අපේ නිර්මාතෘගෙන් හැමදාටම ආශීර්වාද ලබන්න

දෙවියන් අනාගතවක්තෘ ආබ්‍රහම්ට පොරොන්දු වුණා එයාගෙන් පැවතෙන තැනැත්තෙක් මාර්ගයෙන් ‘පොළොවේ සියලු ජාතීන් ආශීර්වාද ලබනවා’ කියලා. (උත්පත්ති 22:18) ඒ පැවතෙන තැනැත්තා කවුද?

ඒ තමයි යේසුස්. මීට අවුරුදු 2,000කට විතර කලින් දෙවියන් ආශ්චර්යයන් කරන්න යේසුස්ට බලය දුන්නා. ඒ ආශ්චර්යයන්වලින් පැහැදිලි වුණා දෙවියන් ආබ්‍රහම්ට පොරොන්දු වුණු විදිහට සියලු ජාතීන් ආශීර්වාද ලබන්න යන්නේ යේසුස් මාර්ගයෙන් කියලා.—ගලාති 3:14.

මිනිසුන්ට ආශීර්වාද ලබා දෙන්න දෙවියන් තෝරගෙන තියෙන්නේ යේසුස් කියලත් දෙවියන් යේසුස්ව යොදාගෙන මිනිසුන්ට හැමදාටම ආශීර්වාද කරන්නේ කොහොමද කියලත් යේසුස් කරපු ආශ්චර්යයන්වලින් පැහැදිලි වෙනවා. ඒ වගේම යේසුස්ට තිබුණු ලස්සන ගුණාංග ගැනත් ඒ ආශ්චර්යයන්වලින් දැනගන්න පුළුවන්. දැන් අපි ඒ අතරින් කිහිපයක් බලමු.

ආදරය - යේසුස් අසනීප අයව සුව කළා.

දවසක් ලාදුරු රෝගියෙක් යේසුස් ළඟට ඇවිත් එයාව සුව කරන්න කියලා බැගෑපත්ව ඉල්ලුවා. ඒ වෙලාවෙම යේසුස් එයාව අල්ලලා, ලාදුරු රෝගය සම්පූර්ණයෙන්ම සුව කළා.—මාක් 1:40-42.

ත්‍යාගශීලීකම - යේසුස් බඩගින්නේ හිටපු අයට කන්න දුන්නා.

අනිත් අය බඩගින්නේ ඉන්නවාට යේසුස් කැමති වුණේ නැහැ. අවස්ථා කිහිපයකදීම රොටි සහ මාළු සුළු ප්‍රමාණයකින් යේසුස් ආශ්චර්යවත් විදිහට දහස් ගාණකට කන්න දුන්නා. (මතෙව් 14:17-21; 15:32-38) හැමෝම ඇති තරම් කෑවාට පස්සේ කෑම ඉතුරුත් වුණා.

දයානුකම්පාව - යේසුස් මැරුණු අයට ආපහු ජීවිතය දුන්නා.

තමන්ව බලාගන්න හිටිය එකම පුතාත් මිය ගිය නිසා වේදනාවෙන් හිටිය වැන්දඹුවක්ව දැකලා “අනුකම්පාවෙන්” පෙලඹුණු යේසුස් ඒ පුතාට ආපහු ජීවිතය දුන්නා.—ලූක් 7:12-15.