යොහන් 16:33 - “මම ලෝකයෙන් ජයගතිමි”

“මම ඔබට මේ දේවල් කිව්වේ මා මාර්ගයෙන් ඔබට සමාදානය ලබා දෙන්නයි. ඔබට මේ ලෝකයෙන් නොයෙකුත් පීඩා ඇති වෙයි. නමුත් කිසි දෙයකට අධෛර්යය වෙන්න එපා. මම ලෝකයෙන් ජය ගත්තා.”—යොහන් 16:33, ‘නව ලොව පරිවර්තනය.’

“මා තුළ නුඹලාට සමාදානය තිබෙන පිණිස මේ දේවල් නුඹලාට කීවෙමි. ලෝකයෙහි නුඹලාට පීඩා තිබේ. නුමුත් ධෛර්යවත්වෙන්න; මම ලෝකයෙන් ජයගතිමියි කීසේක.”—යොහන් 16:33, ‘පැරණි අනුවාදය.’

යොහන් 16:33 අදහස

යේසුස් ඒ දේ කිව්වේ පීඩා, ප්‍රශ්න මැද වුණත් දෙවියන්ව සතුටු කරන්න අනුගාමිකයන්ට පුළුවන් කියලා සහතික කරන්නයි.

“මම ඔබට මේ දේවල් කිව්වේ මා මාර්ගයෙන්a ඔබට සමාදානය ලබා දෙන්නයි.” යේසුස් ඒකෙන් අදහස් කළේ සමාදානයට බාධා වෙන දේවල් නැති වෙනවා කියලා නෙවෙයි. ඒ වෙනුවට ඔහු කතා කළේ හිතේ සහ මනසේ ඇති වෙන සමාදානයක් ගැනයි. ඒ සමාදානය එයාලට අද්දකින්න ලැබෙන්නේ යේසුස් “මාර්ගයෙන්.” ඔහු අනුගාමිකයන්ට පොරොන්දු වුණා එයාලගේ “උපකාරයට” දෙවියන්ගේ බලය ලැබෙන්න සලස්වනවා කියලා. ඕනම අභියෝගයකට සාර්ථකව මුහුණ දෙන්න ඒ බලය උදව් වෙනවා.—යොහන් 14:16, 26, 27.

“ඔබට මේ ලෝකයෙන් නොයෙකුත් පීඩා ඇති වෙයි. නමුත් කිසි දෙයකට අධෛර්යය වෙන්න එපා.” යේසුස් ඔහුගේ ගෝලයන්ට පැහැදිලිවම කිව්වා එයාලට පීඩා, විරුද්ධවාදිකම් සහ අසාධාරණකම්වලට මුහුණ දෙන්න වෙනවා කියලා. (මතෙව් 24:9; 2 තිමෝති 3:12) ඒ වුණත් “අධෛර්යය” නොවී ඒ කියන්නේ “ස්ථිර සිතින්” ඉන්න එයාලට හොඳ හේතු තිබුණා.—යොහන් 16:33, ‘පැරණි අනුවාදය’ (1854).

“මම ලෝකයෙන් ජය ගත්තා.” මේ පදයේ ‘ලෝකය’ කියලා හඳුන්වන්නේ දෙවියන් එක්ක කිසිම බැඳීමක් නැති අධර්මිෂ්ඨ මිනිස් සමාජය.b 1 යොහන් 5:19 කියන්නේ “මුළු ලෝකයම දුෂ්ටයාගේ [සාතන්ගේ] බලපෑමට යටත්ව තියෙනවා” කියලා. ඒ නිසයි මේ ‘ලෝකයේ’ මිනිස්සු දෙවියන් සතුටු වෙන විදිහට හිතන්නේවත් හැසිරෙන්නේවත් නැත්තේ.—1 යොහන් 2:15-17.

මිනිසුන්ට දෙවියන් ගැන උගන්වන එකෙන් සහ ජීවිතය පූජා කරන එකෙන් යේසුස්ව වළක්වන්න සාතනුයි එයා යටතේ තියෙන ලෝකයයි උත්සාහ කළා. (මතෙව් 20:28; ලූක් 4:13; යොහන් 18:37) හැබැයි තමන් හිතන විදිහ වෙනස් කරන්නවත් දෙවියන්ගේ කැමැත්ත කරන එකෙන් තමන්ව වළක්වන්නවත් යේසුස් මේ ලෝකයේ බලපෑමට ඉඩ දුන්නේ නැහැ. මැරෙන මොහොත වෙන කල්ම ඔහු දෙවියන්ට විශ්වාසවන්තව හිටියා. ඒ නිසයි මේ ලෝකයෙන් ජය ගත්තා කියලත් “ලෝකයේ පාලකයා” වන සාතන්ට ‘මාව යටත් කරගන්න කිසි බලයක් නැහැ’ කියලත් යේසුස්ට කියන්න පුළුවන් වුණේ.—යොහන් 14:30.

විශ්වාසය සෝදිසියට ලක් වෙන අවස්ථාවලදී වුණත් දිගටම දෙවියන්ට විශ්වාසවන්තව ඉන්න පුළුවන් කියලා යේසුස් ඔහුගේ අනුගාමිකයන්ට ආදර්ශයෙන්ම පෙන්නුවා. යේසුස් කරපු ඒ දේ හරියට ඔහු අනුගාමිකයන්ට මෙහෙම කිව්වා වගේ. “මම මේ ලෝකයෙන් ජය ගත්තා නම් ඔයාලටත් ඒ දේ කරන්න පුළුවන්.”

යොහන් 16:33 අවට පද

යේසුස් මැරෙන්න කලින් රාත්‍රියේ තමයි ඒ දේ කිව්වේ. තව ටික වෙලාවකින් මරණයට මුහුණ දෙන්න වෙනවා කියලා ඔහු දැනන් හිටියා. යේසුස්ව ආයෙත් දකින්න ලැබෙන්නේ නැහැ කියලත් එයාලට පීඩාවලට මුහුණ දෙන්න වෙයි කියලත් සමහරවිට මරණය පවා අද්දකින්න වෙයි කියලත් යේසුස් එයාලට කිව්වා. (යොහන් 15:20; 16:2, 10) ඒ දේවල් කිව්වට පස්සේ නියෝජිතයන්ගේ බය සැක නැති කරලා එයාලව දිරිගන්වන්න තමයි යේසුස් යොහන් 16:33 තියෙන වචන එයාලට කිව්වේ.

යේසුස් කියපු ඒ දේ සහ ඔහුගේ ආදර්ශය අද ඉන්න ක්‍රිස්තියානීන්ටත් ලොකු දිරිගැන්වීමක්. මොන පීඩාවකට මුහුණ දෙන්න වුණත් දිගටම දෙවියන්ට විශ්වාසවන්තව ඉන්න අපිට පුළුවන්.