සිහි කිරීමට සූදානම් වෙන්න පුළුවන් කොහොමද?

මේ අවුරුද්දේ ඉඳන් යේසුස්ගේ මරණය සිහි කිරීමට සූදානම් වෙන්න වැඩි කාලයක් තියෙනවා. සිහි කිරීම සතියේ දවසක වැටුණොත් ක්‍රිස්තියානි ජීවිතය සහ දේවසේවය රැස්වීම ඒ සතියේදී පවත්වන්නේ නැහැ. ඒක සති අන්තයේ දවසක වැටුණොත් බයිබල් දේශනය සහ ‘මුරටැඹ’ පාඩම පවත්වන්නේ නැහැ. ඒ නිසා අපිට කාලය ඉතිරි වෙනවා. ඒ කාලයෙන් ඔයාට උපරිම ප්‍රයෝජන ගන්න පුළුවන් කොහොමද? මුල් සියවසේදී කළා වගේ අපිත් මේ විශේෂ සැමරීමට අවශ්‍ය දේවල් හොඳින් සැලසුම් කරන්න ඕනේ. (ලූක් 22:7-13; km 3/15 1) ඒත් ඒ සැමරීමෙන් උපරිම ප්‍රයෝජන ගන්න නම් කරන්න ඕන තවත් දේවල් තියෙනවා.

• සිහි කිරීමට සහභාගි වෙන එක කොයි තරම් වැදගත්ද කියලා හිතලා බලන්න.—1කොරි 11:23-26

• යෙහෝවා දෙවියන් එක්ක ඔයාට තියෙන බැඳීම ශක්තිමත්ද කියලා හොඳට හිතලා බලන්න. ඒ ගැන යාච්ඤා කරන්න.—1කොරි 11:27-29; 2කොරි 13:5

• යෙහෝවා දෙවියන් සහ යේසුස් අපි වෙනුවෙන් කරපු දේ ගැන බයිබලයෙන් සහ අපේ ප්‍රකාශනවලින් කියවලා ඒ ගැන හොඳින් හිතන්න.—යොහ 3:16; 15:13

සමහර ප්‍රචාරකයන් ‘දිනපතා ශුද්ධ ලියවිලි පරීක්ෂා කිරීම’ පොතේ තියෙන සිහි කිරීමට අදාළ බයිබල් කොටස කියවලා ඒ ගැන කල්පනා කරනවා. සමහර අය පහත වගුවේ තියෙන බයිබල් පද කියවනවා. තවත් අය යෙහෝවා දෙවියන් සහ යේසුස් අපි වෙනුවෙන් පෙන්වපු ආදරය ගැනත් සිහි කිරීම ගැනත් සඳහන් ‘මුරටැඹ’ ලිපි කියවනවා. ඒ මොන විදිහකින් හරි යෙහෝවා දෙවියන් සහ යේසුස් ගැන ඔයාට තියෙන ආදරයත් අගයත් වැඩි කරගන්න උපරිමයෙන් වෑයම් කරන්න.