සියරා ලියොන් සහ ගිනියාව

කාලයකට පසු නිදහස ලැබූ වහලුන් 1792 මාර්තු 11වෙනිදා නැවත මේ පුළුන් ගහ යටට එකතු වුණේ ඔවුන්ගේ නිදහස සමරන්නයි. එතැන් පටන් ෆ්‍රීටවුන් ලෙස හඳුන්වන විශාල නගරය ඔවුන්ගේ නවාතැන වුණා. අප්‍රිකානු ගෝත්‍ර 100කට වඩා අයිති එම ජනයා තම නිදහසේ සංකේතය ලෙස සැලකුවේ පුළුන් ගසයි.

නමුත් මීට වඩා විශිෂ්ට ආකාරයේ නිදහසක් එනම් “දෙවිගේ දරුවන් ලෙස කියා නිම කළ නොහැකි නිදහසක්” ගැන සියරා ලියොන්හි සිටින සාක්ෂිකරුවන් අවුරුදු 100කට ආසන්න කාලයක් පුරා තම අසල්වැසියන්ට කියා දෙමින් සිටිනවා. (රෝම 8:21) ඒ දෙවිගේ රාජ්‍යය තුළදී පාපයේ සහ මරණයේ වහල්කමින් ලැබෙන නිදහසයි.—යෙසා. 9:6, 7; 11:6-9.

අවුරුදු 50ක් පුරා සියරා ලියොන්හි යෙහෝවා දෙවිගේ සාක්ෂිකරුවන්ගේ ශාඛා කාර්යාලය එහි අසල්වැසි රටක් වන ගිනියාවේත් දේශනා සේවය සම්බන්ධ වැඩකටයුතු සංවිධානය කරමින් සිටිනවා. කාලයක් පුරා ගිනියාවේ පවතින දේශපාලන හා සමාජීය හැලපැප්පීම් නිසා පීඩාවට පත්ව සිටි ජනයා, බයිබලයේ ඇති සැනසිලිදායක පණිවිඩය අසන්න ලැබුණාම එය පිළිගත්තේ මහත් උනන්දුවකින්.

සියරා ලියොන් සහ ගිනියාවේ සිටින සාක්ෂිකරුවන් ශුභාරංචිය දේශනා කරන්නේ දිළිඳුකම, වාර්ගික ගැටුම්, මුල් බැසගත් චාරිත්‍ර වාරිත්‍ර සහ නූගත්කම වැනි නොයෙකුත් බාධක මැද්දේයි. ඔවුන්ගේ නොසැලෙන විශ්වාසය ගැන තොරතුරු බිඳක් දැන් අපි කියවා බලමු. ඔවුන්ගේ කතාව “බලාපොරොත්තුවක් දෙන දෙවි” ගැන ඔබට ඇති විශ්වාසය තවත් ශක්තිමත් කරගන්න උදව් වෙයි කියා අපිට විශ්වාසයි.—රෝම 15:13.