යෙහෝවඃවහන්සේ ගණන් බලන විට, ඔබට උන්වහන්සේගෙන් යහපත අත් වේවා!
‘මාගේ දෙවියන්වහන්ස, මේ නිසාත් මා සිහිකළ මැනව. මාගේ දෙවියන්වහන්ස, යහපත පිණිස මා සිහිකළ මැනව.’—නෙහෙමියා 13:22, 31.
1. දෙවියන්වහන්සේට කැප වූ අයට, යෙහෝවඃවහන්සේට කදිම ආකාරයකින් ගණන් දීම සඳහා උපකාර කරන්නේ කුමක්ද?
යෙහෝවඃවහන්සේට කදිම ආකාරයකින් ගණන් දීම සඳහා උන්වහන්සේගේ සේවකයන්ට අවශ්‍ය සෑම උපකාරයක්ම තිබේ. ඒ ඇයි? දෙවියන්වහන්සේගේ භූමික සංවිධානයට අයත් අය වශයෙන් ඔවුන්ට උන්වහන්සේ සමඟ කිට්ටු සම්බන්ධයක් ඇති නිසාය. උන්වහන්සේ තම අරමුණු ඔවුන්ට හෙළි කර ඇති අතර, තම ශුද්ධාත්මය තුළින් ඔවුන්ට උපකාර හා ආත්මික තීක්ෂ්ණ බුද්ධිය පිරිනමා ඇත. (ගීතාවලිය 51:11; 119:105; 1 කොරින්ති 2:10-13) මෙම විශේෂ තත්වයන් හේතුවෙන්, යෙහෝවඃවහන්සේ තම භූමික සේවකයන්ගෙන් ප්‍රේමනීයව ඉල්ලා සිටින්නේ, ඔවුන්ට තමන් ගැනත්, එසේම උන්වහන්සේගේ ශක්තියෙන් හා ශුද්ධාත්මයේ උපකාරයෙන් ඉටු කරන දේ ගැනත් පෞද්ගලිකව උන්වහන්සේට ගණන් දීමටයි.
2. (අ) නෙහෙමියා දෙවියන්වහන්සේට යහපත් ආකාරයකින් ගණන් දුන්නේ කුමන ආකාරවලින්ද? (ආ) නෙහෙමියා තමාගේ නම දරන බයිබල් පොත අවසන් කළේ කුමන කන්නලව්වෙන්ද?
2 දෙවියන්වහන්සේට යහපත් ආකාරයකින් ගණන් දුන් එක් මනුෂ්‍යයෙකි, පර්සියානු රජු වන අර්තක්ෂස්තාගේ (ලොන්ජිමැනස්) පාත්‍රාධාරි වූ නෙහෙමියා. (නෙහෙමියා 2:1) නෙහෙමියා යුදෙව්වරුන්ගේ ආණ්ඩුකාරයා බවට පත් වූ අතර, සතුරන් හා අන්තරාවන් හමුවේ යෙරුසලමේ පවුර නැවත ගොඩනැඟුවේය. සැබෑ නමස්කාරය සඳහා ජ්වලිතයක් ඇතුව, ඔහු දෙවියන්වහන්සේගේ ව්‍යවස්ථාව පැනවූ අතර, පීඩිතවූවන් කෙරෙහි සැලකිල්ල දැක්වූයේය. (නෙහෙමියා 5:14-19) නිතිපතා තමුන්වම පවිත්‍ර කරගන්ටත්, දොරටු අසල රැකවල් කරන්ටත්, සබත් දවස ශුද්ධ යමක් හැටියට සලකන්ටත්, නෙහෙමියා ලෙවීවරුන්ව උනන්දු කළේය. එබැවින් ඔහුට මෙසේ යාච්ඤා කරන්ට හැකි විය: “මාගේ දෙවියන්වහන්ස, මේ නිසාත් මා සිහිකර, ඔබගේ කරුණාවේ මහත්කම පරිද්දෙන් මට දයාවී වදාළ මැනව.” එමෙන්ම නෙහෙමියා, දිව්‍යානුභාවයෙන් ලියන ලද තම පොත මෙසේ අවසන් කිරීම උචිතය: “මාගේ දෙවියන්වහන්ස, යහපත පිණිස මා සිහිකළ මැනව.”—නෙහෙමියා 13:22, 31.
3. (අ) ඔබ යහපත්කම් කරන පුද්ගලයෙකුව විස්තර කරන්නේ කෙසේද? (ආ) නෙහෙමියා ගත් ක්‍රියාමාර්ගය ගැන කල්පනා කිරීම අපෙන් කුමන ප්‍රශ්න ඇසීමට අපව පොලඹවයිද?
3 යහපත්කම් කරන පුද්ගලයෙක්, සත්ගුණවත් කෙනෙකි; අනුන්ට ප්‍රයෝජන ගෙන දෙන නිර්දෝෂ ක්‍රියා කරන කෙනෙකි. නෙහෙමියා එවැනි පුද්ගලයෙක් වූයේය. ඔහුට දෙවියන්වහන්සේ සඳහා ගෞරවාන්විත භයක් තිබුණු අතර, සැබෑ නමස්කාරය සඳහා ඉමහත් ජ්වලිතයක් තිබිණ. එපමණක්ද නොව, දෙවියන්වහන්සේගේ සේවයෙහි ඔහුට තිබූ වරප්‍රසාද ගැන ඔහු ස්තුතිවන්ත වූ අතර, ඔහු යෙහෝවඃවහන්සේට කදිම ආකාරයකින් තමන් ගැනම ගණන් දුන්නේය. ඔහුගේ ජීවිත ගමන ගැන කල්පනා කිරීම අපෙන් මෙසේ ඇසීමට හේතුවක් විය හැක: ‘දෙවියන්වහන්සේගෙන් ලැබී තිබෙන මගේ වරප්‍රසාද හා වගකීම් මා සලකන්නේ කෙසේද? මම යෙහෝවඃ දෙවියන්වහන්සේට හා යේසුස් ක්‍රිස්තුස්වහන්සේට පෞද්ගලිකව ගණන් දෙමින් සිටින්නේ කුමන ආකාරයකින්ද?’
දැනුම අපව ගණන් දෙන තත්වයකට පමුණුවයි
4. යේසුස්වහන්සේ තම අනුගාමිකයන්ට දුන්නේ කුමන පැවරුමද, එමෙන්ම “සදාකාල ජීවනය ලබන්ට වටින” අය කළේ කුමක්ද?
4 යේසුස්වහන්සේ තම අනුගාමිකයන්ට මෙම පැවරුම දුන්සේක: “ගොස්, සියලු ජාතීන් ගෝලයන් කරන්න, . . . ඔවුන් බව්තීස්මකරන්න. මා විසින් නුඹලාට අණකළ සියල්ලම පවත්වන්ට ඔවුන්ට උගන්වන්න.” (මතෙව් 28:19, 20) ගෝලයන් සෑදීම කළ යුතු වූයේ ඉගැන්වීමේ කාර්යයේ නිරත වීමෙනි. එසේ ඉගැන්වීම ලැබ “සදාකාල ජීවනය ලබන්ට වටින” අය, යේසුස්වහන්සේ කළාක් මෙන් බව්තීස්ම වනු ඇත. (ක්‍රියා 13:48, NW; මාර්ක් 1:9-11) උන්වහන්සේ ආඥා කර තිබූ සෑම දෙයක්ම පැවැත්වීමට වූ ඔවුන්ගේ ආශාව හෘදයෙන්ම නික්මෙනු ඇත. දේවවචනයෙහි ඒකාන්ත දැනුම ලබා, අදාළ කරගැනීමෙන් ඔවුන් කැපවීම කරා දියුණු වනු ඇත.—යොහන් 17:3.
5, 6. අප යාකොබ් 4:17 තේරුම්ගන්නේ කෙසේද? එය අදාළ වන ආකාරය නිදර්ශනය කරන්න.
5 අපේ ශුද්ධ ලියවිලිමය දැනුම ගැඹුරු වන තරමටම, අපේ ඇදහිල්ලේ අත්තිවාරමද ශක්තිමත් වේ. ඒ සමඟම, අප දෙවියන්වහන්සේට ගණන් දිය යුතු බවට වූ වගකීම වැඩි වේ. යාකොබ් 4:17 මෙසේ පවසයි: “එබැවින් යමෙක් යහපත කරන්ට දැන එය නොකරන්නේ නම්, ඔහුට ඒක පාපයය.” මෙම ප්‍රකාශය, දෙවියන්වහන්සේ මත සම්පූර්ණයෙන්ම රඳා නොසිට, පුරසාරම් දෙඩීම ගැන ශ්‍රාවක යාකොබ් මොහොතකට කලින් පවසා තිබූ දෙයට කළ යොමු දැක්වීමක් බව පැහැදිලිය. කල්පවතින කිසිම දෙයක් යෙහෝවඃවහන්සේගේ උපකාරය නොමැතිව ඉටු කරගත නොහැකි බව පුද්ගලයෙකු දැන ඊට අනුකූලව ක්‍රියා නොකරනවා නම්, එය පාපයකි. එහෙත් පැහැර හරින දේ සම්බන්ධ පාපවලටත් යාකොබ්ගේ වචන අදාළ විය හැක. නිදසුනක් වශයෙන්, එළුවන් හා බැටළුවන් පිළිබඳ යේසුස්වහන්සේගේ උපමාවෙහි, එළුවන්ව හෙළා දකිනු ලබන්නේ, නපුරු ක්‍රියා නිසා නොව, නමුත් ක්‍රිස්තුස්වහන්සේගේ සහෝදරයන්ට උපකාර නොකිරීම නිසාය.—මතෙව් 25:41-46.
6 යෙහෝවඃවහන්සේගේ සාක්ෂිකරුවන් සමඟ බයිබලය පාඩම් කරමින් සිටි එක් පුරුෂයෙකුගේ ආත්මික ප්‍රගතිය මන්දගාමී විය; ඒ මන්දයත් දුම්පානය අත්හැරිය යුතු බව ඔහු දැනගෙන සිටියත් ඔහු එය අත්නෑරිය බැවිනි. යාකොබ් 4:17 කියවන මෙන් වැඩිමහල්ලෙක් ඔහුගෙන් ඉල්ලා සිටියේය. මෙම ශුද්ධ ලියවිලි පාඨයේ වැදගත්කම ගැන අදහස් දැක්වීමෙන් පසු, එම වැඩිමහල්ලා මෙසේ පැවසීය: “බව්තීස්ම වෙලා නැති වුණත්, ඔබ ගණන් දෙන්න ඕනේ; ඔබේ තීරණයට සම්පූර්ණයෙන්ම වගකියන්න ඕනේ.” එම පුරුෂයා ප්‍රතිචාරය දක්වා, දුම්පානය නවතා, යෙහෝවඃ දෙවියන්වහන්සේට තම කැපවීමේ සංකේතයක් වශයෙන් බව්තීස්ම වීම සඳහා ඉක්මනින්ම සුදුසුකම් ලැබීම සන්තෝෂයට කරුණකි.
අපේ සේවය සඳහා ගණන් දිය යුතුයි
7. “දෙවියන්වහන්සේම පිළිබඳ වූ දැනුම” සඳහා අපේ කෘතඥතාව විදහාපෙන්විය හැකි එක් මාර්ගයක් කුමක්ද?
7 අපේ මැවුම්කරුට සතුට ගෙන දීම අපේ හෘදයාංගම ආශාව විය යුතුය. “දෙවියන්වහන්සේම පිළිබඳ වූ දැනුම” සඳහා අපේ කෘතඥතාව විදහාපෙන්විය හැකි මඟක් නම්, උන්වහන්සේගේ පුත්‍ර යේසුස් ක්‍රිස්තුස්වහන්සේගේ ගෝලයන් සෑදීමේ පැවරුම ඉටු කිරීමයි. මෙය, දෙවියන්වහන්සේ සඳහාත් අපේ අසල්වාසියා සඳහාත් අපේ ප්‍රේමය පෙන්නුම් කිරීමට මඟකි. (හිතෝපදේශ 2:1-5, NW; මතෙව් 22:35-40) ඔව්, දෙවියන්වහන්සේ පිළිබඳ අප සතු දැනුම නිසා අප උන්වහන්සේට ගණන් දිය යුතු අතර, ගෝලයන් විය හැකි අය වශයෙන් අප සෙසු මනුෂ්‍යයන්ව සැලකිය යුතුය.
8. පාවුල්ට තම සේවය සම්බන්ධයෙන් දෙවියන්වහන්සේට ගණන් දිය යුතු බව දැනුණායයි අපට කිව හැක්කේ මන්ද?
8 ශුභාරංචිය මුළු හෘදයෙන්ම පිළිගෙන ඊට කීකරු වීම ගැළවීමට මඟ පාදන බවත්, එය ප්‍රතික්ෂේප කිරීම විනාශයට තුඩු දිය හැකි බවත් ප්‍රේරිත පාවුල් දැනසිටියේය. (2 තෙසලෝනික 1:6-8) එමනිසා, තම සේවය සම්බන්ධයෙන් තමා යෙහෝවඃවහන්සේට ගණන් දිය යුතු බව ඔහුට හැඟිණ. ඇත්තෙන්ම, පාවුල්ද ඔහුගේ ආශ්‍රිතයන්ද ඔවුන්ගේ සේවය කෙතරම් අගය කළාද කිවහොත්, ඉන් මූල්‍යමය වාසි ලබාගන්නා බවට හැඟීමක් නොදීමට ඔවුහු පරෙස්සමින් වගබලාගත්තෝය. එපමණක්ද නොව, පාවුල්ගේ හෘදය මෙසේ පැවසීමට ඔහුව පෙලඹුවේය: “මම ශුභාරංචිය දේශනාකරම් නුමුත් පාරට්ටුකරගැනීමට මට කිසිත් නැත; මක්නිසාද එසේ කිරීමට බැඳී සිටිමි; ශුභාරංචිය දේශනා නොකළොත් මට දුක්වේ.”—1 කොරින්ති 9:11-16.
9. සියලුම ක්‍රිස්තියානීන් ගෙවිය යුතු වැදගත් ණය කුමක්ද?
9 අප යෙහෝවඃවහන්සේගේ කැප වූ සේවකයන් වන බැවින්, ‘ශුභාරංචිය දේශනා කිරීමට අපි බැඳී සිටින්නෙමු.’ රාජ්‍ය පණිවිඩය දේශනා කිරීම අපේ පැවරුමයි. අප දෙවියන්වහන්සේට කැප වූ විට එම වගකීම අපි පිළිගත්තෙමු. (ලූක් 9:23, 24, සසඳන්න.) එපමණක්ද නොව, ගෙවිය යුතු ණයක් අපට තිබේ. පාවුල් මෙසේ කීවේය: “මම ග්‍රීක්වරුන් හා ම්ලේච්ඡයන්ටත් ඥානවන්තයන් හා අඥානයන්ටත් ණයකාරයෙක්ව සිටිමි. එසේ රෝමයෙහි සිටින්නාවූ නුඹලාටත් මට පුළුවන් ප්‍රමාණයට ශුභාරංචිය දේශනාකරන්ට මම සෑදී [උනන්දුවෙන්, NW] සිටිමි.” (රෝම 1:14, 15) ජනයාට ශුභාරංචිය අසා ගැළවීමට පුළුවන් වන පිණිස, දේශනා කිරීම තම වගකීම බව පාවුල් දැනසිටි නිසා, ඔහු ණයකාරයෙක්ව සිටියේය. (1 තිමෝති 1:12-16; 2:3, 4) එබැවින් ඔහු තම පැවරුම ඉටු කිරීමටත්, සෙසු මනුෂ්‍යයන්ට ගෙවිය යුතු ණය පියවීමටත්, වෙහෙස මහන්සි වී වැඩ කළේය. ක්‍රිස්තියානීන් වශයෙන්, අපටත් ණයක් ගෙවීමට තිබේ. දෙවියන්වහන්සේ සඳහාත්, උන්වහන්සේගේ පුත්‍රයා සඳහාත්, අපේ අසල්වාසීන් සඳහාත් ප්‍රේමය පෙන්වීමේ ප්‍රධාන මාර්ගයකි, රාජ්‍ය දේශනා කිරීම.—ලූක් 10:25-28.
10. සමහරුන් තම සේවය පුළුල් කර ඇත්තේ කුමක් කිරීමෙන්ද?
10 දෙවියන්වහන්සේට පිළිගත හැකි ආකාරයකින් ගණන් දිය හැකි එක් මාර්ගයක් නම්, අපේ සේවය පුළුල් කිරීමට අපේ හැකියාවන් පාවිච්චි කිරීමයි. නිදසුනක් වශයෙන්: මෑත වර්ෂවලදී, විවිධ ජාතීන්ට අයත් ජනයා ක්‍රම ක්‍රමයෙන් බ්‍රිතාන්‍යයට පැමිණ ඇත. ශුභාරංචිය සමඟින් එවැනි අය කරා ළඟාවීම සඳහා, පුරෝගාමීන් (පූර්ණ-කාලීන රාජ්‍ය දේශනාකරුවන්) 800කට වැඩි සංඛ්‍යාවක් හා වෙනත් සාක්ෂිකරුවන් සියගණනක් විවිධ භාෂා ඉගෙනගනිමින් සිටිති. මෙහි ප්‍රතිඵලයක් වශයෙන් සේවය කදිම ආකාරයකින් වර්ධනය වී ඇත. චීන භාෂාව ඉගෙනගන්නා පංතියකට උගන්වන පුරෝගාමී සහෝදරියක් මෙසේ පැවසුවාය: “මේ විදිහට අනිත් අය එක්ක සත්‍යය බෙදාගන්ට, වෙනත් සාක්ෂිකරුවන්ට මගේ භාෂාව උගන්වන්න පුළුවන් වෙයි කියලා මම කවදාවත් හිතුවේ නැහැ. එයින් හරි තෘප්තියක් ලැබෙනවා!” ඒ හා සමාන ආකාරයකින් ඔබට ඔබේ සේවය පුළුල් කළ හැකිද?
11. එක් ක්‍රිස්තියානිවරියක් අවිධිමත් ලෙස සාක්ෂිදැරූ විට කුමක් සිදු වූවාද?
11 බොහෝදුරට, අප සෑම කෙනෙකුම ගිලෙන මනුෂ්‍යයෙකුව බේරාගැනීම සඳහා අපට කරන්ට පුළුවන් සෑම දෙයක්ම කරනු ඇත. සෑම ප්‍රස්තාවකදීම සාක්ෂිදැරීමට තම කුසලතා පාවිච්චි කිරීමට යෙහෝවඃවහන්සේගේ සාක්ෂිකරුවෝ එයට සමාන උනන්දුවක් දක්වති. මෑතකදී සාක්ෂිකාර සහෝදරියක් බස් රථයක සිටි ස්ත්‍රියක ළඟ හිඳගෙන ඇයට ශුද්ධ ලියවිලි ගැන කතා කළාය. මෙම ස්ත්‍රිය, අසන්ට ලැබූ දේ ගැන මවිතයට පත්ව ප්‍රශ්න රාශියක් ඇසුවාය. සාක්ෂිකාරියට බසයෙන් බැසීමට අවස්ථාව එළඹුණු විට, එම ස්ත්‍රියට තවත් ප්‍රශ්න රාශියක් තිබුණු නිසා, ඇගේ නිවසට පැමිණෙන මෙන් ඈ අයැද සිටියාය. සාක්ෂිකාර ස්ත්‍රිය ඊට එකඟ වූවාය. එහි ප්‍රතිඵලය? බයිබල් පාඩමක් ඇරඹූ අතර, මාස හයකට පසුව එම ස්ත්‍රිය බව්තීස්ම නොලත් රාජ්‍ය ප්‍රචාරය කරන්නියක් බවට පත් වූවාය. වැඩි කල් නොගොස්, ඈ පෞද්ගලික බයිබල් පාඩම් හයක් මෙහෙයවමින් සිටියාය. රාජ්‍ය සේවයෙහි තම කුසලතා පාවිච්චි කිරීම වෙනුවෙන් මොනතරම් මවිත කරවන විපාකයක්ද!
12. ක්ෂේත්‍ර සේවයේදී, දේවසේවකයන් වශයෙන් අපේ කුසලතා හොඳින් භාවිත කළ හැක්කේ කෙසේද?
12 පිටු 192කින් යුත් සදාකාල ජීවනයට මඟ පෙන්වන දැනුම නමැති පොත වැනි ප්‍රකාශන ක්ෂේත්‍රයේදී පාවිච්චි කිරීමෙන්, දේවසේවකයන් වශයෙන් අපේ කුසලතා බලපෑමෙන් යුක්තව යොදාගත හැක. එක්දහස් නවසිය අනූහයේ අප්‍රියෙල් මාසය වන විට, යෙහෝවඃවහන්සේගේ සාක්ෂිකරුවන්ගේ පාලක මණ්ඩලයේ ලේඛන කමිටුව, දැනුම පොත භාෂා 140කට වැඩියෙන් ප්‍රකාශයට පත් කිරීමට අනුමැතිය දී තිබුණු අතර, ඒ වන විට, භාෂා 111කින් පිටපත් 3,05,00,000ක් මුද්‍රණය කර තිබිණ. යෙහෝවඃවහන්සේට කැප වී බව්තීස්ම වීම සඳහා ප්‍රමාණවත් වන පරිද්දෙන් දෙවියන්වහන්සේගේ වචනය හා අරමුණු ගැන ඉගෙනීමට බයිබල් ශිෂ්‍යයන්ට උපකාර කිරීමේ පරමාර්ථය ඇතුව මෙම පොත ලියනු ලැබීය. රාජ්‍ය ප්‍රචාරකයන් වසර ගණනාවක් පුරා එකම ශිෂ්‍යයා සමඟ නිවාස බයිබල් පාඩමක් නොපවත්වන බැවින්, මනුෂ්‍යයන් වැඩිදෙනෙකු සමඟ බයිබල් පාඩම් පැවැත්වීමට හෝ ගෙයින් ගෙට සේවයෙහි හා දේවසේවයේ වෙනත් අංගවල තම සහභාගිත්වය වැඩි කිරීමට ඔවුන්ට හැක. (ක්‍රියා 5:42; 20:20, 21) දෙවියන්වහන්සේට ගණන් දිය යුතු බව ඔවුන්ට හොඳින් තේරෙන නිසා, ඔවුහු දිව්‍ය අනතුරු ඇඟවීම්වලට අවධානය යොමු කරති. (එසකියෙල් 33:7-9) එහෙත් ඔවුන්ගේ මූලික සැලකිල්ල යොමු වී තිබෙන්නේ, යෙහෝවඃවහන්සේට ගෞරව කොට, මෙම දුෂ්ට දේවල පිළිවෙළ සඳහා තවමත් ඉතිරි වී තිබෙන කෙටි කාලය තුළ ශුභාරංචිය ගැන ඉගෙනීමට හැකි තරම් ජන සංඛ්‍යාවකට උපකාර කිරීමටයි.
පවුල් වශයෙන් කදිම ආකාරයකින් ගණන් දීම
13. දේවභක්තික පවුල් නිතිපතා පවුල් බයිබල් පාඩමක් පැවැත්විය යුත්තේ මන්ද?
13 සැබෑ ක්‍රිස්තියානි ධර්මය වැලඳගන්නා සෑම පුද්ගලයෙකුම හා පවුලක්ම දෙවියන්වහන්සේට ගණන් දිය යුතු අතර, ඒ හේතුවෙන් “මේරූභාවය අත් කරගැනීමට වීර්යය” කොට “ඇදහිල්ලෙහි ස්ථිර” තත්වයකට පත් විය යුතුය. (හෙබ්‍රෙව් 6:1-3, NW; 1 පේතෘස් 5:8, 9) උදාහරණයක් හැටියට, දැනුම පොත පාඩම් කර බව්තීස්ම වී ඇති අය, නිතිපතා රැස්වීම්වලට යෑමෙන් හා බයිබලය මෙන්ම වෙනත් ක්‍රිස්තියානි ප්‍රකාශන කියවීමෙන් තම ශුද්ධ ලියවිලිමය දැනුම සම්පූර්ණ තත්වයකට ගෙනා යුතුය. දේවභක්තික පවුල් නිතිපතා පවුල් පාඩමකුත් කළ යුතුයි; මන්දයත් ‘අවදිව සිටීමටත්, ඇදහිල්ලේ ස්ථිරව සිටීමටත්, පුරුෂයන් මෙන් සිටීමටත්, ශක්තිමත්ව සිටීමටත්’ එය වැදගත් මාර්ගයක් වන බැවිනි. (1 කොරින්ති 16:13) ඔබ පවුලක මූලිකයෙකු නම්, ඔබේ පවුල ආත්මික ලෙස හොඳින් පෝෂණය වනවාද කියා සහතික කිරීම සම්බන්ධයෙන් විශේෂයෙන් ඔබ දෙවියන්වහන්සේට ගණන් දිය යුතුය. පෝෂ්‍යදායී ශාරීරික ආහාර ස්වාභාවික සෞඛ්‍යයට දායක වන්නාක් මෙන්ම, ඔබටත් ඔබේ පවුලටත් “ඇදහිල්ලෙහි හරිලෙස සිටින පිණිස,” බහුලව මෙන්ම නිතිපතාම ලැබෙන ආත්මික ආහාර සැපයුමක් අවශ්‍යය.—තීතස් 1:14.
14. හොඳින් පුහුණුව ලැබූ ඉශ්‍රායෙල් දැරියක් දුන් සාක්ෂියක ප්‍රතිඵලය කුමක් වීද?
14 ඔබේ පවුලේ දරුවන් සිටී නම්, ඔවුන්ට යෝග්‍ය උපදෙස් දීම හේතුවෙන් දෙවියන්වහන්සේ ඔබට යහපත් ලෙස ගණන් දෙනවා ඇත. දෙවියන්වහන්සේගේ අනාගතවක්තෘ වූ එලිෂාගේ කාලයේ සිරියානුවන් විසින් අල්ලා ගනු ලැබූ ඉශ්‍රායෙල් ජාතික කුඩා දැරිය සම්බන්ධයෙන් සැබෑ වූවාක් මෙන්ම, එවැනි ඉගැන්වීමක් ඔවුන්ටත් ප්‍රයෝජනවත් වනු ඇත. ඈ කුෂ්ඨ රෝගියෙකු වූ සිරියානු යුද හමුදාපති වන නාමන්ගේ භාර්යාවගේ සේවිකාව බවට පත් වූවාය. එම දැරිය ළාබාල වුවත්, ඈ ඇගේ ස්වාමිදුවට මෙසේ පැවසුවාය: “මාගේ ස්වාමියා සමාරියේ අනාගතවක්තෘ ඉදිරියෙහි පෙනීසිටියොත් හොඳය, එවිට ඔහු ඔහුගේ කුෂ්ඨය සුවකරනවා ඇත.” ඇය සාක්ෂිදැරූ නිසා, නාමන් ඉශ්‍රායෙලයට ගොස්, අන්තිමේදී යොර්දාන් ගඟේ සත් වරක් නෑමට වූ එලිෂාගේ මඟ පෙන්වීමට එකඟ වී කුෂ්ඨ රෝගයෙන් සුව වූයේය. එපමණක්ද නොව, නාමන් යෙහෝවඃවහන්සේට නමස්කාර කරන කෙනෙකු බවට පත් විය. එම කුඩා දැරිය කෙතරම් සතුටු වන්ට ඇද්ද!—2 රාජාවලිය 5:1-3, 13-19.
15. දෙමාපියන් තම දරුවන්ට කදිම ආත්මික පුහුණුවක් ලබා දීම වැදගත් වන්නේ මන්ද? නිදර්ශනය කරන්න.
15 සාතන්ගේ බලය යටතේ තිබෙන සදාචාරය අතින් පිරිහුණු මේ ලොවෙහි, දේවභයැති දරුවන් ඇති දැඩි කිරීම ලෙහෙසි පහසු දෙයක් නොවේ. (1 යොහන් 5:19) කෙසේවෙතත්, තිමෝතිගේ ළදරු වියේ පටන්, ඔහුගේ ආච්චි වූ ලොයිස් හා මව වූ එවුනීකි සාර්ථක ප්‍රතිඵල ඇතුව ඔහුට ශුද්ධ ලියවිලි ඉගැන්වූහ. (2 තිමෝති 1:5; 3:14, 15) ඔබේ දරුවන් සමඟ බයිබලය පාඩම් කිරීම, නිතිපතා ඔවුන්ව ක්‍රිස්තියානි රැස්වීම්වලට ගෙන යෑම හා අන්තිමේදී ඔවුන්ව දේවසේවයේදී ඔබ සමඟ හවුල් කරවාගැනීම යනු, ඔබ දෙවියන්වහන්සේට ගණන් දිය යුතු පුහුණු පටිපාටියේ කොටසක් වේ. එක්දහස් නවසිය විසිගණන්වල මුල්භාගයේදී, තම පියා ඊළඟ මිටියාවතේ විසූ ගම්වැසියන්ට බයිබල් පත්‍රිකා බෙදාහැරීම සඳහා කන්දක් හරහා කිලෝමීටර් 10ක් (මුළු ගමනට කිලෝමීටර් 20යි) ගමන් කරන විට තමාවද ගෙනගිය ආකාරය, දැන් 80ගණන්වල මැදභාගයේ පසු වන වේල්ස්හි සිටින එක්තරා ක්‍රිස්තියානි ස්ත්‍රියක් සිහි කරන්නීය. ඈ කෘතඥපූර්වකව මෙසේ පවසයි: “මගේ තාත්තා මගේ හෘදයේ සත්‍යය පැලපදියම් කළේ අපි ඒ වගේ ඇවිද්ද වේලාවන්වලයි.”
වැඩිමහල්ලෝ ගණන් දෙති—ඒ කෙසේද?
16, 17. (අ) පුරාණ ඉශ්‍රායෙල්හි විසූ ආත්මිකව මේරූ වැඩිමහල්ලන් භුක්තිවින්දේ කුමන වරප්‍රසාදද? (ආ) පුරාණ ඉශ්‍රායෙල්හි තත්වය සමඟ සසඳන කල, අදදින ක්‍රිස්තියානි වැඩිමහල්ලන්ගෙන් වැඩි යමක් අවශ්‍ය වන්නේ මන්ද?
16 “පැසුණු හිස ධර්මිෂ්ඨකමේ මාර්ගය රකිනවා නම්, එය අලංකාරයේ ඔටුන්නක්ය.” (හිතෝපදේශ 16:31, NW) එහෙත්, දෙවියන්වහන්සේගේ ජනයාගෙන් යුත් සභාවෙහි වගකීම් දැරීමට පුරුෂයෙකුව සන්නාහ සන්නද්ධ කරන්නේ නිකම්ම ශාරීරිකව මහලු වීම නොවේ. පුරාණ ඉශ්‍රායෙල්හි සිටි ආත්මිකව මේරූ වැඩිමහල්ලෝ, යුක්තිය ඉටු කිරීමටත්, සමාදානය, හොඳ පිළිවෙළ හා ආත්මික සෞඛ්‍යය පවත්වාගැනීමටත් විනිශ්චයකරුවන් හා නිලධාරීන් ලෙස සේවය කළෝය. (ද්විතීය කථාව 16:18-20) මෙය ක්‍රිස්තියානි සභාව සම්බන්ධයෙන් සැබෑවා සේම, මෙම දේවල පිළිවෙළේ අවසානය ළඟා වෙත්ම වැඩිමහල්ලන්ගෙන් වැඩි යමක් අවශ්‍ය කෙරේ. ඒ මන්ද?
17 ඉශ්‍රායෙල්වරු, දෙවියන්වහන්සේ පුරාණ මිසරයෙන් මුදාගත් ‘තෝරාගත් සෙනඟක්’ වූහ. ඔවුන් තම මැදිහත්කරු වූ මෝසෙස් තුළින් ව්‍යවස්ථාව ලබාගත් බැවින්, ඔවුන්ගේ පැවතෙන්නන් කැප වූ ජාතියක් තුළට ඉපදුණු අතර, ඔවුන්ට යෙහෝවඃවහන්සේගේ ශික්ෂා ගැන හොඳ දැනුමක්ද තිබිණ. (ද්විතීය කථාව 7:6, 11) කෙසේවෙතත්, අදදින එසේ කැප වූ ජාතියකට කිසිවෙකු නොඉපදෙන අතර, ශුද්ධ ලියවිලිමය සත්‍යතා ගැන හුරුපුරුදුව සිටින දේවභක්තික පවුල් තුළ ඇති දැඩි කරනු ලබන්නේ සාපේක්ෂ වශයෙන් ස්වල්පදෙනෙකු පමණි. මෑතක සිට “සත්‍යතාවෙහි හැසිරෙන” අයට, ශුද්ධ ලියවිලිමය ප්‍රතිපත්ති අනුව ජීවත් විය යුතු ආකාරය පිළිබඳ උපදෙස් විශේෂයෙන්ම අවශ්‍යය. (3 යොහන් 4) විශ්වාසවන්ත වැඩිමහල්ලෝ “සාරවූ වචනවල ආදෘශය” අල්ලාගනිමින් යෙහෝවඃවහන්සේගේ ජනයාට උපකාර කරත්ම, ඔවුන් පිට තිබෙන්නේ මොනතරම් බැරෑරුම් වගකීමක්ද!—2 තිමෝති 1:13, 14.
18. සභා වැඩිමහල්ලන් සූදානම්ව සිටිය යුත්තේ කුමන ආකාරයේ උපකාර ලබා දීමටද, ඒ මන්ද?
18 ඇවිදීමට ඉගෙනගන්නා කුඩා ළමයෙක් වැටි වැටි ඇවිදියි. ඔහුට අස්ථිරබවක් හැඟෙන අතර, දෙමාපියන්ගේ උපකාර හා දිරිගැන්වීම අවශ්‍යය. යෙහෝවඃවහන්සේට කැප වූ පුද්ගලයෙකුද ඒ හා සමානව ආත්මිකව වැටීමකට භාජන විය හැක. දෙවියන්වහන්සේගේ ඇස් ඉදිරියෙහි හරි හෝ යහපත් දේ කිරීමට මහත් ආයාසයක් දැරීම අවශ්‍ය බව ප්‍රේරිත පාවුල්ට පවා තේරුම් ගියේය. (රෝම 7:21-25) වරදට හසු වුවත් සැබවින්ම පසුතැවිලි වන ක්‍රිස්තියානීන්ට ප්‍රේමනීය උපකාරය දීම දෙවියන්වහන්සේගේ රැළේ එඬේරුන්ගේ වගකීමකි. බරපතළ වරදකට හසු වුණ කැප වූ කාන්තාවක හමුවීමට වැඩිමහල්ලන් ගිය විට, ඇගේ කැප වූ ස්වාමිපුරුෂයා ඉදිරියෙහි ඈ මෙසේ පැවසුවාය: “ඔයගොල්ලන් මාව සභා ඇසුරෙන් කපාහරියි කියලා මම දන්නවා!” එහෙත් එම පවුලට ආත්මිකව ගොඩනැඟීම සඳහා අවශ්‍ය උපකාරය කුමක්ද කියා දැනගැනීමට වැඩිමහල්ලන්ට අවශ්‍ය බව ඇයට පැවසූ විට, ඈ අඬන්ට පටන්ගත්තාය. තමන් ගණන් දිය යුතු බව දැනසිටි වැඩිමහල්ලෝ, පසුතැවිලි වූ සෙසු ඇදහිලිවන්තියකට උපකාර කිරීමට සතුටු වූහ.—හෙබ්‍රෙව් 13:17.
දිගටම කදිම ආකාරයකින් ගණන් දෙන්න
19. අපට පෞද්ගලිකව කදිම ආකාරයකින් දිගටම දෙවියන්වහන්සේට ගණන් දීමට හැක්කේ කෙසේද?
19 සභා වැඩිමහල්ලන්ද, දෙවියන්වහන්සේගේ අනික් සියලුම සේවකයන්ද දිගටම යෙහෝවඃවහන්සේට කදිම ආකාරයකින් ගණන් දිය යුතුය. අප දෙවියන්වහන්සේගේ වචනයට අවනත වී උන්වහන්සේගේ කැමැත්ත කරනවා නම්, මෙය සිදු කළ හැක්කකි. (හිතෝපදේශ 3:5, 6; රෝම 12:1, 2, 9) විශේෂයෙන්ම අපේ ඇදහිල්ලේ පවුලට අයිතිවූවන්ට යහපත කිරීමට අපට ඕනෑය. (ගලාති 6:10) කෙසේවෙතත්, අස්වැන්න තවමත් විශාලය; එමෙන්ම ගොවියන් සිටින්නේ ස්වල්පදෙනෙකි. (මතෙව් 9:37, 38) එබැවින් උත්සාහවන්තව රාජ්‍ය පණිවිඩය ප්‍රකාශ කිරීමෙන් අපි අනුන්ට යහපත කරමු. අප අපේ කැපවීමට විශ්වාසව, උන්වහන්සේගේ කැමැත්ත කරමින්, විශ්වාසවන්තව ශුභාරංචිය ප්‍රකාශ කරමින් සිටිනවා නම්, යෙහෝවඃවහන්සේ ගණන් දෙන විට යහපත අත් කර දෙනවා ඇත.
20. නෙහෙමියා ගත් ක්‍රියාමාර්ගය සලකා බැලීමෙන් අපට කුමක් උගත හැකිද?
20 එසේනම්, ස්වාමීන්වහන්සේගේ මෙහෙයෙහි වඩා වඩා නිරතවීම අපි අපේ අඛණ්ඩ ඉලක්කය කරගනිමු. (1 කොරින්ති 15:58) එමෙන්ම, යෙරුසලමේ පවුරු නැවත ගොඩනඟා, දෙවියන්වහන්සේගේ ව්‍යවස්ථාව පනවා, සැබෑ නමස්කාරයට ජ්වලිතව දිරි දුන් නෙහෙමියාව සලකා බැලීම යහපති. ඔහු සිදු කර තිබූ යහපත වෙනුවෙන් තමාව සිහි කරන්න කියා ඔහු යෙහෝවඃ දෙවියන්වහන්සේට යාච්ඤා කළේය. ඔබත් එලෙසම යෙහෝවඃවහන්සේට භක්තියෙන් සේවය කරත්වා! එමෙන්ම උන්වහන්සේ ගණන් දෙන විට, ඔබටත් උන්වහන්සේගෙන් යහපත අත් වේවා!
ඔබේ පිළිතුරු මොනවාද?
◻ නෙහෙමියා තැබුවේ කෙබඳු ආදර්ශයක්ද?
◻ දෙවියන්වහන්සේට ගණන් දීම සඳහා අපට දැනුම ඉවහල් වන්නේ මන්ද?
◻ අපේ සේවයේදී යෙහෝවඃවහන්සේට පිළිගත හැකි ආකාරයකින් ගණන් දිය හැක්කේ කෙසේද?
◻ දෙවියන්වහන්සේට කදිම ආකාරයකින් ගණන් දීම සඳහා පවුල්වලට කුමක් කළ හැකිද?
◻ ක්‍රිස්තියානි වැඩිමහල්ලන් ගණන් දෙන්නේ කෙසේද?
[18වන පිටුවේ පින්තූර]
පාවුල් කළාක් මෙන්, රාජ්‍ය ප්‍රකාශකයන් වශයෙන් අපට දෙවියන්වහන්සේට කදිම ආකාරයකින් ගණන් දිය හැක
[19වන පිටුවේ පින්තූරය]
නාමන්ගේ නිවසේ සිටි කුඩා ඉශ්‍රායෙල් දැරිය මෙන් ඔබේ දරුවනුත් ඇදහිල්ලෙන් ශක්තිමත්ද?