මුල් පිටුවෙන් | විද්‍යාව බයිබලයේ තැන අරන්ද?
විද්‍යාවටත් සීමාවන්!
දෙවියන්ව විශ්වාස නොකරන අයගේ අදහස් ඇතුළත් පොත් ගණනාවක් මෑතකදී හුඟදෙනෙක්ට කියවන්න ලැබෙනවා. ඒවායේ තියෙන අදහස් සාකච්ඡාවලට සහ වාද විවාදවලට ලක් වෙනවා. ඒ ගැන ඩේවිඩ් ඊග්ල්මන් කියන විද්‍යාඥයා මෙහෙම කියනවා. “ඒවා කියෙව්වාම සමහරු විද්‍යාඥයන් හැම දෙයක්ම දන්නවා කියන අදහස ඇති කරගන්නවා. නියම විද්‍යාව කියන්නේ විවෘත මනසකින් පර්යේෂණය කරන එක. එතකොට කවදාවත් හිතුවේ නැති දේවල් පවා හොයාගන්න පුළුවන්.”
දක්ෂ විද්‍යාඥයන් අවට පරිසරය ගැන පුදුම දේවල් හොයාගෙන තියෙනවා. ඒත් ඔවුන්ට වැරදුණු තැන් නැතුවම නෙමෙයි. කවුරුත් පිළිගත්ත විද්‍යාඥයෙක් තමයි අයිසැක් නිව්ටන්. ඔහු පෙන්නුවේ විශ්වය තුළ ග්‍රහලෝක, තාරකා, මන්දාකිනි රැඳිලා තියෙන්නේ ගුරුත්වාකර්ෂණය නිසා කියලයි. ඒ වගේම ඔහු ගණිත ශාස්ත්‍රයට ඇතුළත් කලනය කියන ගණිත ක්‍රමයත් හොයාගත්තා. පරිගණක වැඩසටහන් නිර්මාණය කරන්නත්, අභ්‍යවකාශ ගමන්වලටත්, න්‍යෂ්ටික භෞතික විද්‍යාවෙදිත් ඒක පාවිච්චි කරනවා. හැබැයි නිව්ටන් රස විද්‍යාවත් විශ්වාස කළා. ඒක ජ්‍යෝතිශය හරි සූත්‍ර හරි පාවිච්චි කරලා තඹ, පිත්තල වගේ ලෝහ රත්තරන්වලට හරවන්න පුළුවන් කියලා විශ්වාස කරන ගුප්ත විද්‍යාවක්.
නිව්ටන්ට අවුරුදු 1,500කට කලින් හිටිය ග්‍රීක තාරකා විද්‍යාඥයෙක් වන ටොලමි ඇස් දෙකෙන් විතරක් අහස දිහා බලලා සෑහෙන දේවල් හොයාගත්තා. රාත්‍රියේ අහස දිහා බලලා ග්‍රහලෝක පිහිටි තැන් ලකුණු කළා. සිතියම් අඳින්නත් ඔහු දක්ෂයෙක් වුණා. හැබැයි ඔහු විශ්වාස කළේ විශ්වයේ හරි මැද පොළොව පිහිටලා තියෙනවා කියලයි. ටොලමිගේ අදහස ගැන තාරකා විද්‍යාඥයෙක් වන කාල් සේගාන් මෙහෙම ලිව්වා. “විශ්වයේ හරි මැද පොළොව තියෙනවා කියන ඔහුගේ අදහස අවුරුදු 1,500ක් පුරා මිනිසුන් විශ්වාස කළත් ඒක වෙනස් වුණා. ඒකෙන් ඔප්පු වෙනවා ඔහු වගේ බුද්ධිමතුන්ටත් වරදිනවා කියලා.”
අද ඉන්න විද්‍යාඥයන්ටත් ඒ වගේ අභියෝගවලට මුහුණ දෙන්න වෙනවා. විශ්වයේ තියෙන හැම දෙයක් ගැනම පැහැදිලි කරන්න ඔවුන්ට පුළුවන්ද? විද්‍යාවේ දියුණුව නිසා ප්‍රයෝජනවත් වන දේවල් හුඟක් හොයාගෙන තියෙනවා කියලා පිළිගන්න පුළුවන් වුණත් විද්‍යාවට සීමාවන් තියෙනවා කියන එකත් මතක තියාගන්න ඕනේ. භෞතික විද්‍යාඥ පෝල් ඩේවීස් මෙහෙම කිව්වා. “විශ්වයේ තියෙන හැම දෙයක්ම තර්කානුකූලව පැහැදිලි කරන්න පුළුවන් න්‍යායක් හොයාගන්න උත්සාහ කරන එක අසාර්ථක වෑයමක්.” ඒකෙන් ඔප්පු වෙන්නේ අවට ලෝකය ගැන සම්පූර්ණයෙන්ම අවබෝධ කරගන්න මිනිසුන්ට බැහැ කියලයි. ඒ නිසා පවතින හැම දේකටම විද්‍යාවෙන් පිළිතුරු හොයාගන්න පුළුවන් කියලා සමහරු ස්ථිරවම කිව්වත් එහෙම නොවෙන්නත් පුළුවන් කියලා මතක තියාගන්න.
බයිබලයෙන් ලැබෙන මඟ පෙන්වීම් විද්‍යාවෙන් ලැබෙන්නේ නැහැ කියන එක පැහැදිලියි
අවට තියෙන පුදුම දේවල් ගැන බයිබලයේ මෙහෙම කියනවා. “අප මේ දකින්නේ දෙවිගේ බලවත් ක්‍රියාවලින් අල්පමාත්‍රයක් පමණි. ඔහුගේ මහත් හඬෙන් අපේ සවනට වැටෙන්නේ සිහින් නාදයක් පමණි.” (යෝබ් 26:14) මිනිසුන්ට අවබෝධ කරගන්න, පැහැදිලි කරගන්න බැරි අනන්ත අප්‍රමාණ දේවල් තියෙනවා කියන එක ඒකෙන් ස්ථිර වෙනවා. මීට අවුරුදු 2,000කට විතර කලින් යේසුස්ගේ නියෝජිතයෙක් වන පාවුල් කිව්ව දේ අදටත් සත්‍යයක්. ‘දෙවියන්ගේ ප්‍රඥාවත් දැනුමත් කොතරම් පුළුල්ද! ඔහු දේවල් තීරණය කරන ආකාරය සහ ඔහු අනුගමනය කරන ක්‍රියාමාර්ග තේරුම්ගැනීම කොතරම් අමාරුද!’—රෝම 11:33.