24වන පරිච්ඡේදය

“දෙවිගේ ප්‍රේමයෙන් අප වෙන් කරන්ට” කිසිවකට නොහැක

1. ඇතැම් සත්‍ය ක්‍රිස්තියානීන් ඇතුළු බොහෝදෙනෙකුට හැඟෙන අශුභවාදී හැඟීම කුමක්ද?

යෙහෝවා දෙවි ඔබට පෞද්ගලිකව ප්‍රේම කරනවාද? ඇතැම් අය එකඟ වන්නේ යොහන් 3:16හි පවසන්නාක් මෙන්, දෙවි සමස්තයක් වශයෙන් මිනිස් සංහතියට ප්‍රේම කරන බවයි. නමුත් එක්තරා අන්දමකින් ඔවුන්ට මෙලෙසත් හැඟෙනවා.‘මට පුද්ගලයෙකු හැටියට ප්‍රේම කරන්නට නම් දෙවිට කවදාවත් බැහැ.’ සැබෑ ක්‍රිස්තියානීන්ට පවා මේ ආකාරයේ සැකයන් ඉඳහිට පහළ විය හැකියි. “දෙවියන් මට මොනම විදිහකින්වත් ප්‍රේම කරනවාය කියන එක මට විශ්වාස කරන්න හුඟක් අමාරුයි” යනුවෙන් අධෛර්යයට ලක් වූ එක් මිනිසෙක් කීවා. ඒ හා සමාන සැකයන් ඇතැම් අවස්ථාවල ඔබටත් ඇති වී තියෙනවාද?

2, 3. අප යෙහෝවාගේ ඇස් හමුවේ කිසිසේත් වටින්නේ නැත කියා හෝ ඔහුගේ ප්‍රේමය ලැබීමට නොහැකි අය බව අප විශ්වාස කරනවා දැකීමට වුවමනා වන්නේ කාටද? තවද එම අදහසට එරෙහිව සටන් කිරීමට අපට හැක්කේ කොහොමද?

² යෙහෝවා දෙවි අපට ප්‍රේම නොකරන බවත්, අපව කිසිම අන්දමකින් වටිනා අය හැටියට සලකන්නේ නැති බවත් අප ලවා විශ්වාස කරවීමටයි සාතන් නිතරම අර අඳින්නේ. ඇත්තයි, මිනිසුන් තුළ තිබෙන පුහුමාන්නය හෝ උඩඟුකම මහා ලොකු දෙයක් ලෙස සිතීමට සලස්වමින් ඔවුන්ව රැවටීමට සාතන් බොහෝ විට උත්සාහ කරනවා. (2 කොරින්ති 11:3) නමුත් ඒ වගේම, අසරණ වී ඇති අයගේ ආත්මගෞරවය පොඩි කර දැමීමෙන්ද ඔහු ලබන්නේ අපමණ සතුටක්. (යොහන් 7:47-49; 8:13, 44) එය විශේෂයෙන්ම, මේ අසීරු “අන්තිම දවස්වල” සිදු වන්නක්. වර්තමානයේ බොහෝදෙනෙක් හැදී වැඩෙන්නේ ‘ජන්ම ස්නේහය නැති’ පවුල්වලයි. තවත් අය දරදඬු, ආත්මාර්ථකාමී හෝ හිස උදුම්මාගත් මිනිසුන්ට නිතරම කොටු වෙනවා. (2 තිමෝති 3:1-5) වසර ගණනාවක් පුරා අමානුෂික සැලකිලිවලට, ජාතිවාදයට හෝ වෛරයට භාජන වී ඇති එවන් අයට, තමන් කිසිසේත්ම නොවටිනා පුද්ගලයන් කියා හෝ තමන්ට කිසිවෙකු ආදරේ නැහැ කියා හෝ හැඟෙනවා වෙන්නට පුළුවන්.

³ ඔබටත් එවන් අධෛර්යය කරවන හැඟීම් ඇති වී තිබෙනවාද? කලකිරෙන්නට එපා. අපගෙන් බොහෝදෙනෙකු තුළ අසාධාරණ ලෙස අපවම හෙළා දකින එවන් තද හැඟීම් ඉඳ හිට ඇති වන්නට පුළුවනි. නමුත් මෙය මතක තබාගන්න. දෙවිගේ වචනය පිළියෙළ කර තිබෙන්නේ “දේවල් නිවැරදි කරන්නට” සහ “තදින් කාවැදී ඇති දේවල් පෙරළා දැමීම” පිණිසයි. (2 තිමෝති 3:16; 2 කොරින්ති 10:4; NW) බයිබලය මෙසේද කියනවා. “අපේ සිත් අපට දෝෂාරෝපණය කරන විට ඔහු ඉදිරියෙහි අපේ සිත් සහතික කරගන්නෙමුව; මක්නිසාද දෙවි අපේ සිතට වඩා උතුම්ව සියලු දේම දන්න නිසාය.” (1 යොහන් 3:19, 20) යෙහෝවා අපට ප්‍රේම කරන බව අපටම ‘සහතික කරගැනීමට’ ශුද්ධ ලියවිල්ල අපට උපකාර කරන ක්‍රම හතරක් ගැන අපි සලකා බලමු.

යෙහෝවා ඔබව ඉතා අනර්ඝ කොට සලකයි

4, 5. අප යෙහෝවාගේ ඇස් හමුවේ අනර්ඝ බව යේසුස් විසින් දුන් ගේ කුරුල්ලන් පිළිබඳ උදාහරණයෙන් පෙන්වන්නේ කොහොමද?

⁴ පළමුව, බයිබලය ඍජුව උගන්වන්නේ සිය සේවකයන් සෑම කෙනෙකු තුළම තිබෙන වටිනා දෙයක් දෙවිට පෙනෙන බවයි. නිදසුනක් වශයෙන්, යේසුස් මෙසේ පැවසුවා. “ගේ කුරුල්ලන් දෙදෙනෙකු ශතයකට නොවිකුණද්ද? එහෙත් උන්ගෙන් එකෙක්වත් නුඹලාගේ පියාණන් නොදැනුවත්ව බිම වැටෙන්නේ නැත. නුඹලාගේ සියලු හිසකේ පවා ගණන් කර තිබේ. එබැවින් භය නොවෙන්න; නුඹලා බොහෝ ගේ කුරුල්ලන්ට වඩා වටින්නහුය.” (මතෙව් 10:29-31) පළමු සියවසේදී, යේසුස්ගේ එම වදන්වලට සවන් දෙමින් සිටි අයට එයින් අදහස් වූයේ කුමක්ද කියා සලකා බලන්න.

⁵ කිසිවෙකු ගේ කුරුල්ලෙකු මිලට ගන්නේ ඇයිදැයි අපට සිතෙන්නට පුළුවන්. ඇත්තෙන්ම, යේසුස් විසූ සමයේ ආහාරය සඳහා විකුණනු ලැබූ ලාභතම කුරුල්ලා ගේ කුරුල්ලායි. උන් මිලට ගන්නාට, එක් කුඩා කාසියකට ගේ කුරුල්ලන් දෙන්නෙක් ලැබුණු බව මෙහිදී සැලකිල්ලට ගන්න. නමුත් යේසුස් පසු අවස්ථාවක සඳහන් කළේ යමෙක් කාසි දෙකක් වියදම් කළා නම් ඔහුට ගේ කුරුල්ලන් හතරදෙනෙකු නොව, නමුත් පස්දෙනෙකු ලැබුණු බවයි. අමතර කුරුල්ලෙකු ලැබුණේ හරියට උගේ කිසිදු වටිනාකමක් නැති ගානටයි. සමහරවිට එවන් කුඩා කුරුල්ලෙකු මිනිසුන්ට නම් එතරම් වටින්නේ නැතුවා වෙන්නට පුළුවනි. නමුත් මැවුම්කරුවාණන් උන්ව සැලකුවේ කොහොමද? යේසුස් පැවසුවේ මෙසේයි. “උන්ගෙන් එකෙක්වත් [අමතරව ලැබූ එකා පවා] දෙවි ඉදිරියෙහි මතක නැති නොවන්නේය.” (ලූක් 12:6, 7) යේසුස් කාවද්දන්නට හැදූ කාරණය දැන් ඔබට පැහැදිලි වනවා ඇති. යෙහෝවා එක් ගේ කුරුල්ලෙකුව එතරම් වටිනා ලෙස සැලකුවා නම්, ඔහුට මිනිසෙකුව ඊට වඩා කොතරම් වටිනවාද! යේසුස් පැහැදිලි කළාක් මෙන්, යෙහෝවා අප ගැන සෑම තොරතුරක්ම දන්නවා. ඒ විතරක් නෙවෙයි, අපගේ හිසේ සෑම හිසකෙස් ගසක්ම පවා ගණන් කර තියෙනවා!

6. අපගේ සියලු හිසකෙස් ගණන් කර තිබේය කියා යේසුස් පවසද්දී, ඔහු යථාර්ථයට පටහැනි දෙයක් නොකිවූ බවට අපට සහතික විය හැක්කේ ඇයි?

⁶ අපේ හිසකෙස් ගණන් කරලා? මෙහිදී යේසුස් යථාර්ථයට පටහැනි යමක් පැවසුවා කියා ඇතමෙකුට හිතෙන්න පිළිවන්. එහෙත්, නැවත නැඟිටීමේ බලාපොරොත්තුව ගැන සිතා බලන්න. අපට යළිත් ජීවිතය දීම සඳහා යෙහෝවා අප ගැන කොතරම් කිට්ටුවෙන් දැනගත යුතුද! ඔහු අපව කොතරම් අනර්ඝ ලෙස සලකනවාද කියතොත්, ඔහු අප ගැන සෑම තොරතුරක්ම මතකයේ තබාගෙන සිටිනවා. අපගේ ජාන සැකැස්ම මෙන්ම වසර ගණනාවක් පුරා අප ලැබූ අද්දැකීම් හා අපගේ මතකයන්ද ඔහුගේ මතකයේ තිබෙනවා.a ඒ හා සසඳන කොට, සාමාන්‍ය මිනිසෙකුගේ හිසේ තිබෙන 1,00,000ක් පමණ වූ හිසකෙස් ගණන් කිරීම ඔහුට එතරම් දෙයක් නම් නොවෙයි.

යෙහෝවා අප තුළ දකින්නේ කුමක්ද?

7, 8. (අ) යෙහෝවා මිනිසුන්ගේ හදවත් සෝදිසි කරන විට ඔහු ඉතා සතුටට පත් වන්නේ ඔවුන් තුළ කිනම් ගුණාංග දකින විටද? (ආ) යෙහෝවා විසින් අගය කරනු ලබන්නාවූ අප කරන ක්‍රියාවන් සමහරක් කවරේද?

⁷ දෙවනුව, යෙහෝවා සිය සේවකයන්ව අගය කරන බව බයිබලය අපට උගන්වනවා. සරලව කියතොත්, අපගේ හොඳ ගුණාංග ගැනත් අප දරන සියලු වෑයම් ගැනත් ඔහු ඉමහත් සේ සතුටු වෙනවා. දාවිත් රජ සිය පුත්‍ර සාලමොන්ට පැවසුවේ මෙහෙමයි. “යෙහෝවා සියලු සිත් විමසා කල්පනාවල සියලු අදහස් තේරුම්ගන්නේය.” (1 ලේකම් 28:9) මේ සාපරාධී වෛරයෙන් පිරුණු ලෝකයේ බිලියන ගණනක මිනිස් හදවත් සිසාරා යමින් දෙවි ඒවා පරීක්ෂා කරන විට, සාමයට, සත්‍යයට හා ධර්මිෂ්ඨකමට ප්‍රේම කරන හදවතක් ඔහුට හමු වෙද්දී ඔහු කොතරම් සතුටු වෙනවා ඇද්ද! තමන් කෙරෙහි ප්‍රේමය උතුරා යන හදවතක් දුටු විට, තමන් ගැන ඉගෙනගැනීමට සොයමින් සිටින මෙන්ම වෙනත් අය සමඟ එම දැනුම බෙදාගැනීමට කැමැත්තෙන් සිටින හදවතක් ඔහුට හමු වූ විට සිදු වෙන්නේ කුමක්ද? තමන් ගැන අන් අයට පවසන අයව ඔහු සැලකිල්ලට ගන්නා බව යෙහෝවා අපට කියනවා. ඒ වගේම, “යෙහෝවා කෙරෙහි භය ඇත්තාවූ, ඔහුගේ නාමය සැලකුවාවූ අය ගැන . . . සිහිවීමේ පොතක්” පවා ඔහුට තියෙනවා. (මලාකී 3:16) එවන් ගුණාංග ඔහුට ඉතා අනර්ඝයි.

⁸ යෙහෝවා අනර්ඝ කොට සලකන ඇතැම් යහපත් ක්‍රියා මොනවාද? සිය පුත්‍රයා වන යේසුස් ක්‍රිස්තුස්ව අනුකරණය කිරීමට අප විසින් දරන වෑයම මීට අයත් වන බව සහතිකයි. (1 පේතෘස් 2:21) දෙවි විසින් අගය කරනු ලබන එක් අතිවැදගත් කාර්යයක් නම් ඔහුගේ රාජ්‍යය පිළිබඳ ශුභාරංචිය දේශනා කිරීමයි. රෝම 10:15හි අපට කියවීමට තිබෙන්නේ මෙයයි. “යහපත් දේ ගැන ශුභ ආරංචිය ගෙනෙන්නාවූ තැනැත්තන්ගේ පාද කොපමණ අලංකාරද!” සාමාන්‍යයෙන් අප අපගේ පාද “අලංකාර” යයි කල්පනා කරන්නේ නැහැ. නමුත් මෙහිදී ඒවායෙන් සංකේතවත් වන්නේ යෙහෝවාගේ සේවකයන් ශුභාරංචිය දේශනා කිරීමට දරන වෑයමයි. එවන් ප්‍රයත්නයන් අලංකාරයි; ඔහුගේ ඇස් හමුවේ අනර්ඝයි.—මතෙව් 24:14; 28:19, 20.

9, 10. (අ) විවිධ අසීරුතා හමුවේ අපේ විඳදරාගැනීම යෙහෝවා බොහෝ සෙයින් අගය කරන බවට අපට සහතික විය හැක්කේ ඇයි? (ආ) යෙහෝවා කිසිවිටෙකත් නොදරන්නේ සිය විශ්වාසවන්ත සේවකයන් තුළ ඇති කිනම් අශුභවාදී දෘෂ්ටීන්ද?

⁹ යෙහෝවා අපගේ විඳදරාගැනීමද අගය කරනවා. (මතෙව් 24:13) සාතන්ට වුවමනා වන්නේ ඔබ විසින් යෙහෝවාට පිටුපෑම බව මතක තබාගන්න. ඔබ යෙහෝවාට පක්ෂපාතව සිටින සෑම දවසකදීම සාතන් කර තිබෙන නින්දාවට පිළිතුරක් දීම සඳහා ඔබ යම් දෙයක් කර තිබෙනවා. (හිතෝපදේශ 27:11) ඇතැම් අවස්ථාවලදී, විඳදරාගැනීම ලෙහෙසි පහසු කාරණයක් නොවෙයි. සෞඛ්‍ය ගැටලු, ආර්ථික දුෂ්කරතා, චිත්තවේගීය පීඩා සහ වෙනත් බාධක වැනි දේ හේතුවෙන් ගත වන සෑම දවසක්ම පරීක්ෂාවේ දවසක් වෙයි. තවමත් ඉටු නොවුණු අපේක්ෂාවන්ද අපව අධෛර්යය කරවයි. (හිතෝපදේශ 13:12) එවන් අභියෝග හමුවේ විඳදරාගෙන සිටීම යෙහෝවාට ඊටත් වඩා වටිනවා. තමාගේ කඳුළු ‘භාජනයක’ බහාලන මෙන් දාවිත් රජ යෙහෝවාගෙන් ඉල්ලා සිටියේ එම නිසයි. “ඒවා ඔබගේ පොතෙහි ලියන ලද්දේ නොවේද” කියාත් ඔහු තවදුරටත් පැවසුවා. (ගීතාවලිය 56:8) ඔව්, අප යෙහෝවා කෙරෙහි පක්ෂපාතකම පවත්වාගනිමින් විඳදරාගන්නා විට, අප වගුරුවන සියලු කඳුළු ඔහු ගබඩා කරගෙන ඒවා මතකයේ තබාගන්නවා. එවන් කඳුළු හා දුක් වේදනා ඔහුගේ ඇස් හමුවේ අතිඅනර්ඝයි.

¹⁰ නමුත් ප්‍රශ්නය වන්නේ අපවම හෙළා දකින අපගේ හදවත, දෙවිගේ ඇස් හමුවේ අප තුළ ඇති වටිනාකම පිළිබඳ එවන් සාක්ෂි දැකගැනීමට නොදී ඊට හරස් කැපීමයි. එය නිතර නිතර අපටම මෙසේ මුමුනනවා වන්නට පිළිවන්. ‘නමුත් මට වඩා හුඟක් ආදර්ශවත් අය ඉන්නවා. යෙහෝවා මාව ඒ අය එක්ක සන්සන්දනය කරන කොට කොච්චර කනගාටු වෙනවා ඇද්ද!’ නැහැ. යෙහෝවා මිනිසුන්ව සන්සන්දනය කරන්නේ නැහැ. ඔහු රළු ලෙස හෝ දැඩි ලෙස සිතන්නේ නැහැ. (ගලාති 6:4) ඔහු අපේ හදවත් කියවන්නේ ඉතා සියුම් ලෙස ගැඹුරට දකිමිනුයි. ඇරත් ඔහු අගය කරන්නේ ටිකක් තිබුණත් අප තුළ ඇති යහපතයි.

යෙහෝවා නරකින් හොඳ පොළා වෙන් කරගනී

11. අබියා සම්බන්ධ සිද්ධිය හැසිරෙවූ ආකාරයෙන් අපට යෙහෝවා ගැන ඉගෙනගත හැක්කේ කුමක්ද?

¹¹ තුන්වෙනුව, යෙහෝවා අපව සෝදිසි කරත්ම, අපව පරෙස්සමින් පොළමින් අප තුළ ඇති යහපත වෙන් කරගනී. නිදසුනක් වශයෙන්, ඇදහිල්ල අත්හළ යෙරොබොවම් රජුගේ මුළු පෙළපතම විනාශ කරනු ලබන බව යෙහෝවා ප්‍රකාශයට පත් කළද, රජුගේ පුත් අබියාට ගෞරවනීය භූමදානයක් ලැබීමට ප්‍රස්තාව දුන්නා. ඒ ඇයි? ‘දෙවි වූ යෙහෝවා කෙරෙහි යහපත් වූ යමක් ඔහු තුළ තිබූ බැවිනුයි.’ (1 රාජාවලිය 14:1, 10-13) මේ අනුව, එම යෞවනයාගේ හදවත විමසූ යෙහෝවා ඒ තුළ “යහපත් වූ යමක්” දුටුවා. එම යහපත්කමේ තරම කොතරම් කුඩා වුවත් අබමල් රේණුවක තරම් වුවත් තම වචනය තුළ එම යහපත ගැන සටහනක් තැබීම සුදුසු බව යෙහෝවාට පෙනී ගියා. ඒ විතරක් නෙවෙයි, ඔහු එම යහපත්කමට විපාකද දුන්නා. මෙනයින් ඔහු පෙන්වූයේ ඇදහිල්ල අත්හැර ගිය එම පවුල් සාමාජිකයාට යම් පමණක හෝ දයාවක් පෙන්වීම සුදුසු බවයි.

12, 13. (අ) අප පව් කළත් යෙහෝවා අප තුළ තිබෙන යහපත දකින බව යෙහෝෂාපාට් රජ පිළිබඳ සිද්ධියෙන් අප දකින්නේ කොහොමද? (ආ) අපගේ හොඳ ක්‍රියා හා ගුණාංග සම්බන්ධව ගත් කල, යෙහෝවා සෙනෙහෙබර පියෙකු ලෙස ක්‍රියා කරන්නේ කොහොමද?

¹² ඊටත් වඩා කැපීපෙනෙන ආදර්ශයක් යහපත් රජෙකු වූ යෙහෝෂාපාට්ගේ සිද්ධියෙන් දැකිය හැකියි. රජ මෝඩ ක්‍රියාවක් කළ විට, යෙහෝවාගේ අනාගතවක්තෘවරයා ඔහුට කීවේ මෙසේයි. “මේ කාරණය නිසා නුඹ කෙරෙහි යෙහෝවාගේ උදහස පැමිණ තිබේ.” ඒ අදහස මොනතරම් බැරෑරුම් එකක්ද! නමුත් යෙහෝවාගේ පණිවුඩය එතැනින් නතර වුණේ නැහැ. එහි තවදුරටත් මෙසේ කියැවුණා. “එසේ වුවත් . . . යහපත් කාරණා නුඹට ඇත්තේය.” (2 ලේකම් 19:1-3) යෙහෝවාගේ ධර්මිෂ්ඨ කෝපය නිසාම යෙහෝෂාපාට් තුළ තිබූ යහපත නොදැකීමට තරම් ඔහු අන්ධව සිටියේ නැහැ. අසම්පූර්ණ මිනිසුන්ට වඩා කොතරම් වෙනස්ද! වෙනත් අය සමඟ ප්‍රශ්න ඇති වී තිබෙන විට, ඔවුන් තුළ තිබෙන යහපත් දේ නොදකින තරමටම අන්ධ වීමට නැඹුරුවාවක් අප තුළ ඇති වන්නට පුළුවන්. තවද අප පව් කරන විට, අප තුළ ඇති වන කලකිරීම, ලජ්ජාව හෝ වරද සහිත හැඟීම නිසා අප තුළ ඇති හොඳ දේවල් අපට නොපෙනිය හැකියි. එහෙත්, අප අපේ පාපවලට පසුතැවිලි වී ඒවා නැවත නොකිරීමට දැඩි මහන්සියක් දරනවා නම්, යෙහෝවා අපට සමාව දෙනවා.

¹³ ඇත්තටම යෙහෝවා ඔබව සෝදිසි කරන විට, අප තුළ තිබෙන එවන් පව් ඔහු ඉවතලන්නේ හරියට මැණික් ගරන්නෙකු වටිනා මැණික් ගල් සොයන අතර වටිනාකමක් නැති ගල් කැට ඉවත් කර දමන්නාක් වගේ. ඔබගේ හොඳ ගුණාංග සහ ක්‍රියා ගැන කුමක් කිව හැකිද? ආ, ඒවා හරියට ඔහු විසින් ළඟ තබාගන්නා “මැණික්” වගේ. සෙනෙහෙබර දෙමාපියන් විසින් තමන්ගේ දරුවන් බාල වියේ ඇඳි චිත්‍ර හෝ පංති මට්ටමෙන් කළ වෙනත් ව්‍යාපෘතිවල යම් යම් දේවල් ඇතැම් විට දශක ගණනාවක් පුරාම තමන් ළඟ තබාගෙන සිටිනවා ඔබ දැක තිබෙනවාද? සමහරවිට දරුවන්ට නම් මේ දේවල් අමතක වෙලත් ඇති. ඒ වගේ, අපට ඉන්න සෙනෙහෙබරම දෙමාපියා යෙහෝවායි. අප ඔහුට විශ්වාසවන්තව සිටින තාක් කල්, ඔහු කවරදාකවත් අප කරන හොඳ ක්‍රියා හා අපේ හොඳ ගුණාංග අමතක කරන්නේ නැහැ. ඇත්ත වශයෙන්ම, මේවා අමතක කර දැමීම ඔහු දකින්නේ අධර්මිෂ්ඨකමක් හැටියටයි. ඔහු නම් කිසිවිටෙකත් අධර්මිෂ්ඨ නැහැ. (හෙබ්‍රෙව් 6:10) ඒ වගේම තවත් ආකාරයකින් ඔහු අපව පොළා බලනවා.

14, 15. (අ) අපගේ අසම්පූර්ණකම් නිසාම යෙහෝවා අප තුළ ඇති හොඳ දේවල් නොදකින තරමට කිසිවිටෙකත් අන්ධ නොවන්නේ ඇයි? නිදර්ශනය කරන්න. (ආ) යෙහෝවා අප තුළ ඇති හොඳ දේවල් දකින විට ඔහු කරන්නේ කුමක්ද? තමන්ගේ විශ්වාසවන්ත ජනයා දෙස යෙහෝවා බලන්නේ කොහොමද?

¹⁴ අපගේ අසම්පූර්ණකම්වලින් ඔබ්බට බලන යෙහෝවා අපට කළ හැකි දේ දකිනවා. නිදසුනක් වශයෙන්, දැකුම්කලු කලා කෘතීන්වලට මහත් ඇල්මක් දක්වන අය බොහෝ සෙයින් කඩතොලු සහිත සිතුවම් හෝ වෙනත් කලා කෘතීන් පිළිසකර කිරීමට මහත් වෑයමක් දරනවා. නිදසුනක් හැටියට මේ සිද්ධිය දෙස බලන්න. එංගලන්තයේ ලන්ඩන් නුවර ජාතික කලාභවනේ තිබූ අමෙරිකානු ඩොලර් මිලියන 30ක් පමණ වටින ලියනාඩෝ ඩා වින්චිගේ සිත්තමකට තුවක්කුවක් අමෝරා ගත් පුද්ගලයෙක් හානි සිදු කළා. දැන් මෙම සිත්තමට හානියක් සිදුව තිබෙන නිසා එය එතැනින් ඉවත් කළ යුතුයයි කිසිවෙකු යෝජනා කළාද? නැහැ. වසර 500ක් පමණ ඉපැරණි මේ සම්භාව්‍ය කෘතිය වහාම පිළිසකර කරන්නට කටයුතු යෙදුණා. ඒ ඇයි? කලා කෘතීන්වලට මහත් ඇල්මක් දැක්වූ අයගේ ඇස් හමුවේ එය ඉතා අනර්ඝව තිබූ නිසයි. එය එසේ සැලකුවා නම්, එම හුණු කූරු හා අඟුරුවලින් ඇඳි සිත්තමට වඩා ඔබ වටින්නේ නැද්ද? උරුම කරගත් අසම්පූර්ණකම් මගින් ඔබට කොතරම් හානි සිදු වී තිබුණද, ඇත්තටම ඔබ දෙවිගේ ඇස් ඉදිරියෙහි ඉතා වටිනවා. (ගීතාවලිය 72:12-14) මිනිස් පවුලේ දක්ෂ මැවුම්කරුවා වූ යෙහෝවා දෙවි, තමන්ගේ ප්‍රේමයට ප්‍රතිචාරය දක්වන සියල්ලන්ව පරිපූර්ණත්වයට පත් කරන්නට අවශ්‍ය දෙය කරනවා ඇති.—ක්‍රියා 3:21; රෝම 8:20-22.

¹⁵ ඔව්, අපට අප තුළම නොදැකිය හැකි හොඳ දේවල් යෙහෝවා දකිනවා. අප ඔහුට සේවය කරත්ම, අප අන්තිමේදී පරිපූර්ණත්වය අත් කරගන්නා තෙක්, ඔහු අප තුළ හොඳ දේ වැඩීමට සලස්වාවි. සාතන්ගේ ලෝකය අපට කෙසේ සැලකුවත්, යෙහෝවා දකින්නේ සිය විශ්වාසවන්ත සේවකයන් ප්‍රියමනාප හෙවත් අතිඅනර්ඝ අය හැටියටයි.—හග්ගයි 2:7, NW පාද සටහන.

යෙහෝවා සිය ප්‍රේමය ක්‍රියාශීලීව නිරූපණය කරයි

16. අප උදෙසා යෙහෝවාගේ ප්‍රේමයේ ශ්‍රේෂ්ඨතම සාක්ෂිය කුමක්ද? මෙම දීමනාව පෞද්ගලික වශයෙන් අප උදෙසා යම් අර්ථයක් ගන්නා බව අප දන්නේ කොහොමද?

¹⁶ හතරවනුව, තමන් ඇත්තටම අපට ප්‍රේම කරන බව ඔප්පු කිරීමට යෙහෝවා බොහෝ දේ කරනවා. අප කිසිත් වටින්නේ නැති බවටත් අපට ප්‍රේම ලැබීමට නොහැකි බවටත් වූ සාතන්ගේ බොරුවට දී ඇති වඩාත් ප්‍රබලතම පිළිතුර තමයි, ක්‍රිස්තුස්ගේ මිදීමේ මිල පූජාව. වධකණුව මත යේසුස් විඳි ගාවිනාත්මක මරණය මෙන්ම ඊටත් වඩා සිය ආදරණීය පුත්‍රයා මිය යනවා දකිමින් යෙහෝවා විඳි වේදනාව, අප උදෙසා ඔවුන්ගේ ප්‍රේමයේ සාක්ෂි බව කිසිවිටෙකත් අප අමතක නොකළ යුතුයි. මෙම දීමනාව තමන්ට පෞද්ගලික වශයෙන් යම් අර්ථයක් ගන්නා බව විශ්වාස කිරීමට බොහෝදෙනෙකුට අමාරු වීම කනගාටුදායක දෙයක්. ඔවුන්ට හැඟෙන්නේ තමන් නොවටිනා බවයි. එහෙත්, ප්‍රේරිත පාවුල් ක්‍රිස්තුස්ගේ අනුගාමිකයන්ට පීඩා කරන්නෙකුව සිටි බව මතක් කරගන්න. එසේ වුවද, ‘මට ප්‍රේම කළාවූ, මා උදෙසා තමන්වම පාවා දුන්නාවූ දෙවිගේ පුත්‍රයා’ ගැන ඔහු ලීවා.—ගලාති 1:13; 2:20, අකුරු ඇල කළේ අපය.

17. යෙහෝවා අපව ඔහු වෙතටත් ඔහුගේ පුත්‍රයා වෙතටත් ඇදගන්නේ කොහොමද?

¹⁷ යෙහෝවා අප උදෙසා සිය ප්‍රේමය ඔප්පු කරන තව ක්‍රමයක් තමයි, ක්‍රිස්තුස්ගේ මිදීමේ මිල පූජාවෙන් ප්‍රයෝජන ගැනීමට තනි පුද්ගලයන් වශයෙන් අපට උපකාර කිරීම. යේසුස් මෙසේ පැවසුවා. “මා එවූ පියා විසින් අදිනු ලැබූ කෙනෙකුට මිස වෙන කිසිවෙකුට මා ළඟට එන්ට බැරිය.” (යොහන් 6:44) ඔව්, යෙහෝවා අපව ඔහුගේ පුත්‍රයා වෙතටත් සදාකාල ජීවිතය නමැති බලාපොරොත්තුව වෙතටත් ඇදගන්නවා. කොහොමද? අප සෑම කෙනෙකු වෙතටම ශුභාරංචිය එවීම මගිනුයි. ඒ වගේම අපගේ සීමාවන් සහ අසම්පූර්ණකම් කොතරම් වුණත්, ශුද්ධ ලියවිලිමය සත්‍යතාවන් තේරුම්ගෙන අදාළ කරගැනීමට සිය ශුද්ධාත්මය දීම තුළින් අපට උපකාර කරයි. මේ නිසා, ඉශ්‍රායෙලිතයන් සම්බන්ධව පැවසුවාක් මෙන් අප ගැනත් මෙසේ පවසන්නට යෙහෝවාට හැකියි. “සදාකාල ප්‍රේමයකින් නුඹට ප්‍රේම කළෙමි. එබැවින් දයාබරකමින් [ප්‍රේමනීය කරුණාවෙන්, NW] නුඹ ඇදගතිමි.”—යෙරෙමියා 31:3.

18, 19. (අ) යෙහෝවා සිය ප්‍රේමය අප කෙරෙහි පැහැදිලිව පෙන්වන වඩාත් සමීපතම, කුලුපගම ක්‍රමය කුමක්ද? ඔහු අපව පෞද්ගලිකව සලකන බව පෙන්වන්නේ කුමකින්ද? (ආ) යෙහෝවා සංවේදනාත්මක සවන්දෙන්නෙකු බව දේවවචනය අපට සහතික කරන්නේ කොහොමද?

¹⁸ අප යෙහෝවාගේ ප්‍රේමය වඩාත් සමීප ලෙස, කුලුපග ලෙස අද්දකින්නේ යාච්ඤාව නමැති වරප්‍රසාදය තුළිනුයි. බයිබලය අප සැමටම ඇරයුම් කරන්නේ දෙවිට “නොකඩවා යාච්ඤා කරන්න” කියායි. (1 තෙසලෝනික 5:17) ඔහු අපට සවන් දෙනවා. ඒ වගේම ඔහුව හඳුන්වා තිබෙන්නේද “යාච්ඤා අසන තැනැත්තා” ලෙසයි. (ගීතාවලිය 65:2) මේ සම්බන්ධයෙන් ඔහු තම පරම අධිකාරය කිසි කෙනෙකුට, එනම් තමන්ගේම පුත්‍රයාටවත් පවරා නැහැ. නිකම් සිතා බලන්න. මේ විශ්වයේ මැවුම්කරු නිදහසේ තමාට කතා කරමින් තමා වෙතට එළඹෙන්න කියා අපෙන් උදක්ම ඉල්ලා සිටිනවා. ඇරත් ඔහු කිනම් ආකාරයේ සවන්දෙන්නෙක්ද? ඔහු සවන් දෙන්නේ කිසි හැඟීමක් නැති, උදාසීන, කිසි සැලකිල්ලක් නැති පුද්ගලයෙකු වගේද? කොහෙත්ම නැහැ.

¹⁹ යෙහෝවා සංවේදනාත්මකයි. සංවේදනය කියන්නේ කුමක්ද? එක් විශ්වාසවන්ත වයස්ගත ක්‍රිස්තියානියෙක් මෙසේ පැවසුවා. “සංවේදනය කියන්නේ ඔබේ වේදනාව මගේ හදට දැනීමයි.” අපගේ වේදනාවෙන් යෙහෝවා ඇත්තටම බලපෑමට ලක් වෙනවාද? “ඔවුන්ගේ සියලුම දුක්වලදී ඔහු දුක් වූයේය” කියා ඉශ්‍රායෙල් ජනයාගේ දුක් විඳීම ගැන අපට කියවන්නට තිබෙනවා. (යෙසායා 63:9) යෙහෝවා ඔවුන්ගේ දුක් කරදර දුටුවා පමණක් නොවෙයි, ඔවුන් ගැන ඔහුට කැක්කුමක් තිබුණා. ඔහුට එය කොතරම් හොඳින් දැනුණාද කියනවා නම්, යෙහෝවා සිය සේවකයන්ට කී මේ වචනවලින්ම එය මොනවට පැහැදිලි වෙනවා. “ඔබට අත ගසන්නා මගේ කළු ඉංගිරියාවට අත ගසන්නේය.”b (සෙකරියා 2:8, NW) යමෙකුට එය මොනතරම් වේදනාකාරි වේවිද! ඔව්, යෙහෝවාට අපි ගැන දැනෙනවා. අපට රිදෙන විට, ඔහුටත් රිදෙනවා.

20. රෝම 12:3හි සඳහන් උපදෙසට අප කීකරු වෙනවා නම්, කිනම් අසමබර සිතිවිලිවලින් අප වැළකී සිටිය යුතුද?

²⁰ සමබරව සිතන කිසිම ක්‍රිස්තියානියෙක් තම සේවකයන් ගැන දෙවි දක්වන සැලකිල්ලේ හා ප්‍රේමයේ එවන් සාක්ෂි දැක දැකත්, උඩඟු වන්නේ හෝ මමත්වය නිදහසට කරුණක් කරගන්නේ හෝ නැහැ. ප්‍රේරිත පාවුල් ලීවේ මෙසේයි. “නුඹලා එකිනෙකා සුදුසු තරමට වඩා තම තමා ගැන උතුම් කොට නොසිතා, දෙවි එකිනෙකාට බෙදා දුන් ඇදහිල්ලේ ප්‍රමාණය ලෙස පමණ දැන සිතන හැටියට, මට දෙන ලද අනුග්‍රහයෙන් [මහත් කරුණාවෙන්, NW] නුඹලා අතරෙහි එකිනෙකාට කියමි.” (රෝම 12:3) මෙහි තවත් පරිවර්තනයක කියන්නේ මෙසේයි. “ඔබ එකිනෙකා පමණට වඩා තමන් ගැන ඉහළින් නොසිතන ලෙසත්, දෙවි එකිනෙකාට ප්‍රදානය කළ ඇදහිල්ලේ ප්‍රමාණයට තැන්පත් සිතින් සිතන ලෙසත් . . . ඔබ එකිනෙකාට කියමි.” (න.අ.) එබැවින්, අප අපගේ ස්වර්ගික පියාණන්ගේ ප්‍රේමයේ උණුසුමින් නැහැවෙන අතරතුරේදී, සිහියෙන් යුක්තව සිට, අප දෙවිගේ ප්‍රේමය උපයාගන්නටවත් එය ලැබීමටවත් වටින්නේ නැති බව මතකයේ තබාගනිමු.—ලූක් 17:10.

21. අප දිගටම ප්‍රතික්ෂේප කළ යුත්තේ සාතන් විසින් උගන්වා ඇති කුමන බොරුද? අපගේ හදවත්වලට අප දිගින් දිගටම කාවද්දාගත යුත්තේ කිනම් දිව්‍ය සත්‍යයද?

²¹ සාතන්ගේ සියලු බොරු ප්‍රතික්ෂේප කිරීමට අපට තිබෙන බලය තුළ කළ හැකි සියල්ල කරමු. අප නොවටිනා අය බව හෝ අපට ප්‍රේමය ලැබිය නොහැකිය යන අදහසද මේ බොරුවලට ඇතුළත්. ඔබ ජීවිතයේ ලබා ඇති අද්දැකීම් ඔබට උගන්වා තිබෙන්නේ, දෙවිගේ අතිමහත් වූ ප්‍රේමයෙන් වසාලිය නොහැකි තරම් වූ ගැටලුවක් ඔබට තිබෙන බවද? සියල්ල දකින දෙවිගේ ඇස්වලට ඔබගේ යහපත් ක්‍රියා නොපෙනෙන බව ඔබට සිතේද? නොඑසේනම්, දෙවිගේ පුත්‍රයාගේ අනර්ඝ මරණයෙන් වසා දැමිය නොහැකි තරමට ඔබ පව් කොට තිබෙන බව ඔබට හැඟේද? තත්වය එය නම්, ඔබට උගන්වා තිබෙන්නේ අමූලික බොරු. එවන් බොරු ඔබේ මුළු හදින්, සහමුලින්ම ප්‍රතික්ෂේප කරන්න! පාවුල්ගේ දේවානුභාව ලත් මෙම වදන් තුළ ප්‍රකාශිත සත්‍යය අපගේ හදවත්වලට දිගින් දිගටම කාවද්දාගනිමු. “මරණයටවත්, ජීවනයටවත්, දූතයන්ටවත්, අධිපතිකම්වලටවත්, දැන් පවතින දේවලටවත්, මතු පැමිණෙන දේවලටවත්, පරාක්‍රමවලටවත්, උසටවත්, ගැඹුරටවත්, අන් කිසි මැවිල්ලකටවත්, අපගේ ස්වාමී වූ යේසුස් ක්‍රිස්තුස් තුළ ඇත්තාවූ දෙවිගේ ප්‍රේමයෙන් අප වෙන් කරන්ට නොහැකි වන්නේ යයි ඒකාන්තයෙන්ම දනිමි.”—රෝම 8:38, 39.

[පාදසටහන්වල]

මෙනෙහි කිරීම සඳහා ප්‍රශ්න

ගීතාවලිය 139:1-24 යෙහෝවා පුද්ගලයන් වශයෙන් අප කෙරෙහි ඉතා තියුණු උනන්දුවක් දක්වන බව දාවිත් රජුගේ දේවානුභාවය ලත් වචනවලින් පෙන්වන්නේ කොහොමද?

යෙසායා 43:3, 4, 10-13 තම සාක්ෂිකරුවන් ලෙස සේවය කරන අය ගැන යෙහෝවාට හැඟෙන්නේ කොහොමද? තවද ඔහුගේ හැඟීම් ක්‍රියාවලින් ප්‍රකාශ වී ඇත්තේ කොහොමද?

රෝම 5:6-8 යෙහෝවාගේ ප්‍රේමය අප කරා ළඟාවීමටත් එයින් අපට ප්‍රයෝජන ලැබීමටත් අපගේ පව්කාර තත්වය බාධාවක් නොවන බව අපට සහතික විය හැක්කේ මන්ද?

යූද් 17-25 අපට දෙවිගේ ප්‍රේමය තුළ පැවතීමට හැක්කේ කොහොමද? අප විසින් එසේ කරනවාට එරෙහිව කිනම් බලවේගයක් ක්‍රියාත්මක වේවිද?

[243වන පිටුවේ පින්තූරය]

“නුඹලා බොහෝ ගේ කුරුල්ලන්ට වඩා වටින්නහුය”

[245වන පිටුවේ පින්තූරය]

පරීක්ෂා හමුවේ අප විසින් විඳදරාගැනීම යෙහෝවා අගේ කොට සලකනවා