රැකියාවෙන් විශ්‍රාම යෑම වැඩිමනත් ක්‍රියාකාරකම් සඳහා විවෘත වූ දොරක්ද?
1 දිගු කලක් තිස්සේ වෙහෙස මහන්සි වී වැඩ කරන බොහෝදෙනෙකු ආශාවෙන් බලා සිටින්නේ වෙහෙසකාරී හා පීඩනකාරී වූ තමන්ගේ රැකියාවෙන් විශ්‍රාම යන අවස්ථාව උදා වන තෙක්ය. එහෙත්, බොහෝ විට සිදු වෙන්නේ විශ්‍රාම යෑමත් සමඟ උදාසීනබවින්, නීරසබවින් ජීවිතය ගෙවී ගොස් නියමිත කාලයට වඩා ඉක්මනින් කෙනෙක්ව මානසිකව හා ශාරීරිකව දුබල තත්වයකට පත්වීමයි. යම් අරමුණක් සහිත ක්‍රියාකාරකම් සැලසුම් කර නැත්නම්, යමෙක් තමන් ගැනම කරදර වී ඒ බරින් මනස පිරී යයි. විශ්‍රාම ගිය රජයේ සේවකයන් තමන්ට ‘අතෘප්තිකරබවක්, කේන්ති යන ස්වභාවයක්, අනාරක්ෂිත හැඟීමක් සහ තමන්ව කොන්කර ඇති බවක් හැඟී ඇති බවත්, විශ්‍රාම ගිය රජයේ සේවකයෝ මැසිවිලි නගති. මේ නිසා මානසික අවපීඩනය අද්දකින ඔවුන්ගේ ලෝකය කඩා වැටෙමින් තිබෙන බවට වූ හැඟීමක් ඔවුන් තුළ තිබෙන’ බව එක්තරා බ්‍රසීල පුවත් පතක් වාර්තා කළේය.
2 මීට පටහැනිව, බොහෝ ක්‍රිස්තියානීන් තම ජීවිතයේ මෙම නව පරිච්ඡේදය දෙස බලන්නේ වැඩිමනත් ආත්මික ක්‍රියාකාරකම් කිරීම සඳහා විවෘත වූ දොරක් හැටියටයි. වයස 65දී තම විශ්‍රාම යෑමෙන් සති දෙකකට පසු පුරෝගාමි සේවය ආරම්භ කළ එක් සහෝදරයෙක් මෙසේ පැවසීය. “පුරෝගාමි සේවය කරපු පසුගිය අවුරුදු දහය තුළ මට ලැබුණු මහඟු ආශීර්වාදවලින් පිරුණු කාලය තරම් කාලයක් මම කවදාවක්වත් අද්දැකලා නැහැ.” එක් විවාහක යුවළක් මෙසේ ලියූහ. “අපේ ජීවිතයේ රන්වන් යුගය පටන්ගත්තේ අපි පුරෝගාමි සේවය කරන්නට පටන්ගත්තායින් පස්සේයි.” එසේය, බොහෝදෙනෙකුට විශ්‍රාම යෑමෙන් පසු තමන්ගේ දේවසේවය පුළුල් කරගැනීමට කදිම ප්‍රස්තාවක් උදා වෙන අතර, යෙහෝවාගෙන් මහඟු ආශීර්වාද භුක්ති විඳීමටද හැකි වේ.
3 කාර්යබහුලව පල දරමින් සිටින්න: අද දින විශ්‍රාම ගොස් සිටින බොහෝදෙනෙකු හැදී වැඩී තිබෙන්නේ නවීන සැපපහසුකම් ඇතිව නොවේ. ඔවුහු බාල වියේ පටන් වෙහෙස මහන්සි වී වැඩ කිරීමට ඉගෙනගත්හ. ඔවුන්ට තවදුරටත් තරුණ කාලයේ තිබූ සවි ශක්තිය නොතිබුණද, ඔවුන් තවමත් කරන වැඩ බොහෝසෙයින් පලදායකය. එක් ශාඛා බලප්‍රදේශයක පුරෝගාමීන්ගෙන් සියයට 22ක්ම, එනම් සහෝදර සහෝදරියන් 22,000ක් පමණ, අඩු තරමින් අවුරුදු 60ක්වත් වයසැති අයය. ශ්‍රී ලංකාවේ ස්ථාවර සහ විශේෂ පුරෝගාමීන් 273දෙනා අතරින්, අඩු තරමින් වයස අවුරුදු 60ක් පමණ වන පුරෝගාමීන් 14දෙනෙක් සිටිති. මෙම වයස්ගත අය දේශනා වැඩයට ඉතා සුවිශාල දායකත්වයක් ලබා දෙති. ඔවුන්ගේ අද්දැකීම් සහ දිව්‍ය ගුණාංග ඔවුන් සේවය කරන සභාවන්ට මහඟු ආශීර්වාදයකි.—යාකො. 3:17, 18.
4 ක්‍රිස්තියානි දේවසේවයේ කඩිසරව යෙදී සිටීම කෙනෙකුගේ සෞඛ්‍යයටත් හොඳය. එමෙන්ම ජීවිතයේ ගුණාත්මකභාවයද ඉහළ නංවයි. විශ්‍රාම ගිය පසු පුරෝගාමි සේවය පටන්ගත් 84 හැවිරිදි එක් වයසක සහෝදරියක් මෙසේ කීවාය. “උනන්දුව දක්වන අය එක්ක හුඟාක් බයිබල් පාඩම් පටන්ගත්තු නිසා මට පුළුවන් වෙලා තියෙනවා මානසික වශයෙන් හොඳ අවදියකින් ඉන්න. මට කාරෙකක් නැහැ. ඒ හින්දා මම හුඟාක් ඇවිදිනවා. ඒක මගේ ශරීර සෞඛ්‍යයටත් හොඳයි.” එක් මහලු පුරෝගාමි යුවළක් මෙසේ සඳහන් කළහ. “මේ සේවය නිසා මානසිකවත් ශාරීරිකවත් හොඳ සෞඛ්‍යයකින් ඉන්න අපිට හැකි වෙලා තියෙනවා. අපි හැමවෙලේම ඉන්නේ එකට. අපි හුඟාක් හිනහ වෙනවා. අපි ඉන්නේ හරිම සතුටෙන්.”
5 අවශ්‍යතාව ඇති තැන්වල සේවය කිරීම: යමක් කමක් තිබෙන විශ්‍රාම ගිය ඇතැම් ක්‍රිස්තියානීහු රාජ්‍ය දේශනාකරුවන්ගේ අවශ්‍යතාව වඩා වැඩි තැන්වල සේවය කිරීම සඳහා පදිංචිය මාරු කරති. තවත් අය තමන්ගේ දේවසේවය පුළුල් කරගෙන ඇත්තේ වෙනත් භාෂාවක් කතා කරන ක්ෂේත්‍රයක සේවය කිරීමට යෑමෙනි. ප්‍රේරිත පාවුල් මෙන්, මෙම ජ්වලිතවත් ප්‍රචාරකයන් “සියල්ල කරන්නේ ශුභාරංචිය වෙනුවෙන්ය. එසේ කරන්නේ [ඔවුන්] අන් අය සමඟ එය බෙදාගන්නා පිණිසය.”—1 කොරි. 9:23, NW.
6 එක් යුවළක් පුරෝගාමි සේවය ආරම්භ කළේ ඇගේ පුතුන් දෙදෙනාව හදා වඩා ගැනීමෙන් පසුවයි. වසර ගණනාවක් පුරා පුරෝගාමි සේවය කිරීමෙන් පසුව, චීන භාෂාව ඉගෙනගැනීමට ඔවුහු පටන්ගත්හ. දැන් ඔවුහු 70 ගණන්වල පසු වෙති. මෑතකදී ඔවුන්ට මහත් ප්‍රීතියක් ලැබුණේ ඔවුන් කලක් වැඩ කළාවූ චීන භාෂාව කතා කරන කණ්ඩායම දැන් සභාවක් බවට පත් වුණු අවස්ථාවේදීයි. මේ වැනි යුවළයන් මොන තරම් ආශීර්වාදයක්ද!
7 දේවසේවයෙන් විශ්‍රාම යෑමක් නැත: වැඩිදෙනෙකු තමන්ගේ බාහිර රැකියාවෙන් විශ්‍රාම ගියද, දේවසේවයෙන් කිසිදු ක්‍රිස්තියානියෙකුට විශ්‍රාම ගත නොහැක. සියලුදෙනාම “අවසානය දක්වා” දිගටම විශ්වාසවන්තව සිටිය යුතුයි. (මතෙ. 24:13, 14, NW) එහෙත් කෙනෙක් වයස්ගත වන විට, යෙහෝවාගේ සේවය තුළ කලින් කළ තරම් කරන්නට බැරි බව නොකිවමනාය. නමුත් ඔවුන් තමන්ට කළ හැකි දෙය මුළු හදින්ම කරනවා දැකීම මොන තරම් දිරිගැන්වෙන දෙයක්ද! ඔවුන් කළ වැඩයද ඔවුන් යෙහෝවාගේ නාමයට දැක්වූ ප්‍රේමයද යෙහෝවා අමතක නොකරන බව දේවවචනයේ සහතික වෙයි.—ලූක් 21:1-4; හෙබ්‍රෙ. 6:10.
8 ඔබ රැකියාවෙන් විශ්‍රාම යන්නට ළං වී සිටිනවා නම්, ඔබේ ජීවිතයේ වෙනස් වන මේ තත්වයෙන් උපරිම ප්‍රයෝජන ගැනීම සම්බන්ධයෙන් යාච්ඤා පූර්වකව සලකා බලන්නේ නැත්තේ ඇයි? විශ්‍රාම යෑමේදී ඔබට යෙහෝවාගේ ප්‍රශංසාව උදෙසා වැඩිමනත් ක්‍රියාකාරකම් සඳහා දොරක් විවෘත වන බව ඔබට සොයාගත හැකි වේ. ඒ සඳහා දිව්‍ය උපකාරය ඔබට ලැබේවි. මේ මගින් අපමණ ආශීර්වාද ඔබ නෙළාගන්නා බව නොඅනුමානය.—ගීතා. 148:12, 13.