දෙවියන් අනාගතයේදී කරන්නේ මොනවාද?

හොඳ යාළුවෙක් ඔයා කරදරේකට මුහුණ දෙන වෙලාවට ඔයාට උදව් කරන්න දෙසැරයක් හිතන්නේ නැහැ. දෙවියන් ඒ වගේ හොඳ යාළුවෙක් කියලා ඔයා පිළිගන්නවාද? ගොඩක් අය හිතන්නේ දෙවියන් මිනිසුන් වෙනුවෙන් මුකුත් කරන්නේ නැහැ කියලා. ඒත් දැනටමත් ඔහු අපි වෙනුවෙන් ගොඩක් දේවල් කරලා තියෙනවා කියලා අපි දැනගත්තා. අනාගතයේදීත් ඔහු ඔයා වෙනුවෙන් පුදුමාකාර දේවල් කරන්න යනවා.

දුෂ්ටකම නැති කරනවා

බයිබලයේ කියනවා “මේ මුළු ලෝකයම දුෂ්ටයාගේ බලපෑමට යටත්” කියලා. (1 යොහන් 5:19) අද පොළොවේ තියෙන හැම නපුරු දෙයක්ම පිටිපස්සේ අපිට නොපෙනෙන දුෂ්ට කෙනෙක් ඉන්නවා. යේසුස් එයාව “මේ ලෝකයේ පාලකයා” කියලා හැඳින්වුවා. (යොහන් 12:31) ඒ වෙන කවුරුත් නෙමෙයි සාතන් කියන යක්ෂයා. දෙවියන් සාතන්ව විනාශ කරලා දුෂ්ටකම සදහටම මේ පොළොවෙන් අතුගාලා දානවා කියලා පොරොන්දු වෙනවා.

යෙහෝවා දෙවියන් තම පුත්‍රයා වන යේසුස් ක්‍රිස්තුස් මාර්ගයෙන් ‘මරණය ගෙන ඒමට බලය ඇති යක්ෂයාව නැති කරන්නේය.’ (හෙබ්‍රෙව් 2:14; 1 යොහන් 3:8) සාතනුත් දන්නවා එයාට තියෙන්නේ තව “කෙටි කාල පරිච්ඡේදයක්” කියලා. (එළිදරව් 12:12) සාතන් ඇතුළුව දුෂ්ට දේවල් කරන හැම කෙනෙක්වම සම්පූර්ණයෙන්ම විනාශ කරනවා කියලා දෙවියන් කියනවා.—ගීතාවලිය 37:9; හිතෝපදේශ 2:22.

මුළු පොළොවම පාරාදීසයක් කරනවා

හැම දුෂ්ට දෙයක්ම අයින් කළාට පස්සේ පොළොව සහ මිනිසුන් සඳහා දෙවියන්ට තිබුණ මුල් අරමුණ ඔහු ඉටු කරන්න යනවා. ඊටපස්සේ . . .

සුරක්ෂිත, සාමකාමී ජීවිතයක් ලැබෙනවා. “නිහතමානී අය පොළොව උරුම කරගන්නෝය. දසත පැතිරී තිබෙන සාමය නිසා ඔවුහු මහත් සේ ප්‍රීති වන්නෝය.”—ගීතාවලිය 37:11.

ඇති තරම් පෝෂ්‍යදායී ආහාර තියෙනවා. “පොළොව ධාන්‍යවලින් පිරී ඉතිරී යයි. කඳු මුදුන් ධාන්‍යවලින් වැසී යයි.”—ගීතාවලිය 72:16.

හැමෝටම හොඳ නිවහනක් ලැබෙනවා. හිතේ සතුටින් කරන්න පුළුවන් වැඩ ලැබෙනවා. ‘ඔවුහු ගෙවල් ගොඩනඟා එහි ජීවත් වන්නෝය. මිදිවතු වවා එහි පලදාව භුක්ති විඳින්නෝය. මාගේ තෝරාගත් අය තමන් කරන වැඩවලින් නියම සතුටක් ලබන්නෝය.’—යෙසායා 65:21, 22.

ඒ වගේ ජීවිතයක් අද නම් සිහිනයක් විතරයි. ඒත් ඒ සිහිනය සැබෑ වෙන දවස වැඩි ඈතක නැහැ.

අසනීප සහ මරණය නැති කරනවා

අසනීප සහ මරණය නිසා අද මිනිසුන් කොච්චර නම් දුක් විඳිනවාද! හැබැයි ළඟදීම ඒ හැම දේම වෙනස් වෙනවා. යේසුස්ගේ ජීවිත පූජාව මාර්ගයෙන් දෙවියන් අපිට ගොඩක් ආශීර්වාද ලබා දෙන්න යනවා. බයිබලයේ කියන්නේ ‘යේසුස් කෙරෙහි විශ්වාසය තබන සෑම කෙනෙක්ටම සදහටම ජීවත් වීමේ ප්‍රස්තාව’ ලැබෙනවා කියලයි. (යොහන් 3:16) එදාට . . .

කිසිම කෙනෙක් අසනීප වෙන්නේ නැහැ. “දේශයේ වාසය කරන සියල්ලන්ගේ වරදට සමාව දෙනු ලබයි. කිසිවෙකුවත්, ‘මා ලෙඩින්’ යයි පවසන්නේ නැත.”—යෙසායා 33:24.

කිසිම කෙනෙක් මැරෙන්නේ නැහැ. “විශ්වයේ පාලකයාණන් වන යෙහෝවා දෙවි මරණය සදහටම ගිල දමා සියලුදෙනාගේ ඇස්වලින් කඳුළු පිස දමන්නේය.”—යෙසායා 25:8.

හැමදාටම ජීවත් වෙන්න ලැබෙනවා. “අපේ ස්වාමීන් වන ක්‍රිස්තුස් යේසුස් මාර්ගයෙන් දෙවි අපට ලබා දෙන තෑග්ග නම් සදාකාල ජීවනයයි.”—රෝම 6:23.

මැරුණ අයට ආයෙත් ජීවිතය ලැබෙනවා. “ධර්මිෂ්ඨ අය වගේම අධර්මිෂ්ඨ අයත් නැවත නැඟිටිනවා.”—ක්‍රියා 24:15.

දෙවියන් ඒ දේවල් ඉටු කරන්නේ කොහොමද?

දේවරාජ්‍යයෙන් මුළු පොළොවම පාලනය කරනවා

දෙවියන් ස්වර්ගයේ ආණ්ඩුවක් පිහිටුවලා ඒකේ රජ විදිහට යේසුස් ක්‍රිස්තුස්ව පත් කළා. (ගීතාවලිය 110:1, 2) ඒ ආණ්ඩුව මාර්ගයෙන් දෙවියන් පොළොව සහ මිනිසුන් සඳහා ඔහුට තිබුණු මුල් අරමුණ ඉටු කරනවා. ‘ස්වර්ගයෙහි සිටින අපගේ පියාණෙනි, ඔබගේ රාජ්‍යය පැමිණේවා’ කියලා යේසුස් තම අනුගාමිකයන්ට යාච්ඤා කරන්න කිව්වේ මේ ආණ්ඩුව ගැනයි.—මතෙව් 6:9, 10.

ළඟදීම දෙවියන්ගේ රාජ්‍යයෙන් මුළු පොළොවම පාලනය කරනවා. ඒ කාලයේදී දෙවියන් අපේ හැම ප්‍රශ්නයක්ම විසඳනවා. යේසුස් මේ පොළොවේ ඉද්දී වෙහෙස මහන්සි නොබලා ඒ ‘රාජ්‍යය ගැන ශුභාරංචිය’ දේශනා කළෙත් තමන්ගේ අනුගාමිකයන්ට ඒ දේම කරන්න කිව්වෙත් ඒ නිසයි.—මතෙව් 4:23; 24:14.

යෙහෝවා දෙවියන් අපිට දෙන්න යන්නේ මොන තරම් ලස්සන අනාගතයක්ද! ඒ ගැන කල්පනා කරද්දී දෙවියන්ට තව ළං වෙන්න ඔයා තුළ පෙලඹීමක් ඇති වෙන්නේ නැද්ද? දෙවියන්ට ළං වෙද්දී ඔයාට ලැබෙන ප්‍රයෝජන ගැන ඊළඟ ලිපියෙන් දැනගන්න.