සාතන්ගේ උගුල්වලින් පරෙස්සම් වෙන්න

“යක්ෂයාගේ උගුලෙන් මිදී නැවත පියවි සිහියට පැමිණෙන්න.”—2 තිමෝ. 2:26.

ඔබ පිළිතුරු දෙන්නේ කොහොමද?

අපි නිතරම අනිත් අයගේ වැරදි හොයනවා නම් අපි මොන වගේ සෝදිසියක් කරගත යුතුද?

පිලාත් හා පේතෘස් ක්‍රියා කළ ආකාරයෙන් ඉගෙනගත හැකි පාඩම් මොනවාද?

කළ වරදක් ගැන පමණට වඩා දුක් වීමෙන් වළකින්න පුළුවන් කොහොමද?

1, 2. මෙම ලිපියෙන් අපි සාකච්ඡා කරන්නේ සාතන් අටවන මොන උගුල් ගැනද?

දඩයක්කාරයෙක් සතෙකුව හසු කරගන්නවා වගේ යක්ෂයාත් මාන බලාගෙන සිටින්නේ දෙවිගේ සේවකයන්ව හසු කරගන්නයි. සාතන්ගේ අරමුණ අපිව නැති කර දමනවා වෙනුවට අප ලවා ඔහු කැමති දේ කරවගන්නයි.—2 තිමෝති 2:24-26 කියවන්න.

² දඩයක්කාරයෙක් විවිධ වර්ගයේ සතුන්ව පණපිටින් අල්ලාගැනීම සඳහා විවිධ උගුල් අටවනවා. දෙවිගේ සේවකයන්ව අල්ලාගැනීම සඳහා සාතනුත් විවිධාකාරයේ උගුල් අටවනවා. අපි සෝදිසියෙන් සිටින්නේ නැත්නම් අපිත් ඒ උගුල්වලට ගොදුරු වෙයි. සාතන් අටවන උගුල් තුනක් ගැන අපි මේ ලිපියෙන් සාකච්ඡා කරමු. ඒවා නම් (1) දිව පාලනය කර නොගැනීම, (2) මිනිසුන්ට තිබෙන භය සහ (3) කළ වරදක් ගැන පමණට වඩා දුක් වීමයි. එම උගුල් අටවා සමහරුන්ව අල්ලාගන්න සාතන්ට පුළුවන් වෙලා තිබුණත් කල් ඇතුව ඒ ගැන දැන සිටීමෙන් ඔහුගෙන් ආරක්ෂා වෙන්න අපිට පුළුවන්.

ගිනි අවුළන දිව

3, 4. දිව පාලනය කරගන්නේ නැත්නම් මොකක් වෙන්න පුළුවන්ද? උදාහරණයක් දෙන්න.

³ සමහර සතුන් ලඳු කැලෑවල ආරක්ෂිතව ජීවත් වෙනවා. එවිට දඩයක්කරුවන් කරන්නේ ඒ කැලෑවලට ගිනි තබා එහි සැඟවී සිටින සතුන්ව එළියට පන්නා උන් එළියට ආ විට උන්ව පහසුවෙන් ගොදුරු කරගැනීමයි. ඒ හා සමානව සාතන් කැමති වන්නේ ක්‍රිස්තියානි සභාවට ගිනි තබා එහි රැකවරණය ලබන සාමාජිකයන්ව එළියට පන්නා අල්ලාගන්නයි. අපත් සාතන්ට හසු වී නොදැනුවත්ව ඔහුට සහයෝගය දෙන්න ඉඩ තිබෙනවා. ඒ කොහොමද?

⁴ යාකොබ් දිව සමාන කළේ ගින්නකටයි. (යාකොබ් 3:6-8 කියවන්න.) අපේ කතාබහ ගැන පරෙස්සම් වුණේ නැත්නම් සභාවට ගිනි තියන්න සාතන් අපව පාවිච්චි කරයි. උදාහරණයකට මේ ගැන සිතන්න. සහෝදරියක් ස්ථාවර පුරෝගාමියෙක් ලෙස පත් වුණා කියා සභාවේදී නිවේදනය කරනවා. එදා රැස්වීමෙන් පසු සහෝදරියන් දෙදෙනෙක් ඒ ගැන කතා කරනවා. එක්කෙනෙක් ඒ ගැන සතුටු වෙනවා. අනික් සහෝදරී ‘එයා ඉතිං හරි ආසයිනේ කැපිලා පේන්න. ඒකයි ඔය ස්ථාවර කරන්නේ’ කියා පවසනවා. මේ දෙදෙනාගෙන් ඔබේ මිතුරිය කරගන්න ඔබ කැමති කාවද? සභාවේ ගිනි ඇවිළෙන ලෙස කතා කළේ ඒ දෙදෙනාගෙන් කවුද කියා තේරුම්ගන්න අමාරු නැහැ.

5. දිව පාලනය කරගන්න නම් අපි කළ යුත්තේ මොනවාද?

⁵ ගින්න නිවන්නේ කොහොමද? ‘කෙනෙකුගේ මුවින් පිට වන්නේ ඔහුගේ සිත තුළ පිරී ඇති දේවල්’ කියා යේසුස් පැවසුවා. (මතෙ. 12:34) ඒ අනුව අපේ දිව පාලනය කරගන්න නම් අපේ සිත සෝදිසි කරන්න අවශ්‍යයි. උදාහරණයකට සහෝදරයෙක් සේවා වරප්‍රසාද අත් කරගැනීමට උත්සාහ කරනවා නම් ඔහු ගැන අපිට හිතෙන්නේ කොහොමද? ඔහු යෙහෝවා දෙවිව සතුටු කරන්න ඕන හින්දා එහෙම කරනවා කියාද? නැත්නම් ඔහුට යටි අරමුණක් තිබෙනවා කියාද? සහෝදරයන් හැම දෙයක්ම කරන්නේ ඔවුන්ගේ වාසියට කියා සිතන්න එපා. සාතන් යෝබ් ගැන කිව්වෙත් ඒ ටිකමයි. (යෝබ් 1:9-11) අපි නිතරම සහෝදරයන්ගේ චේතනා ගැන සැක කරනවාද? එසේ කරන්නේ සාධාරණ හේතුවක් ඇතුවද? එසේ නැත්නම් සමාජයේ පැතිර පවතින ආකල්ප අපිටත් බෝ වී තිබෙන නිසාද?—2 තිමෝ. 3:1-4.

6, 7. (අ) අපි අනිත් අයව විවේචනය කරන්න පෙලඹෙන හේතු මොනවාද? (ආ) කෙනෙක් අපිට නින්දා කළොත් අපි කරන්න ඕනෙ මොකක්ද?

⁶ අපි නිතරම අන් අයව විවේචනය කරන්න පෙලඹෙනවා නම් ඊට හේතු මොනවාද කියා බලමු. එසේ කරන්නේ තමන් අහවලාට වඩා හොඳයි කියා හෝ උසස් කියා හෝ පෙන්වන්න කැමති නිසා විය හැකියි. එසේත් නැත්නම් තමන් කළ යුතු දෙයක් නොකර වෙනත් අය ඒ දේ හොඳින් කරනකොට ඇති වන ඊර්ෂ්‍යාව නිසාත් විය හැකියි. ඒ අනුව බලද්දී උඩඟුකම, ඊර්ෂ්‍යාව හෝ අපිවම අවතක්සේරු කරගැනීම අපිටත් අන් අයටත් හානිකරයි.

⁷ සමහරවිට කෙනෙක් අපි ගැන යම් වැරදි දෙයක් කියා අපිව රිද්දවා තිබෙනවා නම් ඒ පුද්ගලයාව විවේචනය කරන්නත් අපි පෙලඹෙන්න ඉඩ තිබෙනවා. නමුත් එකට එක කිරීමෙන් සිදු වෙන්නේ තත්වය වඩාත් නරක අතට හැරෙන එක විතරයි. අපි එසේ කරනවාට දෙවි කැමති නැහැ. නමුත් සාතන්ට ඕනෑ කරන්නේ අපි ලවා ඒ වගේ දෙයක් කරවන්නයි. (2 තිමෝ. 2:26) කෙනෙක් අපිට නින්දා කර තිබෙනවා නම් යේසුස්ව ආදර්ශයට ගනිමු. ‘ඔහුට නින්දා කළ විට ඔහු නින්දා කළේ නැහැ. ඒ වෙනුවට ධර්මිෂ්ඨකමින් විනිශ්චය කරන තැනැත්තාණන්ට ඔහු තම ජීවිතය භාර දුන්නා.’ (1 පේතෘ. 2:21-23) යෙහෝවා දෙවි සුදුසු වෙලාවේදී සුදුසු විදිහට ඒ කාරණය හසුරුවයි කියා යේසුස් විශ්වාස කළා. එවැනිම විශ්වාසයක් අපිත් තබාගනිමු. අපි අනිත් අයව දිරිගන්වන දේවල් කතා කරන්න දිව පාවිච්චි කරනවා නම් අපේ සභාවේ “එක්සත්කම රැකගැනීමටත් සමාදානයෙන් ජීවත් වීමටත්” එය දායක වෙනවා.—එෆීස 4:1-3 කියවන්න.

මිනිසුන්ට භය වීම

8, 9. පිලාත් යේසුස්ව මරන්න ඉඩ දුන්නේ ඇයි?

⁸ සාමාන්‍යයෙන් සතෙක් උගුලකට හසු වුණාම ඌ කොටු වෙනවා. ඌට ඉන් ගැලවීමක් නැහැ. මිනිසුන්ට තිබෙන භයත් උගුලකට සමානයි. කෙනෙක් ඒ උගුලට හසු වුණොත් ඔහුගේ ජීවිතය පාලනය වෙන්නේ වෙනත් අයට වුවමනා විදිහටයි. (හිතෝපදේශ 29:25 කියවන්න.) මේ උගුලට හසු වූ දෙදෙනෙක් ගැන සාකච්ඡා කර ඉන් අපිට ඉගෙනගන්න පුළුවන් පාඩම් කිහිපයක් ගැන බලමු.

⁹ ඉන් එක්කෙනෙක් රෝම ආණ්ඩුකාරයා වූ පිලාත්. යේසුස් ‘මරණ දඬුවම ලබන්න තරම් කිසි වරදක් කර නැති’ බව දැන සිටි පිලාත් යේසුස්ව මරන්න කැමති වුණේ නැහැ. ඒත් ඔහු ඊට ඉඩ දුන්නා. ඒ ඇයි? මිනිසුන්ට තිබූ භය නිසයි. (ලූක් 23:15, 21-25) “ඔබ මේ මිනිසාව නිදහස් කර හැරියොත් ඔබ සීසර්ගේ මිත්‍රයෙක් වන්නේ නැහැ” කියා කෑගසමින් තමන් කැමති දේ පිලාත් ලවා කරවාගැනීමට සෙනඟ උත්සාහ කළා. (යොහ. 19:12) යේසුස්ව බේරාගත්තොත් තමන්ගේ තනතුරු නැති වෙයි කියා හෝ තමාව මරා දමයි කියා හෝ පිලාත් භය වෙන්න ඇති. ඒ පීඩනයට හසු වී ඔහු සාතන්ගේ කැමැත්තට ඉඩහැරියා.

10. යේසුස්ව හඳුනන්නේ නැහැ කියා පේතෘස් කිව්වේ ඇයි?

¹⁰ අනික් කෙනා යේසුස්ගේ කිට්ටුම මිතුරෙක් වූ පේතෘස්. යේසුස් ගැලවුම්කරු බව ප්‍රසිද්ධියේ කියන්න ඔහු භය වුණේ නැහැ. (මතෙ. 16:16) එක් අවස්ථාවක, යේසුස් කියපු දෙයක් වරදවා වටහාගෙන ගෝලයන් හුඟදෙනෙක් යේසුස්ව අත්හැර ගියත් පේතෘස් එහෙම කළේ නැහැ. (යොහ. 6:66-69) සතුරන් යේසුස්ව අත් අඩංගුවට ගන්න ආ වෙලාවේ ඔහුව ආරක්ෂා කරන්න පේතෘස් කඩුවක් පාවිච්චි කළා. (යොහ. 18:10, 11) නමුත් පසුව ඔහු මිනිසුන්ට භය වී යේසුස්ව හඳුනන්නේ නැහැ කියා කිව්වා. මොහොතකට හරි පේතෘස් ඒ උගුලට හසු වුණා. ඒ නිසා ඔහු තුළ තිබූ ධෛර්යය නැති වී යේසුස්ට පක්ෂපාත වීමට ඔහු අසමත් වුණා.—මතෙ 26:74, 75.

11. අපිට මුහුණ දෙන්න සිදු වන්නේ මොන වගේ පීඩනවලටද?

¹¹ ක්‍රිස්තියානීන් වන අපිට දෙවි අකමැති දේවල් කරන්න පීඩනයක් එල්ල විය හැකියි. උදාහරණයකට රැකියා ස්ථානයේදී වංක වීමට හා අනාචාරයේ යෙදීමට පීඩනයක් එල්ල විය හැකියි. පාසැල් යන දරුවන්ට විභාගවලදී කොපි කරන්න, කාමුක දර්ශන බලන්න, මත්පැන් හෝ මත්ද්‍රව්‍ය භාවිත කරන්න හෝ නොහොබිනා ලෙස හැසිරෙන්න පීඩනයක් එන්න පුළුවන්. මිනිසුන්ට භය වීමේ පීඩනයට යටත් නොවී සිටින්න නම් අපි මොනවාද කරන්න ඕනේ?

12. පිලාත්ගෙන් හා පේතෘස්ගෙන් ඉගෙනගන්න පුළුවන් පාඩම් මොනවාද?

¹² පිලාත් හා පේතෘස් ක්‍රියා කළ ආකාරයෙන් අපිට ඉගෙනගන්න පුළුවන් පාඩම් මොනවාද? පිලාත්ට යේසුස් ගැන එතරම් අවබෝධයක් තිබුණේ නැහැ. නමුත් යේසුස් සාමාන්‍ය මිනිසුන්ට වඩා ගොඩක් වෙනස් කෙනෙක් බවත් ඔහු අත කිසි වරදක් නැති බවත් පිලාත් දැන සිටියා. ඒ වගේම පිලාත් දෙවිට ප්‍රේම නොකළ උඩඟු කෙනෙක්. ඔහු සිතුවේ තමාගේ තනතුරු ගැන විතරයි. ඒ නිසා පහසුවෙන්ම සාතන් ඔහුව හසු කරගත්තා. අනික් අතට පේතෘස්ට නිවැරදි දැනුමක් තිබුණු අතර ඔහු දෙවිටත් ප්‍රේම කළා. නමුත් සමහර අවස්ථාවල ඔහු තමන් ගැන ඕනෑවට වඩා සිතුවා. ඒ නිසා ඔහු අනිත් අයගේ බලපෑම්වලට හසු වුණා. යේසුස්ව අත් අඩංගුවට ගන්න කලින් පේතෘස් මෙසේ පුරසාරම් දෙඩුවා. “අන් සියලුදෙනාම ඔබව අත්හැර ගියත් මම නම් කවදාවත් ඔබව අත්හරින්නේ නැහැ.” (මාක් 14:29) නමුත් ඔහුට ගීතිකාකරුගේ ආකල්පය තිබුණා නම් කොතරම් හොඳද! ගීතිකාකරු කිව්වේ මෙහෙමයි. “යෙහෝවා දෙවි මාගේ පැත්තේ සිටින බැවින් මම බිය නොවන්නෙමි. දූවිලි වැනි මිනිසාට මට විරුද්ධව කළ හැක්කේ කුමක්ද?” (ගීතා. 118:6) යේසුස් තම අන්තිම රාත්‍රියේදී පේතෘස් සහ තවත් ගෝලයන් දෙදෙනෙක් සමඟ ගෙත්සෙමන උයනට ගොස් ඔවුන්ට අවදිව සිටින්න කියා පැවසුවත් ඔවුන්ට නින්ද ගියා. යේසුස් ඔවුන්ව අවදි කරමින් මෙහෙම කිව්වා. “යම් වරදක් කිරීමට පෙලඹීමක් ඇති නොවීම සඳහා අවදිව සිට යාච්ඤා කරන්න. නමුත් ඒ දේ කරන්න සිත කොතරම් කැමති වුණත් මිනිසුන්ගේ දුර්වලකම එයට ඉඩ දෙන්නේ නැහැ.” (මාක් 14:38) නැවතත් පේතෘස් නිදාගත්තා. අවදි වී සෝදිසියෙන් සිටිය යුතු අවස්ථාවක එසේ නොකළ නිසා අවසානයේදී පේතෘස් සාතන්ගේ උගුලට හසු වුණා.

13. වැරදි දෙයක් කරන්න ඇති වන පීඩනයෙන් ජය ගන්න අපිට පුළුවන් කොහොමද?

¹³ ඔවුන් දෙදෙනා සම්බන්ධ සිද්ධියෙන් තවත් වැදගත් දෙයක් ඉගෙනගන්න පුළුවන්. මිනිසුන්ගෙන් එල්ල වන බලපෑම්වලට හසු නොවී සිටින්න නම් අපිට නිවැරදි දැනුම, යටහත්පහත්කම, දෙවි කෙරෙහි ප්‍රේමය හා දේවගරුබිය තිබිය යුතු අතර අපි ගැන ඕනෑවට වඩා සිතීමෙනුත් වැළකී සිටිය යුතුයි. නිවැරදි දැනුම මත පදනම් විශ්වාසයක් තිබෙනවා නම් දෙවි ගැන කතා කරන්න අපි භය වෙන්නේ නැහැ. මිනිසුන්ගේ බලපෑම්වලට යටත් නොවී සිටීමට එය අපිට උපකාරවත් වෙනවා. ඒක තමන්ගේම ශක්තියෙන් කරන්න පුළුවන් දෙයක් කියා සිතන්න එපා. ඒ සඳහා යටහත්පහත් ලෙස දෙවිගේ බලය ඉල්ලන්න. දෙවි සඳහා ප්‍රේමයත් ඔහුගේ බලයේ උපකාරයත් තිබෙන විට දෙවිගේ උසස් ප්‍රමිති රකින්න පහසුයි. ඊට අමතරව මිනිසුන්ගෙන් බලපෑමක් එල්ල විය හැක්කේ මොන වගේ අවස්ථාවලද කියාත් කල් ඇතුව සිතන්න. ප්‍රශ්නයක් ඇති වෙන්න කලින් ඊට මුහුණ දෙන ආකාරය ගැනත් සිතා බලන්න. දරුවන්වත් එසේ පුහුණු කර තිබෙනවා නම් මිනිසුන්ට භය නොවී සිටින්න ඔවුන්ටත් හැකි වෙයි.—2 කොරි. 13:7.a

කළ වරදක් ගැන පමණට වඩා දුක් වීම

14. අපි කළ වරදක් ගැන අපි කොහොම හිතනවාටද සාතන් කැමති?

¹⁴ තවත් ආකාරයක උගුලක් වන්නේ විශාල ගලක් හෝ කොටයක් සතා යන අඩි පාරට ඉහළින් ඇටවීමයි. මේ කිසිවක් නොදත් සතා අඩි පාරේ යද්දී උගේ කකුල උගුලට සම්බන්ධ කළ නූලක් වැනි දෙයක වැදුණු ගමන්ම ඒ ගල හෝ කොටය වේගයෙන් පහළට ඇවිත් සතා මත පතිත වෙයි. තමන් අතින් සිදු වූ වරදක් නිසා ඕනෑවට වඩා සිතමින් දුක් වීම හිතට විශාල බරක් වෙයි. (ගීතාවලිය 38:3-5, 8 කියවන්න.) දෙවිගේ සමාව හා දයාව ලැබීමට අපි වටින්නේ නැහැ කියා සිතනවාටත් අපිට කවදාවත් දෙවි කැමති විදිහට ජීවත් වෙන්න බැහැ කියා අපි සිතනවාටත් සාතන් කැමතියි.

15, 16. කළ වරදක් ගැන පමණට වඩා දුක් වීම යන උගුලෙන් ගොඩ එන්නේ කොහොමද?

¹⁵ ඔබ බරපතළ වරදක් කර තිබෙනවා නම් දෙවි සමඟ මිත්‍රත්වය යළි ගොඩනඟාගන්න උත්සාහ කරන්න. වැඩිමහල්ලන්ගේ උපකාරය පතන්න. (යාකො. 5:14-16) වරද නිවැරදි කරගැනීමට අවංක උනන්දුවක් දක්වන්න. (2 කොරි. 7:11) ඔබ දියුණු විය යුතු පැති ඔබම දකිනවා නම් නැතහොත් ඔබට හික්මවීම් ලැබී තිබෙනවා නම් කලකිරෙන්න එපා. (හෙබ්‍රෙ. 12:6) වරදට හේතු වූ දේවල් නැවත නොකිරීමට අදිටන් කරගන්න. වරද ගැන පසුතැවිලි වී එය සම්පූර්ණයෙන්ම අත්හැරියාම යේසුස්ගේ ජීවිත පූජාව පදනම් කරගෙන දෙවි ඔබට සමාව දෙන බවට නිසැක වන්න.—1 යොහ. 4:9, 14.

¹⁶ සමහර අය වරදකට සමාව ලැබුවත් කළ වරද ගැන තවමත් ඕනෑවට වඩා දුක් වෙනවා. ඔබටත් එසේ හැඟෙනවා නම් පේතෘස් ඇතුළු අනිත් ගෝලයන් ගැන සිතන්න. යේසුස්ට අත්‍යවශ්‍යම වෙලාවේදී ඔවුන් ඔහුව අත්හැර ගියත් දෙවි ඔවුන්ට සමාව දුන්නා. තවත් අවස්ථාවකදී භයක් සැකක් නැතුව අනාචාරයේ යෙදීම නිසා සභා සාමාජිකත්වයෙන් ඉවත් කළ කෙනෙකු පවා පසුතැවිලි වුණාට පසුව යෙහෝවා දෙවි ඔහුට සමාව දුන්නා. (1 කොරි. 5:1-5; 2 කොරි. 2:6-8) බරපතළ වැරදි කළ බොහෝදෙනෙකු පසුතැවිලි වූ විට දෙවි සමාව දුන් අවස්ථා ගැන බයිබලයේ සඳහන් වෙනවා.—2 ලේක. 33:2, 10-13; 1 කොරි. 6:9-11.

17. යේසුස්ගේ ජීවිත පූජාව කෙරෙහි විශ්වාසය තැබීමෙන් ලැබෙන ප්‍රයෝජන මොනවාද?

¹⁷ ඔබ පසුතැවිලි වෙනවා නම්, දෙවි ඔබට දයාව පෙන්වනවා කියා විශ්වාස කරනවා නම් දෙවි ඔබේ වැරදිවලට සමාව දී ඒවා අමතක කරනවා. නමුත් දෙවි කවදාවත් මට සමාව දෙන්නේ නැහැ කියා ඔබ සිතනවා නම් ඉන් අදහස් කරන්නේ ඔබේ වැරදිවලට සමාව දෙන්න තරම් යේසුස්ගේ ජීවිත පූජාව ප්‍රමාණවත් නැහැ කියා ඔබ සිතන බවයි. එසේ නම් ඔබ සාතන්ගේ උගුලට හසු වෙලා! යේසුස්ගේ ජීවිත පූජාවෙන් ප්‍රයෝජන ලැබෙන්නේ අප බරපතළ වරදක් කළත් ඉන් ගොඩ එන්න වෑයම් කරනවා නම් පමණයි. (හිතෝ. 24:16) අපි යේසුස්ගේ ජීවිත පූජාව කෙරෙහි විශ්වාස කරනවා නම් කළ වැරදි ගැන පමණට වඩා දුක් වීමෙන් වළකින අතර ජීවිතයම දෙවිට කැප කර මුළු හදවතින්ම දෙවිට සේවය කරන්න අපි පෙලඹෙනවා.—මතෙ. 22:37.

සාතන්ගේ කපටිකම් ගැන දැනුවත් වෙමු

18. සාතන්ගේ උගුල්වලින් වළකින්නේ කොහොමද?

¹⁸ සාතන් බලන්නේ මොකක් හරි උගුලක් අටවා අපව හසු කරගන්නයි. ඔහුට වුවමනා වෙන්නේ ඔහු කැමති දේ අපි ලවා කරවගන්නයි. ඔහුගේ කපටි උගුල් ගැන අපි හොඳින් දන්නා නිසා ඒවායින් වළකින්න අපිට පුළුවන්. (2 කොරි. 2:10, 11) සාතන් අපිට එල්ල කරන පීඩන දරාගන්න ප්‍රඥාව ඉල්ලා යාච්ඤා කරනවා නම් ඔහුගේ උගුල්වලින් බේරෙන්න අපිට පුළුවන්. යාකොබ් කිව්වේ මෙහෙමයි. “තමාට ප්‍රඥාව අඩුයි කියා යමෙකුට හැඟෙනවා නම් එය ඔහුට නොකඩවා දෙවිගෙන් ඉල්ලිය හැකියි. ඔහුගේ ඉල්ලීමට අනිවාර්යයෙන්ම පිළිතුරක් ලැබෙයි. මන්ද දෙවි අදිමදි නොකර සියල්ලන්ට ප්‍රඥාව ත්‍යාගශීලීව ලබා දෙයි.” (යාකො. 1:5) ඒ යාච්ඤාවට එකඟව පෞද්ගලිකව බයිබලය පාඩම් කරන්නත් අවශ්‍යයි. ඒ මාර්ගයෙන් දෙවි ප්‍රඥාව දෙනවා. දාසයා පළ කරන ප්‍රකාශන මගින් අපිට පුළුවන් සාතන් අටවන උගුල් හඳුනාගෙන ඒවායින් බේරෙන්න.

19, 20. නපුරට ද්වේෂ කිරීම එතරම් අවශ්‍ය ඇයි?

¹⁹ අපි නොකඩවා බයිබලය අධ්‍යයනය කරනවා නම් හා යාච්ඤා කරනවා නම් හරි දේ කරන්න අපි තුළ ලොකු ආශාවක් ඇති වෙනවා. ඒත් එක්කම නපුරු දෙයට ද්වේෂ කරන්නත් අපි පුරුදු වෙන්න ඕනෙ. (ගීතා. 97:10) අපේ පව්කාර ආශාවන්ට ඉඩ දීමෙන් ඇති වන ඵල විපාක ගැන සිතනවා නම් නපුරු දේවලින් වළකින්න එය උපකාරයක් වෙයි. (යාකො. 1:14, 15) ඒ වගේම නපුරු දේවලට අපි ද්වේෂ කරනවා නම් නපුරු දේවල් ඇමක් විදිහට යොදාගන්න සාතන්ට බැහැ.

²⁰ සාතන්ගේ උගුල්වලට හසු නොවීම සඳහා දෙවි උපකාර කිරීම ගැන අපි ඔහුට ස්තුතිවන්ත වෙමු. ‘දුෂ්ටයාගෙන් අපව ගලවාගැනීමට’ දෙවි ඔහුගේ බලය, වචනය හා සංවිධානය යොදාගන්නවා. (මතෙ. 6:13) ඊළඟ ලිපියෙන් සාතන් අටවන තවත් උගුල් දෙකක් ගැන සාකච්ඡා කරමු.

ස්ථිරව සිට සාතන්ගේ උගුල්වලට නොවැටෙමු

‘යක්ෂයාගේ උපායන්වලට විරුද්ධව නොසැලී ස්ථිරව සිටින්න.’—එෆී. 6:11.

ඔබ පිළිතුරු දෙන්නේ කොහොමද?

ධන සම්පත් පසුපස යෑමේ උගුලට හසු නොවීමට දෙවිගේ සේවකයෙකුට පුළුවන් කොහොමද?

අනාචාරයෙන් වැළකී සිටීම සඳහා විවාහක ක්‍රිස්තියානියෙකුට උපකාර වෙන්නේ මොනවාද?

ධන සම්පත් පසුපස යෑමෙන් හා අනාචාරයෙන් වැළකී සිටීමට ස්ථිර අධිෂ්ඨානයක් ගැනීම ප්‍රයෝජනවත් කියා ඔබ සිතන්නේ ඇයි?

1, 2. (අ) අභිෂේක ලත් අයට හා වෙනත් බැටළුවන්ට සාතන් වෛර කරන්නේ ඇයි? (ආ) මෙම ලිපියෙන් සාකච්ඡා කරන්නේ සාතන්ගේ මොන උගුල් දෙක ගැනද?

සාතන් මුළු මිනිස් වර්ගයාගේම සතුරා වුණත් ඔහු විශේෂයෙන්ම වෛර කරන්නේ දෙවිට සේවය කරන අයටයි. අභිෂේක ලත් අය, මේ ලෝකයේ පාලකයා සාතන් බව හෙළි කරන නිසාත් ලොව පුරා කෙරෙන දේශනා සේවයේ පෙරමුණ ගන්න නිසාත් සාතන් සිටින්නේ ඔවුන් සමඟ මහත් වෛරයකින්. (එළි. 12:17) ඒ වගේම අභිෂේක ලත් අයට පූර්ණ සහයෝගය දක්වන “වෙනත් බැටළුවන්” සමඟත් ඔහුට තිබෙන්නේ පුදුම තරහක්. (යොහ. 10:16) සාතන්ට සදාකල් ජීවත් වීමේ බලාපොරොත්තුව නැති නිසා ඔහු සිටින්නේ මහත් කෝපයකින්. ඔහුගේ එකම අරමුණ වන්නේ සදාකල් ජීවත් වීමේ බලාපොරොත්තුව තිබෙන අයව ගොදුරු කරගන්නයි.—1 පේතෘ. 5:8.

² ඒ සඳහා ඔහු විවිධ උගුල් අටවනවා. ඔහු උත්සාහ කරන්නේ මිනිසුන්ගේ මනස් අන්ධ කරන්නයි. එවිට ඔවුන්ට ශුභාරංචිය වටහාගන්න බැරි වන අතර සාතන් අටවන උගුල් හඳුනාගන්නත් බැරි වෙනවා. (2 කොරි. 4:3, 4) කලින් ලිපියේ සාතන් අටවන උගුල් තුනක් ගැන කතා කළා. ඒවා නම් (1) දිව පාලනය කර නොගැනීම, (2) මිනිසුන්ට තිබෙන භය සහ (3) කළ වරදක් ගැන පමණට වඩා දුක් වීමයි. දැන් අපි සාතන්ගේ තවත් උගුල් දෙකකින් බේරෙන්නේ කොහොමද කියා සාකච්ඡා කරමු. ඒ උගුල් දෙක නම් ධනය පසුපස හඹා යෑම සහ අනාචාරයයි.

ධනය පසුපස යෑම

3, 4. සමාජයේ තිබෙන දේවල් ගැන අනවශ්‍ය ලෙස කරදර වීම ධන සම්පත් පසුපස හඹා යෑමට මඟ පෑදීමක් වෙන්නේ කොහොමද?

³ යේසුස් වපුරන්නාගේ උපමාව ගැන කියද්දී කටු ගස් අතර වැටුණු බීජයක් හා සමාන පුද්ගලයා “යටපත් වී පල නොදරන” හේතුව ගැන පැවසුවේ මෙහෙමයි. “ඔහු මේ සමාජයේ තිබෙන දේවල් ගැන අනවශ්‍ය ලෙස කරදර වන නිසාත් ධනය පසුපස ගොස් එයින් මුළා වන නිසාත් ඔහුට එලෙස සිදු වෙයි.” (මතෙ. 13:22) අපිව හසු කරගැනීමට සාතන් ධනය පසුපස යෑමේ උගුල අටවනවා.

⁴ වචනය “යටපත් වී” පල නොදැරීමට කාරණා දෙකක් හේතු වෙනවා. පළමු එක වන්නේ ‘සමාජයේ තිබෙන දේවල් ගැන අනවශ්‍ය ලෙස කරදර වීමයි.’ අපි ජීවත් වන්නේ ‘ඉතා අසීරු කාලයක’ නිසා කරදර වෙන්න හේතු රැසක් තිබෙනවා. (2 තිමෝ. 3:1) බඩු මිල ඉහළ යනවා. සමහරවිට හරි හැටි රස්සාවක් නැති නිසා ජීවිතය ගැටගහගන්න ලේසි නැහැ. තවත් සමහරුන් අනාගතය ගැන සිතමින් කරදර වෙනවා. ‘මම වයසට ගියාම මට ජීවත් වෙන්න අවශ්‍ය තරම් සල්ලි තියෙයිද’ කියා සමහරවිට ඔවුන්ට සිතෙනවා ඇති. මේ වගේ දේවල් ගැන කරදර වන නිසා සමහරු සිතන්නේ ධන සම්පත් එක්රැස් කරගත්තොත් හැම ප්‍රශ්නයක්ම විසඳෙයි කියායි.

5. ධනය නිසා කෙනෙක් මුළා වෙන්නේ කොහොමද?

⁵ යේසුස් කී දෙවෙනි හේතුව වන්නේ ‘ධනය පසුපස ගොස් එයින් මුළා වීමයි.’ අපිට මුදල් අවශ්‍ය බව ඇත්තයි. ‘මුදල ආරක්ෂාවක්’ කියා බයිබලයේ පවා පවසා තිබෙනවා. (දේශ. 7:12) අවශ්‍ය දේවල් මිල දී ගැනීමට මුදල් ඕන වුණත් මුදල් සෙවීමට අපේ ජීවිතයේ මුල් තැන දීම නැණවත් දෙයක් නෙවෙයි. ධන සම්පත් රැස් කිරීමට කෙනෙක් වැඩියෙන් වෑයම් කරන විට ඉන් සිදු වන්නේ එම ආශාව තවත් වැඩි වීමයි. එම ආශාවේ ඉවරයක් නැති නිසා ඔහු ඉන් මුළා වෙයි. අවසානයේදී ඔහු පඹ ගාලක පැටලුණා හා සමාන තත්වයකට පත් වෙයි. ඒ උගුලට වැටුණු අය ධනය නමැති ස්වාමියාගේ දාසයන් බවට පත් වෙනවා.—මතෙ. 6:24.

6, 7. (අ) රැකියා ස්ථානයේදී ධනය පසුපස යෑමට ආශාවක් ඇති වෙන්න පුළුවන් කොහොමද? (ආ) අතිකාල වැඩ කරන්න භාරගැනීමට පෙර මොන වගේ පැති ගැන සිතිය යුතුද?

⁶ කෙනෙකු තුළ ධන සම්පත්වලට තිබෙන ආශාව වැඩි වෙන්නේ ටිකෙන් ටිකයි. සිදු විය හැකි මෙවැනි තත්වයක් ගැන සිතන්න. ඔබේ රැකියා ස්ථානයේ ප්‍රධානියා ඔබට මේ වගේ දෙයක් කියනවා. “අපේ කොම්පැනියට හොඳ කොන්ත්‍රාත් එකක් හම්බුණා. ඔයාටත් මාස කීපයක් ඕවටයිම් කරන්න වෙයි. හැම සතියෙම රෑ වැඩත් තියෙයි. හැබැයි ඉතින් හොඳට හම්බ කරන්න නං පුළුවන්.” එවැනි අවස්ථාවක ඔබ මොකද කරන්නේ? බැලූ බැල්මට එය වාසිදායක අවස්ථාවක්. අනික පවුලේ අයට අවශ්‍ය දේ ලබා දීම බැරෑරුම් වගකීමක් කියාත් බයිබලයේ පවසා තිබෙනවා. (1 තිමෝ. 5:8) නමුත් ඔබට තවත් වගකීම් තිබෙන බව අමතක කරන්න එපා. ඔබ සලකා බැලිය යුතු පැති ගණනාවක් තිබෙනවා. උදාහරණයකට හැමදාම රෑ වැඩ තියෙයිද? අතිකාල වැඩ නිසා රැස්වීම්වලට හා පවුලේ නමස්කාරය ඇතුළු අනිකුත් නමස්කාර කටයුතුවලට බාධාවක් වෙයිද?

⁷ ජීවිතයේ වඩාත්ම වැදගත් දෙය ලෙස ඔබ සලකන්නේ ඔබේ බැංකු ගිණුම තර කරගැනීමද නැත්නම් දෙවි සමඟ තිබෙන බැඳීම ශක්තිමත් කරගැනීමද? වැඩියෙන් මුදල් හම්බ කරන්න ඕන නිසා දෙවිට මුල් තැන දෙන එක ඔබ නතර කරයිද? ඔබ මුදලට හා ධන සම්පත්වලට මුල් තැන දුන්නොත් එය ඔබේ පවුලේ අයට බලපාන්නේ කොහොමද? පවුලක් විදිහට නමස්කාර කටයුතුවල පෙරමුණ ගන්න ඔබට කාලයක් නැති නිසා පවුලේ අය දෙවිගෙන් ඈත් වී යයිද? ඔබ සිටින්නේ එවැනි තත්වයක නම් වචනය “යටපත් වී” පල නොදරන තත්වයකට පත් වීමෙන් වළකින්නේ කොහොමද?—1 තිමෝති 6:9, 10 කියවන්න.

8. අපි ජීවත් වන ආකාරය ගැන සෝදිසි කිරීමට මොන වගේ බයිබල් චරිත ගැන සිතීම අපිට ප්‍රයෝජනවත් වෙයිද?

⁸ සාතන්ගේ උගුලට හසු වූ දෙදෙනෙක් ගැන දැන් අපි බලමු. එක්කෙනෙක් ඒසව්. ඔහු තම ක්‍රියාකලාපයෙන් පෙන්නුවේ දෙවිට මුල් තැන නොදෙන බව හා පරිශුද්ධ දේ අගය නොකරන බවයි. (උත්. 25:34; හෙබ්‍රෙ. 12:16) අනික් කෙනා ධනවත් තරුණයෙක්. ඔහුගේ ධන සම්පත් විකුණා එයින් ලැබෙන මුදල් දිලිඳුන්ට දී තමාගේ අනුගාමිකයෙක් වෙන්න කියා යේසුස් ඔහුට ආරාධනා කළත් ඔහු තම ධන සම්පත් අත්හරින්න කැමති වුණේ නැහැ. (මතෙ. 19:21, 22) ඒ නිසා එදා මෙදා තුර ජීවත් වී ඇති ශ්‍රේෂ්ඨතම මිනිසාගේ අනුගාමිකයෙක් වීමේ වරප්‍රසාදය ඔහුට අහිමි වුණා. ධන සම්පත් පසුපස හඹා යෑමේ උගුලට හසු නොවීමට නම් අපි ජීවත් වන ආකාරය ගැන නිතරම සෝදිසි කර බලන්න අවශ්‍යයි. එසේ නොකළොත් යේසුස්ගේ අනුගාමිකයෙක් වීමට ලැබී තිබෙන වරප්‍රසාදය අපිට අහිමි වෙයි.

9, 10. ධන සම්පත් ගැන සිතිය යුතු ආකාරය සම්බන්ධයෙන් බයිබලයේ තිබෙන උපදෙස් මොනවාද?

⁹ ධනය පසුපස ගොස් එයින් මුළා නොවීමට නම් යේසුස් දුන් මෙම උපදෙස අපි සිතට ගමු. “‘කන්නේ බොන්නේ මොනවාද’ කියාවත් ‘අඳින්නේ මොනවාද’ කියාවත් සිතමින් කිසිවිටක කනස්සලු නොවන්න. ජනයා මහත් උනන්දුවකින් හඹා යන්නේ ඒ දේවල් පසුපසයි. නමුත් ඒ සියල්ල ඔබට අවශ්‍ය බව ස්වර්ගයේ සිටින ඔබේ පියාණන් දන්නා බව මතක තබාගන්න.”—මතෙ. 6:31, 32; ලූක් 21:34, 35.

¹⁰ ධන සම්පත්වලින් මුළා නොවීම සඳහා ආගුර්ගේ ආදර්ශය සලකා බැලීමත් වටිනවා. ඔහු මෙසේ යාච්ඤා කළා. “මට දුප්පත් වීමටවත් පොහොසත් වීමටවත් ඉඩ නොදී, එදිනෙදා අවශ්‍ය ආහාර පාන විතරක් ලබා දෙන්න.” (හිතෝ. 30:8) අත්‍යවශ්‍ය දේවල් ගන්න මුදල් ඕන වුණත් ධන සම්පත් පසුපස හඹා යෑම උගුලක් බව ආගුර් වටහාගත්තා. සමාජයේ තිබෙන දේවල් ගැන අනවශ්‍ය ලෙස කරදර වීමත් මුළා කරවන ධනය පසුපස හඹා යෑමත් දෙවිගෙන් අපිව ඈත් කිරීමට හේතු වන බව අපිත් වටහාගත යුතුයි. ධන සම්පත් රැස් කිරීමට වැඩිපුර කාලයක් වැය කරනවා නම් දෙවිට සේවය කිරීමට අපිට කාලයවත් ශ්‍රමයවත් ආශාවවත් ඉතුරු වෙන්නේ නැහැ. එමනිසා අපි ස්ථිරව සිට සාතන්ගේ මේ උගුලෙන් බේරෙමු.—හෙබ්‍රෙව් 13:5 කියවන්න.

අනාචාරය ගැඹුරු වළක්

11, 12. කෙනෙක් රැකියා ස්ථානයේදී අනාචාරයට වැටෙන්න ඉඩ තිබෙන්නේ කොහොමද?

¹¹ දඩයක්කරුවන් විශාල සතුන් අල්ලාගැනීමට අටවන තවත් සාර්ථක උගුලක් වන්නේ එම සතුන් ගමන් කරන අඩි පාරේ ගැඹුරු වළක් කැපීමයි. ඉන්පසු සතාට එම වළ නොපෙනෙන ලෙස ඊට උඩින් කෝටුද ඊටත් උඩින් කොළ රොඩුද දමා සිහින් පස් තට්ටුවකින් එය වසා දමනවා. සාතනුත් ගැඹුරු වළක් හා සමාන උගුලක් අටවනවා. එය අනාචාරයයි. (හිතෝ. 22:14; 23:27) දෙවිගේ සමහර සේවකයන් සාතන්ගේ එම උගුලට වැටී තිබෙන්නේ නොසැලකිලිමත්කම නිසයි. සමහර විවාහක ක්‍රිස්තියානීන් අනියම් ප්‍රේම සම්බන්ධයන්වල පැටලී අවසානයේදී අනාචාරයේ යෙදී තිබෙනවා.

¹² බොහෝවිට එවැනි ප්‍රේම සම්බන්ධකම් ඇති වෙන්නේ රැකියා ස්ථානවලයි. වාර්තාවලට අනුව අනාචාරයේ යෙදෙන ස්ත්‍රීන්ගෙන් අඩකට වඩා හා අනාචාරයේ යෙදෙන පුරුෂයන්ගෙන් වැඩි පිරිසක් එසේ යෙදෙන්නේ රැකියා ස්ථානයේ එකට වැඩ කරන අය සමඟයි. ඔබටත් නිතරම විරුද්ධ ලිංගයේ අය සමඟ කිට්ටුවෙන් වැඩ කරන්න සිදු වෙනවාද? එසේනම් ඔවුන් සමඟ ඔබට තිබෙන ආශ්‍රය මොන වගේ එකක්ද? නුසුදුසු බැඳීමක් ඇති නොවීම සඳහා ඔබ එම ආශ්‍රයට සීමා දමාගෙන තිබෙනවාද? රැකියා ස්ථානයේදී සිදු විය හැකි මේ වගේ තත්වයක් ගැන හිතන්න. සහෝදරියක් තමන් සමඟ එකට වැඩ කරන පුරුෂයෙකුට ඕනෑවට වඩා ළං වෙනවා. ඇය ඔහු සමඟ කොතරම් හිතවත් වෙනවාද කියනවා නම් ඇගේ විවාහයේ තියෙන ගැටලු පවා කියන්න පෙලඹෙනවා. සහෝදරයෙකුට වුණත් ඒ වගේ දෙයක් වෙන්න පුළුවන්. තමන් සමඟ එකට වැඩ කරන කාන්තාවකට ඕනෑවට වඩා ළං වීමේ ප්‍රතිඵලයක් හැටියට ඔහුට ඇය ගැන මෙහෙම හිතෙන්න ඉඩ තිබෙනවා. “එයත් එක්ක කතා කරන්න හරිම ලේසියි. මං කියන දේ අහනවා. මාව තේරුම්ගන්නවා. මට ගරු කරනවා. අපේ එක්කෙනත් මේ වගේ නං!” ඒ දෙදෙනා සිටින්නේ ගැඹුරු වළට වැටෙන්න ඔන්න මෙන්න කියා ඔබට පේනවාද?

13. සභාව තුළ අනියම් ප්‍රේම සම්බන්ධකම් ඇති විය හැක්කේ කොහොමද?

¹³ සභාව තුළත් අනියම් ප්‍රේම සම්බන්ධකම් ඇති වීමට ඉඩ තිබෙනවා. සහෝදර යුවළකට වෙච්ච දෙයක් ගැන අපි දැන් බලමු. ඩැනියල් සහ සේරාa ස්ථාවර පුරෝගාමි සේවයේ යෙදුණු යුවළක්. ඩැනියල් වැඩිමහල්ලෙක් වෙලත් හිටියා. තමන්ට ලැබෙන වගකීමක් ඉටු කරන්න බැහැ කියලා ඔහු කවදාවත් කිව්වේ නැහැ. ඔහු තරුණයන් පස්දෙනෙක් සමඟ බයිබල් පාඩම් පහක් පැවැත්වූ අතර ඔවුන්ගෙන් තුන්දෙනෙක්ම බව්තීස්ම වුණා. ඔවුන්ට දිගටම උපකාර අවශ්‍ය වූ නමුත් එය ලබා දීමට තරම් කාලයක් ඩැනියල්ට තිබුණේ නැහැ. ඒ අඩුව පිරෙව්වේ සේරා. සේරාටත් සැලකිල්ල හා අවධානය අවශ්‍ය වුණා. ඒ සැලකිල්ල ඇයට ලැබුණේ ඩැනියල්ගේ බයිබල් ශිෂ්‍යයන්ගෙන්. ඒ වෙද්දී ඇය සිටියේ මාරාන්තික උගුලට ටිකෙන් ටික ළං වෙමිනුයි. සිදු වූ දේ ගැන ඩැනියල් කිව්වේ මෙහෙමයි. “ඒ ශිෂ්‍යයන්ට උදව් කරන්න සේරා කාලයක් තිස්සේ ගොඩක් මහන්සි වුණා. හැබැයි මගෙන් එයාට ලැබෙන්න ඕන ආදරෙයි සැලකිල්ලයි එයාට ලැබුණේ නැහැ. දෙවිට ළං වෙලා ඉන්න එයාට අවශ්‍ය පෝෂණය ලැබුණේ නැති හින්දා යෙහෝවා දෙවිත් එක්ක තිබුණු එයාගේ බැඳීමත් දුර්වල වෙලා තිබුණා. අන්තිමේදී සිද්ධ වුණේ මහ විනාසයක්. එයා ඒ එක තරුණයෙක් එක්ක අනාචාරයේ යෙදුණා. ඒ දේ සිද්ධ වෙනකම්ම මං වෙහෙසුණේ මගේ සේවා වරප්‍රසාද රැකගන්න මිසක් මගේ බිරිඳව රැකගන්න නෙවෙයි.”

14, 15. අනාචාරයෙන් වැළකී සිටින්න ක්‍රිස්තියානීන්ට උපකාර වෙන්නේ මොනවාද?

¹⁴ අනාචාරය කියන උගුලෙන් බේරෙන්න පුළුවන් කොහොමද? එසේ කිරීමට විවාහ පොරොන්දුවේ බැරෑරුම්කම ගැන නිතර නිතර හිතන්න ඕනෙ. යේසුස් කිව්වේ මෙහෙමයි. “දෙවි ඔවුන්ව එලෙස එක් කළ නිසා කිසි මිනිසෙක් ඔවුන්ව වෙන් නොකළ යුතුයි.” (මතෙ. 19:6) සභාවෙන් ඔබට ලැබෙන සේවා වරප්‍රසාද ඔබේ භාර්යාවට වඩා වැදගත් කියා කිසිදාක හිතන්න එපා! අත්‍යවශ්‍ය නොවන දේවලට කාලය යෙදවීමට ඔබ නිතරම නිවසෙන් පිටව සිටිනවා නම් ඔබේ භාර්යාව සමඟ ගත කරන්න තිබෙන කාලය අඩු වෙනවා. එවිට ඔබ දෙදෙනා අතර ඇති බැඳීම දුර්වල විය හැකියි. එය අනාචාරයේ යෙදීමට පෙලඹීමක් වෙන්න පුළුවන්.

¹⁵ ඔබ වැඩිමහල්ලෙක් නම් සභාව රැකබලා ගැනීමේ වගකීම ඔබට පැවරෙන බව ඇත්තයි. ඒ ගැන පේතෘස් කිව්වේ “ඔබට භාර දී ඇති දෙවිගේ රැළ රැකබලා ගන්න. කිසිවෙකුගේ බල කිරීම නිසා නොව කැමැත්තෙන්ද අයුතු ලෙස වාසි ප්‍රයෝජන ලබාගැනීමේ ආශාව නිසා නොව අවංක උනන්දුවකින්ද” එසේ කරන්න කියායි. (1 පේතෘ. 5:2) එම වගකීම නොසලකාහරින්න ඔබට බැහැ. ඒ වුණත් හොඳ වැඩිමහල්ලෙක් වෙන්න ඕනෙ නිසා බිරිඳව නොසලකා හරින්න එපා. රැළ පෝෂණය කරන්න වෙහෙසුණත් බිරිඳට අවශ්‍ය පෝෂණය ලබා දෙන්නේ නැත්නම් එයින් පලක් වෙන්නේ නැහැ. කලින් සඳහන් කළ ඩැනියල් මෙහෙම දෙයක් කිව්වා. “පවුලේ අයට දෙන්න ඕන අවධානය දෙන්න බැරි වන තරමට සභාවේ වගකීම් භාරගන්න එපා.”

16, 17. (අ) අනියම් සම්බන්ධයක් ඇති කරගන්න කැමති නැති බව පෙන්වන්න ක්‍රිස්තියානියෙකුට පුළුවන් කොහොමද? (ආ) මෙම උගුලට නොවැටී සිටීම සඳහා සඟරාවල පළ වී තිබෙන්නේ මොන වගේ උපදෙස්ද?

¹⁶ ක්‍රිස්තියානි යුවළයන්ට මෙම උගුලට නොවැටී සිටීම සඳහා මුරටැඹ හා පිබිදෙව් සඟරාවල හොඳ උපදෙස් පළ කර තිබෙනවා. උදාහරණයකට 2006 සැප්තැම්බර් 15 මුරටැඹ සඟරාවේ මේ වගේ දෙයක් සඳහන් කර තිබුණා. ‘රැකියා ස්ථානයේදී හෝ වෙනත් ස්ථානයකදී ප්‍රේම සම්බන්ධයක් ඇති විය හැකි තත්වයන් ගැන කල්පනාකාරී වන්න. උදාහරණයකට ඔබට විරුද්ධ ලිංගයේ කෙනෙකු සමඟ වැඩිපුර වේලාවක් වැඩ කිරීමට සිදු විය හැකියි. මෙවැනි අවස්ථාවලදී වැරදි පෙලඹීම් ඇති වෙන්න පුළුවන්. විවාහ වූ කෙනෙක් හැටියට ඔබ සෑමවිටම ඔබේ කතාබහෙන් හා හැසිරීමෙන් කිසිම කෙනෙකු සමඟ ප්‍රේම සම්බන්ධයක් ඇති කරගැනීමට කැමති නැති බව පැහැදිලිවම ඇඟවිය යුතුයි. දේවභක්තික ජීවිතයක් ගත කරන කෙනෙක් හැටියට ඔබ අන්‍යයන් තුළ වැරදි හැඟීම් ඇති වන ආකාරයට හැසිරීමෙන් හා අවිනීත ආකාරයෙන් ඇඳ පැළඳ සිටීමෙන්ද වැළකී සිටිය යුතුයි. ඔබ වැඩ කරන තැන ඔබේ ස්වාමිපුරුෂයාගේ හෝ භාර්යාවගේ හා දරුවන්ගේ ඡායාරූප තබාගන්න. ඔබේ ජීවිතයේ වඩාත් වටින්නේ කාවද කියා ඔබටත් අන් අයටත් එම ඡායාරූප මගින් මතක් කර දෙනවා. ප්‍රේම සම්බන්ධයකට තුඩු දෙන කිසිම දෙයක් නොකරන්නත් ඔබව එවැනි දෙයකට පොලඹවාගන්න යම් කෙනෙක් උත්සාහ කරනවා නම් එයට ඉඩ නොදෙන්නත් අධිෂ්ඨාන කරගන්න.’

¹⁷ වර්ෂ 2009 අප්‍රියෙල් පිබිදෙව් සඟරාවේ “විශ්වාසවන්තකමේ සැබෑ අරුත කුමක්ද” යන මාතෘකාවෙන් යුතු ලිපියේ ඔබේ පුරුෂයා හෝ භාර්යාව නොවන කෙනෙකු සමඟ ලිංගික ක්‍රියාවල යෙදෙන ආකාරය ගැන සිහින මැවීම අනාචාරයේ යෙදෙන්න මඟ පාදන බවට අනතුරු ඇඟෙව්වා. (යාකො. 1:14, 15) ඔබ විවාහ වී සිටිනවා නම් ඔබේ භාර්යාව හෝ ස්වාමිපුරුෂයා සමඟ මෙවැනි තොරතුරු ඇතුළත් ලිපි කලින් කලට සාකච්ඡා කිරීම ප්‍රයෝජනවත් වෙයි. විවාහ සැලැස්ම ඇති කළේ යෙහෝවා දෙවි නිසා එය පරිශුද්ධ දෙයක්. ඔබ දෙදෙනාම ඔබේ විවාහය ගැන කතා කරන්නත් බැඳීම ශක්තිමත් කරගන්නත් කාලය වෙන් කරනවා නම් ඔබ දෙදෙනාම පරිශුද්ධ දේවල් අගය කරන බව පෙන්වනවා.—උත්. 2:21-24.

18, 19. (අ) අනාචාරයේ යෙදීම නිසා සිදු විය හැකි හානි මොනවාද? (ආ) බිරිඳට හෝ සැමියාට විශ්වාසවන්තව සිටීමෙන් ලැබෙන ප්‍රයෝජන මොනවාද?

¹⁸ අනියම් ප්‍රේම සම්බන්ධයක් ඇති කරගැනීමට පෙලඹීමක් ඔබට ඇති වෙනවා නම් අනාචාරයෙන් සිදු වන හානිය ගැන හොඳින් කල්පනා කර බලන්න. (හිතෝ. 7:22, 23; ගලා. 6:7) අනාචාරයේ යෙදෙන කෙනෙක් දෙවිව අසතුටු කරන අතර තමාගේ බිරිඳට හෝ සැමියාට ලොකු වේදනාවක් ගෙන දෙයි. ඒ වගේම තමන්ටත් හානි කරගනියි. (මලාකි 2:13, 14 කියවන්න.) අනික් අතට සදාචාර ප්‍රමිති රකින කෙනෙකුට සදහටම ජීවත් වීමේ බලාපොරොත්තුව පමණක් නොවෙයි දැන් ජීවිතයත් ප්‍රීතියෙන් ගත කරන්න පුළුවන්. යෙහෝවා දෙවි ඉදිරියේ නිදොස් හෘදය සාක්ෂියක් පවත්වගන්නත් පුළුවන්.—හිතෝපදේශ 3:1, 2 කියවන්න.

¹⁹ ගීතිකාකරු කිව්වේ ‘දෙවිගේ නීතියට ප්‍රිය කරන අය මහත් සමාදානයක් අද්දකිනු ඇත. පය පැටලී ඔවුහු කිසිවිටක වැටෙන්නේ නැත’ කියායි. (ගීතා. 119:165) ඒ නිසා දෙවිගේ ප්‍රමිතිවලට ඇලුම්ව සිටින්න. මේ අවසාන කාලයේදී ‘අඥාන අය මෙන් නොව ඥානවන්ත අය මෙන් ජීවිතය ගත කිරීමට වගබලා ගන්න.’ (එෆී. 5:15, 16) දෙවිගේ සේවකයන්ව හසු කරගැනීමට සාතන් අද විවිධ උගුල් අටවනවා. නමුත් ඒවාට හසු නොවී දිගටම ‘ස්ථිරව සිටීමට’ යෙහෝවා දෙවි හැම අතින්ම අපිව සූදානම් කර තිබෙනවා.—එෆී. 6:11, 16.