ඔබ අපගේ අපක්ෂපාතී දෙවියන්වහන්සේව අනුකරණය කරන්නෙහිද?

අපක්ෂපාතිත්වය—එය සොයාගත හැක්කේ කොහෙන්ද? සහමුලින්ම අපක්ෂපාති මෙන්ම අගති සහිත හැඟීමෙන්, අනිසි අනුග්‍රහයක් දැක්වීමෙන් සහ වෙනස්කම් කිරීමෙන් නිදහස්ව සිටින කෙනෙක් සිටියි. උන්වහන්සේ, මිනිස්වර්ගයාගේ මැවුම්කරුවාණන් වන යෙහෝවඃ දෙවියන්වහන්සේය. කෙසේවෙතත්, 19වන සියවසේ ඉංග්‍රීසි ජාතික ලේඛකයෙක් වන චාර්ල්ස් ලෑම්, මනුෂ්‍යයන් පිළිබඳව අවංකව මෙසේ ලීවේය: “කොටින්ම කියනවා නම්, මම රුචි අරුචිකම්වලින් සකස් වූ අගතීන්ගෙන් පිරී සිටිමි.”

අපක්ෂපාතිත්වය දැක්වීම සම්බන්ධයෙන් ගත් කල මිනිස් සබඳතා ඉතා දුර්වලය. සියවස් ගණනාවකට පෙර ඉශ්‍රායෙල්හි ප්‍රඥාවන්ත සාලමොන් රජ මෙසේ නිරීක්ෂණය කළේය: “මනුෂ්‍යයන්ට අනතුරු වෙන හැටියට මනුෂ්‍යයෙකු විසින් ඔවුන් කෙරෙහි ආණ්ඩුකර . . . තිබේ.” (දේශනාකාරයා 8:9) ජාතිවාදී වෛර, ජාතික ගැටුම්, පවුල් ආරවුල්, නොකඩවා වැඩි වෙමින් තිබේ. එමනිසා, මනුෂ්‍යයන්ට තමන් විසින්ම අපක්ෂපාතී සමාජයක් බිහි කිරීමට හැකිය කියා විශ්වාස කිරීම යථාර්ථානුරූපීද?

අපගේ ආකල්ප පාලනය කරගැනීමට සහ ගැඹුරට මුල්බැසගත් අගතීන්ගෙන් නිදහස් වීමට අවබෝධයෙන් යුත් පරිශ්‍රමයක් දැරීම අවශ්‍ය කෙරේ. (එපීස 4:22-24) ඒ ගැන නොසිතාම, අප අපගේ සමාජීය සහ අධ්‍යාපනික පරිසරය මගින් සකස් වූද, අපගේ පවුල්, ජනවාර්ගික සහ ජාතික පසුබිමෙහි මුල්බැස ඇත්තාවූද ආකල්ප හිමි කරගෙන තිබෙනවා විය හැකිය. ගණන් ගත නොහැකියයි පෙනෙන නැඹුරුවාවන්, බොහෝවිට, ගැඹුරට මුල්බැසගත් සහ පක්ෂග්‍රාහී වීමට මඟ පාදන ඒවා වෙයි. ස්කොට්ලන්ත ජාතික නීතිවේදියෙකු මෙන්ම සංස්කාරකයෙක්ද වන ශ්‍රීමත් ෆ්‍රැන්සස් ජෙෆ්‍රි පවා මෙසේ පිළිගත්තේය: “මිනිසෙකු තම අගතිසහගත හැඟීම්වල තරම හා ප්‍රබලත්වය ගැන සහමුලින්ම අනවබෝධයෙන් සිටිය හැක.”

පක්ෂග්‍රාහී වීමට ඇති නැඹුරුවාවට එරෙහිව අවබෝධයෙන් යුත් පරිශ්‍රමයක් දැරිය යුතු බව පිළිගන්නියකි, ලීනාa. තමා තුළම ඇති අගතිසහගත හැඟීම් මැඩපැවැත්වීමට නම්, “මහත් වෑයමක් දරන්න සිදු වෙනවා, ඒ ඇයි කිව්වොත්, හදා වඩා තිබෙන ආකාරය ප්‍රබල බලපෑමක් ඇති කරන හින්දයි,” කියා ඇය පවසයි. නිරන්තර මතක් කිරීම්ද අවශ්‍ය වන බව ලීනා පිළිගන්නීය.

අපක්ෂපාතකම පිළිබඳ යෙහෝවඃවහන්සේගේ වාර්තාව

යෙහෝවඃවහන්සේ අපක්ෂපාතකම පිළිබඳ පරිපූර්ණ ආදර්ශයකි. මනුෂ්‍යවර්ගයා සමඟ කටයුතු කිරීමේදී උන්වහන්සේ අපක්ෂපාතකම පැහැදිලිව ප්‍රකාශ කළ ආකාරය බයිබලයේ මුල් පිටු කිහිපය තුළම අපට කියවීමට තිබේ. මෙම විශිෂ්ට ආදර්ශවලින් සහ මතක් කිරීම්වලින් අපට බොහෝ දේ උගත හැකිය.

පොදු යුගයේ 36දී, කොර්නේලියස්ට සහ අන්‍යජාතීන්ට ශුභාරංචිය ප්‍රකාශ කිරීමට යුදෙව් ප්‍රේරිතයෙකු වූ පේතෘස්ව යෑමට සැලැස්වීමෙන් යෙහෝවඃවහන්සේ අපක්ෂපාතිත්වය පෙන්වූසේක. එම අවස්ථාවේදී පේතෘස් කීවේ: “සැබවින් දෙවියන්වහන්සේ මනුෂ්‍යයන්ගේ තරාතිරම් නොබලන කෙනෙක්ය. සියලු ජාතීන් අතරේ උන්වහන්සේ කෙරෙහි භය ඇතිව ධර්මිෂ්ඨකම් කරන තැනැත්තේ උන්වහන්සේට ප්‍රසන්න” බවය.—ක්‍රියා 10:34, 35.

මිනිස් පවුල සමඟ උන්වහන්සේගේ සියලු කටයුතුවලදී, යෙහෝවඃවහන්සේ ස්වකීය අපක්ෂපාතකම නොකඩවාම පෙන්වා තිබෙනසේක. යේසුස්වහන්සේ තම පියාණන් ගැන කීවේ: “උන්වහන්සේ නපුරන්ටත් යහපතුන්ටත් තමන් ඉර උදාකරවනසේක” කියාය. (මතෙව් 5:45) අපක්ෂපාතී දෙවිකෙනෙකු වශයෙන් යෙහෝවඃවහන්සේට තවදුරටත් ප්‍රශංසා කරමින්, පේතෘස් මෙසේ සහතික කරයි: “සියල්ලන්ම පසුතැවිලිවෙනවාට මිස කිසිවෙක් විනාශවෙනවාට උන්වහන්සේ නොකැමැතිව, නුඹලා කෙරෙහි බොහෝ කල් ඉවසනසේක.”—2 පේතෘස් 3:9.

නෝවාගේ දවසේදී, ‘මනුෂ්‍යයාගේ දුෂ්ටකම පොළොවෙහි මහත්ව තිබූ නිසාත්, ඔහුගේ සිතේ කල්පනාවල කවර අරමුණත් නිරන්තරයෙන් නපුරුවම’ තිබූ නිසාත්, යෙහෝවඃවහන්සේ එම මිනිස් ලෝකයට විනාශය ප්‍රකාශ කළසේක. (උත්පත්ති 6:5-7, 11, 12) කෙසේවෙතත්, දෙවියන්වහන්සේගේ අණ පරිදි සහ ඔහුගේ සමකාලීනයන් බලා සිටිද්දීම නෝවා නැවක් සෑදීය. ඔහු සහ ඔහුගේ පුත්‍රයන් නැව සාදමින් සිටින අතරතුර, නෝවා “ධර්මිෂ්ඨකමේ දේශනාකාරයෙක්[ද]” විය. (2 පේතෘස් 2:5) එම පරම්පරාවේ දුෂ්ට හෘද නැඹුරුවාව දැනගෙනත්, යෙහෝවඃවහන්සේ අපක්ෂපාත ලෙස ඔවුන් වෙත පැහැදිලි පණිවුඩයක් යැවූසේක. නෝවා ලවා නැව සෑදීම සහ දේශනා කිරීම තුළින් ඔවුන්ගේ මනස් සහ හෘදවලට උන්වහන්සේ ඉතා ඕනෑකමින් ආයාචනා කළසේක. එයට ප්‍රතිචාරය දක්වන්ට ඔවුන්ට සෑම ප්‍රස්තාවක්ම තිබුණත්, “ජලගැල්ම පැමිණ සියල්ලන්ම ගසාගෙන යනතුරු ඔව්හු නොදැන [ගණන් නොගෙන, NW] සිටියෝය.”—මතෙව් 24:39.

යෙහෝවඃවහන්සේගේ අපක්ෂපාතිකම පිළිබඳ මොනතරම් විශිෂ්ට ආදර්ශයක්ද! මෙම අර්බුදකාරි අන්තිම දවස්වලදී, එම අපක්ෂපාතිත්වයම ඇතුව රාජ්‍යයේ ශුභාරංචිය ප්‍රචාරය කරන්ට දේවසේවකයන්ව පොලඹවයි. තවදුරටත්, යෙහෝවඃවහන්සේගේ උදහස් දවස ප්‍රකාශ කිරීමෙන් ඔවුහු වැළකී නොසිටිත්. සියල්ලන් ඉදිරියේ, සියල්ලන්ටම ඇසෙන පරිදි, ඔවුහු යෙහෝවඃවහන්සේගේ පණිවුඩය අපක්ෂපාතිව ඉදිරිපත් කරත්.—යෙසායා 61:1, 2.

ආබ්‍රහම්, ඊසාක් සහ යාකොබ් යන කුලදෙටුවන්ට යෙහෝවඃවහන්සේ කළ පොරොන්දුවලින් උන්වහන්සේ අපක්ෂපාති දෙවිකෙනෙකු බව පෙන්වීය. ඔවුන්ගේ නිශ්චිත පෙළපත තුළින්, පත් කරන ලද තැනැත්තා පැමිණෙණු ඇති අතර, උන්වහන්සේ තුළින් ‘පොළොවේ සියලු ජාතීහු සැබවින්ම ආශීර්වාද ලබාගනු ඇත.’ (උත්පත්ති 22:18; 26:4; 28:14) ක්‍රිස්තුස් යේසුස්වහන්සේ එම පත් කරන ලද තැනැත්තා බවට පත් වූසේක. යේසුස්වහන්සේගේ මරණය සහ නැවත නැඟිටීම තුළින්, යෙහෝවඃවහන්සේ සියලුම කීකරු මනුෂ්‍යවර්ගයාට ගැළවෙන මාර්ගය සපයා දුන්සේක. එසේය, ක්‍රිස්තුස්වහන්සේගේ මිදීමේ මිල පූජාවේ ප්‍රයෝජන කිසිම පක්ෂපාතිත්වයකින් තොරව ලබාගත හැකිය.

මෝසෙස්ගේ දවස්වලදී, යෙහෝවඃවහන්සේගේ අපක්ෂපාතිභාවය, ශෙලෝඵෙහාද්ගේ දූවරුන් සම්බන්ධ සිද්ධියකින් ඉතා සිත්ගන්නා අයුරින් පැහැදිලි විය. පොරොන්දු දේශයේදී, ඔවුන්ගේ පියාගේ උරුමය පිළිබඳ දුෂ්කර ප්‍රශ්නයකට මෙම ස්ත්‍රීහු පස්දෙනා මුහුණ දුන්හ. මෙය එසේ වූයේ, මනුෂ්‍යයෙකුගේ දේශයේ උරුමය තම පුත්‍රයන්ට හිමි විය යුතුය යන සිරිත ඉශ්‍රායෙල්හි තිබූ නිසාය. කෙසේවෙතත්, උරුමයක් ලබා දීමට තමන්ට පුත්‍රයෙකු නොලැබ ශෙලෝඵෙහාද් මියගියේය. එමනිසා, ශෙලෝඵෙහාද්ගේ දූවරු පස්දෙනා අපක්ෂපාතී විසඳුමක් බලාපොරොත්තුවෙන් තම ඉල්ලීම මෝසෙස් වෙත ගෙනැවිත්, මෙසේ පැවසුවෝය: “අපේ පියාණන්ට පුත්‍රයෙකු නැති බැවින් ඔහුගේ නාමය ඔහුගේ වංශය අතරෙන් පහවෙන්ට ඕනෑ මක්නිසාද? අපේ පියාගේ සහෝදරයන් අතරේ අපට උරුමයක් දුනමැනවි.” යෙහෝවඃවහන්සේ ඔවුන්ගේ කන්නලව්වලට සවන් දී මෝසෙස්ට මෙසේ උපදෙස් දුන්සේක: “මනුෂ්‍යයෙක් පුත්‍රයෙකු නොලැබ නැසුණොත් ඔහුගේ උරුමය ඔහුගේ දුවට හිමිවෙන්ට සලසන්න.”—ගණන් කථාව 27:1-11.

මොනතරම් ප්‍රේමනීය අපක්ෂපාති පූර්වාදර්ශයක්ද! එම දූවරුන් විවාහ වන විට මෙම ගෝත්‍රික උරුමය වෙනත් ගෝත්‍රයකට උරුම නොවන බවට සහතික කරගැනීම සඳහා, ඔවුන් “තමුන්ගේ පියාගේ ගෝත්‍රයේ වංශය” තුළ පමණක් විවාහ වීම අවශ්‍ය කරවීය.—ගණන් කථාව 36:5-12.

යෙහෝවඃවහන්සේගේ අපක්ෂපාතිත්වය තවදුරටත් සියුම් ලෙස දැකගත හැකි වන්නේ, විනිශ්චයකාරයෙකු මෙන්ම අනාගතවක්තෘවරයෙක්ද වන සාමුවෙල්ගේ කාලයේදීය. බෙත්ලෙහෙමිය යෙස්සේගේ පවුලේ කෙනෙකුව යූදා ගෝත්‍රයෙන් අලුත් රජෙකු ලෙස පත් කිරීම සඳහා යෙහෝවඃවහන්සේ ඔහුව පත් කළසේක. එහෙත් යෙස්සේට පුත්‍රයෝ අටදෙනෙක් සිටියෝය. රජු ලෙස අභිෂේක කරනු ඇත්තේ කාවද? එලියාබ්ගේ දේහ ලක්ෂණයට සාමුවෙල්ගේ සිත ඇදී ගියේය. කෙසේවෙතත්, යෙහෝවඃවහන්සේ පිටාතර පෙනුමට වසඟ නොවනසේක. උන්වහන්සේ සාමුවෙල්ට මෙසේ පැවසූසේක: “ඔහුගේ පෙනීම දෙසවත් ශරීරයේ උස දෙසවත් නොබලන්න; . . . ස්වාමීන්වහන්සේ මනුෂ්‍යයා බලන්නාක්මෙන් නොබලනසේක; මනුෂ්‍ය තෙමේ පිටාතර පෙනීම බලන්නේය, නුමුත් ස්වාමීන්වහන්සේ සිත බලනසේක.” යෙස්සේගේ බාල පුත්‍රයා වන, දාවිත්ව තෝරාගන්නා ලදි.—1 සාමුවෙල් 16:1, 6-13.

යෙහෝවඃවහන්සේගේ අපක්ෂපාතිකමෙන් ඉගෙනගැනීම

සෙසු ඇදහිලිවන්තයෙකුගේ ආත්මික ගුණාංග සෝදිසි කිරීමේදී, යෙහෝවඃවහන්සේගේ ආදර්ශය අනුගමනය කිරීමෙන් ක්‍රිස්තියානි වැඩිමහල්ලෝ යහපතක් කරත්. අපගේ පෞද්ගලික හැඟීම් මගින් අපගේ විනිශ්චය අඳුරු කිරීමට ඉඩහැරීමෙන්, කෙනෙකුව අපගේ මිම්මෙන් මැනීම පහසුය. එක්තරා වැඩිමහල්ලෙකු කීවේ, “මම අන් අය සමඟ කටයුතු කරන්න උත්සාහ කරන්නේ, යෙහෝවඃවහන්සේට ප්‍රසන්න වන විදිහට මිසක්, මම කලින් සිතාගත් ආකාරයට නෙවෙයි” කියාය. තමන්ගේ ප්‍රමිතිය ලෙස දේවවචනය භාවිත කිරීම යෙහෝවඃවහන්සේගේ සියලුම සේවකයන්ට මොනතරම් ප්‍රයෝජනවත්ද!

වාර්ගික සහ ජාතික අගතියට විරුද්ධව සිටින්ට ඉහත සඳහන් බයිබල් ආදර්ශ අපට උපකාර කරයි. යෙහෝවඃවහන්සේගේ අපක්ෂපාතිත්වය අනුකරණය කිරීම මගින් අපි අගතියෙන්, වෙනස්කම් කිරීමෙන් සහ අනිසි අනුග්‍රහය දැක්වීමෙන් ක්‍රිස්තියානි සභාව ආරක්ෂා කරන්නෙමු.

‘දෙවියන්වහන්සේ තරාතිරම් නොබලන’ බව ප්‍රේරිත පේතෘස් දැනගත්තේය. (ක්‍රියා 10:34) අනිසි අනුග්‍රහය යනු ප්‍රේමයේ සහ එකමුතුකමේ ප්‍රතිපත්ති උල්ලංගනය කරන අපක්ෂපාතිත්වයේ හතුරාය. යේසුස්වහන්සේ දුප්පතුන්ගේ, දුර්වලයන්ගේ හා පහත් ගණයේලා සැලකූ අයගේ සිත්ගත් අතර, ඔවුන්ගේ බර සැහැල්ලු කළසේක. (මතෙව් 11:28-30) දැරීමට නොහැකි නීති විශාල ප්‍රමාණයක් මනුෂ්‍යයන් මත පටවමින්, ඔවුන් කෙරෙහි අධිපතිකම් කරමින් සිටි යුදෙව් ආගමික නායකයන්ට වඩා උන්වහන්සේ පැහැදිලි ලෙස කැපීපෙනෙන්ට විය. (ලූක් 11:45, 46) මෙලෙස ක්‍රියා කරන අතරතුර, ධනවත් සහ ප්‍රධාන පෙළේ අයට අනිසි අනුග්‍රහය දැක්වීම ඇත්තවශයෙන්ම ක්‍රිස්තුස්වහන්සේගේ ඉගැන්වීම්වලට එකඟ වූයේ නැත.—යාකොබ් 2:1-4, 9.

අදදින, ක්‍රිස්තියානි වැඩිමහල්ලෝ ක්‍රිස්තුස්වහන්සේගේ මූලිකත්වයට යටත් වන අතර, යෙහෝවඃවහන්සේට කැප වූ සියලුම සෙනඟට අපක්ෂපාතිත්වය පෙන්වති. ‘ඔවුන් භාරයේ සිටින්නාවූ දෙවියන්වහන්සේගේ රැළ රැකබලා ගැනීමට එඬේරකම්’ කරද්දී, ඔවුහු ආර්ථික තත්වයන්, වෙනස් පෞද්ගලිකත්ව සහ පවුල් සබඳතා වැනි දේ නිසා අනිසි අනුග්‍රහය දැක්වීමෙන් වැළකෙති. (1 පේතෘස් 5:2) අපක්ෂපාති දෙවියන්වහන්සේව අනුකරණය කිරීමෙන් සහ අනිසි අනුග්‍රාහී ක්‍රියාවලට විරුද්ධ උන්වහන්සේගේ අනතුරු ඇඟවීම්වලට අවනත වීමෙන්, ක්‍රිස්තියානි වැඩිමහල්ලෝ සභාව තුළ අපක්ෂපාති ස්ප්‍රීතුවකට අනුබල දෙති.

යෙහෝවඃවහන්සේගේ සාක්ෂිකරුවන්ගේ ක්‍රිස්තියානි සභාව වනාහි ජාත්‍යන්තර සහෝදරත්වයකි. අගතියෙන් තොර, අපක්ෂපාතී සමාජයක් යේසුස් ක්‍රිස්තුස්වහන්සේගේ මඟ පෙන්වීම යටතේ සැබෑවක් විය හැකි බවට එය ජීවමාන සාක්ෂියකි. සාක්ෂිකාරයෝ “සැබෑවේ ධර්මිෂ්ඨකමින්ද ශුද්ධකමින්ද දෙවියන්වහන්සේට සමානව මවනලද්දාවූ අලුත් මනුෂ්‍යයා පැළඳ[ගෙන]” ඇත්තාහ. (එපීස 4:24) එසේය, ඔවුහු පරිපූර්ණ ආදර්ශය වන අපක්ෂපාතී දෙවියන් වන යෙහෝවඃවහන්සේගෙන් ඉගෙනගන්නා අතර, සියලුම ආකාරයේ පක්ෂපාතකමෙන් තොර නව පොළොව තුළ සදාකාල ජීවනය බලාපොරොත්තුවෙන් සිටිති.—2 පේතෘස් 3:13.

[පාදසටහන]

[26වන පිටුවේ පින්තූරය]

දෙවියන්වහන්සේ තරාතිරම් නොබලන කෙනෙකු බව පේතෘස් දැනගත්තේය