කල් පවතින සිත්ගන්නාසුලු බයිබලයක්!

සාක්ෂිකරුවන් වන අපට බයිබලය තරම් වැදගත් පොතක් තවත් නැහැ. අපි නිතරම අධ්‍යයනය කරන්න හා ශුභාරංචිය අනිත් අයට උගන්වන්න බයිබලය යොදාගන්නවා. (මතෙ. 24:14) ඒ නිසා 2013දී නිකුත් කරපු සංශෝධනය කළ ඉංග්‍රීසි ‘ශුද්ධ බයිබලය - නව ලොව පරිවර්තනය’ කල් පවතින හා සිත්ගන්නාසුලු එකක් විදිහට නිපදවන්න සහෝදරයන් ලොකු වෑයමක් දැරුවා.

ඇමරිකාවේ වෝල්කිල්වල මුද්‍රණ අංශයේ වැඩ කරන සහෝදරයන් පොත් බඳින ආයතනයක ප්‍රධානියෙක් එක්ක ඒ ගැන කතා කළා. ඔහු මෙහෙම කිව්වා. “ඔයාලා කියන විදිහේ බයිබල් හදන්න බෑ. මොකද ගොඩක් බයිබල් හදන්නේ මේසයක, පොත් රාක්කයක තියන්න මිසක් නිතර පාවිච්චියට නෙමෙයි.”

කලින් මුදාහැරපු ‘නව ලොව පරිවර්තනයේ’ සමහර පිටපත් වැඩි කල් පාවිච්චි කරන්න බැරි වුණා. ඒ නිසා සහෝදරයන්ට ඕන වුණේ ඕනම දේශගුණයකට හරියන කල් පවතින බයිබලයක් නිර්මාණය කරන්නයි. ඒකට පිළියමක් හැටියට ඔවුන් බයිබල් කවර හදන්න පාවිච්චි කරන අමුද්‍රව්‍ය, ගම් වර්ග හා පොත් බඳින ක්‍රම ගැන හොයලා බැලුවා. ඊටපස්සේ අලුත් බයිබල් කිහිපයක් හදලා ඒවා කල් පවතිනවද කියලා හොයලා බලන්න විවිධ දේශගුණයන් තියෙන රටවල්වලට යැව්වා.

මාස 6කට පස්සේ ඒ හැම බයිබලයක්ම ගෙන්වලා පරීක්ෂා කළා. ඊටපස්සේ ඊටත් වඩා හොඳින් හදපු තවත් බයිබල් තොගයක් පරීක්ෂා කරන්න ආයෙත් ඒ රටවල්වලට යැව්වා. එහෙම යවපු මුළු බයිබල් ගණන 1,690කට වඩා වැඩියි. ඒවායින් සමහරකට විවිධ අකරතැබ්බ සිද්ධ වුණා. උදාහරණයකට, එක බයිබලයක් වැස්සේ මුළු රැයක්ම එළියේ තිබුණා. තව එකක් ජලගැල්මකට අහු වෙලා තිබුණා. තවත් බයිබලයක් උඩින් කාර් එකක් ගිහින් තිබුණා.

ඒ විදිහට බයිබලයේ කල් පැවැත්ම ගැන පරීක්ෂා කරන අතරතුර 2011දී වේගයෙන් පොත් බඳින අලුත් උපකරණ වෝල්කිල්වල සහ ජපානයේ එබිනාවල තියෙන මුද්‍රණාලවලට ගෙන්වාගත්තා. සහෝදරයන්ගේ අරමුණ වුණේ අවශ්‍ය ප්‍රමාණය විතරක් නෙවෙයි ඒ ස්ථාන දෙකේම එක වගේ පෙනුමක් තියෙන බයිබල් මුද්‍රණය කරන එකයි.

ඇකිළුණු කවර

2012 මුලදී අලුතින් නිපදවූ කවර යොදාගෙන මේ මුද්‍රණාල දෙකෙන්ම 1984දී නිකුත් කළ ‘නව ලොව පරිවර්තනයේ’ පිටපත් මුද්‍රණය කළා. හැබැයි ඒවාට යොදාගත්ත ගම් වර්ගය සහ කවරයේ ඇතුළට දාන්න පාවිච්චි කරපු කඩදාසි ඒ වෙද්දී පරීක්ෂා කරලා තිබුණේ නැති නිසා කවර ඇකිළුණා. ඒකට ඉක්මනින් විසඳුමක් හොයාගන්න බැරි වුණ නිසා මුද්‍රණ කටයුතු ඇණහිටියා.

මෘදු කවර ඇකිළෙන එකට විසඳුමක් නැහැ කියලා අමුද්‍රව්‍ය සපයපු අය කිව්වත් ගනකම් කවරයක් යොදාගන්න සහෝදරයන් කැමති වුණේ නැහැ. මෘදු කවරයක් දාලා ඇකිළෙන්නේ නැති, කාලයක් පවතින, සිත්ගන්නාසුලු බයිබලයක් හදන්න ඔවුන් දිගටම වෑයම් කළා. මාස 4ක් තිස්සේ ගම් වර්ග හා කවරයේ ඇතුළට දාන රෙදි වර්ග ගැන පරීක්ෂා කළ ඔවුන් අන්තිමේදී කවරය හදන්න සුදුසුම විදිහ හොයාගත්තා.

2013 ඔක්තෝබර් 5වෙනිදා වොච් ටවර් බයිබල් ඇන්ඩ් ට්‍රැක්ට් සොසයටි ඔෆ් පෙන්සිල්වේනියා මගින් පවත්වන වාර්ෂික රැස්වීමේදී අලුත් බයිබලය මුදාහරින්න නියමිත වෙලා තිබුණා. ඒත් ඒකේ ඉලෙක්ට්‍රෝනික පිටපත මුද්‍රණාලවලට ලැබුණේ 2013 අගෝස්තු 9වෙනි සිකුරාදායි. ඊළඟ දවසෙම මුද්‍රණ කටයුතු පටන්ගත්ත සහෝදරයන් අගෝස්තු 15වෙනිදා වෙද්දී පළවෙනි බයිබලය හදලා ඉවර කළා. වාර්ෂික රැස්වීමට සහභාගි වන හැම කෙනෙක්ටම බයිබලයක් ලබා දෙන්න ඕන වුණු නිසා වෝල්කිල්වල හා එබිනාවල මුද්‍රණ අංශයේ සහෝදරයන් සති 7ක් පුරා දිවා රෑ නොබලා වැඩ කළා. ඒ නිසා ඔවුන්ට බයිබල් 16,00,000ක් මුද්‍රණය කරලා නැව්ගත කරන්න පුළුවන් වුණා.

අලුත් බයිබලය සිත්ගන්නාසුලුයි. ඒ වගේම කල් පවතිනවා. හැබැයි ඒ හැම දේටම වඩා ඒකේ තියෙන පණිවිඩය වටිනවා. අලුත්ම බයිබලය අතට ලැබිලා දවසකට පස්සේ ඇමරිකාවේ ඉන්න සහෝදරියක් මෙහෙම ලියලා එව්වා. “මට දැන් ඉස්සරට වඩා බයිබලයේ තියෙන දේවල් තේරෙනවා.”