පැනයට පිළිතුර බයිබලයෙන්

බයිබලයේ අනාවැකි තියෙන්නේ ඇයි?

බයිබලයේ විස්තර ඇතුළත් අනාවැකි තියෙනවා. අනාගතයේදී සිද්ධ වෙන දේවල් එකිනෙක විස්තර කරන්න කිසි මිනිසෙකුට බැහැ. බයිබල් අනාවැකි ඉටු වීමෙන් බයිබලය දේවවචනය කියන එක තහවුරු වෙනවා.—යොෂුවා 23:14; 2 පේතෘස් 1:20, 21 කියවන්න.

දැනටමත් ඉටු වෙලා තියෙන අනාවැකිවලින් දෙවියන් ගැන විශ්වාසය වැඩි වෙනවා. (හෙබ්‍රෙව් 11:1) ඒ වගේම ප්‍රීතිමත් අනාගතයක් ගැන දෙවියන් දීලා තියෙන පොරොන්දු සැබෑ වෙනවා කියන එකත් පැහැදිලියි. ඒ නිසා බයිබල් අනාවැකිවලින් අපිට ස්ථිර බලාපොරොත්තුවක් තියාගන්න පුළුවන්.—ගීතාවලිය 37:29; රෝම 15:4 කියවන්න.

බයිබල් අනාවැකි පියවර ගන්න අපිට උදව් වෙන්නේ කොහොමද?

සමහර අනාවැකිවලින් දෙවියන්ගේ සෙනඟට පියවරක් ගන්න ඕන කියලා පැහැදිලිව කියලා තිබුණා. උදාහරණෙකට මුල් සියවසේ හිටිය ක්‍රිස්තියානීන් අනාවැකි ඉටු වෙනවා දකිද්දී යෙරුසලමෙන් පලා ගියා. වැඩිදෙනෙක් යේසුස්ව ප්‍රතික්ෂේප කරපු නිසා ඒ නගරය විනාශ කරද්දී පලා ගිය අය ආරක්ෂා වුණා.—ලූක් 21:20-22 කියවන්න.

අද දින ඉටු වෙන අනාවැකිවලින් පේන්නේ දේවරාජ්‍යය මගින් ළඟදීම මිනිසුන්ගේ පාලනයන්ට අවසානයක් ගේනවා කියලයි. (දානියෙල් 2:44; ලූක් 21:31) දෙවියන් පත් කරපු රජු වන යේසුස් ක්‍රිස්තුස්ගේ අනුමැතිය දිනාගන්න නම් හැම කෙනෙක්ම දැන්ම පියවර ගන්න ඕනේ.—ලූක් 21:34-36 කියවන්න.