ඔවුන් එය කියවන වේලාව සහ ඉන් ප්‍රයෝජන ලබන ආකාරය
හිමිදිරි උදෑසන:
තම නිවසින් පිටත රැකියා කරන, එක් විවාහක යුවළක්, සෑම උදෑසනකම විනාඩි දහයකට පෙර අවදිවීමටත්, තමන් නිවසින් පිටව යෑමට පෙර එකට බයිබලය කියවීමට එම කාලය මිඩංගු කිරීමටත්, තීරණය කළෝය. ඔවුන් කියවන දෙය, ඔවුන් නිවසින් පිටව ගිය පසු සුවදායක යහපත් කතාබහක් සඳහා ඔවුන්ට සැබෑ පදනමක් සපයයි.
නයිජීරියාවේ එක් වැඩිමහල්ලෙක්, දිව්‍යාණ්ඩු සේවා පාසැලේ වැඩසටහන, තම පවුලේ බයිබල් කියවීම සඳහා පදනමක් ලෙස යොදාගනී. සාමාන්‍යයෙන් සෑම දිනකම උදෑසන ඔවුන් දිනපදය සාකච්ඡා කළායින් පසුව, ඔවුහු එයින් කොටසක් කියවති. පවරා ඇති සමහරක් කොටස් වරින් වර කියවීමට දරුවන්ගෙන් ඉල්ලා සිටිනු ලැබේ. අනතුරුව, කියවනු ලැබූ ඡේදවලින් ප්‍රශ්න ඇසීමට ඔවුන්ට ආරාධනා කෙරේ.
ජපානයේ එක් ගෘහණියක්, 1985 සිට අවුරුද්දකට වතාවක් බයිබලය කියවා තිබේ. ඇගේ කාලසටහන නම්, සෑම දවසකම පෙ.ව. 5.00ට ආරම්භ කරමින් විනාඩි 20ක් හෝ 30ක් එය කියවීමය. ප්‍රයෝජන සම්බන්ධව ඈ මෙසේ පවසන්නීය: “මගේ ඇදහිල්ල ශක්තිමත් වී තිබෙනවා. මගේ අසනීප අමතක කිරීමටත්, පාරාදීසමය බලාපොරොත්තුව මත මෙනෙහි කිරීමටත්, එය මට උපකාර කරනවා.”
වසර 30ක් පුරා පුරෝගාමියක ලෙස සේවය කර ඇති, තම සැමියා සාක්ෂිකරුවෙකු නොවන සහෝදරියක්, ඇගේ බයිබල් කියවීම සඳහා සෑම උදෑසනකම පහට අවදිවන්නීය. ඇගේ කියවීමේ සටහනට, හෙබ්‍රෙව් ශුද්ධ ලියවිල්ලෙන් පිටු හතරක්, ක්‍රිස්තියානි ග්‍රීක් ශුද්ධ ලියවිලිවලින් පිටු හතරක් සහ හිතෝපදේශයෙන් ඡේදයක් කියවීම ඇතුළත් වෙයි. වර්ෂ 1959 සිට ඇය සෑම වසරකම මුළු බයිබලයම කියවා ඇත. ඈ මෙසේ පවසන්නීය: “මගේ බයිබල් කියවීමේ ප්‍රතිඵලයක් වශයෙන්, මා යෙහෝවඃවහන්සේ විසින් ප්‍රේම කරනු ලබන බවක් මට හැඟෙනවා. . . . දිරිගැන්වීම, සැනසීම සහ නිවැරදි කිරීම මා ලබනවා.” ඈ මෙසේද එකතු කරන්නීය: “බයිබලය කියවීම, මගේ ජීවිතයේ වසන්තයේදී සෑම දවසකම යෙහෝවඃවහන්සේව ඈඳා තබාගැනීමක් හා සමානය.”
යෙහෝවඃවහන්සේගේ සාක්ෂිකරුවන්ගේ ක්‍රියාකාරකම් තහනම් කරනු ලැබ ඇති රටක එක් සහෝදරියක් සත්‍යය ඉගෙනගත් අතර, ඇගේ සැමියා ඇගේ විශ්වාසයන්ට විරුද්ධ විය. ඇයට තම බයිබල් කියවීම කිරීමට හැකිකම තිබෙන්නේ, සඳුදා සිට සිකුරාදා පෙ.ව. 6.00 සිට 7.00 දක්වාය. මෙය ඇයට අභ්‍යන්තර ශක්තියක් ලබා දී ඇත. ඇගේ මෙම කියවීම ඇයට බලපා තිබෙන ආකාරය ගැන ඈ මෙසේ පවසන්නීය: “යෙහෝවඃවහන්සේට සහ යේසුස්වහන්සේට ප්‍රේම කිරීමටත්, ගැටලු සහ දුෂ්කරතා තිබුණත්, යෙහෝවඃවහන්සේගේ පොරොන්දු ඉෂ්ට නොවී නොතිබෙන බව දැනගෙන සන්තෝෂයෙන් ජීවත් වීමටත් අපි ඉගෙනගන්නවා.”
පුරෝගාමී සේවා පාසැලට සහභාගි වූ එක් සහෝදරියක්, පුරුද්දක් වශයෙන් දිනපතා බයිබලය කියවීමට එහිදී දෙන ලද උපදෙස් අනුගමනය කිරීමට අදිටන් කරගත්තාය. පළමුව, එය පෙ.ව. 5.00 සිට 6.00 දක්වා කිරීමට ඇයට හැකිවිය. රැකියාව වෙනස් වීම නිසා එයට බාධා පැමුණුණද, එය ප.ව. 9.00 සිට 10.00 දක්වා කිරීමට සකස් කරගත්තාය. වෙනත් අභියෝගාත්මක තත්වයන් පැනනැඟි විට, ඈ මෙසේ පවසන්නීය: “තත්වයන්ට අනුව මම මගේ කාලසටහන සකස් කරගත්තා.”
දවසේ පසු භාගයේදී:
බ්‍රසීලයේ බෙතෙල් පවුලේ සාමාජිකයන් වන මාංසික සහෝදරියන් දෙදෙනෙකුට, දිවා ආහාරයෙන් පසු සෑම දිනකම විනාඩි 20ක් පමණ එකට බයිබලය කියවීමේ පුරුද්දක් තිබේ. ඔවුහු මුළු බයිබලය 25 වතාවක් පමණ කියවා ඇත්තාහ; එහෙත් ඔවුහු මෙසේ ලියති: “අප සෑමවිටම යම් අලුත් දෙයක් සොයාගන්නවා, එමනිසා බයිබලය කියවීම කිසිම විටෙක ඒකාකාරි නිරස දෙයක් වන්නේ නැහැ.”
ජපානයේ එක් සහෝදරියක්, තමා සාක්ෂිකාරියක ලෙස හැදී වැඩුණද, ශුද්ධ ලියවිලි මැනවින් දැන නොසිටි බව වටහාගත්තාය; ඈ පුරෝගාමී සේවිකාවක් බවට පත්වූ විට, බයිබලය නිතිපතා කියවීමට ඈ අදිටන් කරගත්තාය. සෑම සතියකම එක් දිනක් ප්‍රතිකාර සඳහා රෝහලට ගමන් කරන විට, ඈ දිව්‍යාණ්ඩු සේවා පාසැලේ ඇගේ පැවරුම සඳහා ඇගේ කියවීම කරන්නීය. පසුව, නිවසේදී, ඈ ඒ පිළිබඳව පර්යේෂණ කරන්නීය. සතියේ අවසානය වන විට, බයිබල් පොත් ලියා ඇති පිළිවෙළට අනුව ඒවා තෝරාගනිමින් ඈ තවදුරටත් කියවීම කරන්නීය.
මුළු බයිබලයම දැනටමත් තුන් වතාවක් කියවා ඇති 13හැවිරිදි තැනැත්තෙක්, පාසැලෙන් පසු නිවෙසට පැමිණි විට, සෑම දිනකම පරිච්ඡේදයක් කියවයි. මෙය, “යෙහෝවඃවහන්සේ සඳහා වඩාත් ප්‍රේමයක් දැනීමට” තමාට උපකාර කර ඇති බව ඔහු පවසයි.
බාහිර රැකියාවක නියැලෙන්නෙකු ලෙස, වැඩිමහල්ලෙකු ලෙස, ස්වාමිපුරුෂයෙකු ලෙස හා පියෙකු ලෙස කාර්ය බහුල කාලසටහනක් ඇති සාක්ෂිකරුවෙක්, දුම්රියෙන් රැකියාව කරා යන විට බයිබල් ඕඩියෝ කැසට්පටවලට සවන් දෙයි. පසුව, නිවසේදී ඔහු එම කාරණයම සම්බන්ධයෙන් පෞද්ගලික කියවීම කරයි.
තමාගේ පෞද්ගලික කියවීමට අමතරව, ප්‍රංශයේ එක් පුරෝගාමිවරියක්, ආහාර පිළියෙළ කරන විට, රිය පදවන විට, දුෂ්කර කාලවල්වලට මුහුණ දෙන විට හෝ හුදෙක් වින්දනය සඳහා බයිබල් ඕඩියෝ කැසට්වලට සවන් දෙන්නීය.
ජපානයේ 21හැවිරිදි එක් පුරෝගාමියෙක් සිහිකරන්නේ, තම මව සෑම දිනකම ආත්මිකව යම් දෙයක් ගන්නා මෙන් තමාට බල කර කියා සිටි බවත්, දවසේ එකම වේලාවක නොවුවත්, වයස අවුරුදු තුනේ සිට තමා දිනපතා බයිබලය කියවමින් සිටින බවයි. දවසේ කියවන කොටස තෝරාගත් පසුව, ප්‍රධාන බයිබල් ඡේද යළිත් කියවීමට ඔහු ඉලක්ක කරගන්නා අතර, අනතුරුව තමා කියවූ දෙය මනසින් යළිත් පුනරීක්ෂණය කිරීමට ඔහු විනාඩි ස්වල්පයක් ගනී.
පුරෝගාමියෙකු වන තවත් සාක්ෂිකරුවෙක්, පසුගිය වසර 12 පුරා මුළු බයිබලය 10 වතාවක් පමණ කියවා ඇත. ඇගේ ස්වාමිපුරුෂයා නොඇදහිලිකාරයෙකි, එමනිසා, ඈ ඇගේ කියවීමේ සටහන මධ්‍යාහ්න කාලයට වෙන් කර තබා තිබේ.
සැන්දෑ කාලය:
සෑම රාත්‍රියකම නින්දට යෑමට පෙර, තම බයිබලය කියවන ජපානයේ ස්ථාවර පුරෝගාමියෙක් වන එක් වැඩිමහල්ලෙක්, පසුගිය වසර අට පුරා මෙසේ කර තිබේ. ඔහු මෙසේ පවසයි: “යෙහෝවඃවහන්සේ සිතන ආකාරය, උන්වහන්සේට කාරණා ගැන හැඟෙන ආකාරය, සහ උන්වහන්සේගේ තත්වයන් හසුරුවන ආකාරය ගැන අඟවන ශුද්ධ ලියවිලිවලට මම විශේෂ ළැදිකමක් දක්වනවා. මෙම ශුද්ධ ලියවිලි ගැන මෙනෙහි කිරීමෙන්, යෙහෝවඃවහන්සේගේ සිතිවිලි මගේම සිතිවිලි කරගන්ටත්, මගේ ක්‍රිස්තියානි සහෝදරයන් සහ සහෝදරියන්ටද මගේම පවුලේ අයට සහය වන්ටත් මෙය මට උපකාර වී තිබෙනවා.”
ප්‍රංශයේ එක් වැඩිමහල්ලෙක්, 1979 සිට සෑම සැන්දෑවකම පැයක් බයිබලය කියවමින් සිටී. ඔහු ඉදිරියේ බොහෝවිට සැසඳීම සඳහා බයිබල් පරිවර්තන පහක් හෝ හයක් තිබේ. පරෙස්සමින් කියවීම, “එදිනෙදා තත්වයන්ට බයිබල් දැනුම අදාළ කරන ආකාරය” වටහාගැනීමට තමාට උපකාර වී තිබෙන බව ඔහු කියයි. එමෙන්ම ශුද්ධ ලියවිලිවලින් උපදෙස් දෙන විට වඩාත් බලපෑමෙන් යුක්ත වීමටද මෙය ඔහුට හැකි කරවා තිබේ.
පසුගිය වසර 28 පුරා, නයිජීරියාවේ එක් සහෝදරයෙක්, දිනපතා ශුද්ධ ලියවිලි පරීක්ෂා කිරීම පොතේ ඊළඟ උදෑසන සඳහා දී ඇති ශුද්ධ ලියවිල්ල සෑම දිනකම සැන්දෑවේ කියවීම පුරුද්දක් කරගෙන තිබේ. එම ශුද්ධ ලියවිල්ල සමඟ එම පාඨය ලබාගෙන ඇති මුළු බයිබල් පරිච්ඡේදයම ඔහු කියවයි. ඔහු විවාහ වූ පසු, තමාගේ භාර්යාව සමඟ එම කරුණ කියවමින් සහ සාකච්ඡා කරමින්, ඔහු මෙම පුරුද්ද දිගටම කරගෙන ගියේය.
තම දෙමාපියන් සාක්ෂිකරුවන් නොවන, එක් නහඹර වියේ පසුවන්නියක්, සෑම දිනකම නින්දට යෑමට පෙර විනාඩි පහක් හෝ දහයක් කියවීම පුරුද්දක් කරගත්තේය. එම විනාඩි ගණනට ඇයට මහත් වටිනාකමක් ඇති අතර, එය කියවීමට පෙර හා පසුව ඈ යාච්ඤා කරන්නීය. ඇගේ ඉලක්කය වනුයේ, බයිබලයේ එක් එක් ලේඛකයන් ලවා වාර්තා කිරීමට යෙහෝවඃවහන්සේ විසින් සැලැස්වූ පණිවුඩය දැනගැනීමය.
බෙතෙල් සේවයේ නියැලී සිටින, එක් විවාහක සහෝදරයෙක්, තමා පසුගිය වසර අට පුරා වසරකට එක් වතාවක් බැගින් බයිබලය කියවා ඇති බව පවසයි. සෑම රාත්‍රියකම නින්දට යෑමට පෙර ඔහු විනාඩි 20ක් හෝ 30ක් එය කියවයි. තමා ඉතා වෙහෙසට පත්වී සිටියද, බයිබලය කියවන්නේ නැතුව තම සයනය කරා ගියද, තමාට නිදාගැනීමට බැරි බව ඔහුට පෙනේ. ඔහුට සයනයෙන් නැගිට එම ආත්මික අවශ්‍යතාව සපුරාගැනීමට සිදුවෙයි.