දෙවියන් ඔබව ළං කරගන්නවා

සමහරු සැක කරන හේතුව: හුඟක් අය දෙවියන්ව විශ්වාස කළත් ඔහුට ළං වෙන්න බැහැ කියලා හිතනවා. “දෙවියන් හැම දේකම නිර්මාතෘ විතරයි. ඔහු එක්ක බැඳීමක් තියෙනවා කියලා නං මට කවදාවත් හිතිලා නෑ” කියලා හැම සතියකම පල්ලි ගිය කාන්තාවක් කිව්වා.

දේවවචනයේ කියන දේ: දෙවියන් කවදාවත් අපිව අත්හරින්නේ නැහැ. ඔහු අපි ගැන දක්වන සැලකිල්ල ගැන යේසුස් මෙහෙම කිව්වා. “යම් මිනිසෙකුට බැටළුවන් සියදෙනෙකු සිටිද්දී උන්ගෙන් එකෙකු මංමුළා වී ගියොත් ඔහු අනික් අනූනවදෙනාට කඳුවල ඉන්න හැර මංමුළා වී ගිය බැටළුවා සොයා යන්නේ නැද්ද? . . . කුඩා දරුවන් හා සමාන මේ අයගෙන් එක් කෙනෙකුවත් විනාශ වෙනවාට ස්වර්ගයේ සිටින මගේ පියාණන් කැමති නැහැ.”—මතෙව් 18:12-14.

මංමුළා වුණු හැමෝවම දෙවියන්ට හුඟක් වටිනවා. ඔහු ඔවුන්ව හොයාගන්නේ කොහොමද? මේ ලිපියේ මුලින්ම තියෙන බයිබල් පදයේ කියන විදිහට කෙනෙක් දෙවියන්ට ළං වෙන්නේ දෙවියන් ඔවුන් තුළ ආශාවක් ඇති කළොත් විතරයි.

දෙවියන් මුල් සියවසේදී ඒ දේ කරපු විදිහ බලන්න. දෙවියන් ෆිලිප්ට මඟ පෙන්නුවා බයිබලයේ තියෙන අනාවැකියක් කියවමින් හිටිය ඉතියෝපියානු නිලධාරියාට ඒක පහදලා දෙන්න. (ක්‍රියා 8:26-39) දෙවියන් ගැන දැනගන්න ආශාවක් ඇතුව දෙවියන්ට යාච්ඤා කරපු රෝම නිලධාරියෙක් වුණ කොර්නේලියස් ළඟට දෙවියන් පේතෘස්ව යැව්වා. (ක්‍රියා 10:1-48) ඒ වගේම පාවුල්ට සහ ඔහු එක්ක හිටිය අයට ෆිලිප්පියේ ගඟක් අසලට යන්න මඟ පෙන්නුවා. එහිදී “දෙවිට නමස්කාර කරන තැනැත්තියක්” වන ලිදියාව ඔවුන්ට හම්බ වුණා. ඔවුන්ගේ පණිවිඩයට සවන් දෙන්න “යෙහෝවා දෙවි ඇගේ හදවත තුළ මහත් පෙලඹීමක් ඇති කළා.”—ක්‍රියා 16:9-15.

ඒවායින් පෙනෙන්නේ දෙවියන්ව හොයන අයට ඔහු ගැන දැනගන්න අවස්ථාවක් ලබා දෙනවා කියලයි. අද දින දෙවියන් ගැන බයිබලයේ තියෙන පණිවිඩය කියන්න මිනිසුන්ගේ ගෙවල්වලට යන්නේ කවුද? යෙහෝවා දෙවිගේ සාක්ෂිකරුවන් කියලා කවුරුත් කියයි. දෙවියන්ට ළං වෙන්න ඔබට උපකාර කරන්න ඔහු ඔවුන්ව යොදාගන්නවාද කියලා හිතලා බලන්න. දෙවියන් ඔබව ළං කරගන්න දරන වෑයමට හොඳ ප්‍රතිචාරයක් දක්වන්න ඔබට උපකාර කරන්න කියලා ඔහුට යාච්ඤා කරන්න කියලා අපි ඔබට උනන්දු කරනවා.a