විනාශය එන දවස ගැන යේසුස් කිව්වේ මොනවාද?

ලෝක විනාශය ගැන යේසුස් කිව්ව දේවල් දෙකක් බලමු.

“සෝදිසියෙන් සිටින්න. මන්ද ඔබ ඒ දවසවත් පැයවත් දන්නේ නැහැ.”​—මතෙව් 25:13.

“නියමිත කාලය කවදාද කියා ඔබ නොදන්නා නිසා අවදිව, සෝදිසියෙන් සිටින්න.”​—මාක් 13:33.

ඒකෙන් පැහැදිලියි විනාශය එන දවස අපි කවුරුත් හරියටම දන්නේ නැහැ කියලා. හැබැයි දෙවියන් දැනටමත් ඒ දේ සිද්ධ වෙන “දවස හා වේලාව” තීරණය කරලා ඉවරයි. (මතෙව් 24:36) ඒ දවස හරියටම දන්නේ නැති වුණත් විනාශය එන කාලය හඳුනගන්න උදව් වෙන ලකුණක් යේසුස් ඔහුගේ ගෝලයන්ට දුන්නා. ඒ ලකුණට අයිති වෙන්නේ මොනවාද කියලා දැන් අපි බලමු.

යේසුස් දුන්න ලකුණ

“පවතින සමාජයේ අවසාන කාල පරිච්ඡේදය” හඳුනගන්න උදව් වෙන ලකුණට අයිති සිද්ධීන් ගැන යේසුස් මෙහෙම කිව්වා. “ජාතියක් ජාතියකට විරුද්ධවත් රාජ්‍යයක් රාජ්‍යයකට විරුද්ධවත් නැඟී සිටියි. එක් තැනක් පාසා තවත් තැනක ආහාර හිඟකම්ද භූමිකම්පාද සිදු වෙයි.” (මතෙව් 24:3, 7) ඒ වගේම මුළු ලෝකෙටම බලපාන “වසංගත” ඇති වෙනවා කියලත් යේසුස් කිව්වා. (ලූක් 21:11) යේසුස් කිව්ව දේවල් අද ඒ විදිහටම ඉටු වෙනවා නේද?

දරුණු යුද්ධ, ආහාර හිඟකම්, භූමිකම්පා, ඉවරයක් නැති වසංගත වගේ දේවල් නිසා අද හුඟක් මිනිස්සු දුක් විඳිනවා. උදාහරණෙකට 2004දී ඉන්දියන් සාගරේ වුණ භූමිකම්පාවක් නිසා දරුණු සුනාමියක් ඇති වුණා. ඒකෙන් ජීවිත 2,25,000ක් විතර නැති වුණා. අවුරුදු තුන වගේ කාලෙකදී කොරෝනා වසංගතය නිසා ලෝකේ පුරා මිනිස්සු ලක්ෂ 69කටත් වඩා මිය ගියා. ඒ සිද්ධීන්වලින් පැහැදිලියි යේසුස් කිව්ව විනාශය අත ළඟමයි කියලා.

“අවසාන කාලය”

විනාශය වෙන්න ඔන්න මෙන්න කියලා තියෙන කාල පරිච්ඡේදය බයිබලේ හඳුන්වලා තියෙන්නේ “අවසාන කාලය” කියලයි. (2 පේතෘස් 3:3, 4) අවසාන කාලයේ හුඟක් නරක ගතිගුණ තියෙන මිනිස්සු ඉන්නවා කියලා බයිබලේ විස්තර කරලා තියෙනවා. (“අවසාන කාලයේ මිනිස්සු” කියන කොටුව බලන්න.) අද වැඩිපුරම ඉන්නේ කිසිම ආදරයක් කරුණාවක් නැති, ආත්මාර්ථකාමී, කෑදර, දරුණු මිනිස්සු කියලා ඔයාටත් හිතෙන්නේ නැද්ද? අපි ඉන්නේ මේ දුෂ්ට සමාජයේ විනාශය අද්දරයි කියලා කියන්න ඒකත් හොඳ සාක්ෂියක්.

අවසාන කාලය තව කොච්චර කල් තියෙයිද? බයිබලේ කියන්නේ අවසාන කාලය “ඉතා කෙටි කාල පරිච්ඡේදයක්” කියලා. ඒකෙන් පස්සේ දෙවියන් ‘පොළොව විනාශ කරන අයව විනාශ කරනවා.’​—එළිදරව් 11:15-18; 12:12.

පාරාදීසය පේන මානයේ!

මේ දුෂ්ට සමාජය විනාශ කරන දවස හා පැය දෙවියන් දැනටමත් තීරණය කරලා ඉවරයි. (මතෙව් 24:36) හැබැයි “කිසි කෙනෙකු විනාශ වෙනවාට” දෙවියන් පොඩ්ඩක්වත් කැමති නැහැ. (2 පේතෘස් 3:9) ඒක නිසා දෙවියන් අපි හැමෝටම ඔහු ගැන ඉගෙනගෙන ඔහු කැමති විදිහට ජීවිතේ වෙනස් කරගන්න අවස්ථාව දීලා තියෙනවා. මොකද ඔහුට ඕනෙ අපි හැමෝම ලස්සන පාරාදීසයක හැමදාටම ජීවත් වෙනවා දකින්නයි.

දෙවියන්ගේ රාජ්‍යය ගැනත් ඒක යටතේ ජීවත් වෙන්න නම් අපි කරන්න ඕනෙ දේවල් ගැනත් ලෝකේ පුරාම ඉන්න මිනිසුන්ට උගන්වන්න දෙවියන් සැලැස්මක් ඇති කරලා තියෙනවා. යේසුස් ඒ ගැන කිව්වේ “ජනාවාස වූ මුළු පොළොව පුරාම” දෙවියන්ගේ රාජ්‍යය ගැන ශුභාරංචිය දේශනා කරනවා කියලයි. (මතෙව් 24:14) බයිබලේ තියෙන පණිවිඩය ගැන මිනිසුන්ට උගන්වන්න යෙහෝවා දෙවිගේ සාක්ෂිකරුවන් පැය බිලියන ගාණක් වැය කරලා තියෙනවා. විනාශය එන්න කලින් මුළු පොළොව පුරාම ඒ පණිවිඩය ගැන දේශනා කරනවා කියලා යේසුස් කිව්වා.

මිනිසුන්ට මේ පොළොව පාලනය කරන්න ලැබෙන්නේ තව ටික කාලයයි. ළඟදීම එන්න යන විනාශයෙන් බේරිලා හැමදාටම ජීවත් වෙන්න ඔයාටත් පුළුවන්. ඒ කොහොමද කියලා ඊළඟ ලිපියෙන් බලමු.