24වෙනි පරිච්ඡේදය

ආදරය වෙනුවෙන් ඕනෑම දෙයකට ඉඩ දීම හරිද?

හෙදර්, මයික්ව දැන හඳුනා ගෙන මාස දෙකයි. නමුත් ඇයට දැනෙන්නේ ඔහුව කාලයක් තිස්සේ හඳුනනවා වගෙයි. ඔවුන් නිතර කෙටි පණිවිඩ හුවමාරු කරගත්තා. වරු ගණන් දුරකථනයෙන් කතා කෙරුවා. ඔවුන්ගේ සිතුම් පැතුම්ද එක වගේ! එක දවසක් රෑ හදපානේ ඔවුන් කාර් එකේ තනි වුණා. ඒ වෙලාවේ මයික්ට කතාබහ කරනවාට වඩා වැඩි යමක් අවශ්‍ය වුණා.

ගෙවී ගිය මාස දෙකේදී ඔවුන් තම ආදරය ප්‍රකාශ කළේ අත් ඇල්ලීමෙන් හා පුංචි හාදුවක් දීමෙනුයි. ඊට වැඩි දෙයක් කිරීමට හෙදර් කැමති වුණේ නැහැ. ඒත් මයික්ගේ ආදරය නැති කරගන්නත් ඇය කැමති නැහැ. ඔහු තරම් ඇයව වර්ණනා කරපු, විශේෂ සැලකිල්ලක් දක්වපු කෙනෙක් ඇයට හිටියේ නැහැ! ඒ නිසා ඇය මෙහෙම හිතුවා. ‘අපි පෙම්වතුන් නිසා මයික්ට මොන දේ කරන්න ඉඩ දුන්නත් කමක් නෑ.’

ඊළඟට සිදු වෙන්නේ මොකක්ද කියලා ඔබට සිතාගන්න පුළුවන්. ඒත් ඔබට තේරුම්ගන්න බැරි දෙයක් තිබෙනවා. ඒ, හෙදර් සහ මයික් ලිංගික ඇසුරේ යෙදුණොත් එය ඔවුන්ගේ ජීවිතවලට කොයි තරම් නරක බලපෑමක් ඇති කරයිද කියන කාරණය.

උදාහරණයකට ඔබ ගුරුත්වාකර්ෂණය නමැති නීතිය නොතකා උස් තැනක සිට පැන්නොත් සිදු වන දේ ඔබ දන්නවා. “වේශ්‍යාකමින් වැළකී සිටිය යුතුයි” කියා දෙවි දී ඇති නීතිය නොසලකා හැරියොත් සිදු වෙන්නේද ඒ හා සමාන දෙයක්. (1 තෙසලෝනික 4:3) බයිබලයේ මෙසේ සඳහන් වෙනවා. ‘වේශ්‍යාකම් කරන තැනැත්තා තම ශරීරයට විරුද්ධව පව් කරයි.’ (1 කොරින්ති 6:18) විවාහ වීමට පෙර ලිංගික ඇසුරේ යෙදීමෙන් කෙනෙකුට මුහුණ දීමට සිදු විය හැකි අහිතකර ප්‍රතිඵල තුනක් පහත සඳහන් කරන්න.

1 ․․․․․

2 ․․․․․

3 ․․․․․

ලිංගිකව බෝ වන රෝග, අනවශ්‍ය ගැබ්ගැනීම් හෝ දෙවිගේ අනුමැතිය අහිමි වීම වැනි දේවල් ඔබ සඳහන් කරන්න ඇති. ඒවා දෙවි දුන් සදාචාර ප්‍රතිපත්ති කැඩීම නිසා අත් වන භයානක ප්‍රතිඵලයි.

ඒ ගැන ඔබ දැන සිටියත් ලිංගික ඇසුරේ යෙදෙන්න ඔබට පෙලඹීමක් ඇති විය හැකියි. ‘මට මුකුත් වෙන්නේ නැහැ. ඔය හැමෝම කරන්නේ’ කියා ඔබ තර්ක කළ හැකියි. තමන් ලැබූ ලිංගික අද්දැකීම් ගැන ඔබේ පාසැලේ මිතුරන් මහ ඉහළින් වර්ණනා කරන්න පුළුවන්. ඒ වගේම ඔවුන්ට එයින් කිසි හානියක් වී නැහැයි කියාත් ඔබට සිතෙන්න පුළුවන්. ලිංගික ඇසුරේ යෙදීමෙන් පෙම්වතාට ඔබ තවත් ළං වෙයි කියා හෙදර් මෙන් ඔබත් සිතන්න ඉඩ තියෙනවා. ‘ඔයා තවමත් පිරිමි ළමයෙක් එක්ක එකට ඉඳලා නැද්ද’ කියා ඔබේ මිතුරන් ඔබට සමච්චල් කරනවාත් ඇති.

මේ ගැන සිතන්න. යෞවනයන් වැඩි පිරිසක් ලිංගික ඇසුරේ යෙදෙන බව වාර්තාවලින් ඔප්පු වෙන බව ඇත්තයි. නමුත් විවාහයට පෙර හැමෝම ලිංගික ඇසුරේ යෙදෙන්නේ නැහැ. උදාහරණයකට ඇමරිකාවේ පාසැල් අධ්‍යාපනය අවසන් කළ යෞවනයන් තුන්දෙනෙකුගෙන් දෙදෙනෙක්ම ලිංගික ඇසුරේ යෙදී තිබෙන බව වාර්තා වෙනවා. නමුත් එයින් ඔප්පු වෙන්නේ තුන්දෙනෙකුගෙන් එක් කෙනෙක් එසේ කර නැති බවයි. එය සැලකිය යුතු ප්‍රමාණයක්! විවාහයට පෙර ලිංගික ඇසුරේ යෙදුණු යෞවනයන් බොහෝදෙනෙක් පහත සඳහන් අමිහිරි ප්‍රතිඵල එකකට හෝ මුහුණ දෙනවා කියා සමීක්ෂකයන් පවසනවා.

පළමුවෙනි අමිහිරි ප්‍රතිඵලය දැඩි කනගාටුව. විවාහ වීමට පෙර ලිංගික ඇසුරේ යෙදී ඇති අයගෙන් වැඩිදෙනෙක් තමන් එසේ කිරීම ගැන පසුව දැඩි සේ කනගාටු වෙනවා.

දෙවෙනි අමිහිරි ප්‍රතිඵලය අවිශ්වාසය. ලිංගික ඇසුරේ යෙදීමෙන් පසු ‘ඔහු හෝ ඇය තව කීදෙනෙක් සමඟ මේ විදිහට හිටියාද කියා’ දෙදෙනාම සැක කිරීමට පටන්ගනියි.

තුන්වෙනි අමිහිරි ප්‍රතිඵලය මඟහැර යෑම. සාමාන්‍යයෙන් ගැහැනු ළමයෙක් කැමති තමාව ආරක්ෂා කරන කෙනෙකුට මිස තමාගෙන් අයුතු ප්‍රයෝජන ගන්නා කෙනෙකුට නොවෙයි. ඒ වගේම ලිංගික ඇසුරේ යෙදීමෙන් පසු බොහෝ පිරිමි ළමයින්ට තම පෙම්වතිය කෙරෙහි මුලින් තිබූ ආකර්ෂණය අඩු වී යනවා.

පිරිමි ළමයින් වැඩිදෙනෙක් පවසන්නේ තමන් සමඟ ලිංගික ඇසුරේ යෙදුණු ගැහැනු ළමයෙකු සමඟ කිසි දිනක විවාහ නොවන බවයි. ඔවුන් විවාහ කරගන්න කැමති චරිතවත් ගැහැනු ළමයෙකුවයි.

ඔබ ගැහැනු ළමයෙක් නම් ඉහත කී තොරතුරු ගැන පුදුම වෙනවා ඇති. ඔබ තුළ කෝපයක් පවා ඇති විය හැකියි. මේ දේ මතක තබාගැනීම වැදගත්. චිත්‍රපටවල හා රූපවාහිනි වැඩසටහන්වල පෙන්වන්නේ විවාහ වීමට පෙර ලිංගික ඇසුරේ යෙදීම සාමාන්‍ය දෙයක් හැටියටයි. නමුත් රැවටෙන්න එපා! එවැනි දෙයකට යමෙකු ඔබව පොලඹවනවා නම් ඔහු සිතන්නේ ඔහු ගැන විතරයි. (1 කොරින්ති 13:4, 5) ඔබට ඇත්තටම ආදරය කරන කෙනෙක් ඔබව මානසිකව හා ශාරීරිකව වේදනාවට පත් කරයිද? (හිතෝපදේශ 5:3, 4) ඔබට ඇත්තටම ආදරය කරන කෙනෙක් ඔබ සහ දෙවි අතර තිබෙන මිත්‍රත්වය අනතුරේ හෙළයිද?—හෙබ්‍රෙව් 13:4.

ඔබ පෙම්වතෙක් නම් මෙම පරිච්ඡේදයේ සඳහන් දේවල් ඔබට ප්‍රයෝජනවත් වෙන්නේ කොහොමද කියා කල්පනා කර බලන්න. මේ ගැන ටිකක් සිතන්න. ‘මගේ පෙම්වතියට මම ඇත්තටම ආදරෙයිද?’ ඔබ ඔව් කියා පිළිතුරු දෙනවා නම් ඒ ආදරය ඔබ පෙන්වන්නේ කොහොමද? දෙවිගේ නීතිවලට කීකරු වීමට තරම් ආත්ම ශක්තියක් තිබෙන බව පෙන්වීමෙන් හා වැරදි පෙලඹීමක් ඇති විය හැකි අවස්ථාවලදී ප්‍රඥාවන්තව කටයුතු කිරීමෙන් ඔබට ඒ දේ කළ හැකියි. ඒ වගේම සෑමවිටම ඇගේ යහපත ගැන සිතීමෙන්ද ඔබට ඒ දේ කළ හැකියි. ඔබට එවැනි ගුණාංග තිබෙනවා නම් ඔබේ පෙම්වතියත්, බයිබලයේ සඳහන් වන ෂූලම්මීය ස්ත්‍රිය ඇගේ පෙම්වතා ගැන කියූ ලෙස ඔබ ගැන කියයි. “මගේ පෙම්වතාගේ හිමිකාරිය මමයි. මගේ හිමිකාරයා ඔහුයි.” (සලමොන්ගේ ගීතිකාව 2:16) වෙන විදිහකින් කියනවා නම් ඇයට ඔබ කෙරෙහි තිබෙන ආදරයත් ගෞරවයත් වැඩි වෙයි.

ඔබ ගැහැනු ළමයෙක් වුණත් පිරිමි ළමයෙක් වුණත් විවාහ වීමට පෙර ලිංගික ඇසුරේ යෙදීමෙන් ඔබේ වටිනාකම නැති වී යයි. (රෝම 1:24) ලිංගික ඇසුරේ යෙදුණු පසු බොහෝදෙනෙකුට තමන් දැන් වටින්නේ නැහැයි කියා සිතෙනවා. තමන් සතු වටිනා දෙයක් සොරා ගත්තා යන හැඟීම ඔවුන්ට ඇති වී තිබෙනවා. ඔබට එවැනි දෙයක් සිදු වෙන්න කවදාවත් ඉඩ දෙන්න එපා! “ඔයා මට ආදරෙයි නම් බැහැ කියන්නේ නැහැ” කියමින් කෙනෙක් ඔබව පොලඹවා ගැනීමට උත්සාහ කළොත් ස්ථිරව මෙහෙම කියන්න. “ඔයා මට ඇත්තටම ආදරෙයි නම් මේ වගේ දෙයක් මගෙන් ඉල්ලන්නේ නැහැ!”

ඔබේ ශරීරය ඉතාමත් අනර්ඝ බව මතක තබාගන්න. එමෙන්ම වේශ්‍යාකමින් වැළකී සිටින්න කියා දෙවි දී තිබෙන ආඥාවට කීකරු වීමට තරම් ආත්ම ශක්තියක් ඔබට තිබෙන බවත් පෙන්වන්න. එවිට ඔබ යම් දවසක විවාහ වුණොත් ලිංගික ඇසුරේ යෙදීමෙන් සතුටක් ලබන්න ඔබට පුළුවන් වෙයි. විවාහ වීමට පෙර එවැනි ඇසුරක් පවත්වා ඇති අය මුහුණ දෙන කනස්සල්ල, පසුතැවිල්ල හා අනාරක්ෂිත බව ඔබට අද්දකින්න සිදු වෙන්නේ නැහැ.—හිතෝපදේශ 7:22, 23; 1 කොරින්ති 7:3.

තවත් දැනගැනීමට 2වන පොතේ 4වන සහ 5වන පරිච්ඡේද බලන්න

බයිබල් උපදෙස

‘වේශ්‍යාකම වෙතින් පලා දුවන්න. වේශ්‍යාකම් කරන තැනැත්තා තම ශරීරයට විරුද්ධව පව් කරයි.’—1 කොරින්ති 6:18.

යෝජනාවක්

මේ දේ මතක තබාගන්න: ඔබ විරුද්ධ ලිංගයේ කෙනෙක් සමඟ හැසිරෙන ආකාරය ඔබේ දෙමාපියන් දකිද්දී ඔබට ලැජ්ජාවක් ඇති වෙනවා නම් ඉන් පැහැදිලි වෙන්නේ ඔබ එවන් ක්‍රියාවලින් වැළකී සිටිය යුතු බවයි.

ඔබ මේ ගැන දැන සිටියාද . . . ?

පිරිමි ළමයින් තම පෙම්වතිය සමඟ ලිංගික සම්බන්ධකම් පැවැත්වීමෙන් පසුව ඇයව අත්හැර වෙනත් කෙනෙකුට ආකර්ෂණය වෙන්න ඉඩ තිබෙනවා.

ගත හැකි පියවර

විරුද්ධ ලිංගයේ කෙනෙක් සමඟ සිටින විට මම මඟහැරිය යුතු තත්වයන් ․․․․․

විරුද්ධ ලිංගයේ කෙනෙකුට මාව පාළු තැනකදී මුණගැසීමට ඕනේ වුණොත් මම මෙහෙම කියනවා ․․․․․

මේ විෂය ගැන දෙමාපියන්ගෙන් මම අසා දැනගන්න කැමති දේ ․․․․․

ඔබ සිතන්නේ කුමක්ද?

● විවාහයට පෙර ලිංගික ඇසුරේ යෙදීමට ආශාවක් ඇති වුණත් ඔබ එයින් වැළකී සිටිය යුත්තේ ඇයි?

● යමෙකු තමා සමඟ ලිංගික ඇසුරේ යෙදෙන්න කියා පැවසුවොත් ඔබ කරන්නේ කුමක්ද?

[176වන පිටුවේ වාක්‍ය කණ්ඩය]

‘‘ඔබ සැබෑ ක්‍රිස්තියානියෙක් නිසා ඔබට තිබෙන හොඳ ගුණාංගවලට අන් අය ආකර්ෂණය වෙනවා. ඒ නිසා පරෙස්සම් වෙන්න. වැරදි දෙයක් කරන්න කියලා පොලඹවද්දී ඒක ප්‍රතික්ෂේප කරන්න. ඔබ තුළ ඇති යහපත් ගුණාංග රැකගන්න. ඒවා නැති කරගන්න එපා!’’ —ජොෂුවා

[176, 177වන පිටුවේ පින්තූරය]

විවාහයට පෙර ලිංගික ඇසුරේ යෙදීම හරියට වටිනා චිත්‍රයක් පාපිස්සක් ලෙස භාවිත කරනවා හා සමානයි

25වෙනි පරිච්ඡේදය

ස්වයංවින්දනය අත්හරින්නේ කොහොමද?

“මම ස්වයංවින්දනයට පුරුදු වුණේ අවුරුදු අටේදීයි. පස්සේ මම දැනගත්තා දෙවි ඒක පිළිකුල් කරනවා කියලා. ඒත් ඒක කරන්න පෙලඹීමක් ඇති වෙලා ඒ දේ කරපු හැම වෙලාවකම මට ලොකු කලකිරීමක් ඇති වුණා. මං වගේ කෙනෙකුට දෙවි ආදරය කරයිද කියලා මම හැමතිස්සේම කල්පනා කළා.”—ලුයීස්.

යොවුන් වියේදී ලිංගික හැඟීම් ප්‍රබලයි. ඒ නිසා ඔබ ස්වයංවින්දනයට පුරුදු විය හැකියි.a බොහෝදෙනෙක් කියන්නේ එය අහිංසක වින්දනයක් කියායි. නමුත් එය සත්‍යයක් නොවෙයි. බයිබල් ලේඛකයෙක් වූ පාවුල් ලිව්වේ, ‘කාමාශාව සහමුලින්ම ඔබේ ශරීරයේ අවයවවලින් නැති කර දැමිය යුතුයි’ කියායි. (කොලොස්සි 3:5) ස්වයංවින්දනයෙන් කාමාශාව තව තවත් වැඩි කරනවා මිස එය නැති කර දමන්නේ නැහැ. පහත සඳහන් කාරණාද සලකා බලන්න.

● ස්වයංවින්දනයේ යෙදෙන කෙනෙක් තමා ගැන පමණක් සිතන කෙනෙකු බවට පත් විය හැකියි.

● එවැනි කෙනෙක් විරුද්ධ ලිංගයේ අයව සලකන්නේ තමාගේ ආශාවන් තෘප්තිමත් කරගැනීමට තිබෙන භාණ්ඩ ලෙසයි.

● ස්වයංවින්දනයේ යෙදෙන කෙනෙක් තමා ගැන පමණක් සිතන නිසා විවාහ වූ පසු ලිංගික ඇසුරක් පවත්වද්දී තෘප්තියක් නොලැබිය හැකියි.

ස්වයංවින්දනය තුළින් ලිංගික ආශාවන් තෘප්තිමත් කරගන්නවා වෙනුවට ඔබේ හැඟීම් පාලනය කරගැනීමට ඉගෙනගන්න. (1 තෙසලෝනික 4:4, 5) ඒ සඳහා ලිංගික හැඟීම් ඇති වීමට දායක වන තත්වයන් මඟහරින්න කියා බයිබලයේ උපදෙස් දී තිබෙනවා. (හිතෝපදේශ 5:8, 9) ඒත් ඔබ ස්වයංවින්දනයට වහල් වෙලා නම් ඔබට කුමක් කළ හැකිද? ඔබ කොතරම් වෑයම් කළත් නැවතත් ඒ පුරුද්දට වැටෙනවා නම්, ‘මට කවදාවත් දෙවිගේ ප්‍රමිති අනුව ජීවත් වෙන්න බැහැ’ කියා ඔබට සිතෙන්න පුළුවන්. පේත්‍රෝ නමැති යෞවනයා සිතුවේ ඒ විදිහටයි. “මම ඒ පුරුද්දට ආයෙත් වැටෙන කොට දෙවි මට කවදාවත් සමාව දෙන එකක් නැහැ කියලා මට හිතුණා. මට යාච්ඤා කරන්නත් අමාරු වුණා.”

ඔබේ තත්වයත් එය නම් අධෛර්යය වෙන්න එපා. බොහෝ තරුණයන් සහ වැඩිහිටියන් ස්වයංවින්දනය අත්හැර තිබෙනවා. ඔබටත් පුළුවන් එය අත්හරින්න.

සිත වධ දෙනවා නම් . . .

ස්වයංවින්දනය අත්හැරියාට පස්සේ එහි නැවත යෙදෙන්න පෙලඹෙන අයට ඔවුන්ගේ සිත බොහෝවිට වධ දෙනවා. ‘දෙවි ඉදිරියේ’ එලෙස ‘අවංකවම දුක් වීම’ ඒ පුරුද්දෙන් මිදීමට ඔබට උපකාරයක්. (2 කොරින්ති 7:11) නමුත් ඕනෑවට වඩා දුක් වීම එයින් ගොඩ ඒමට බාධාවක්. මන්ද ඔබ අධෛර්යයට පත් වී උත්සාහය අත්හරින්න ඉඩ තිබෙනවා.—හිතෝපදේශ 24:10.

ඒ නිසා සමබරව කටයුතු කිරීමට වෑයම් කරන්න. ස්වයංවින්දනය අපවිත්‍ර ක්‍රියාවක්. එමගින් ‘විවිධාකාර ආශාවන් හා තෘෂ්ණාවලට වහල් වීමටත්’ අන් අය සමඟ පෑහී කටයුතු කිරීමට බාධාවක් ඇති වීමටත් ඉඩ තිබෙනවා. (තීතස් 3:3) ඒත් එය වේශ්‍යාකම තරම් බරපතළ වරදක් නොවෙයි. (යූද් 7) ස්වයංවින්දනයේ යෙදී තිබෙනවා නම් ඔබට දෙවිගෙන් සමාව ලැබෙන්නේ නැහැ කියා සිතන්න එපා. ඔබ කළ යුත්තේ එහි නියැලීමට ඇති වන පෙලඹීම මැඩපවත්වාගැනීම සහ එයින් මිදීමට අත් නෑර උත්සාහ කිරීමයි.

එත් ඔබ අසාර්ථක වන විට ඔබ තුළ කලකිරීමක් ඇති වෙයි. එවැනි අවස්ථාවන්වල හිතෝපදේශ 24:16හි සඳහන් වදන්වලින් සහනයක් ලබාගන්න. “ධර්මිෂ්ඨයා සත් වතාවක් වැටුණත් ඔහු නැඟිටින්නේය. එහෙත් දුෂ්ටයෝ විපතට හසු වී විනාශ වී යන්නෝය.” ඔබ ඉඳහිට අසාර්ථක වුණා කියා ඔබ දුෂ්ටයෙක් වෙන්නේ නැහැ. එමනිසා උත්සාහය අත්හරින්න එපා. ඔබ තුළ වැරදි පෙලඹීමක් ඇති වුණේ කුමක් නිසාද කියා සොයා බලා ඒ දේ නැවත කරන්න එපා.

ඒ වගේම දෙවි අනුකම්පාව පෙන්වන ප්‍රේමණීය කෙනෙක් බව මතක තබාගන්න. බයිබල් ලේඛකයෙක් වූ දාවිත් රජ පවා තමාගේ දුර්වලකම් නිසා පව් කළ කෙනෙක්. ඔහු මෙසේ පැවසුවා. “පියෙකු තම පුත්‍රයන්ට දයාව දක්වන්නාක් මෙන් යෙහෝවා දෙවි තමා කෙරෙහි ගරුබිය ඇති අයට දයාව දක්වන්නේය. ඔහු අපේ ස්වභාවය හොඳින් දන්නේය. අපව දූවිල්ලෙන් සෑදූ බව ඔහු සිහි කරන්නේය.” (ගීතාවලිය 103:13, 14) අපි පව්කාරකම උරුම කරගෙන සිටින බව යෙහෝවා දෙවි දන්නවා. ඒ නිසා ඔහු අපට ‘සමාව දීමට කැමතියි.’ (ගීතාවලිය 86:5) ඒ වගේම අපත් අපගේ වැරදි හදාගන්න වෑයම් කරනවා නම් ඒ ගැන දෙවි හුඟක් සතුටු වෙනවා. එම නරක පුරුද්ද අත්හැරීමට ඔබට කරන්න පුළුවන් මොනවාද?

විනෝදයට කරන දේවල් ගැන සිතා බලන්න. ලිංගික හැඟීම් ඇති කරන චිත්‍රපට සහ රූපවාහිනි වැඩසටහන් ඔබ බලනවාද? එවැනි වෙබ් අඩවිවල ඔබ සැරිසරනවාද? දාවිත් රජ මෙසේ දෙවිට යාච්ඤා කළා. “කිසි වැදගැම්මකට නැති දේවල් වෙතින් මාගේ දෙනෙත් හරවාගැනීමට මට උදව් කරන්න.”b—ගීතාවලිය 119:37.

මනස වෙනත් දේවලට යොමු කිරීමට දැඩි වෑයමක් දරන්න. විලියම් නමැති යෞවනයා මෙහෙම කියනවා. “දවස අවසානයේදී මනසට හොඳ දෙයක් ඇතුල් කිරීම හරිම වැදගත්. ඒ නිසා නිදාගන්න කලින් බයිබලය හරි ඒ තොරතුරු තියෙන පොතක් හරිකියවන්න.”—ෆිලිප්පි 4:8.

ඔබේ ගැටලුව කාට හරි කියන්න. ඔබට දැනෙන ලැජ්ජාව නිසා කාට හරි ඒ ගැන කියන එක ලේසි නැතුව ඇති. නමුත් එසේ කිරීමෙන් නරක පුරුද්ද අත්හරින්න ලොකු උපකාරයක් ඔබට ලැබෙයි. ඩේවිඩ් එය අද්දැක්කා. ඔහු මෙහෙම කියනවා. “මම තාත්තට ඒක කිව්වා. තාත්තා ඒ වෙලාවේ කියපු දේ මට කවදාවත් අමතක වෙන්නේ නැහැ. ඔහු සන්සුන්ව මට මෙහෙම කිව්වා. ‘මට මේ ගැන කියන්න පුතා කොයි තරම් ධෛර්යයක් ගන්න ඇද්ද කියලා මට තේරෙනවා. ඒ ගැන මම ආඩම්බර වෙනවා.’ තාත්තා කියපු ඒ වචන මට ලොකු ශක්තියක් වුණා. මම හිතුවා කොහොම හරි මේ නරක පුරුද්ද අත්හරිනවා කියලා.

“මම නරක කෙනෙක් නෙමෙයි කියලා තේරුම් කරලා දෙන්න තාත්තා බයිබල් පද කිහිපයක් මට පෙන්නුවා. ඒ වගේම ඒ පුරුද්ද නිසා කොයි තරම් නරක ප්‍රතිඵල අද්දකින්න වෙයිද කියලා පැහැදිලි කරලා දෙන්න ඔහු තවත් බයිබල් පද කිහිපයක් පෙන්නුවා. තාත්තා මෙහෙම කිව්වා. ‘අද ඉඳන් ඒක නොකර ඉන්න හිතාගන්න. අපි ආයෙත් මේ ගැන කතා කරමු. ඔයා ඒකට නැවත වරක් පෙලඹුණොත් අධෛර්යය වෙන්න එපා. ඒ වගේ දේවල් වෙනවා. ඒත් ඔයාගේ උත්සාහය අත්හරින්න එපා.’ මගේ ගැටලුව තව කෙනෙකුට කියපු නිසාත් ලැබුණු උපකාරය නිසාත් ඒ පුරුද්දෙන් ගොඩ එන්න මට පුළුවන් වුණා.”c

[පාදසටහන්වල]

බයිබල් උපදෙස

“යොවුන් වියට ආවේණික වූ ආශාවන් ඔබේ සිතින් පලවාහරින්න. ඒ වෙනුවට ධර්මිෂ්ඨකම, විශ්වාසය, ප්‍රේමය හා සමාදානය යන දේවල් ඔබේ ජීවිතයට එකතු කරගැනීමට දැඩි වෑයමක් දරන්න. එලෙසම පිරිසිදු හදවතකින් ස්වාමීන්ට කන්නලව් කරන අයට සමීපව සිටින්න.”—2 තිමෝති 2:22.

යෝජනාවක්

ඔබේ හැඟීම් ප්‍රබල වීමට පෙර යාච්ඤා කරන්න. හැඟීම් පාලනය කරගන්න යෙහෝවා දෙවිගෙන් “සාමාන්‍යය ඉක්මවූ බලය” ඉල්ලන්න.—2 කොරින්ති 4:7.

ඔබ මේ ගැන දැන සිටියාද . . . ?

ඔබට ලිංගික ආශාවන් පාලනය කරන්න බැරි නම් ඉන් පෙන්වන්නේ ඔබ දුර්වල කෙනෙක් බවයි. නමුත් තනිව සිටිද්දී පවා ඔබට ඔබේ හැඟීම් පාලනය කරගන්න පුළුවන් නම් ඔබ ඇත්තෙන්ම ශක්තිමත් කෙනෙක්.

ගත හැකි පියවර

මගේ මනස පිරිසිදුව තියාගන්න මම ․․․․․

ස්වයංවින්දනයට පෙලඹීමක් ඇති වුණොත් මම ․․․․․

මේ විෂය ගැන දෙමාපියන්ගෙන් මම අසා දැනගන්න කැමති දේ ․․․․․

ඔබ සිතන්නේ කුමක්ද?

● යෙහෝවා දෙවි “සමාව දීමට කැමති” බව මතක තබාගැනීම වැදගත් ඇයි?—ගීතාවලිය 86:5.

● ලිංගික ආශාවන් අප තුළට දැම්මේ දෙවියි. ඒ ආශාවන් පාලනය කරගන්න කියා ඉල්ලා සිටින්නෙත් දෙවියි. එසේනම් දෙවිට අපි ගැන තිබෙන නිසැකකම කුමක්ද?

[182වන පිටුවේ වාක්‍ය කණ්ඩය]

‘‘මම ඒ නරක පුරුද්ද අත්හැරිය නිසා මගේ හිත දැන් මට වධ දෙන්නේ නැහැ. ඒ නිසා සතුටින් යෙහෝවා දෙවිට සේවය කරන්න පුළුවන්. ඒක මම මොනම දේකින්වත් නැති කරගන්න ආස නැහැ.’’—සේරා

[180වන පිටුවේ පින්තූරය]

දුවද්දී වැටුණොත් නැඟිටලා එතැන් සිට දුවනවා මිසක් නැවත ආරම්භයට ගොස් දුවන්නේ නැහැ. ඒ හා සමානව ස්වයංවින්දනයට නැවත යොමු වුණොත් අධෛර්යය නොවී ඒ පුරුද්දෙන් මිදීමට දිගටම උත්සාහ කරන්න

26වෙනි පරිච්ඡේදය

මට නරක යෝජනාවක් කළොත් . . .

“සමහර ළමයි කාව හරි ආශ්‍රය කරන්නේ ලිංගික ඇසුරකට විතරයි. එයාලා එක් කෙනෙක් දෙන්නෙක්ගෙන් සෑහීමට පත් වෙන්නෙත් නැහැ.”—පෙනී.

“සමහර පිරිමි ළමයින්ට පෙම්වතියක් ඉන්දැද්දීත් වෙන ගෑනු ළමයි එක්ක ලිංගික ඇසුරේ යෙදුණ විදිහ ගැන කිසිම ලැජ්ජාවක් නැතුව කියනවා.”—එඩ්වඩ්.

හුඟක් යෞවනයන් ප්‍රේම සම්බන්ධයක් පටන්ගැනීමටවත් විවාහ වීමටවත් කිසිම අදහසක් නැතුව තම ලිංගික ආශාවන් පිනවාගැනීමට පමණක් විරුද්ධ ලිංගයේ අයව ඇසුරු කරනවා.

ඔබටත් එවැනි දේකට පෙලඹීමක් ඇති වුණොත් ඒ ගැන පුදුම වෙන්න එපා. (යෙරෙමියා 17:9) ඉහත සඳහන් කළ එඩ්වඩ්ටත් එවැනි පෙලඹීමක් ඇති වුණා. “හුඟක් ගෑනු ළමයි මට ලිංගික ඇසුරකට ආරාධනා කරලා තියෙනවා. ඒ වගේ අවස්ථාවලදී දෙවිගේ ප්‍රමිති රකින එක ලේසි වුණේ නැහැ. බැහැ කියන්න හරිම අමාරුයි.” ඔබට යම් කෙනෙක් නරක යෝජනාවක් කළොත් ඔබ මතක තබාගත යුතු බයිබල් ප්‍රතිපත්ති මොනවාද?

එය වැරදි දෙයක් බව තේරුම්ගන්න

වේශ්‍යාකම කොතරම් බරපතළද කිවහොත් එහි දිගින් දිගටම යෙදෙන අයට “දෙවිගේ රාජ්‍යය උරුම වන්නේ නැති බව” බයිබලයේ සඳහන් වෙනවා. (1 කොරින්ති 6:9, 10) එය විවාහ වීමේ අරමුණක් ඇතුව හෝ නැතුව ලිංගික ඇසුරේ යෙදෙන අයට අදාළයි. වැරදි පෙලඹීම් පරාජය කරන්න නම් ඔබ වේශ්‍යාකම සම්බන්ධයෙන් යෙහෝවා දෙවි දරන ආකල්පය දැරිය යුතුයි.

“මම නම් හිතන්නේ යෙහෝවා දෙවි කියන දේ තමයි හරි.”—කැනඩාවේ කැරන්.

“ඔබේ දෙමාපියන්, මිතුරන් සහ සභාවේ අය ගැන හිතන්න. ඔබ අතින් වරදක් වුණොත් එයාලට මොන තරම් දුකක් දැනෙයිද!”—බ්‍රිතාන්‍යයේ පීටර්.

වේශ්‍යාකම ගැන යෙහෝවා දෙවි කියන දේ හිතට ගන්නවා නම් එවැනි දේකට ඔබ තුළ පෙලඹීමක් ඇති වුණත් “නපුරට ද්වේෂ කරන්න” ඔබට හැකි වෙයි.—ගීතාවලිය 97:10.

කියවන්න: උත්පත්ති 39:7-9. යෝසෙප් ලිංගික දුරාචාරයෙන් වැළකීමට ගත් ස්ථිර අධිෂ්ඨානයත් ඒ සඳහා ඔහුට උපකාරවත් වුණේ කුමක්ද කියාත් සලකා බලන්න.

බයිබල් ප්‍රතිපත්ති රැකීමට ලැජ්ජා වෙන්න එපා

සාමාන්‍යයෙන් තරුණ තරුණියන්ට යම් දෙයක් හරියි කියා සිතුණොත් ඒ ගැන බියක් සැකක් නැතුව කතා කරනවා. ඔබ දන්නවා දෙවිගේ ප්‍රමිති හරියි කියලා. එසේනම් ඔබගේ ආදර්ශවත් හැසිරීමෙන් එය පෙන්වන්න. විවාහයට පෙර ලිංගික සම්බන්ධකම් පැවැත්වීම ඔබ ප්‍රතික්ෂේප කරන බව කීමට ලැජ්ජා වෙන්න එපා.

“ඔබ දෙවිගේ උසස් ප්‍රමිතිවලට අනුව ජීවත් වෙන්න කැමති කෙනෙක් කියලා මුලින්ම කියන්න.”—ජර්මනියේ ඇලන්.

“අපේ ඉස්කෝලේ පිරිමි ළමයි මම යෙහෝවා දෙවිට නමස්කාර කරන කෙනෙක් කියලා දැනගෙන හිටියා. ඒ නිසා මාව වරදකට පොලඹවාගන්න උත්සාහ කරලා වැඩක් නැහැ කියලා එයාලට තේරුණා.”—එක්සත් ජනපදයේ විකී.

ඔබ දෙවිට විශ්වාසවන්තව සිටීමට ගන්න වෑයමෙන් පෙන්වන්නේ ඔබ අවබෝධයෙන් කටයුතු කරන කෙනෙක් හැටියට දියුණු වන බවයි.—1 කොරින්ති 14:20.

කියවන්න: හිතෝපදේශ 27:11. හරි දේ කිරීමෙන් යෙහෝවා දෙවිව සතුටු කරන්න පුළුවන් විදිහ ගැන සිතන්න.

තීරණයක් ගන්න

ඔබ අකමැති බව කීම වැදගත්. නමුත් සමහර අයට හිතෙන්න පුළුවන් ඔබ හිතේ එකක් තියාගෙන බොරුවට බැහැ කියනවා කියා.

“ඔබ කරන හැම දෙයකින්ම, අඳින පළඳින විදිහෙන් කතා කරන විදිහෙන් ආශ්‍රය කරන අයගෙන් ඔබ ඇත්තටම වැරදි දේට අකමැති කියලා පේන්න ඕනේ.”—නයිජීරියාවේ ජෝයි.

“කොච්චර බල කෙරුවත් වැඩක් නැහැයි කියලා ඔවුන්ට දැනෙන්න සලස්වන්න. ඒ වගේම වැරදි චේතනාවකින් පිරිමි ළමයි තෑගි දුන්නොත් භාරගන්න එපා. ඒවා භාර ගත්තොත් පස්සේ එයාලගේ යෝජනාත් භාරගන්න වෙයි.”—බ්‍රිතාන්‍යයේ ලෝරා.

ඔබ ස්ථිර අධිෂ්ඨානයෙන් සිටියොත් යෙහෝවා දෙවිත් ඔබට උපකාර කරයි. බයිබල් ලේඛකයෙක් වූ දාවිත්, දෙවි ගැන මෙහෙම කිව්වා. “ඔබව අත් නොහරින කෙනෙකුව ඔබත් කිසිදාක අත් නොහරින්නෙහිය.”—ගීතාවලිය 18:25.

කියවන්න: දෙවන ලේකම් 16:9. හරි දේ කිරීමට කැමති අයට උපකාර කරන්න දෙවි කොයි තරම් ආශාවෙන් සිටිනවාද කියා සිතා බලන්න.

දුර දිග බලා කටයුතු කරන්න

“බුද්ධිමත් අය අවදානම දුර තියාම හඳුනාගෙන එයින් ඉවත් වෙති” කියා බයිබලයේ සඳහන් වෙනවා. (හිතෝපදේශ 22:3) ඔබටත් හැකියි එලෙස කටයුතු කරන්න.

“නුසුදුසු දේවල් කතා කරන අයගෙන් පුළුවන් තරම් ඈත් වෙන්න.”—ජපානයේ නයෝමි.

“ඔබේ ලිපිනය හෝ දුරකථන අංකය වැනි පෞද්ගලික තොරතුරු නුසුදුසු අයට දෙන්න එපා.”—බ්‍රිතාන්‍යයේ ඩයනා.

ඔබේ කතාව, හැසිරීම, ඔබ ඇසුරු කරන අය සහ ඔබ නිතර යන එන තැන් ගැන ඔබට සිතෙන්නේ කුමක්ද? ‘එවැනි දේවලින් මම අනික් අයට මං ගැන වැරදි අදහසක් දෙනවාද’ කියා සිතා බලන්න.

කියවන්න: උත්පත්ති 34:1, 2. දීනා නමැති යෞවනිය නුසුදුසු තැන්වලට ගිය නිසා ඇයට අත් විඳින්න සිදු වූ නරක ප්‍රතිඵල ගැන සිතන්න.

විවාහ වීමට කිසිම අදහසක් නැතුව ලිංගික ඇසුරේ යෙදීම යෙහෝවා දෙවි සලකන්නේ බරපතළ වරදක් ලෙසයි. ඔබත් ඒ ආකල්පයම දැරිය යුතුයි. ඔබ හරි දේ කරනවා නම් ඔබේ ගෞරවය රැකගන්නත් නිදොස් හෘදය සාක්ෂියකින් දෙවිට සේවය කරන්නත් ඔබට හැකි වෙයි. කාලි නමැති යෞවනිය පැවසුවේ මෙයයි. “තව කෙනෙකුගේ ආශාවන් පිනවන්න ඔබව පාවිච්චි කරන්න ඉඩ දෙන්න එපා. ඔබ මහන්සි වෙලා දෙවි සමඟ ඇති කරගත් හොඳ නම රැකගන්න!”

බයිබල් උපදෙස

“අවසානය දක්වාම නොකිලිටිව, නිකැළැල්ව හා සමාදානයෙන් යුතුව [දෙවි] ඉදිරියෙහි පෙනී සිටීමට උපරිම උත්සාහයක් දරන්න.”—2 පේතෘස් 3:14.

යෝජනාවක්

හොඳ ගුණාංග ඇති කරගැනීමට වෑයම් කරන්න. (1 පේතෘස් 3:3, 4) ඔබ හොඳ නම් ඔබ සමඟ ඇසුරු කරන්න හොඳ අය කැමති වෙයි.

ඔබ මේ ගැන දැන සිටියාද . . . ?

යෙහෝවා දෙවි කැමති, ඔහු අරමුණු කළ ලෙස ඔබ විවාහ වූ පසු ලිංගික ඇසුරක් පැවැත්වීමෙන් සතුටක් ලබනවාටයි. වේශ්‍යාකම නිසා ඇති වන කනස්සල්ල, අනාරක්ෂිත බව වැනි කටුක අද්දැකීම්වලට ඔබ මුහුණ දෙනවාට දෙවි කැමති නැහැ.

ගත හැකි පියවර

සදාචාරය රැකගැනීමට යෝසෙප් ගත් අධිෂ්ඨානය අනුකරණය කරන්න මම ․․․․․

දීනා අතින් වුණ වරද මගේ අතින් නොවීමට නම් මම ․․․․․

මේ විෂය ගැන දෙමාපියන්ගෙන් මම අසා දැනගන්න කැමති දේ ․․․․․

ඔබ සිතන්නේ කුමක්ද?

● නුසුදුසු ලිංගික ඇසුරට ඔබේ සිත ඇදී ගියත් එයින් වැළකී සිටිය යුත්තේ ඇයි?

● යමෙකු නරක යෝජනාවක් කළොත් ඔබ කරන්නේ කුමක්ද?

[185වන පිටුවේ වාක්‍ය කණ්ඩය]

‘‘කතා කරන්න භය වෙන්න එපා. එක කොල්ලෙක් මට නරක යෝජනාවක් කෙරුවා. මම රවලා බලලා ‘ඔය වගේ දේවලට නම් එන්න එපා’ කියලා එතැනින් ගියා.’’—එලන්

[187වන පිටුවේ පින්තූරය]

නුසුදුසු ලිංගික ඇසුරේ යෙදීමෙන් ඔබේ වටිනාකම නැති වෙයි