“පොළොවේ සීමා දක්වා” ආලෝකය පතුරුවන්ට ඔහු උදව් වුණා
“පොළොවේ සීමා දක්වා” ආත්මික ආලෝකය පතුරුවන්ට ප්‍රේරිත පාවුල්ව පාවිච්චි කළා. ප්‍රතිඵලයක් හැටියට, “සදාකාල ජීවනය ලැබීමට නියමකරනලද” බොහෝදෙනෙක් ‘අදහාගත්තා.’—ක්‍රියා 13:47, 48; යෙසායා 49:6, NW.
යෙහෝවාගේ සාක්ෂිකරුවන්ගේ පාලක මණ්ඩලයේ සාමාජිකයෙක් වූ විලියම් ලොයිඩ් බැරිගේ ඇප කැප වූ ජීවිතයෙන් සහ වෙහෙස මහන්සි නොබලා කළ ක්‍රිස්තියානි වැඩ කටයුතු තුළින් ආත්මික ආලෝකය පැතිරවීමට තිබූ ඔහුගේ මහත් ආශාව දිස් වුණා. වර්ෂ 1999 ජූලි 2වනදා සහෝදර බැරි, හවායිහි පැවති දිස්ත්‍රික් සමුළුවකට සහභාගි වෙමින් සිටියදී මියගියා.
ලොයිඩ් බැරි 1916 දෙසැම්බර් 20වනදා නවසීලන්තයේදී උපත ලැබුවා. වොච් ටවර් බයිබල් සහ පත්‍රිකා සමිතිය මගින් බෙදාහරින ලද සී.ටී. රසල්ගේ ප්‍රකාශනවලින් ඉදිරිපත් කළ බයිබල් සත්‍යයන් කෙරෙහි ඔහුගේ දෙමාපියන් මුල සිටම ක්‍රියාශීලී උනන්දුවක් දක්වා තිබුණා. මේ හේතුවෙන් සහෝදර බැරි භක්තිමත් ක්‍රිස්තියානි පවුලක් තුළ හැදී වැඩුණා.
ක්‍රීඩා සම්බන්ධයෙන් මෙන්ම විද්‍යා උපාධියක් ලැබීමට තරම් අධ්‍යාපනය කෙරෙහිද උනන්දුවක් දැක්වුවත්, සහෝදර බැරි තම ජීවිතයේ තියුණු අවධානයක් යොමු කළේ ආත්මික කාරණා කෙරෙහියි. මෙසේ, 1939 ජනවාරි 1වනදා, ඕස්ට්‍රේලියාවේ පිහිටි සමිතියේ කාර්යාලයේ බෙතෙල් පවුලේ සාමාජිකයෙක් වීමෙන් ඔහු පූර්ණ කාලීන දේවසේවය ඇරඹුවා. ආණ්ඩුව 1941දී සමිතියේ වැඩකටයුතු තහනම් කළ විට, සහෝදර බැරි කාර්යාල කටයුතුවල කාර්ය බහුලව සිටි අතර, ඇතැම් අවස්ථාවලදී සෙසු ඇදහිලිවන්තයන්ව දිරිගන්වන ලිපි ලිවීමට පවා ඔහුට පැවරුණා. ඔහු ප්‍රසිද්ධ දේවසේවයේදීද ආදර්ශවත් ලෙස මූලිකත්වය ගත්තා.
වර්ෂ 1942 පෙබරවාරි මාසයේදී, සහෝදර බැරි පූර්ණ කාලීන සේවිකාවක් හා විවාහ වුණා. පසුගිය අවුරුදු ගණනාව පුරා, ඔහුගේ සදාදර බිරිඳ මෙල්බා පොළොවේ රටවල් බොහෝමයක විශ්වාසවන්ත ලෙස සේවය කිරීමෙහිලා ඔහු සමඟ හවුල් වී තිබෙනවා. ඔවුන් එක්සත් ජනපදයේ පැවති ගිලියද් මුරටැඹ බයිබල් පාසැලේ 11වන පංතියට සහභාගි වීමත් සමඟ විදේශ රටවල සේවය කිරීම සඳහා තවත් වැඩිමනත් පියවර ගත්තා. ඔවුන්ගේ පැවරුම වූයේ ‘පොළොවේ සීමාව’ ලෙස බොහෝදෙනා සැලකූ ජපානයයි. වර්ෂ 1949 නොවැම්බර් මාසයේදී ජපානයට ගොඩ බැසීමත් සමඟ ඔවුන් වෙරළබඩ නගරයක් වන කෝබෙහි මිෂනාරිවරුන් ලෙස සේවය ඇරඹුවා. ඒ වකවානුවේදී, ජපානය පුරා ශුභාරංචිය දේශනා කරමින් සිටියේ දොළොස්දෙනෙක් පමණයි. සහෝදර බැරි ඔහුගේ අලුත් නවාතැනේ භාෂාවත් සිතුම් පැතුම් විලාසයත් ඉගෙනගත් අතර, ජපන් මිනිසුන් කෙරෙහි ගැඹුරු සෙනෙහසක්ද වර්ධනය කරගත්තා. ඔහු එතැන් සිට අවුරුදු 25ක්ම ඔවුන් සමඟ සේවය කළා. “සදාකාල ජීවනය ලැබීමට නියමකරනලද” අය වෙත තිබූ ඔහුගේ ප්‍රේමය, ජපානයේ වර්ධනය වෙමින් පවතින ක්‍රිස්තියානි සහෝදර සංගමයට පැහැදිලි වුණා. දශක ගණනාවක් පුරා ශාඛා කාර්යාල වැඩ ඵලදායී ලෙස අධීක්ෂණය කිරීමට එම ප්‍රේමය උපකාර වුණා.
වර්ෂ 1975 මැද භාගයේදී, ජපානයේ සාක්ෂිකරුවන් 30,000ක් පමණ සිටියදී, බැරි යුවළව නියූ යෝක්හි බෲක්ලින් වෙත මාරු කරනු ලැබුවා. ආත්මයෙන් ආලේප ලත් ක්‍රිස්තියානිවරයෙක් හැටියට, යෙහෝවාගේ සාක්ෂිකරුවන්ගේ පාලක මණ්ඩලයේ සාමාජිකයෙකු වශයෙන් සේවය කිරීමට සහෝදර බැරිට ආරාධනා කරනු ලැබුවා. (රෝම 8:16, 17) ලිඛිත වැඩ සම්බන්ධයෙන් ඔහුට තිබූ අද්දැකීම ඔහුගේ අලුත් පැවරුම වූ ලේඛන අංශයේ වැඩ සඳහා බොහෝ සේ ප්‍රයෝජනවත් වුණා. එමෙන්ම ශාඛා කාර්යාල සහ විදෙස් කටයුතු පිළිබඳ ඔහු සතු වූ පුළුල් අද්දැකීම, පාලක මණ්ඩලයේ ප්‍රකාශන කමිටුවේ සාමාජිකයෙකු වශයෙන් අනර්ඝ දායකත්වයක් ලබා දීමට ඔහුව සන්නද්ධ කළා.
ගත වූ වසර ගණනාව පුරාම, ප්‍රාචීනය සහ එහි සෙනඟ කෙරෙහි වූ ආදරය සහෝදර බැරි දිගටම පවත්වාගත්තා. මිෂනාරි සේවයේ යෙදුණු අය පිළිබඳ හද උණුසුම් කරවන අද්දැකීම් ඔහුගේ කතා සහ අදහස්වල විශේෂ තැනක් ගත් බව ගිලියද් පාසැලේ සිසුන් මෙන්ම බෙතෙල් පවුලේ සාමාජිකයන්ද හොඳින් දන්නවා. සහෝදර බැරි ඔහුගේම අද්දැකීම උද්‍යෝගයෙන් විස්තර කරද්දී ‘පොළොවේ සීමාවල’ සිදු වන රාජ්‍යය දේශනා වැඩය පිළිබඳ චිත්‍රයක් මැවෙනවා. මේ අද්දැකීම් කිහිපයක් 1960 සැප්තැම්බර් 15වනදා මුරටැඹෙහි (ඉංග්‍රීසියෙන්) ඇති ඔහුගේ ජීවිත කතාවේ සඳහන් වෙනවා.
“සදාකාල ජීවනය ලැබීමට නියමකරනලද” අය කෙරෙහි සහෝදර බැරි දැක්වූ උනන්දුව, ‘ක්‍රිස්තුස්ගේ හවුල් උරුමක්කරුවෙක්’ වශයෙන් ඔහු දැන් කරන සේවය තුළත් දිගටම පවතින බව අපට නිසැකයි. යෙහෝවාට සම්පූර්ණයෙන්ම කැප වූ දෙවිගේ සෙනඟ කෙරෙහි උණුසුම් සෙනෙහසක් ඇති ආත්මික මිනිසෙක් ලෙස ඔහුව දැන සිටි සහ ඔහුට ආදරය කළ සියලුදෙනාටම ඇත්තෙන්ම ඔහු නැති පාළුව තදින් දැනේවි. එහෙත්, සහෝදර බැරි තම භූමික ජීවිතය තුළ අවසානය දක්වා ඇදහිලිවන්තව විඳදරාගැනීම ගැන අපි ප්‍රීති වෙමු.—එළිදරව් 2:10.
[16වන පිටුවේ පින්තූර]
වර්ෂ 1988දී ලොයිඩ් බැරි සහ ජෝන් බාර් “ශුද්ධ ලියවිලි පිළිබඳ තීක්ෂ්ණ බුද්ධිය” (ඉංග්‍රීසියෙන්) මුදාහරිමින්
[16වන පිටුවේ පින්තූර]
ගිලියද්හි 11වන පංතියේ උපාධිධාරීන් අවුරුදු 40කට පසු ජපානයේදී මුණගැසේ