කීකරු අයට දෙවියන් ආශීර්වාද කරනවා

එක අවස්ථාවක අනාගතවක්තෘ මෝසෙස් කිව්වා අපි දෙවියන්ගේ ආඥාවලට කීකරු වෙනවා නම් දෙවියන්ගේ ආශීර්වාද ලබන්න අපිට පුළුවන් කියලා. (ද්විතීය කතාව 10:13; 11:27) අපි දෙවියන්ට කීකරු වෙන්නේ ඔහුට තියෙන ආදරේ නිසා මිසක් දඬුවම් ලබන්න තියෙන බය නිසා නෙවෙයි. දෙවියන්ගේ ලස්සන ගුණාංග ගැන හිතන තරමට අපේ හිතේ ඔහු ගැන තියෙන ආදරය තවත් වැඩි වෙනවා. ඒ නිසා ඔහුව දුකට පත් කරන දෙයක් කරන්න අපි පොඩ්ඩක්වත් කැමති නැහැ. ශුද්ධ ලියවිල්ලෙත් කියනවා “දෙවිට ප්‍රේම කරනවා කීමෙන් අදහස් කරන්නේ ඔහුගේ ආඥා පිළිපැදීමය” කියලා.—1 යොහන් 5:3.

දෙවියන්ට කීකරු වෙන එකෙන් ලැබෙන ආශීර්වාද මොනවාද? ඒවායින් දෙකක් ගැන දැන් අපි බලමු.

1. ඥානවන්තව කටයුතු කරන්න පුළුවන් වෙනවා

“මා ඔබේ දෙවි වන යෙහෝවාය. ඔබේම ප්‍රයෝජනය සඳහා ඔබට උගන්වන්නෙත් ඔබ යා යුතු හරි මඟ ඔබට කියා දෙන්නෙත් මමය.”—යෙසායා 48:17.

යෙහෝවා දෙවියන් අපේ නිර්මාතෘ නිසා ඔහු අපි ගැන හොඳින්ම දන්නවා. ඒ වගේම ඔහු අපිට ඕන කරන මඟ පෙන්වීම් ලබා දෙනවා. හැබැයි ඒ මඟ පෙන්වීම්වලින් ප්‍රයෝජන අරන් ඥානවන්තව කටයුතු කරන්න නම් අපි කරන්න ඕන මොනවාද? ශුද්ධ ලියවිල්ලෙන් දෙවියන් අපෙන් බලාපොරොත්තු වෙන දේවල් ගැන හොයලා බලලා ඒවා අදාළ කරගන්න ඕනේ.

2. සතුටින් ඉන්න පුළුවන් වෙනවා

“ඇත්තටම සන්තෝෂවත් වන්නේ දෙවි පවසන දේ අසා එය පිළිපදින අයයි.”—ලූක් 11:28.

දෙවියන් කියන දේවල් පිළිපදින නිසා ලෝකේ පුරා ඉන්න මිලියන ගණන් දෙනෙක් නියම සතුට අද්දකිනවා. ස්පාඤ්ඤයේ ඉන්න කෙනෙක්ගේ අද්දැකීම බලන්න. ඉස්සර එයා පොඩි දේටත් කේන්ති ගත්ත, බිරිඳටත් අනිත් අයටත් නපුරු විදිහට සලකපු කෙනෙක්. දවසක් එයා යාකොබ්ගේ පුතා වුණු යෝසෙප් ගැන මෝසෙස්ගේ ලියවිලිවල තිබුණු තොරතුරු කියෙව්වා. යෝසෙප්ව වහලෙක් විදිහට විකුණලා තිබුණා. සාධාරණ හේතුවක් නැතුව හිරේ දාලත් තිබුණා. ඒත් එයා දිගටම සාමකාමීව කටයුතු කළා. අනිත් අයට සමාව දුන්නා. (උත්පත්ති 37-45 පරිච්ඡේද) ස්පාඤ්ඤයේ ඉන්න ඒ කෙනා මෙහෙම කියනවා. “මෘදුකම, කරුණාවන්තකම, තමාව පාලනය කරගන්න එක වගේ ගුණාංග වර්ධනය කරගන්න යෝසෙප්ගේ ආදර්ශය මට උදව් වුණා. දැන් මං ඉන්නේ හරිම සතුටින්.”

අපි අනිත් අයට සලකන්න ඕන විදිහ ගැන ශුද්ධ ලියවිල්ලේ සඳහන් වෙනවා. ඒ ගැන අපි ඊළඟ ලිපියෙන් බලමු.