තුල්‍ය පීඩනය සහ ඔබ සතු දේශනා කිරීමේ වරප්‍රසාදය
1 තුල්‍ය පීඩනය ප්‍රබල බලපෑමක් ඇති කරයි. එය හොඳ හෝ නරක අතට බලපෑ හැකියි. අප හා එක්ව යෙහෝවාට සේවය කරන අය අපව යහපත් ක්‍රියාවලට පොලඹවමින් අප කෙරෙහි හොඳ බලපෑමක් ඇති කරයි. (හෙබ්‍රෙ. 10:24) ඒ වුණත්, සාක්ෂිකරුවන් නොවන අපේ පවුලේ සාමාජිකයන්, අපේ රැකියා ස්ථානයේ සිටින අය, පාසැලේ මිතුරන්, අසල්වාසීන් හා අප දන්නා හඳුනන වෙනත් අය විසින් ක්‍රිස්තියානි ප්‍රතිපත්තිවලට පටහැනි දේවල් කිරීමට අප මත දැඩි බලපෑමක් එල්ල කරන්න පුළුවන්. ඒ වගේම ඔවුන් ‘ක්‍රිස්තුස් හා සම්බන්ධ අපේ යහපත් හැසිරීම ගැන දොස් තබන්නත්’ පුළුවන්. (1 පේතෘ. 3:16) තුල්‍යයන්ගෙන් එල්ල විය හැකි අහිතකර බලපෑම් මැද දේශනා කිරීම සඳහා අප ගෙන තිබෙන අධිෂ්ඨානය දිගටම පවත්වාගත හැක්කේ කෙසේද?
2 පවුලේ සාමාජිකයන්: සමහර අවස්ථාවලදී, යෙහෝවාගේ සාක්ෂිකරුවෙකු නොවන කෙනෙක් තම භාර්යාව හා දරුවන් ප්‍රසිද්ධියේ දේවසේවයේ හවුල් වෙනවා දැකීමට අකමැති විය හැකියි. මෙක්සිකෝවේ එක් පවුලක මෙවන් තත්වයක් තිබුණා. මේ පවුලේ භාර්යාව හා දරුවන් සත්දෙනා සත්‍යය වැලඳගත්තා. නමුත් පුරුෂයා තම පවුලේ අය ගෙයින් ගෙට දේශනා කරමින් බයිබලය මත පදනම් පොත් පත් බෙදාහරිනවාට අකමැති වූ නිසා මුලදී සත්‍යයට විරුද්ධ වුණා. ගෙයින් ගෙට ගොස් දේශනා කිරීමෙන් ඔවුන් තමන්ගේ ගෞරවය නැති කරගන්නවා කියලයි ඔහු සිතුවේ. කොහොමවුණත්, ඔහුගේ භාර්යාව හා දරුවන් යෙහෝවාට සේවය කිරීමට ගත් තීරණය වෙනස් නොකර දේවසේවයේ දිගටම හවුල් වුණා. කලකට පසු, දේශනා සේවය සඳහා දෙවි ඇති කර තිබෙන විධිවිධානයේ වටිනාකම තේරුම්ගත් මේ මිනිසාත් යෙහෝවාට කැපවීමට තීරණය කළා. සත්‍යය පිළිගැනීමට ඔහුට අවුරුදු 15ක් ගත වුණා. ඔහුගේ පවුලේ අය අත්නෑර දිගටම දේශනා කළේ නැත්නම්, ඔහු කවදා හෝ සත්‍යය පිළිගැනීමට පෙලඹෙයිද?—ලූක් 1:72, 73; 1 කොරි. 7:16.
3 හවුල් සේවකයන්: ඔබ රැකියාව කරන ස්ථානයේ සිටින අයට සාක්ෂි දරන විට, සමහර අය හොඳ ප්‍රතිචාරයක් නොදක්වන්න පුළුවන්. එක් සහෝදරියක් තමා වැඩ කරන කාර්යාලයේ සෙසු සේවකයන් ලෝක විනාශය ගැන සාකච්ඡා කරමින් සිටි අවස්ථාවකදී, මතෙව් 24වන පරිච්ඡේදය කියවා බලන්න කියා ඔවුන්ට පැවසුවා. ඒ අවස්ථාවේදී ඔවුන් ඇයට සමච්චල් කළා. කොහොමවුණත්, දවස් කිහිපයකට පසු, ඇය සමඟ වැඩ කරන එක් ස්ත්‍රියක් එම පරිච්ඡේදය තමන් කියවූ බවත්, එය ඇගේ සිතට කාවැදුණු බවත් පැවසුවා. ඇයට සමිතියේ ප්‍රකාශනයක් දී, ඇයත් ඇගේ ස්වාමිපුරුෂයාත් සමඟ බයිබල් පාඩමක් පටන්ගැනීමට ඒ සහෝදරිය කටයුතු පිළියෙළ කළා. මුල්ම පාඩම පාන්දර දෙක වෙන තෙක් පැවැත්වුවා. තුන්වන පාඩමෙන් පසු, ඔවුන් රැස්වීම්වලට පැමිණෙන්න පටන්ගත්තා. ඒ වගේම වැඩි කල් නොගොස් ඔවුන් දුම්පානය කිරීමද නතර කර දැමුවා. ඔවුන් දේවසේවයේ හවුල් වෙන්නත් පටන්ගත්තා. අපේ සහෝදරිය ඇගේ බලාපොරොත්තුව ගැන අනිත් අයත් සමඟ කතා නොකළා නම්, ඒ වගේ දෙයක් සිදු වෙයිද?
4 පාසැල් මිතුරන්: පාසැලේදී තුල්‍ය පීඩනයට ලක්වීමත්, දේශනා සේවයේ හවුල් වීම නිසා වෙනත් යෞවනයන් තමන්ව සුළු කොට සලකයිද කියා ඇති වන බියත් සාක්ෂිකාර යෞවනයන් අද්දකින සාමාන්‍ය දෙයක්. එක්සත් ජනපදයේ සිටින නහඹර වියේ පසු වන ක්‍රිස්තියානියෙක් මෙසේ පැවසුවා. “මම අනිත් යෞවනයන්ට සාක්ෂි දැරුවොත් ඔවුන් මට සමච්චල් කරයි කියල හිතපු නිසා ඔවුන්ට සාක්ෂි දරන්න මම බය වුණා.” මේ නිසා පාසැලේ ඇය සමඟ ඉගෙනගන්න අයට හා බලප්‍රදේශයේ සිටින යෞවනයන්ට සාක්ෂි දරන්න ලැබුණු අවස්ථා ඈ මඟහැරියා. තුල්‍ය පීඩන හමුවෙහි නිර්භීතකම වඩවාගැනීමට ඔබට උපකාරවත් වන්නේ කුමක්ද? යෙහෝවාගේ අනුමැතිය ලබාගැනීමට වෑයම් කරමින් ඔහු කෙරෙහි දැඩි විශ්වාසයක් තැබීමයි. (හිතෝ. 29:25) දේවසේවයේදී දෙවිගේ වචනය භාවිත කිරීමට ඔබට තිබෙන හැකියාව වැදගත්කොට සලකන්න. (2 තිමෝ. 2:15) තමාගේ පාසැලේ සිටින මිතුරන්ට කතා කරන්න ආශාවක් ඇති කරගන්න උපකාර කරන්න කියා කලින් සඳහන් කළ යෞවනිය යෙහෝවාට යාච්ඤා කළා. පසුව ඇය පාසැලේදී සාක්ෂි දරන්න පටන්ගත්තා. එයින් හොඳ ප්‍රතිඵල අත් කරගැනීමට ඇයට හැකි වුණා. ඇය වැඩි කල් නොගොස් දන්න කියන හැම කෙනාටම සාක්ෂි දරන්න පටන්ගත්තා. “මේ යෞවනයන්ට අනාගතය ගැන බලාපොරොත්තුවක් අවශ්‍යයි. ඒ ගැන දැනගන්න ඔවුන්ට වුවමනාවක් තියෙනවා. ඔවුන්ට උදව් කරන්න යෙහෝවා අපිව පාවිච්චි කරමින් ඉන්නවා” කියා ඇය පැවසුවා.
5 අසල්වැසියන්: අපි යෙහෝවාගේ සාක්ෂිකරුවන් වන නිසාත්, අපි විශ්වාස කරන දේවල් නිසාත්, අසල්වැසියන් හා වෙනත් හිත මිතුරන් ඔවුන්ගේ අප්‍රසාදය පළ කරන්න පුළුවන්. ඔවුන් අප ගැන කුමක් සිතයිද කියා ඔබට බියක් දැනෙනවා නම් ඔබගෙන්ම මෙසේ අසන්න. ‘සදාකාල ජීවනයට මඟ පෙන්වන සත්‍යය ඔවුන් දන්නවාද? ඔවුන්ගේ හදවත්වලට ළඟා වෙන්න මට කරන්න පුළුවන් මොනවාද?’ අසල්වැසියන්ට සුදුසු වේලාවේදී උචිත ආකාරයෙන් සාක්ෂි දරන විට හොඳ ප්‍රතිඵල ලබාගත හැකි බව එක් චාරිකා අවේක්ෂකයෙක් පැවසුවා. අවංක හදවත් තිබෙන අයව සොයාගැනීම සඳහා අවශ්‍ය ශක්තිය හා ප්‍රඥාව ඉල්ලා යෙහෝවාට කන්නලව් කරන්න.—පිලි. 4:13.
6 තුල්‍යයන්ගෙන් එල්ල වන පීඩනවලින් අපි යටපත් වෙනවා නම්, අපේ විරුද්ධවාදීන් ඒ ගැන සතුටු විය හැකියි. එහෙත් එය ඔවුන්ගේවත් අපගේවත් යහපතට හේතු වෙයිද? යේසුස් ජීවත් වූ සමාජයේ සිටි මිනිස්සු ඔහුට විරුද්ධ වුණා. ඔහුගේ අර්ධ සහෝදරයන් ඔහුට අකාරුණික ලෙස පැවසූ දේවල් පවා ඔහු දරාගත්තා. ඔවුන්ට උපකාර කළ හැක්කේ දෙවි තමාට පැවරූ කාර්යය දිගටම කිරීමෙන් පමණක් බව යේසුස් දැන සිටියා. එනිසා යේසුස් ‘තමන්ට විරුද්ධව සිටිය පව්කාරයන්ගේ විරුද්ධවාදිකම් ඉවසුවා.’ (හෙබ්‍රෙ. 12:2, 3) අප කළ යුත්තේද යේසුස් කළ දෙයමයි. රාජ්‍යයේ පණිවිඩය දේශනා කිරීම සඳහා ඔබට ලැබී තිබෙන වරප්‍රසාදය හැකි උපරිමයෙන් භුක්ති විඳීමට අදිටන් කරගන්න. එසේ කිරීමෙන් ‘ඔබවද ඔබේ වචන අසන්නන්වද ගළවාගන්න’ ඔබට හැකියි.—1 තිමෝ. 4:16.