පැනයට පිළිතුර බයිබලයෙන්

අපිට උදව් කරන්න දේවදූතයන්ට පුළුවන්ද?

මිනිසුන්ව නිර්මාණය කරන්න කලින් යෙහෝවා දෙවියන් බලවත් දේවදූතයන් මිලියන ගණනක් නිර්මාණය කළා. (යෝබ් 38:4, 7) දේවදූතයන් මාර්ගයෙන් දෙවියන් තමාට සේවය කරන අයව ආරක්ෂා කරලත් තියෙනවා. මඟ පෙන්වීම් දීලත් තියෙනවා. (ගීතාවලිය 91:10, 11) අද දිනත්, යේසුස්ගේ අනුගාමිකයන් දේශනා කරන ශුභාරංචිය දැනගන්න දේවදූතයන් මිනිසුන්ට උපකාර කරනවා.—එළිදරව් 14:6, 7 කියවන්න.

දේවදූතයන්ට යාච්ඤා කරන එක හරිද? නැහැ. යාච්ඤාව නමස්කාරයේ කොටසක් නිසා අපි යාච්ඤා කරන්න ඕන යෙහෝවා දෙවියන්ට විතරයි. (එළිදරව් 19:10) දේවදූතයන් දෙවියන්ගේ සේවකයන් නිසා ඔවුන් කරන්නේ දෙවියන් කියන දේ මිසක් මිනිසුන් කියන දේ නෙමෙයි. ඒ නිසා අපි යාච්ඤා කරන්න ඕන යේසුස් මාර්ගයෙන් දෙවියන්ට විතරයි.—ගීතාවලිය 103:20, 21; මතෙව් 26:53 කියවන්න.

දෙවියන්ට අකීකරු වුණ දේවදූතයන් ඉන්නවාද?

දෙවියන් දේවදූතයන්ව නිර්මාණය කරද්දී මිනිසුන්ට වගේ හරි වැරැද්ද තෝරගන්න නිදහස දුන්නා. ඒත් සමහර දේවදූතයන් දෙවියන්ට අකීකරු වුණා. (2 පේතෘස් 2:4) දෙවියන්ට මුලින්ම අකීකරු වුණ දේවදූතයාව හැඳින්නුවේ සාතන් කියලයි. ඊටපස්සේ තවත් දේවදූතයන් ඔහුගේ පැත්ත ගත්ත නිසා ඔවුන් භූතයන් වුණා. සාතන්වයි භූතයන්වයි ස්වර්ගයෙන් පොළොවට හෙළුවා.—එළිදරව් 12:7-9 කියවන්න.

1914 පටන් මේ ලෝකයේ දුෂ්ටකම් හා ප්‍රචණ්ඩත්වය වැඩි වෙලා තියෙනවා. ඒකෙන් පේන්නේ දෙවියන් ඉක්මනින්ම සාතන්වයි භූතයන්වයි ක්‍රියා විරහිත කරලා පොළොව කලින් තිබුණ තත්වයට පත් කරනවා කියන එකයි.—එළිදරව් 12:12; 21:3, 4 කියවන්න.