රාජ්‍ය ප්‍රකාශකයන්ගේ වාර්තාව
අයර්ලන්තයේ බයිබල් සත්‍යතා දිගටම දේශනා කරනු ලැබේ
මෑත වසරවලදී අයර්ලන්තය නමැති දර්ශනීය රට සැලකිය යුතු ප්‍රමාණයක වියවුල් සඳහා ප්‍රසිද්ධ වී තිබේ. ඒ අතරම, යෙහෝවඃවහන්සේගේ සාක්ෂිකරුවන් විසින් අයිරිෂ් ජාතික ජනයා වෙතට ගෙනෙනු ලැබූ බලාපොරොත්තුවකින් යුත් බයිබලයේ පණිවුඩයට ඔවුන් හිතකර ලෙස ප්‍රතිචාරය දක්වා තිබේ. අයර්ලන්තයෙන් ලද මෙම පහත සඳහන් අද්දැකීම් මෙය සනාථ කරයි.
■ යෙහෝවඃවහන්සේගේ සාක්ෂිකරුවෙක් සහ ඔහුගේ කුඩා දියණිය ඩබ්ලින්හි ගෙයින් ගෙට දේශනා සේවයේ යෙදෙමින් සිටියහ. තම දරුවන් බොහෝදෙනා සමඟින් ඉතා කාර්ය බහුලව සිටි කැතී නම් කාන්තාවක ඔවුන්ට හමු විය. දේශනා කිරීමට ඉගෙනගනිමින් සිටි තම දියණියට ඇය සමඟ කෙටි පණිවුඩයක් බෙදාගත හැකිදැයි සාක්ෂිකරුවා ඇගෙන් ඇසීය. කැතී එකඟ වූ අතර, කුඩා දැරිය පැහැදිලි, එමෙන්ම ඥානවන්තව සකස් කළ ඉදිරිපත් කිරීමක් කළාය. කුඩා දැරියගේ අවංකකම හා ගෞරවාන්විතභාවය දැක කැතී පුදුමයට පත් වූ අතර, බයිබල් පත්‍රිකාවක් ඉදිරිපත් කළ විට, ඇය එය පිළිගත්තාය.
කුඩා අමුත්තියගේ හොඳ පෙර සූදානම සහ ආචාරශීලීභාවය ගැන කැතී පසු වේලාවකදී කල්පනා කර බැලුවාය. “කුඩා දැරියකට තමන්ගේ පැත්තට අවධානය ඇදගන්නේ නැතුව, ඒ වගේ උනන්දුව ඇති කරන විදිහෙ පණිවුඩයක් බෙදාගන්ට පුළුවන් වුණු එක ගැන මම පුදුම වුණා,” කියා ඈ පැවසුවාය. “ඊළඟ වතාවේ යෙහෝවඃවහන්සේගේ සාක්ෂිකරුවන් ආවාම, ඒ අයට ඇහුම්කන් දෙන්ට මම තීරණය කළා.”
ඒ අතර කාලයේදී, අයර්ලන්තයේ නිරිත දිග ප්‍රදේශයේ කෝර්ක් හා කෙරී ප්‍රාන්තවල සීමාව අසල පිහිටි කුඩා නගරයකට කැතී පදිංචියට ගියාය. ටික කාලයකට පසුව, යෙහෝවඃවහන්සේගේ සාක්ෂිකරුවන් ඇගේ නිවසට පැමිණි අතර, ඈ ඔවුන්ව නිවස තුළට ආරාධනා කළාය. ඇය නිතිපතා බයිබල් පාඩමක් කිරීමට කැමති වූ අතර, දැන් ඈ ඇගේ දරුවන් කිහිපදෙනෙකු සමඟ රැස්වීම්වලටද පැමිණෙන්නීය. තමා සමඟ ශුභාරංචිය බෙදාගැනීමට වූ කුඩා දැරියගේ අව්‍යාජ ආශාවට කැතී ස්තුතිවන්ත වන්නීය.
■ ටලාමෝර් නම් ප්‍රදේශයේ, ජීන් නමැති කාන්තාවක සමඟ වසර හතක කාලයක් පුරා සාක්ෂිකරුවෝ බයිබල් සාකච්ඡා පවත්වමින් සිටියහ. සමහර අවස්ථාවලදී ඈ උනන්දු වී බයිබල් පොත් පත් ලබාගත්තාය, එහෙත් වෙනත් අවස්ථාවලදී ඇගේ උනන්දුව හීන විය. දිනක්, ෆ්‍රාන්සස් නම් සාක්ෂිකාරිය සහ ඇගේ සහයක සහෝදරිය, ජීන් හමුවීමට ගිය අවස්ථාවේදී, ඇය ඉතා අප්‍රසන්න චිත්ත ස්වභාවයකින් සිටින බව ඔවුහු දුටුහ. “අපි කියන කියන හැම දේටම එයාට තරහ ගියා. අන්තිමේදී, එයා අපිට සැර කරලා, ගෙදරින් පිට වෙන්න කියලා දොර හයියෙන් වැහුවා” කියා සාක්ෂිකාරිය වාර්තා කරයි.
නැවතත් ඇයව හමුවීමට ගියහොත් එවැනිම ප්‍රතිචාරයක් ලැබේද කියා ෆ්‍රාන්සස් කල්පනා කළාය. ‘සමහරවිට, එයාට පණිවුඩය ගැන ඇත්තටම උනන්දුවක් නැත්නම්, ආයෙත් එයාව හම්බ වෙන්න ගියාට වැඩක් වෙන එකක් නැහැ’ කියා ෆ්‍රාන්සස් සිතුවාය. කෙසේවෙතත්, ඇය මෙම කාරණය ගැන ඇගේ සැමියා වන ටොමස් සමඟ සාකච්ඡා කළ අතර, ඔහු ඒ පිළිබඳව වඩාත් ඒකාන්ත ආකල්පයක් දැක්වූයේය. එම ප්‍රදේශයට ගිය ඊළඟ වතාවේදී, ඔවුහු නැවත වරක් ජීන්ව බැහැදැකීමට ගියහ. ඈ මිත්‍රශීලී ස්වභාවයක් දැක්වූ අතර, මුරටැඹ සහ පිබිදෙව්! සඟරාවල පිටපත් ලබාගත්තාය. තවදුරටත් කරන ලද බැහැදැකීම් ඒ ආකාරයටම ප්‍රසන්න ඒවා වූ අතර, ටොමස් සහ ෆ්‍රාන්සස් ඇය සමඟ නිතිපතා බයිබල් පාඩමක් පටන්ගත්හ.
එම වෙනසට හේතුව කුමක්ද? සාක්ෂිකරුවන්ට අකාරුණික ලෙස කතා කිරීමට හේතු වූයේ, එදිනම තමා දරු ප්‍රසූතියෙන් පසු රෝහලෙන් පිට වී පැමිණීම බව ඈ පැහැදිලි කළාය. අලුත උපන් බිළිඳාට මව් කිරි දීමටත්, ඇගේ වැඩිමහල් දරුවාට හැන්දෙන් කැවීමටත් තිබූ නිසා, ඇයට රාත්‍රියේ නිදාගැනීමට ලැබී තිබුණේ පැය එකහමාරක් පමණි. “මට ආගම ගැන කතා කරන්න කිසි ඕනකමක් තිබුණේ නැහැ” කියා ජීන් පවසයි.
මාස දෙකක් ඇතුළත ජීන් සියලුම සභා රැස්වීම්වලට පැමිණීමටත්, මාස හතරක් ඇතුළත ඇය ක්ෂේත්‍ර සේවයේ සහභාගි වීමටත් පටන්ගත්තාය. ඇගේ බයිබල් පාඩම ආරම්භ වීමෙන් මාස 10ක් ඇතුළත ඈ බව්තීස්ම වූවාය. දැන් ජීන්ට තමාගේම අද්දැකීම ක්ෂේත්‍ර සේවයේදී උපකාරවත් වේ. ඇය මෙසේ ප්‍රකාශ කරයි: “මට පරුෂ විදිහට කතා කරන කෙනෙක් මුණගැසුණොත්, මම හුඟක් තේරුම්ගන්න පුළුවන් විදිහට කටයුතු කරන්න උත්සාහ කරනවා. මම හැම වෙලාවේම ඒක සටහන් කරගන්නවා. සමහරවිට මම ආයෙත් යනකොට තත්වය වෙනස් වෙලා තියෙන්න පුළුවන්; ඒ පුද්ගලයා වඩා හොඳ ස්වභාවයක ඉන්න ඉඩ තියෙනවා; ඒ වගේම වඩා හොඳ ප්‍රතිචාරයක් දක්වන්ටත් පුළුවන්.”