ඔබ පුනර්භවය විශ්වාස කරනවාද?
“ඔයා ඉන්දියාවේ ඇති දැඩි වෙච්ච කාලයේ ආදරය කරපු අසල්වැසි ගේක හිටිය ගෑනු ළමයාව ඔයාට මතකද?” කියා ඉන්දියාවේ වෙසෙන මූකාන්බයි, එක්සත් ජනපදයේ විශ්වවිද්‍යාල ශිෂ්‍යයෙකු වන තම පුතාට ලිව්වා. “ඈ තව සති කිහිපයකින් විවාහ වෙන්න යනවා. මං හිතුවා ඔයා දැනගන්න එක හොඳයි කියලා.”
පියා මේ ආරංචිය තමාගේ පුතාට දැන්නුවේ ඇයි? මොකද, මූකාන්බයි මේ නහඹරයන්ගේ ප්‍රේම සම්බන්ධතාවට සම්පූර්ණයෙන්ම විරුද්ධ වෙලා, අවුරුදු ගානකට කලින් ඒ සම්බන්ධය නතර කෙරෙව්වා. ඒ වගේම, ඔහුගේ පුතා අවුරුදු හයක කාලයක් තිස්සේ එක්සත් ජනපදයේ උසස් අධ්‍යාපනය හදාරමින් සිටියා. ඒ කාල සීමාව ඇතුළත ඔහු මේ ගැහැනු ළමයා එක්ක අදහස් හුවමාරු කරගත්තේ නැහැ; මේ බව මූකාන්බයි දැනගෙන සිටියා.
එහෙමනම්, ඇයි සැලකිල්ලක් දක්වන්නේ? මූකාන්බයි ඒ ගැන සැලකිල්ලක් දැක්වුවේ, ඔහු පුනර්භවය නැතහොත් නැවත ඉපදීම විශ්වාස කළ නිසයි.a කුඩා කාලයේ සිට ඇති වූ මේ නහඹරයන්ගේ ප්‍රේම සම්බන්ධය, ඔවුන්ගේ කලින් ජීවිතවලදී විවාහක සහකරුවන් හැටියට ජීවත් වීමේ ප්‍රතිඵලයක් නිසා ඇති වී තිබූ දෙයක් නම්, දැන් විවාහ වීමට සුදුසු වයසක සිටින මේ දෙදෙනාව වෙන් කර දැමීම කුරිරු ක්‍රියාවක් වේවි. මේ ගැහැනු ළමයා මේ ජීවිතයේදී වෙනත් කෙනෙකුගේ බිරිඳක් වෙන්න කලින්, මේ බව තමාගේ පුතාට දන්වන්න මූකාන්බයිට වුවමනා වුණා.
මේ හා සම්බන්ධ තවත් සිද්ධියක් සලකා බලන්න. සිව් හැවිරිදි ගැහැනු ළමයෙක් ඉන්දියාවේ මුම්බායිහි ආරෝග්‍ය ශාලාවක වේදනාකාරි රෝගයක් නිසා නතර වී සිටියා. ඇගේ රෝගය වුණේ, හදවතේ කපාටයක දෝෂයක්. ඇගේ අත මිට සරු දෙමාපියන්ට තමන්ගේ දරුවා වේදනා විඳිනවා දැකීම දරාගන්න බැරි වුණා. ඒත් ඔවුන් මේ විදිහට එයට හේතු දැක්වූවා: “අපේ දරුවා රෝගියෙක් කියල අපිට පිළිගන්න සිද්ධ වෙනවා. එයාට මේ වගේ දෙයක් වෙන්න, එයාගේ කලින් ජීවිතයේදී එයා මොකක් හරි කරන්න ඇති.”
පුනර්භවය පිළිබඳ විශ්වාසය හින්දු ධර්මය, බෞද්ධ ධර්මය, ජෛන ධර්මය, සික දහම සහ ඉන්දියානු සම්භවයක් ඇති වෙනත් ආගම්වල සිටින මිලියන ගණනකගේ ජීවිතවලට ඉමහත් බලපෑමක් ඇති කරවනවා. ජීවිතයේ අද්දැකීම්—එනම් ප්‍රේමයෙන් වෙළී සිටීමේ සිට දරුණු වේදනා විඳීම දක්වා සිදුවීම්—පෙර ජීවිතයක හෝ ජීවිතවල සිදු කළ ක්‍රියාවන්ගේ ප්‍රතිවිපාක හැටියට සලකනවා.
බටහිර රටවල් බොහොමයකටද පුනර්භවය පිළිබඳ මූලධර්මය ගැන උනන්දුවක් තියෙනවා. අමෙරිකානු නිළියක් වන ෂ’ලි මක්ලන් එය විශ්වාස කරනවා කියා පවසනවා. පෙර භවයන් 50ක මතකයන් තමාට තිබෙන බව, කැනඩාවේ බ්‍රිතාන්‍ය කොලොම්බියාවේ වැන්කූව’හි සිටින ලේඛකයෙකු වන ලොරල් ෆෙලන් කියා සිටිනවා. සීඑන්එන්/යූඑස්ඒ ටුඩේ යන පුවත්පත වෙනුවෙන් 1994දී කළ ගැලප් විමසුමකදී, වැඩිහිටියන් 1,016දෙනෙකුගෙන් 270කටත් වඩා වැඩිදෙනෙක් කියා සිටියේ තමන් පුනර්භවය විශ්වාස කරන බවයි. පුනර්භවය විශ්වාස කිරීම, නව යුග ව්‍යාපාරයේ කොටසක්ද වෙනවා. ඒ වුණත් මේ විශ්වාසයට කිනම් සාක්ෂිද අනුබල දෙන්නේ?
“කලින් ජීවිතයේ මතකයන්!” කියා, පුනර්භවය විශ්වාස කරන්නන් කියනවා. එහි ප්‍රතිඵලයක් හැටියට, බැංකොක්හි සිටින තුන් හැවිරිදි රාත්නාට, “වයස අවුරුදු 60 ගණන්වලදී මියගිය ආගමට ලැදි ස්ත්‍රියක් හැටියට ඇගේ කලින් ජීවිතයේ මතකයන්” සිහිපත් වෙන්න පටන්ගත් විට, පුනර්භවය සනාථ කිරීමේ වලංගු සාක්ෂියක් හැටියට බොහෝ නිරීක්ෂකයන් එය පිළිගෙන තියෙනවා.
කොහොම වුණත්, සැක සහිත අදහස් බොහොමයක් පවතිනවා. ඒ වගේම කලින් ගත කළ ජීවිතවලට සම්බන්ධ කර දක්වන මතකයන් පිළිබඳව කෙරෙන වෙනත් පැහැදිලි කිරීම්ද තියෙන්න පුළුවන්.b හින්දුනිසම්: ඉට්ස් මීනින් ෆෝ ද ලිබ’රේෂන් ඔෆ් ද ස්පිරිට් (හින්දු ධර්මය: ආත්මයෙන් නිදහස් වීම සඳහා එහි ඇති අරුත) නමැති තමාගේ පොතේ, හින්දු දාර්ශනිකයෙකු වන නිකිලානන්ඩ් පවසන්නේ, ‘මරණින් පසු අද්දකින දේවල්, හේතු දැක්වීමෙන් සනාථ කළ නොහැකි’ බවයි. ඒත් “නැවත ඉපදීමේ මූලධර්මයේ සිදුවීමට හැකි ඉඩ කඩ, සිදු නොවීමට හැකි ඉඩ කඩට වඩා වැඩි” බව ඔහු ඊට අනුබල දෙමින් කියනවා.
බයිබලය මේ ඉගැන්වීමට අනුබල දෙනවාද? එමෙන්ම දෙවිගේ ආනුභාවය ලත් වචනය මළවුන්ට ඉදිරිපත් කරන්නේ කිනම් බලාපොරොත්තුවක්ද?
[පාදසටහන්වල]
a “පුනර්භවය” යනුවෙන් අදහස් කරන්නේ, “මිනිසෙක්, සත්වයෙක් හෝ ඇතැම් අවස්ථාවලදී, ගස්කොළන් ලෙසින් උපතක් සිදු විය හැකි, අනුපිළිවෙළකින් යුත් භවයක හෝ ඊට වැඩි භවයන්වල ප්‍රාණය නැවත ඉපදීමයි” කියා ද නියූ එන්සයික්ලොපීඩියා බ්‍රිටැනිකා පවසනවා. මේ සංසිද්ධිය විස්තර කිරීම සඳහා “නැවත ඉපදීම” යන යෙදුමද භාවිත කරන නමුත්, “පුනර්භවය” යන යෙදුමද පොදුවේ පිළිගනු ලබනවා. ඉන්දියානු භාෂාවලින් ප්‍රකාශයට පත් කොට තිබෙන ශබ්දකෝෂ ගණනාවක මේ වචන මාරුවෙන් මාරුවට භාවිත කරනවා.
[4වන පිටුවේ පින්තූර]
ඇය කලින් ජීවිතයකදී කළ පාපවලට දඬුවම් ලබමින් සිටීද?