පාඩම—එනම්, තමා කොතැනට ගියත්, කුමක් කළත්, යෙහෝවඃවහන්සේ හැමවිටම සමීපව හා උපකාර කිරීමට සූදානම්ව සිටි බව—ඔහුට කවදාවත් අමතක වූයේ නැත.

සාර්ථක මව්පියන් සිය දරුවන්ගේ උරුමවූ අසම්පූර්ණත්වය නිසා ඇති වන වැරදි නැඹුරුවාවන් අඳුනා ගැනීමට ඉගෙන ගන්නා අතර මේවා නිවැරදි කර ගැනීමට සිය දරුවන්ට උපකාර කිරීම එම මව්පියෝ කල් ඇතිව ආරම්භ කරති. (හිතෝපදේශ 22:15) ආත්මාර්ථකාමිත්වය, මුරණ්ඩුකම, උඩඟුකම, පමණ ඉක්මවා අන්‍යයන්ව විවේචනය කිරීම යනාදිය සඳහාවූ නැඹුරුවාවන් සමඟ කල් ඇතිව කටයුතු කළ යුතුය. එසේ නොකළොත්, එවන් බීජ යථා කාලයේදී දෙවියන්වහන්සේ හා උන්වහන්සේගේ මාර්ගවලට එරෙහිව කැරලි ගැසීම දක්වා වර්ධනය වනු ඇත. උදාහරණයක් වශයෙන්, හොඳ අභිප්‍රායක් දරන එහෙත් පමණ ඉක්මවා තමන්ගේ අභිලාෂයන් සිත් සේ පිනවීමට දරුවන්ට ඉඩ දෙන මව්පියෝ බොහෝ විට සිය දරුවන්ට තමා ගැනම පමණක් සලකන ආකල්පයන් ගොඩනගා ගැනීමට ඉඩ හරිති. මෙම දරුවන්, බයිබලයේ සඳහන් කර ඇති ‘කළගුණ සැලකීමක් නැති’ තැනැත්තා හා සමාන වෙමින්, සිය මව්පියන්ට හෝ යෙහෝවඃවහන්සේට ගෞරව කිරීම දුෂ්කර බව අද්දකිනු ඇත. (හිතෝපදේශ 29:21, නව අනුවාදය) අනෙක් අතට, නිවසේ වැඩකටයුතු පවරනු ලබන මෙන්ම අන්‍යයන්ගේ අවශ්‍යතා ගැන සාවධානව සිටීමට උගන්වනු ලබන දරුවෝ සිය මව්පියන්ටත් යෙහෝවඃවහන්සේටත් වැඩියෙන් ස්තුතිපූර්වක වන්නට නැඹුරු වෙති.

තවත් වැදගත් දෙයක් වනුයේ දරුවෙකුට සාධාරණ ලෙස අත්කර ගත හැකි දිව්‍යාණ්ඩු ඉලක්කයන් කල් ඇතිව තබන්ට පටන් ගැනීමයි. කල් ඇතිවත්, ස්ථිරසාරවත් මෙය කරනු නොලබන්නේ නම්, අන් අය වෙනස් ඉලක්කයන්ගෙන් ඔහුගේ මනස හා හෘදය පුරවන්ට පුළුවන. මුල සිට අග දක්වා බයිබලය කියවීම, වොච්ටවර් සමිතියේ ප්‍රකාශනයන්ගෙන් එකක් පෞද්ගලිකව ඉගෙන ගැනීම, දිව්‍යාණ්ඩු සේවා පාසැලට ඇතුල් වීම, ශුභාරංචියේ ප්‍රචාරකයෙක් බවට පත්වීම හා බව්තීස්මය ලැබීම මෙම ඉලක්කයන් අතරට ඇතුළත් කළ යුතුය.

ටාක ෆූමි සිහිපත් කරන්නේ, ඔහුගේ මව සරල ප්‍රශ්න සාදා, ඔහු පාසැලෙන් පැමිණි විට ඔහුට දැකිය හැකි ලෙස ඒවා මුළුතැන්ගෙයි මේසය මත තැබීමෙන් ඇය මුරටැඹ හා පිබිදෙව්! සඟරා කියවීමේ පුරුද්දට තමාව පත් කළ බවය. ක්‍රිස්තියානි දේව සේවකයන් සඳහා වැඩි අවශ්‍යතාවක් තිබූ ස්ථානවල පුරෝගාමීන්b සමඟ දින කීපයක් රැඳී සිටීම, ඔවුන් සමඟ දේව සේවයේ සහභාගි වීම, ඔවුන් ප්‍රණීත ආහාර පිසින අයුරු බලා සිටීම, එමෙන්ම ඔවුන්ගේ ප්‍රීතියත් ජ්වලිතයත් නිරීක්ෂණය කිරීම සමානාකාරයෙන් යෙහෝවඃවහන්සේට සේවය කිරීමට ඇයගේ ආශාවට මහත් බලපෑමක් කළ බව යූරි මතකයට නගන්නීය. වෙනත් යෞවන පුරුෂයන් හා කාන්තාවන් සතුටින් යෙහෝවඃවහන්සේට සේවය කරන අයුරු තමන්ට නිරීක්ෂණය කළ හැකි බෙතෙල් වෙත, එනම් වොච් ටවර් සමිතියේ මූලස්ථානයන් හා ශාඛා කාර්යාල වෙත සිය මව්පියන් නිතිපතා තමන්ව රැගෙන පැමිණි බව බොහෝ යෞවනයෝ සිහිපත් කරති. දරුවන්ව සිටියදී එහි පැමිණි බොහෝ දෙනෙක් දැන් ලොව වටා බෙතෙල්වල සේවය කරමින් සිටිති.

ඔබගේ දරුවන්ට ඔබගේ කාලය ලබා දෙන්න

ඔබගේ දරුවන් සමඟ ඔබ ගත කරන කාලයේ ප්‍රමාණය හා ගුණය බොහෝ දුරට ඔවුන් යෙහෝවඃවහන්සේට සේවය කිරීමට තෝරා ගන්නවාද නැද්ද යන්න කෙරෙහි ඍජු බලපෑමක් කරනු ඇත. ඔබ ඔවුන් සමඟ පවත්වන බයිබල් පාඩම සඳහා ඔබ වැය කරන කාලයත් සූදානමත් ඔවුන්ට ඉක්මනින් තේරුම් ගත හැක. පසුගිය පාඩමේදී ඔබ නැවැත්වූ ස්ථානය ඔබට මතක නැත්නම් එසේත් නැතහොත් නොවැදගත් හේතු නිසා ඔබ පාඩම අවලංගු කරන්නේ නම්, ඉන් ඔබ ඉදිරිපත් කරන පණිවුඩය වන්නේ පාඩම එතරම් නොවැදගත් බවයි. කෙසේ වෙතත්, මව්පියන් පාඩම සඳහා පරිත්‍යාගයන් කරන බව ඔවුන් දකින විට, එනම් එය හොඳින් සූදානම් කර කුමන බාධාවක් පැමිණියත් එය පවත්වන බව ඔවුන් දකින විට, ඉන් ඉදිරිපත් වන්නේ සහමුලින්ම වෙනස් පණිවුඩයකි. එය අවශ්‍යතාවක් නොවුවත්, ඇතැම් මව්වරුන් රැස්වීම්වලට යන ආකාරයට නැතහොත් අසල්වැසියෙකු සමඟ පවත්වන බයිබල් පාඩමකට යන ආකාරයට ඇද පැළඳ ගනිති. මෙයින් ඉදිරිපත් කරනු ලබන හැඟීම වන්නේ යෙහෝවඃවහන්සේගේ නමස්කාරය වැදගත් බවයි.

ඔබගේ දරුවන්ගේ හෘදයන්ට පිවිසෙමින්, ඔවුන්ගේ බයිබල් අධ්‍යාපනය ප්‍රීතිජනක එකක් කරවීමට වැඩි කාලයක් හා වෑයමක් අවශ්‍ය වන්ට පුළුවන. විශේෂයෙන් කුඩා දරුවන්ගේ සිතට තමන් ඉගෙන ගන්නා කාරණා කාවදින්නේ, තමන් ඉදිරියේ ඒවා රඟපානු ලබනවා දකින විටයි. උදාහරණයක් වශයෙන්, එක් පියෙක්, නැවත නැගිටීම මනසේ මවා ගන්ට සිය දරුවන්ට උපකාර කළේ, ලාසරුස්ගේ නැවත නැගිටීම පිළිබඳ බයිබල් වාර්තාව රඟපෑමෙනි. ඔහු ගබඩා කුටියට ගොස් අනතුරුව නැවත නැගිටුවන ලද ලාසරුස් මෙන් පිටතට පැමිණියේය.—යොහන් 11:17-44.

දරුවන් වැඩිහිටිභාවයට පැමිණෙත්ම, ඔවුන් මුහුණ දෙන චිත්තවේගයන්, සැකයන්, හා සිත් තැවුල් ධාරාවත් සමඟ කටයුතු කරන්ට ඊටත් වඩා වැඩි කාලයක් හා දක්ෂකමක් අවශ්‍ය වේ. දරුවන් යෙහෝවඃවහන්සේ කෙරෙහි දැඩි විශ්වාසයක් වර්ධනය කර ගන්ට නම්, ප්‍රේමනීය හා දැනුම් තේරුම් ඇති මව්පියන් විසින් මෙම වකවානුව තුළ වෙන් කරන කාලය අතිවැදගත් වේ. දරුවන් හතරදෙනෙක් සිටි සාර්ථක පියෙක් සිහිපත් කළේ සිය දරුවන් විවිධ ගැටලුවලට මුහුණ දුන් විට, එම උග්‍රාවස්ථාව සහමුලින්ම ජයගන්නාතෙක් ඔහු සෑම දිනකම මුරටැඹ ප්‍රකාශනවලින් සම්බන්ධිත තොරතුරු සොයා ඔවුන් සමඟ සාකච්ඡා කරන බවයි.

දරුවන් දෙදෙනෙක් සිටි කාර්ය බහුල පුරෝගාමි මවක් සිය දියණිය දිව්‍යාණ්ඩු කටයුතුවලින් බැහැර වෙමින් ඉන් ප්‍රීතියක් නොලබන බව නිරීක්ෂණය කළාය. එබැවින් සෑම පස්වරුවකම එම දරුවා පාසැලෙන් ගෙදර පැමිණෙන විට ගෙදර සිටින්ටත් තේ පානය කරමින් ඇයව සාකච්ඡාවට පොලඹවා ගන්ටත් එම මව අධිෂ්ඨාන කරගත්තාය. මව හා දියණිය අතර ඇතිවූ කිට්ටු සංවාද තුළින්, එම දැරිය තමාට අවශ්‍යව තිබූ උපකාරය ලැබුවාය. දැන්, ජ්‍යෙෂ්ඨ පාසැල සමත්වීමෙන් පසු, ඈ පුරෝගාමි සේවයෙහි සිය මව හා එක්වී සිටින්නීය.—හිතෝපදේශ 20:5.

හොඳ ආශ්‍රය හා ආදර්ශය

සිය කාලය වෙන් කිරීමට අමතරව, මව්පියන් තමන්ගේ දරුවන්ට ගුණදායක ආශ්‍රයද සැපයිය යුතුය. හිතෝපදේශ 13:20 මෙසේ පවසයි: “ඥානවන්තයන් කැටුව යන්න, එවිට නුඹ ඥානවන්තවන්නේය; එහෙත් අඥානයන්ගේ සමාගම්කාරයාට වේදනා සිදුවන්නේය.”

සාර්ථකත්වය ලැබූ මව්පියෝ බොහෝ දෙනෙක් එම හිතෝපදේශයේ සත්‍යතාව පිළිගනිති. දරුවන් හතරදෙනෙකුගේ පියෙක් මෙසේ පවසයි: “අතීතය ගැන කල්පනා කරන විට, මට සිතෙන්නේ යෙහෝවඃවහන්සේට සේවය කිරීමට අපගේ දරුවන්ව පෙලඹෙන්ට උපකාර කළේ සත්‍යයේ සිටි ඔවුන්ගේ විශාල මිත්‍ර පිරිසයි. මා ඔවුන්ව දිරිගැන්වූයේ අපගේ සභාව තුළ මෙන්ම වෙනත් සභාවන්හිද මිත්‍රයන් සාදා ගන්ටත් එම මිත්‍රත්වයන් ආදරයෙන් රක්ෂා කරන්ටත්ය.” වසර ගණනාවක් බෙතෙල්හි සේවය කළ ක්‍රිස්තියානි වැඩිමහල්ලෙක් මෙසේ සිය අතීතය සිහිපත් කළේය: “මා යෞවනව සිටියදී, අප ජීවත් වුණේ කුඩා නිවසකයි, එහෙත් නිතර චාරිකා අවේක්ෂකට නවාතැන් පහසුකම් දෙනු ලැබුවේ එම නිවසේය. මීට අමතරව, අපගේ සභාවේ විශේෂ පුරෝගාමීන් නිතිපතා අපත් සමඟ රාත්‍රි ආහාර ගත්තා. ඔවුහු අපගේ නිවසේ නාගත් අතර අප සමඟ හොඳ ඇසුරකුත් පැවැත්වූවා. පූර්ණ-කාලීන සේවය සඳහා ඇගයීමක් වර්ධනය කර ගැනීමට මට උපකාරවත් වූයේ ඔවුන්ගේ අද්දැකීම් ඇසීමත් ඔවුන්ගේ ප්‍රීතිය දැකීමත්ය.”

හොඳ ඇසුර දුෂ්කරතාවන්ට ගොදුරු වී සිටින අයට උපකාරවත් වේ. තම පුත්‍රයා කරදරකාරී කාලයක් අද්දකිමින් සිටි මවක් එම ගැටලුව යෙහෝවඃවහන්සේගේ සාක්ෂිකරුවන්ගේ සංචාරක අවේක්ෂකයෙකු සමඟ සාකච්ඡා කළාය. ඇයත් සමඟ ක්ෂේත්‍ර සේවයේ එම පිරිමි දරුවාව රැගෙන යෑම ඔහු නිර්දේශ කළේය. “ඔබ එසේ කළොත්, ඔහුගේ ආත්මිකත්වයත් ඔහුගේ අන් සියලු ගැටලුත් යහපත් අතට හැරෙනවා ඇත” යයි එම අවේක්ෂකයා පැවසුවේය. ඇය මෙසේ වාර්තා කරන්නීය: “අපගේ සභාවේ සන්ධ්‍යා සාක්ෂි දැරීමක් සඳහා සැලැස්මක් තිබූ අතර පාසැල් වියේ දරුවන් බොහෝ දෙනෙක්, වයස්ගත ස්ථාවර පුරෝගාමීන් කීපදෙනෙක්, හා අඩුතරමින් එක් වැඩිමහල්ලෙක්වත් ඊට සහභාගි වුණා. මුලදී මගේ පුත්‍රයාව නිතිපතා ඊට යොමු කිරීමට සෑහෙන වෑයමක් දරන්ට සිදු වුණත්, ඔහු හැරී ගෙදර පැමිණෙන විට එහි ලැබූ යහපත් ආශ්‍රයෙන් ප්‍රීතියට හා දිරිගැන්වීමට පත්ව සිටි බැවින්, එම තත්ත්වය ඉක්මනින්ම වෙනස් වුණා. ඔහු ජ්‍යෙෂ්ඨ පාසැලේ ශිෂ්‍යයෙක්ව සිටියදී, ඔහු බව්තීස්මය ලබා උපකාරික පුරෝගාමියෙක් හැටියට සෑම මාසයකම සේවය කළ අතර ඔහු විභාගවලින් සමත්වීමෙන් පසු ස්ථාවර පුරෝගාමියෙක් බවට පත් වුණා.” යෙහෝවඃවහන්සේගේ කැමැත්ත කිරීම හා බැඳි යහපත් ආශ්‍රය හොඳ ප්‍රතිඵල ලබා දුණි.

ඔබගේ දරුවා කෙරෙහි යහපත් බලපෑමක් විය හැකි යෞවනයන් ඇතැම්විට ප්‍රාදේශීය වශයෙන් නොසිටිය හැකිමුත්, යෙහෝවඃවහන්සේට සේවය කිරීමට තෝරා ගන්නා යෞවනයන් බොහෝ දෙනෙකු විසින් නිතර නිතර කරනු ලබන නිරීක්ෂණයක් ඔවුන්ගේ මව්පියන්ගේ ආදර්ශය හා බැඳී පවතී. බොහෝ යෞවනයන් සිය මව්පියන්ව ගෞරවයෙන් සැලකූ අතර කැමති වූයේ ඔවුන්ව අනුකරණය කරන්ටයි. සිය මවගේ ආගන්තුක සත්කාරශීලී ස්වභාවය මෙන්ම ඇය අන්‍යයන්ට සැලකූ ආකාරය, එනම් අන්‍යයන්ට දුරකථනයෙන් ඇමතීම හා රෝගාතුර අයට කෑම පිළියෙළ කිරීම යූරි සිහිපත් කරන්නීය. සියල්ලන්ම දැන් හැදී වැඩී, යෙහෝවඃවහන්සේට සේවය කරන හතරදෙනෙකුගෙන් සමන්විත පවුලක කෙනෙක් වන ටට්සුවෝ, මෙසේ පැවසුවේය: “පියා නොඇදහිලිකරුවෙක්ව සිටීමත් ඥාතීන්ගෙන් ඇයට දැඩි විරුද්ධවාදීකම් තිබීමත් නිසා අම්මාහට අප සමඟ නිතිපතා පාඩම් කිරීමට නොහැකි විය. එහෙත් සත්‍යය සඳහා ඇයගේ ස්ථාවරයත් යෙහෝවඃවහන්සේට සේවය කිරීමෙන් ඇය ලැබූ ප්‍රීතියත් නිරීක්ෂණය කිරීමෙන් මට මහත් බලපෑමක් ලැබුණි. අපගේ ගැටලු සම්බන්ධයෙන් අපට උපකාර කිරීමට අලුයම් කාලය දක්වා අවදිව සිටින්ට ඈ කැමැත්තෙන් සිටියාය.” ඇදහිල්ලේ ක්‍රියාවන්ගෙන් අනුබලය ලැබෙන විට මව්පියන්ගේ ඥානවන්ත වදන්වලට බලයක් ඇත. තමාගේ මව්පියන් ගැන යොයිචිරෝ මෙසේ පැවසුවේය: “ඔවුන් සභාවේ වෙනත් අය ගැන නිෂේධාත්මක සිතුවිලි කවරදා හෝ ප්‍රකාශ කළ බවක් මට මතක නැත; එමෙන්ම අන්‍යයන්ගේ වැරදි ගැන දරුවන් වූ අපට ඕපාදූප කථා කරන්ට ඔවුන් ඉඩ හැරියේද නැත.”—ලූක් 6:40-42.

දරුවන් යෙහෝවඃවහන්සේව තෝරනු දැකීමෙහි ප්‍රීතිය

ඔබගේ දරුවන්ට යෙහෝවඃවහන්සේව තෝරා ගැනීමට උපකාර කිරීමට සියයට සියයක් හරියන ක්‍රමයක් නැත. කාන්සා සහිත අවස්ථාවන් බොහොමයක් ඇති වන්ට පුළුවන. එහෙත් කලින් පවසන ලද සිත්තැවුලට පත් පියා කියා සිටියේ, “මව්පියන් හැටියට අප හැමවිටම විශ්වාසයෙන් යුක්තව යෙහෝවඃවහන්සේගේ දෘශ්‍යමාන සංවිධානයේ මඟ පෙන්වීම අනුගමනය කරන්ට වෑයම් කළා. මෙය ගැටලු මැඩපැවැත්වීමෙහි මහත් උපකාරකයක් වුණා.” ඔවුන්ගේ වෑයම් සාර්ථක විය.

එසේය බයිබලයේ මාර්ග දර්ශක අනුගමනය කිරීමට ඔබගේ උපරීමය කිරීමෙන්, යෙහෝවඃවහන්සේට ප්‍රේම කිරීම සඳහා හොඳ හේතු ලබාදීමෙන්, ඔබගේ විශ්වාසවන්ත ආදර්ශය හා උපකාර කිරීමට වූ අවංක වෑයම් මගින්, අවසානයේදී ඔබගේ වෑයම්වලට සාර්ථක ප්‍රතිඵල ලබනවා ඔබට දැකිය හැකි වේ. යෙහෝවඃවහන්සේගේ සාක්ෂිකරුවෙක් නොවන්ට වරක් අධිෂ්ඨානයක් ගත් කලින් සඳහන් කළ පිරිමි ළමයා මතකද? ඇත්තෙන්ම, ඔහුගේ දුෂ්කර කාලපරිච්ඡේදය ගත කිරීමට සිය මව සාර්ථකව උපකාර කිරීමෙන් පසු, ඔහු කියා සිටියේ, “ඇය අත් නෑර එසේ කිරීම ගැන මා සතුටු වෙනවා!” යනුවෙනි. ඔබගේ දරුවන් සමඟ ඔබටත් සමාන ප්‍රතිවිපාකයක් ලැබිය හැක.—ගලාති 6:9.

[පාදසටහන්වල]

[30වන පිටුවේ පින්තූරය]

ප්‍රීතිමත් මතක සටහන් ඇතිව දරුවන් හදාවඩා ගත් ආකාරය දෙස ඔබට හැරී බලන්ට පුළුවන්ද?