නැවත පිහිටුවන ලද “දේශයක” එක්වී සිටින වැසියෝ

“නුඹලා වනාහි ස්වාමීන්වහන්සේගේ පූජකයෝයයි කියනු ලබන්නෝය. මනුෂ්‍යයන් නුඹලාට: අපේ දෙවියන්වහන්සේගේ සේවකයෝයයි කියනවා ඇත.”—යෙසායා 61:6.

1, 2. (අ) ඉශ්‍රායෙලයේ යුදෙව් ආගමට හැරුණු අයගේ තත්වය කුමක් වීද? (ආ) වත්මන් කාලවල, ‘මහත් සමූහයේ’ සාමාජිකයන් පෙන්වා ඇත්තේ කිනම් ස්ප්‍රීතුවද?

ඉපැරණි කාලවල, ඉශ්‍රායෙල් ජනයා ඇදහිලිවන්තව සිටින විට, යෙහෝවඃවහන්සේගේ මහිමයට සාක්ෂියක් ලෙස ලෝකය නමැති දර්ශනයේ රඟපෑහ. (යෙසායා 41:8, 9; 43:10) යෙහෝවඃවහන්සේගේ තෝරාගත් ජනයා සමඟ ඇසුරු කරමින් බොහෝ විදේශීන් ප්‍රතිචාරය දැක්වූ අතර, යෙහෝවඃවහන්සේට නමස්කාර කිරීමටද පැමිණියහ. ඇත්තෙන්ම, ඔවුන් ඉශ්‍රායෙල්ට පැවසුවේ රූත් නායොමිට පැවසූ දෙයමය: “නුඹේ සෙනග මාගේ සෙනග වන්නේය, නුඹේ දෙවියන්වහන්සේ මාගේ දෙවියන්වහන්සේ වනසේක.” (රූත් 1:16) ඔවුන් ව්‍යවස්ථා ගිවිසුමේ කොන්දේසිවලට යටත් වූ අතර, පුරුෂයෝ චර්මච්ඡේදනය ලැබූහ. (නික්මයාම 12:43-48) ඇතැම් ස්ත්‍රීහු ඉශ්‍රායෙලිතයන් හා සමඟ විවාහ වූහ. යෙරිකෝවේ රාහබ් සහ මෝවබීය රූත් යේසුස් ක්‍රිස්තුස්වහන්සේගේ මුතුන්මිත්තණියෝ බවට පත්වූහ. (මතෙව් 1:5) යුදෙව් ආගමට හැරුණු එවැන්නෝ ඉශ්‍රායෙල් සභාවේ කොටසක් බවට පත්වූහ.—ද්විතීය කථාව 23:7, 8.

² ඉශ්‍රායෙලයේ සිටි යුදෙව් ආගමට හැරුණු අය මෙන්, අදදින ‘මහත් සමූහයද,’ අභිෂේක ලත් ඉතිරි අයට මෙසේ පවසා ඇත: “දෙවියන්වහන්සේ නුඹලා සමග සිටින බව අප විසින් අසා තිබේ.” (එළිදරව් 7:9; සෙකරියා 8:23) මෙම අභිෂේක ලත් අය වනාහි යෙහෝවඃවහන්සේගේ “විශ්වාසවූ නුවණ ඇති දාසයා” ලෙසට ඔවුන් විසින් හඳුනාගෙන ඇති අතර, මෙම “මහත් සමූහය” ඔවුන් සමඟ කොතරම් කිට්ටුවෙන් වැඩ කරනවාද කියතොත්, අභිෂේක ලත් අය සහ මෙම “වෙනත් බැටළුවෝ” “එක රැළක්ද එක එඬේරෙක්ද” වෙති. (මතෙව් 24:45-47; යොහන් 10:16) මෙම අභිෂේක ලත් සහෝදරයන් සියලුදෙනාම තමන්ගේ ස්වර්ගික විපාකය ලබාගත් විට, මහත් සමූහයට කුමක් වනු ඇත්ද? ඔවුන්ට භය වීමට කිසිදු අවශ්‍යතාවක් නැත. මෙම “අන්තිම දවස්” පුරා, යෙහෝවඃවහන්සේ එම කාලය සඳහා සූදානම් කර ඇත.—2 තිමෝති 3:1.

ආත්මික “දේශයක්”

3. පේතෘස් විසින් පුරෝකථනය කරන ලද ‘අලුත් අහස’ කුමක්ද? තවද ඒවා ස්ථාපිත කරනු ලැබුවේ කවදාද?

³ අභිෂේක ලත් ක්‍රිස්තියානීන් 1,44,000දෙනා, කොටසක්ව සිටින මෙම ස්වර්ගික ආණ්ඩු විධිවිධානය ප්‍රේරිත පේතෘස් විසින් පුරෝකථනය කරන ලදි. ඔහු මෙසේ පැවසීය: “ධර්මිෂ්ඨකම වාසයකරන අලුත් අහසක්ද අලුත් පොළොවක්ද උන්වහන්සේගේ පොරොන්දුවේ හැටියට අපි බලා සිටිමු.” (2 පේතෘස් 3:13) මෙම “අලුත් අහස” පිහිටුවන ලද්දේ, ක්‍රිස්තුස්වහන්සේ ස්වර්ගීය රාජ්‍යයේ රජු වශයෙන් සිංහාසනාරූඪ කරනු ලැබූ 1914දීය. එහෙත්, මෙම “අලුත් පොළොව” ගැන කුමක් කිව හැකිද?

4. (අ) වර්ෂ 1919දී සිදුවූ අනපේක්ෂිත සිද්ධිය කුමක් වීද? (ආ) ‘එකවිට උපන් ජාතිය’ කුමක් වීද, එමෙන්ම ‘එකවිට උපන් දේශය’ කුමක් වීද?

⁴ වර්ෂ 1919දී, යෙහෝවඃවහන්සේ මෙම අභිෂේක ලත් ඉතිරි කොටස, මහා බබිලෝනියේ වහල්භාවයෙන් පිටතට ගෙනාසේක. (එළිදරව් 18:4) ක්‍රිස්තියානි ලෝකයේ නායකයන්හට, මෙම චමත්කාරජනක සිද්ධිය සම්පූර්ණයෙන්ම අනපේක්ෂිත එකක් විය. ඒ සම්බන්ධව බයිබලය මෙසේ කියයි: “මෙබඳු දෙයක් ඇසුවේ කවුද? මෙබඳු දේ දුටුවේ කවුද? එක දවසකදී දේශයක් උපදිනවා ඇද්ද? නොහොත් සෙනගක් එකවිටම උපදිනවා ඇද්ද?” (යෙසායා 66:8) අභිෂේක ලත් සභාව නිදහස් සෙනඟක් ලෙස හදිසියේම ජාතීන් ඉදිරියේ පෙනී සිටි කල, එය වනාහි ඇත්තෙන්ම, “එකවිට උපන්” ජාතියක් විය. එහෙත්, “දේශය” වූයේ කුමක්ද? එක් අර්ථයකින් ගත් කල, එය වනාහි ඉපැරණි ඉශ්‍රායෙලයේ දේශයේ ආත්මික සමානතාවක් විය. එය වනාහි, අලුත උපන් ‘ජාතියට’ ක්‍රියාකාරකම්වල ක්ෂේත්‍රයක් දානය කිරීම වූ අතර, යෙසායාගේ පොතේ පාරාදීස අනාවැකිවල නවීන, ආත්මික ඉටුවීමක් තිබූ ස්ථානයක් විය. (යෙසායා 32:16-20; 35:1-7; සසඳන්න හෙබ්‍රෙව් 12:12-14) යම් ක්‍රිස්තියානිවරයෙක් ශාරීරිකව කොතැන සිටියත්, ඔහු සිටින්නේ එම ‘දේශයේය.’

5. වර්ෂ 1919දී පැවැත්මට පැමිණි න්‍යෂ්ටිය කුමක් වීද? පැහැදිලි කරන්න.

⁵ පේතෘස් විසින් පුරෝකථනය කරනු ලැබූ “අලුත් පොළොව” සමඟ මීට තිබූ සම්බන්ධය කුමක් වීද? ඇත්තෙන්ම, 1919දී, යළි පිහිටුවනු ලැබූ “දේශයකට” උපන් එම නව “ජාතිය,” යෙහෝවඃවහන්සේට ප්‍රශංසා කරන අභිෂේක ලත් සහ අභිෂේක නොලත් අයගෙන් සමන්විත වන ලෝක ව්‍යාප්ත සංවිධානයක් බවට වර්ධනය වීමට තිබිණ. මෙම සංවිධානය, හර්මගෙදොන් තුළින් දෙවියන්වහන්සේගේ නව ලෝකයට බේරී පවතිනවා ඇත. මේ අන්දමින්, එම ජාතිය, ධර්මිෂ්ඨ මිනිස් සමාජයේ, එනම් අලුත් පොළොවේ න්‍යෂ්ටිය ලෙසට සැලකිය හැකි අතර, එය සාතන්ගේ ලෝකයේ විනාශයෙන් පසු පවතිනවා ඇත.a වර්ෂ 1930 ගණන්වල මැද භාගයේ, මෙම අභිෂේක ලත් අය කණ්ඩායමක් වශයෙන් යළි පිහිටුවනු ලැබූ දේශයකට එක්රැස් කර තිබිණ. එවක් පටන්, අවධානය දෙනු ලැබ තිබෙන්නේ වෙනත් බැටළුවන්ගේ මහත් සමූහයව එක්රැස් කිරීමට වන අතර, අදදින ඔවුහු සංඛ්‍යාවෙන් මිලියන පහක් පමණ වෙති. (එළිදරව් 14:15, 16) “දේශය” අධිජනගහනය වී තිබේද? නැත, එහි දේශ සීමා අවශ්‍ය පරිදි, පුළුල් කළ හැකිය. (යෙසායා 26:15) ඇත්තවශයෙන්ම, අභිෂේක ලත් ඉතිරි කොටස, මෙම “දේශය” “ඵලදාවෙන්”—එනම් සුවදායක, ශක්තිජනක ආත්මික ආහාරවලින් පුරවත්ම, එහි ජනගහනය වැඩෙනවා දැකීම ප්‍රමෝදජනකය. (යෙසායා 27:6) එහෙත්, දෙවියන්වහන්සේගේ ජනයාගේ යළි පිහිටුවනු ලැබූ මෙම “දේශයේ” මෙම වෙනත් බැටළුවන්ගේ තත්වය කුමක්ද?

‘දේශයෙහි’ ක්‍රියාශීලිව සිටින විදේශීහු

6. දෙවියන්වහන්සේගේ ජනයාගේ ‘දේශයෙහි’ විදේශීන් ක්‍රියාකාරි වී ඇත්තේ කෙසේද?

⁶ ඉශ්‍රායෙල් දේශයේ, සිටි යුදෙව් ආගමට හැරුණාවූ අය මෝසෙස්ගේ ව්‍යවස්ථාවට යටත්වූවාක් මෙන්, අදදින මහත් සමූහයද, යළි පිහිටුවනු ලැබූ මෙම “දේශය” තුළ යෙහෝවඃවහන්සේගේ අණ පනත්වලට කීකරු වෙති. තම අභිෂේක ලත් සහෝදරයන් විසින් දැනුවත් කරනු ලැබ සිටින ඔවුහු, සියලු ආකාර බොරු නමස්කාරවලින් වැළකී සිට, රුධිරයේ පරිශුද්ධතාව පිළිපදිති. (ක්‍රියා 15:19, 20; ගලාති 5:19, 20; කොලොස්සි 3:5) ඔවුහු යෙහෝවඃවහන්සේට තම මුළු හෘදයෙන්, මනසින්, ආත්මයෙන් හා ශක්තියෙන් ප්‍රේම කරන අතර, තමන්ට මෙන් තම අසල්වැසියන්ටද ප්‍රේම කරති. (මතෙව් 22:37; යාකොබ් 2:8) ඉපැරණි ඉශ්‍රායෙලයේ යුදෙව් ආගමට හැරුණු අය, සාලමොන්ගේ දේවමාළිගාව ගොඩනැඟීමට උදව් කළ අතර, සැබෑ නමස්කාරය යළි ස්ථාපිත කිරීමට අනුබල දුන්හ. (1 ලේකම් 22:2; 2 ලේකම් 15:8-14; 30:25) අදදින, මහත් සමූහයද ගොඩනැඟීමේ ව්‍යාපෘතීන්වලට හවුල් වෙති. නිදසුනක් වශයෙන්, ඔවුන් සභාවන් සහ චාරිකා ගොඩනැංවීමට උපකාර කරන අතර, රාජ්‍ය ශාලා, එක්රැස්වීම් ශාලා සහ ශාඛා පහසුකම් වැනි ගොඩනැගිලි ඉදි කිරීමේ ව්‍යාපෘතීන් භාරගෙන ක්‍රියා කිරීම ගැන සඳහන් කළ යුතු නැත.

7. දේවමාළිගා සේවාවන් කරගෙන යෑමට ඇති තරම් ලෙවීවරුන් නොසිටි අවස්ථාවේ, වහල්භාවයට යෑමෙන් පසු යෙරුසලමේ කුමක් සිදුවීද?

⁷ පොදු යුගයට පෙර 537දී, ඉශ්‍රායෙල් සෙනඟ බබිලෝනියේ වහල්භාවයේ සිට ආපසු හැරී එන විට, දේවමාළිගා භූමි ප්‍රදේශයෙහි සේවය සංවිධානය කිරීමට ඔවුහු පටන්ගත්හ. කෙසේවුවද, ආපසු හැරී ආ ලෙවීවරු ගණනින් එතරම් සංඛ්‍යාවක් නොවූහ. මෙබැවින්, නෙතිනිම්වරුන්ට—එනම්, මීට පෙර ලෙවීවරුන්ට උදව් කළ චර්මච්ඡේදිත විදේශීය වැසියන්ට—දේවමාළිගා සේවය තුළ වැඩිමනත් වරප්‍රසාද දෙන ලදි. කෙසේවෙතත්, ඔවුන් අභිෂේක ලත් ආරොන්ගේ පූජකයන්ට සමාන වූයේ නැත.b—එස්රා 7:24; 8:15-20; නෙහෙමියා 3:22-26.

8, 9. අන්තිම දවස්වල පරිශුද්ධ සේවය පිරිනැමීමේ වැඩය තුළ, වෙනත් බැටළුවන් වැඩිමනත් පංගුකාරකමක් දක්වා ඇත්තේ කෙසේද?

⁸ අදදින අභිෂේක ලත් ක්‍රිස්තියානීහු මෙම රටාව අනුගමනය කර ඇත්තාහ. “අන්තිම කාලය” ඉදිරියට ඇදී යෑමත් සමඟම, අභිෂේක ලත් ඉතිරි අය, දෙවියන්වහන්සේගේ “දේශයේ” ගණනින් එන්ට එන්ටම ස්වල්පයක් බවට පත්වී ඇත්තාහ. (දානියෙල් 12:9; එළිදරව් 12:17) මේ හේතුව නිසා, “පරිශුද්ධ සේවය” පිරිනැමීමේ බරෙන් වැඩි හරියක් දැන් ඉටුකර තිබෙන්නේ මහත් සමූහයයි. (එළිදරව් 7:15) තමන්ගේ අභිෂේක ලත් සහෝදරයන්ගේ මඟ පෙන්වීම අනුගමනය කරමින්, ඔවුහු, “දෙවියන්වහන්සේගේ නාමයට ස්තුතිකරන තොල්වල ඵල වන ප්‍රශංසාව නැමති පූජාව උන්වහන්සේම කරණකොටගෙන නිතරම දෙවියන්වහන්සේට ඔප්පුකර[ති].” ඔවුහු “යහපත්කම්කරන්ටත් අනුන්ට බෙදාදෙන්ටත් මතකනැති නොකර[ති],” මන්ද “එයාකාර පූජාවලට දෙවියන්වහන්සේ ප්‍රසන්න වන” බව ඔවුහු දනිති.—හෙබ්‍රෙව් 13:15, 16.

⁹ එපමණක්ද නොව, සෑම වසරකම මහත් සමූහය සිය දහස් ගණනින් වැඩි වීමත් සමඟ, අධීක්ෂණය සඳහා වූ අවශ්‍යතාව එන්ට එන්ටම වැඩි වෙයි. එක් කාලයක, මෙය සම්පූර්ණයෙන්ම හසුරුවනු ලැබුවේ, අභිෂේක ලත් ක්‍රිස්තියානීන් විසිනි. දැන්, වැඩිමනත් සභාවන්හි, එමෙන්ම චාරිකාවන්හි, දිස්ත්‍රික්කවල සහ ශාඛා වැඩි ප්‍රමාණයක අධීක්ෂණය වෙනත් බැටළුවන්ට පවරා දීමට අවශ්‍ය වී ඇත. වර්ෂ 1992දී, මේ අයගෙන් ස්වල්පදෙනෙකුට පාලක මණ්ඩලයේ කමිටුවල රැස්වීම්වලට පැමිණීමටත්, ඡන්ද නොදමන අය ලෙසට සේවය කිරීමටත් වරප්‍රසාද දෙන ලදි. තවමත්, මෙම වෙනත් බැටළුවන් තමන්ගේ අභිෂේක ලත් සෙසු ක්‍රිස්තියානීන්ට පක්ෂපාතව සිටින අතර, යෙහෝවඃවහන්සේගේ විශ්වාස වූ නුවණ ඇති දාසයා වශයෙන් ඔවුන්ට සහය දීම වරප්‍රසාදයක් බව ඔවුන්ට හැඟේ.—මතෙව් 25:34-40.

“අධිපතියෙකු මෙන්”

10, 11. සමහරක් පිලිස්තිවරුන්ගේ රටාව අනුගමනය කරමින්, කලින් දෙවියන්වහන්සේගේ සතුරන්ව සිටි අයගේ හෘදයන්හි වෙනසක් ඇතිවී තිබෙන්නේ කෙසේද? කිනම් ප්‍රතිඵල සහිතවද?

¹⁰ විශ්වාස වූ නුවණ ඇති දාසයා වෙනත් බැටළුවන්ව වගකීම් සහිත නිලතලවල පාවිච්චි කර තිබෙන ආකාරය, සෙකරියා 9:6, 7හි පුරෝකථනය කරනු ලැබිණ. එහි අපට මෙසේ කියවීමට තිබේ: “පිලිස්තිවරුන්ගේ පාරට්ටුවද සිඳදමන්නෙමි. ඔහුගේ ලේ ඔහුගේ කටින්ද ඔහුගේ පිළිකුල්කම් ඔහුගේ දත් අතරෙන්ද පහකරන්නෙමි; ඔහු අපේ දෙවියන්වහන්සේ උදෙසා ඉතිරිවී, යූදාහි අධිපතියෙකු මෙන් සිටිනවා ඇත, එක්‍රොන් යෙබූසියයෙකු මෙන් වන්නේය.”c පිලිස්තිවරු වනාහි, අදදින සාතන්ගේ ලෝකය මෙන් යෙහෝවඃවහන්සේගේ පරම සතුරෝ වූහ. (1 යොහන් 5:19) අවසානයේදී පිලිස්තිවරුන් ජනතාවක් හැටියට සමූලඝාතනය කරනු ලැබුවාක් මෙන්, මෙම ලෝකයද, එහි ආගමික, දේශපාලනික හා වාණිජමය කොටස් සමඟ ඉතා ඉක්මනින් යෙහෝවඃවහන්සේගේ විනාශකාරි වියරුව අද්දකිනවා ඇත. —එළිදරව් 18:21; 19:19-21.

¹¹ කෙසේවෙතත්, සෙකරියාගේ වචනවලට අනුව, ඇතැම් පිලිස්තිවරුන් තම හෘද වෙනස් කරගෙන තිබූ අතර, මින් පූර්වාදර්ශනය කළේ, අදදින මේ ලෝකයේ ඇතමුන් යෙහෝවඃවහන්සේගේ සතුරන් ලෙස සිටින්ට යන්නේ නැති බවය. මොවුන් ආගමික පිළිම වන්දනාවෙන් සහ ඒවායේ අශික්ෂිත චාරිත්‍ර සහ පිළිකුල් පූජා නවතා දමනු ඇති අතර, යෙහෝවඃවහන්සේගේ ඇස් ඉදිරියේ පවිත්‍ර කරනු ලබනවා ඇත. අපගේ දවස්වල, එවැනි පුනරුත්ථාපනය කරනු ලැබූ “පිලිස්තිවරුන්” මහත් සමූහය තුළ සොයාගත හැකිය.

12. නවීන කාලවලදී, “එක්‍රොනය” “යෙබූසියවරුන් මෙන්” වී ඇත්තේ කෙසේද?

¹² මෙම අනාවැකියට අනුව, එක්‍රොන් නමැති ප්‍රධාන පිලිස්ති නුවර “යෙබූසියයෙකු මෙන් වන්නේය.” යෙබූසිවරුද වරක් ඉශ්‍රායෙල්හි සතුරෝව සිටියෝය. දාවිත් යෙරුසලම අත්පත් කරගන්නා තෙක්, එය තිබුණේ ඔවුන්ගේ යටතේය. කෙසේවෙතත්, යුද්ධවලින් බේරී ජීවත් වූ අයගෙන් සමහරෙක් යුදෙව් ආගමට හැරුණු බවක් පෙනෙන්ට තිබේ. ඔවුහු ඉශ්‍රායෙල් දේශයේ වහලුන් ලෙස සේවය කළ අතර, දේවමාළිගාව ඉදි කිරීමේ වරප්‍රසාදය පවා ඔවුන්ට ලැබිණ. (2 සාමුවෙල් 5:4-9; 2 ලේකම් 8:1-18) අදදින, යෙහෝවඃවහන්සේට නමස්කාර කිරීමට හැරෙන, “එක්‍රොන්වරුන්ට,” විශ්වාස වූ නුවණ ඇති දාසයාගේ අධීක්ෂණය යටතේ, “දේශය” තුළ සේවය කිරීමේ වරප්‍රසාදය ඇත.

13. ඉපැරණි ලෝකයේ අධිපතීන් කවුරුන් වීද?

¹³ පිලිස්තිවරුන් යුදාහි අධිපතියෙකු වනු ඇති බව සෙකරියා පවසයි. ’අල්·ලූප්ʹ, යන හෙබ්‍රෙව් වචනය, “අධිපතියා” යනුවෙන් පරිවර්තනය කළ විට, “සහස්‍රාධිපතියා” (හෙවත්, “චිලිආච්”ය). එය ඉතා උසස් නිලයක් විය. මුල් ඒදොම් ජාතියට අධිපතීන් 13දෙනෙකු පමණක් සිටි බව පෙනෙන්ට තිබේ. (උත්පත්ති 36:15-19) මෙම “අධිපතියා” යන වචනය බොහෝවිට භාවිත වී ඇත්තේ ඉශ්‍රායෙල් ගැන කතා කරන විට නොවේ, නමුත් ‘දහස් ගණනකට මුලාදෑනියා (හෙවත් අධිපතියා)’ යන ප්‍රකාශය නිතරම දකින්ට ලැබේ. මෝසෙස් ඉශ්‍රායෙල් ජාතියට නියෝජිතවරුන්ගේ නාම ප්‍රකාශයට පත් කළ විට, ඔහු ‘ඉශ්‍රායෙල් දහස් ගණන්වලට මුලාදෑනියන්ව’ කැඳවීය.d මොවුන්ගෙන් 12දෙනෙකු සිටි අතර, පෙනෙනාකාරයට ඔවුන් යටත්ව සිටියේ මෝසෙස්ට පමණය. (ගණන් කථාව 1:4-16) ඒ හා සමානව, යුද සංවිධානයේද, සහස්‍රාධිපතීන් දෙවන වූයේ හමුදා ප්‍රධානියාට හෙවත් රජුට පමණි.—2 සාමුවෙල් 18:1, 2; 2 ලේකම් 25:5.

14. අදදින “පිලිස්තිවරුන්” අධිපතීන් බවට පත්ව සිටින්නේ කෙසේද?

¹⁴ පසුතැවිලි වූ පිලිස්තිවරයා ඇත්තටම ඉශ්‍රායෙල්හි අධිපතියෙකු වන බවක් සෙකරියා පුරෝකථනය කළේ නැත. ඔහු ඉශ්‍රායෙල්හි ජන්ම උපතක් ඇති කෙනෙකු නොවූ නිසා, එය සුදුසු දෙයක් නොවනවා ඇත. එහෙත්, ඔහු අධිපතියෙකුට සමාන වනවා ඇත, එනම් අධිපතියෙකුට සමාන අධිකාරමය නිලයක් හොබවනවා ඇත. එය එසේ බවට ඔප්පු වී තිබේ. අභිෂේක ලත් ක්‍රිස්තියානීන්ගේ ඉතිරි කොටස ගණනින් අඩුවත්ම, එමෙන්ම තවමත් ජීවත් වන අයගෙන් බොහෝදෙනෙක් තම වයස මගින් සීමාවත්ම, හොඳින් පුහුණු කරනු ලැබූ වෙනත් බැටළුවෝ එම අඩුව පිරිමහති. තමන්ගේ අභිෂේක ලත් සහෝදරයන්ගේ තැන ගන්ට ඔවුන්ට වුවමනා නැත. එහෙත්, විශ්වාස වූ නුවණ ඇති දාසයා ඔවුන්ට අවශ්‍ය තරමින්, “දේශය” තුළ අධිකාරය ලබා දෙන අතර, එවිට දෙවියන්වහන්සේගේ සංවිධානයට සංවිධානාත්මක ආකාරයකින් ඉදිරියට ඇදී යා හැකිය. එවැනි ප්‍රගතිශීලි ක්‍රියාවලියක් තවත් අනාවැකියකද දකින්ට තිබේ.

පූජකයෝ සහ ගොවියෝ

15. (අ) යෙසායා 61:5, 6 ඉටුවීම තුළ, “ස්වාමීන්වහන්සේගේ පූජකයෝ” කවරහුද, එහි සම්පූර්ණ අර්ථයෙන් මෙම පදවිය තුළ ඔවුන් සේවය කරන්නේ කවදාද? (ආ) ඉශ්‍රායෙල්ගේ වගා කිරීමේ වැඩය කරන “විදේශියෝ” කවරහුද, තවද ආත්මික අර්ථයෙන් ගත් කල, මෙම වැඩයට ඇතුළත් වන්නේ කුමක්ද?

¹⁵ යෙසායා 61:5, 6හි මෙසේ කියවීමට තිබේ: “විදේශියෝ සිට නුඹලාගේ බැටළු රැළවල් පෝෂ්‍යකරන්නෝය, විදේශියෝ නුඹලාගේ ගොවියෝද නුඹලාගේ මිදිවතු වවන්නෝද වන්නෝය. නුඹලා වනාහි ස්වාමීන්වහන්සේගේ පූජකයෝයයි කියනු ලබන්නෝය. මනුෂ්‍යයන් නුඹලාට: අපේ දෙවියන්වහන්සේගේ සේවකයෝයයි කියනවා ඇත. නුඹලා ජාතීන්ගේ සම්පත් භුක්තිවිඳ, ඔවුන්ගේ තේජස හිමිකරගන්නවා ඇත.” අදදින, “ස්වාමීන්වහන්සේගේ පූජකයෝ”, අභිෂේක ලත් ක්‍රිස්තියානීහු වෙති. අවසාන හා පූර්ණ අර්ථයෙන් ඔවුහු ස්වර්ගික රාජ්‍යයේ “ස්වාමීන්වහන්සේගේ පුජකයෝ . . .. , අපේ දෙවියන්වහන්සේගේ සේවකයෝ” ලෙස සේවය කරනු ඇත. (එළිදරව් 4:9-11) මෙම වගා කිරීමේ වැඩයට වගකිව යුතු “විදේශියෝ” කවරහුද? මොවුහු වනාහි, දෙවියන්වහන්සේගේ ඉශ්‍රායෙල් “දේශය” තුළ වාසය කරන වෙනත් බැටළුවෝය. ඔවුන්ට පවරා තිබෙන එඬේර වැඩකටයුතු, ගොවිතැන් කටයුතු සහ මිදිවතු බලාගැනීමේ වැඩකටයුතු මොනවාද? වැදගත් ආත්මික අර්ථයෙන් ගත් කල, මෙම වැඩ නම්, ජනයාට උපකාර කොට ඔවුන්ව පෝෂණය කිරීමේ හා ඔවුන්ව ගෝලයන් කිරීමේ වැඩයි.—යෙසායා 5:7; මතෙව් 9:37, 38; 1 කොරින්ති 3:9; 1 පේතෘස් 5:2.

16. දෙවියන්වහන්සේගේ ජනයාගේ ‘දේශයෙහි’ සියලු වැඩකටයුතු අවසානයේදී හසුරුවනු ඇත්තේ කවුරුන්ද?

¹⁶ දැනට, පොළොව මත සිටින ආත්මික ඉශ්‍රායෙල්ගේ කුඩා සංඛ්‍යාවක් ආත්මික එඬේර වැඩකටයුතු, ගොවිතැන් සහ මිදිවතු බලාගැනීමේ කටයුතුවල හවුල්වෙමින් සිටිති. අභිෂේක ලත් සභාව අවසානයේදී මුළුමනින්ම ක්‍රිස්තුස්වහන්සේ හා සමඟ එක්සත් වූ විට, මේ සියලු වැඩ වෙනත් බැටළුවන් සඳහා වෙන්වනවා ඇත. “දේශයේ” මිනිස් අධීක්ෂණ කටයුතු පවා සුදුසුකම් ලත් වෙනත් බැටළුවන්ගේ අත්වල තිබෙනු ඇති අතර, එසකියෙල් පොතේ මේ අයව අධිපතීන්ගේ පංතියක් හැටියට නම් කරනු ලැබ ඇත.—එසකියෙල්, 45, 46වන පරිච්ඡේද.e

“දේශය” සදාකල් පවතියි

17. මෙම අවසාන දවස් අතරතුරේදී, යෙහෝවඃවහන්සේ කිනම් සූදානම් කිරීම් කරමින් සිටිනසේක්ද?

¹⁷ එසේය, මහත් සමූහයට භයවන්ට අවශ්‍යතාවක් නැත! යෙහෝවඃවහන්සේ ඔවුන් සඳහා ඇති තරම් පිළියෙළ කිරීම් කර තිබෙනසේක. මෙම අවසාන කාලයේදී පොළොව මත සිදුවී තිබෙන අතිවැදගත් දෙය නම්, අභිෂේක ලත් අයගේ එකතු කිරීම හා මුද්‍රා කිරීම සිදු කරනු ලැබ තිබීමයි. (එළිදරව් 7:3) කෙසේවෙතත්, මෙය සිදුවන බවට බලාගනිමින්, යෙහෝවඃවහන්සේ, ඔවුන්ව යළි පිහිටුවන ලද ආත්මික දේශයක වෙනත් බැටළුවන්ව ඔවුන් සමඟ ඇසුරකට ගෙනැවිත් තිබේ. එහි ඔවුහු ආත්මිකව පෝෂණය කරනු ලැබ, ක්‍රිස්තියානි මාර්ගය තුළ පුහුණු කරනු ලැබ සිටිති. තවදුරටත්, අධීක්ෂණය ඇතුළු පරිශුද්ධ සේවයේ ඔවුහු මැනවින් ස්ථාපිත කරනු ලැබ සිටිති. ඔවුහු මේ සඳහා යෙහෝවඃවහන්සේටද, තම අභිෂේක ලත් සහෝදරයන්ටද ගැඹුරින් කෘතඥ වෙති.

18. ආත්මික ඉශ්‍රායෙලයේ ‘දේශයෙහි’ වෙනත් බැටළුවන් පක්ෂපාතව සිටිනු ඇත්තේ කිනම් සිද්ධීන් තුළින්ද?

¹⁸ මාගොග්හි ගොග්, දෙවියන්වහන්සේගේ ජනයා මත තම අවසාන ප්‍රහාරය එල්ල කරන විට, වෙනත් බැටළුවන් අභිෂේක ලත් ඉතිරි අය සමඟ, ‘ගම් ඇති දේශයෙහි’ ස්ථිරව සිටිනවා ඇත. ඔවුන් ජාතීන්ගේ විනාශයෙන් බේරී ජීවත් වී, දෙවියන්වහන්සේගේ නව ලෝකයට ඇතුල් වන විට වෙනත් බැටළුවන් එම “දේශය” තුළ සිටිනවා ඇත. (එසකියෙල් 38:11; 39:12, 13; දානියෙල් 12:1; එළිදරව් 7:9, 14) දිගටම ඇදහිලිවන්තව සිටින ඔවුන්ට එම චමත්කාරජනක ස්ථානයෙන් කිසිදා පිටවීමට සිදු නොවෙනවා ඇත.—යෙසායා 11:9.

19, 20. (අ) නව ලෝකයේදී, ‘දේශයේ’ වැසියන් කිනම් උදාර අධීක්ෂණයක් භුක්තිවිඳිනවා ඇත්ද? (ආ) මහත් ආශාවෙන් අප බලා සිටින්නේ කුමක් සඳහාද?

¹⁹ ඉපැරණි ඉශ්‍රායෙලය මිනිස් රජවරුන් විසින් පාලනය කරනු ලැබූ අතර, එහි ලෙවී පූජකයෝ සිටියහ. නව ලෝකයේදී, ක්‍රිස්තියානීන්ට ඉතා මහත් උදාර අධීක්ෂණයක් තිබෙනු ඇත: එනම් යෙහෝවඃ දෙවියන්වහන්සේ යටතේ, ඔවුහු ශ්‍රේෂ්ඨ උත්තම පූජකයාණන් සහ රජාණන් වන යේසුස් ක්‍රිස්තුස්වහන්සේටත්, සහය රජවරුන් සහ පූජකයන් වන 1,44,000දෙනාටත්, යටත්ව සිටිනු ඇති අතර, මේ අයගෙන් සමහරෙකු පොළොව මත විසූ තම ක්‍රිස්තියානි සහෝදර සහෝදරියන් හැටියට ඔවුහු කලින් දැන සිටියහ. (එළිදරව් 21:1) නව යෙරුසලමින් ගලා එන සුව කිරීමේ ආශීර්වාදවල ප්‍රබෝධවත් වෙමින්, ආත්මික දේශයේ මෙම ඇදහිලිවන්ත වැසියන් පදගතාර්ථයෙන්ම පාරාදීසයක් බවට නැවත පත් කරන ලද පොළොවක ජීවත් වනවා ඇත.—යෙසායා 32:1; එළිදරව් 21:2; 22:1, 2.

²⁰ යෙහෝවඃවහන්සේගේ මහත් ස්වර්ගික රථය, උන්වහන්සේගේ අරමුණ සාක්ෂාත් කරගැනීම සඳහා ඉදිරියට ගමන් කරත්ම, අපට පවරා තිබෙන වැඩ කොටස ඉටු කිරීමට අපි දැඩි උනන්දුවකින් ඉදිරිය බලා යමු. (එසකියෙල් 1:1-28) එම අරමුණු අවසානයේදී ඉටු කරනු ලබන විට, යෙහෝවඃවහන්සේගේ ජයග්‍රාහී විශුද්ධත්වය කිනම් ප්‍රීතියක් සමඟින් පවත්වනු ලැබේදයයි සිතා බලන්න! එළිදරව් 5:13හි වාර්තා කර ඇති ප්‍රබල ගීය, එවිට සියලු මැවිලි විසින් ගායනා කරනු ඇත: “සිංහාසනයෙහි වැඩඉන්න තැනැන්වහන්සේටත් බැටළුපැටවාණන්ටත් ප්‍රශංසාවද ගෞරවයද මහිමයද පරාක්‍රමයද සදාකාලේටම වේ[වා]”! අපේ ස්ථානය ස්වර්ගයේ වේවා, පොළොවේ වේවා, එම මහානුභාවසම්පන්න ප්‍රශංසා ගී ඛණ්ඩයට අපගේ කට හඬද එක් කරන්ට අප ආශාවෙන් බලා නොසිටින්නෙමුද?

[පාදසටහන්වල]

ඔබ පිළිතුරු දෙන්නේ කෙසේද?

◻ වර්ෂ 1919දී කිනම් “දේශය” යළි පිහිටුවනු ලැබීද, තවද එය වැසියන්ගෙන් පිරී ගියේ කෙසේද?

◻ දෙවියන්වහන්සේගේ යළි පිහිටුවන ලද ජනයාගේ “දේශය” තුළ, වෙනත් බැටළුවන්ට වැඩිමනත් වගකීම් දෙනු ලැබ ඇත්තේ කෙසේද?

◻ මහත් සමූහයේ සාමාජිකයන්, “යෙබූසියයෙකු මෙන්” වන්නේ කිනම් මාර්ගයෙන්ද? “යූදාහි අධිපතියෙක් මෙන්” වන්නේ කිනම් මාර්ගයෙන්ද?

◻ ඇදහිලිවන්ත වෙනත් බැටළුවන් “දේශය” තුළ කොතරම් කලක් සිටිනු ඇත්ද?

[23වන පිටුවේ පින්තූරය]

නවීන පිලිස්තිවරු “යූදාහි අධිපතියෙක්” මෙන් වනවා ඇත

[24වන පිටුවේ පින්තූර]

අභිෂේක ලත් අය සහ වෙනත් බැටළුවෝ ආත්මික දේශයෙහි එකට සේවය කරති