අපේ පොත් පත්, සඟරා ලියන්නෙත් ඒවා පරිවර්තනය කරන්නෙත් කොහොමද?

“සියලු ජාතීන්ටත් ගෝත්‍රවලටත් භාෂාවලටත් ජනයාටත්” ශුභාරංචිය දන්වන්න ඕන නිසා අපේ සඟරා, පොත් පත් භාෂා 750කට වැඩි ගාණකින් බෙදාහරිනවා. (එළිදරව් 14:6) ඒක අපිට කරන්න පුළුවන් වෙලා තියෙන්නේ කොහොමද? පොත් පත් ලියන්න වෙනම ලේඛකයන් කණ්ඩායමක් ඉන්නවා. ඒ වගේම ඒවා එක එක භාෂාවලට පරිවර්තනය කරන්න පරිවර්තකයන් පිරිසක් ඉන්නවා. ඒ හැමෝම එක එක රටවල ඉන්න යෙහෝවා දෙවිගේ සාක්ෂිකරුවන්.

ඒවා ලියන්නේ ඉංග්‍රීසියෙන්. අපේ ප්‍රධාන කාර්යාලයේ ලේඛන අංශයක් තියෙනවා. ප්‍රධාන කාර්යාලයේ හා වෙනත් රටවල තියෙන ශාඛා කාර්යාලවල ඉන්න ලේඛකයන්ට ලියන්න ඕන දේවල් පවරන්නේ ඒ අංශයෙනුයි. ඒ අංශයට මඟ පෙන්වීම් දෙන්නේ පාලක මණ්ඩලයයි. අපේ පොත් පත් ලියන්න ගොඩක් රටවල ඉන්න අය හවුල් වෙන නිසා ඕනම රටක ජීවත් වෙන කෙනෙක්ට ඒවා කියවලා ප්‍රයෝජන ගන්න පුළුවන් විදිහට ලිපි ලියන්න හැකි වෙලා තියෙනවා.

ඉංග්‍රීසියෙන් ලියපු ලිපි පරිවර්තකයන්ට යවනවා. ලේඛකයන් ලිපි ලිව්වට පස්සේ ඒවා කියවලා අවශ්‍ය සකස් කිරීම් කරලා ලෝකේ වටේ ඉන්න පරිවර්තන කණ්ඩායම්වලට ඒවා ඊ-මේල් මාර්ගයෙන් යවනවා. පරිවර්තන කණ්ඩායමක පරිවර්තකයෙක්, ඉංග්‍රීසි අදහස හරියට පරිවර්තනය කරලා තියෙනවාද බලන්න කෙනෙක්, ව්‍යාකරණ වගේ දේවල් බලන්න සෝදුපත් කියවන්නෙක් ඉන්නවා. ඒ හැමෝම උත්සාහ කරන්නේ ඉංග්‍රීසියෙන් තියෙන අදහස නිවැරදිව එයාලගේ භාෂාවට පරිවර්තනය කරන්නයි.—දේශනාකාරයා 12:10.

කොම්පියුටර් නිසා වැඩේ වේගයෙන් කරන්න පුළුවන්. ලේඛකයන් හා පරිවර්තන කණ්ඩායම් කරන වැඩ කොටස කවදාවත් කොම්පියුටරයකට කරන්න බැහැ. හැබැයි එයාලගේ වැඩේ වේගවත්ව කරන්න කොම්පියුටර් තාක්ෂණය ලොකු උදව්වක්. යෙහෝවා දෙවිගේ සාක්ෂිකරුවන් පරිවර්තන වැඩවලට මෙප්ස් (MEPS) කියන කොම්පියුටර් වැඩසටහන හදලා තියෙනවා. ඒ වැඩසටහන නිසා ඕනම භාෂාවකට ලිපි පරිවර්තනය කරන්නත් ඒවාට අදාළ පින්තූර ඇතුළත් කරන්නත් මුද්‍රණය කරන්න ඒවා සකස් කරන්නත් පුළුවන්.

අපේ පොත් පත් ප්‍රධාන භාෂාවලින් විතරක් නෙමෙයි, පොඩි ජන පිරිසක් කතා කරන භාෂාවකින් වුණත් බෙදාහරින්න අපි ලොකු වෙහෙසක් ගන්නේ ඇයි? මොකද යෙහෝවා දෙවිගේ කැමැත්ත තමයි ‘සෑම තරාතිරමකම සිටින මිනිසුන් ගැලවීම ලැබීම හා සත්‍යය පිළිබඳව නිවැරදි දැනුමක් ලබාගන්නවා දැකීම.’—1 තිමෝති 2:3, 4.

• අපේ සඟරා, පොත් පත් ලියන වැඩේ සිද්ධ වෙන්නේ කොහොමද?

• ගොඩක් භාෂාවලට අපේ පොත් පත් පරිවර්තනය කරන්නේ ඇයි?