ඔවුන් යෙහෝවාගේ කැමැත්ත කළා

සමාරියයෙක් යහපත් අසල්වැසියෙකු බව ඔප්පු වෙයි

යේසුගේ දවස්වලදී, යුදෙව්වන් හා අන්‍යජාතීන් අතර පැහැදිලි එදිරිවාදිකමක් පැවතුණා. කල් යත්ම, යුදෙව් නොවන ස්ත්‍රීන්ගේ දරු උපත්වලදී ඉශ්‍රායෙල් ස්ත්‍රීන් උපකාර කිරීම තහනම් කරන නීතියක් පවා යුදෙව් මිෂ්නාහි ඇතුළත් කළා; එසේ කළේ මෙය ලෝකයට තවත් අන්‍යජාතිකයෙකු ඉපදවීමට පමණක් උපකාරයක් වනු ඇති නිසයි.—ඇබෝඩා සාරා 2:1.

අන්‍යජාතීන්ට වඩා සමාරියයන්ට ආගමිකවත්, වාර්ගිකවත් යුදෙව්වන්ට ඉතා කිට්ටු සම්බන්ධකමක් තිබුණා. එහෙත්, ඔවුන්වත් සැලකුවේ කුලබැහැරියන් හැටියටයි. “සමාරියයන් සමඟ යුදෙව්වන්ගේ ගනුදෙනුවක් නැත” කියා ප්‍රේරිත යොහන් ලිව්වා. (යොහන් 4:9) ඇත්තෙන්ම, “සමාරියයෙක් දෙන පාන් කෑල්ලක් ඌරෙකුගේ මාංසයටත් වඩා අපිරිසිදුයි” කියා තල්මුඩය ඉගැන්නුවා. සමහර යුදෙව්වන් ‘සමාරියයා’ යන යෙදුම අවමානයේ හා නින්දාවේ ප්‍රකාශයක් හැටියට පවා යෙදුවා.—යොහන් 8:48.

මේ තත්වය ගැන සලකා බලද්දී, යුදෙව් නීතිය ගැන දැනුම් තේරුම් ඇති මනුෂ්‍යයෙකුට යේසු පැවසූ වචනවල උපදෙස් පිරී තිබුණා. එම මනුෂ්‍යයා යේසු වෙත ගොස් මෙසේ ඇසුවා: “ආචාරිනි, සදාකාල ජීවනය උරුමකර ගන්න පිණිස මා විසින් කුමක් කටයුතුද”? පිළිතුරු වශයෙන්, ‘ඔබේ මුළු හෘදයෙන්ද, ප්‍රාණයෙන්ද, ශක්තියෙන්ද, බුද්ධියෙන්ද යෙහෝවාට ප්‍රේම කරන්න’ සහ ‘ඔබට මෙන් ඔබේ අසල්වාසියාට ප්‍රේම කරන්න’ කියා අණ කරන මෝසෙස්ගේ ව්‍යවස්ථාව වෙත යේසු තම අවධානය යොමු කළා. එවිට නීතිඥයා යේසුගෙන් මෙසේ ඇසුවා: “මාගේ අසල්වාසියා කවුද”? (ලූක් 10:25-29; ලෙවී කථාව 19:18; ද්විතීය කථාව 6:5) ඵරිසිවරුන්ට අනුව, “අසල්වාසියා” යන යෙදුම අදාළ වුණේ යුදෙව් සම්ප්‍රදායන් පැවැත්වූ අයට පමණයි—ඇත්තෙන්ම අන්‍යජාතීන්ට හෝ සමාරියයන්ට නොවෙයි. යේසු එම ආකල්පයට සහාය දෙයි කියා මෙම විපරම්කාරි නීතිඥයා සිතුවා නම්, පුදුමයට පත් කරවන තත්වයක් අබියසයි ඔහු සිටියේ.

දයානුකම්පිත සමාරියයෙක්

යේසු උපමාවක් විස්තර කිරීමෙන් මේ මනුෂ්‍යයාගේ ප්‍රශ්නයට උත්තර දුන්නා.a “එක්තරා මනුෂ්‍යයෙක් යෙරුසලමෙන් යෙරිකෝවට යන කල සොරුන්ට අසුවිය” කියා ඔහු පැවසුවා. යෙරුසලම හා යෙරිකෝව අතර දුර ප්‍රමාණය කිලෝමීටර් 23ක් පමණ වුණා. මේ නගර දෙක සම්බන්ධ වන පාරේ පටු වංගු සහ නෙරා ඇති පර්වත තිබුණ නිසා එය සොරුන්ට සැඟවී සිටින්න, පහර දෙන්න හා ගැළවී යන්න පහසු කළා. ප්‍රතිඵලයක් වශයෙන්, යේසුගේ උපමාවේ සංචාරකයාව “සොරුන්ට අසුවිය; සොරු ඔහුගේ වස්ත්‍ර පැහැරගෙන, ඔහුට පහරදී, ඔහු අඩපණකර ගියෝය.”—ලූක් 10:30.

යේසු තවදුරටත් මෙසේ පැවසුවා, “එක්තරා පූජකයෙක් අහම්බෙන් ඒ මාර්ගයෙන් යනුයේ ඔහු දැක අනික් පැත්තෙන් ගියේය. එසේම ලෙවීයයෙක්ද එතැනට පැමිණ ඔහු දැක අනික් පැත්තෙන් ගියේය.” (ලූක් 10:31, 32) පූජකයන් හා ලෙවීවරුන්, ව්‍යවස්ථාවේ ගුරුවරුන් වුණා—අසල්වැසි ප්‍රේමයේ ව්‍යවස්ථාවද ඊට ඇතුළත් වුණා. (ලෙවී කථාව 10:8-11; ද්විතීය කථාව 33:1, 10) ස්ථිරවම, අන් සියල්ලන්ට වඩා ඔවුන්ට තුවාල ලත් මඟියාට උපකාර කළ යුතුයයි හැඟෙන්ට යුතුව තිබුණා.

යේසු තවදුරටත් මෙසේ පැවසුවා: “එක්තරා සමාරියයෙක් ගමන් යන අතර ඔහු සිටි තැනට [ආවා].” සමාරියයෙක් කියා පැවසීමෙන් නීතිඥයාගේ කුතුහලය වැඩි කළ බවට සැකයක් නැහැ. යේසු මේ ජාතිය ගැන නිෂේධාත්මක දෘෂ්ටිය අනුමත කරයිද? ඊට පටහැනිව, අභාග්‍යවන්ත මඟියා දැක, සමාරියයා ‘අනුකම්පා කළා.’ යේසු මෙසේ පැවසුවා: “ළඟට ගොස්, ඔහුගේ තුවාලවලට තෙල්ද මුද්‍රිකපානයද වත්කොට තුවාල බැඳ, තමාගේම මෘගයා පිට හිඳුවාගෙන, තානායමකට ගෙන ගොස්, ඔහු බලාගත්තේය.b පසුවදා ඔහු මසු දෙකක් රැගෙන තානායම්කාරයාට දී: මොහු බලාගන්න; මීට වැඩියෙන් නුඹ වියදම්කරන දෙයක් මම නැවත ආ කල නුඹට ගෙවන්නෙමි.”—ලූක් 10:33-35.

යේසු මේ අවස්ථාවේදී ඔහුගේ විමසන්නාගෙන් මෙසේ ඇසුවා: “සොරුන් අතට අසුවූ තැනැත්තාට මොවුන් තුන්දෙනාගෙන් අසල්වාසියා වුණේ කවරෙක් කියා නුඹ සිතන්නෙහිද” යන ප්‍රශ්නයට උත්තරය නීතිඥයා දැන සිටියත්, “සමාරියයා” කියා පැවසීමට ඔහු පසුබට වන බවක් පෙනෙන්න තිබුණා. ඒ වෙනුවට, ඔහු නිකම් මෙසේ පිළිතුරු දුන්නා: ‘ඔහුට කරුණා කළ තැනැත්තා.’ යේසු එවිට මෙසේ පැවසුවා: “නුඹත් ගොස් එලෙසම කරන්න.”—ලූක් 10:36, 37.

අප සඳහා පාඩම

යේසුගෙන් ප්‍රශ්න කළ තැනැත්තා එසේ කළේ “තමා ධර්මිෂ්ඨ බව ඔප්පු කිරීමට” වෑයමක් වශයෙන්. (ලූක් 10:29, NW) ඔහු මෝසෙස්ගේ ව්‍යවස්ථාව අකුරටම පිළිපැදීම සම්බන්ධයෙන් යේසු ප්‍රශංසා කරයි කියා සමහරවිට ඔහු සිතන්න ඇති. නමුත් මෙම අහංකාර පුද්ගලයාට බයිබල් හිතෝපදේශයේ සත්‍යය ඉගෙනීමට අවශ්‍යව තිබුණා: ‘මනුෂ්‍යයෙකුගේ සියලු මාර්ග තමාගේම ඇසට හරිව පෙනෙයි; එහෙත් යෙහෝවා සිත් කිරා බලන්නේය.’—හිතෝපදේශ 21:2.

සැබවින්ම කෙළින් වැඩ කරන පුද්ගලයෙක් දෙවිගේ නීතිවලට කීකරු වෙන කෙනෙක් පමණක් නොව, නමුත් ඔහුගේ ගුණාංගත් අනුකරණය කරන කෙනෙක් බව යේසුගේ උපමාව පෙන්නුම් කරයි. (එපීස 5:1) උදාහරණයක් වශයෙන්, ‘දෙවි තරාතිරම් නොබලන’ බව බයිබලය අපට පවසයි. (ක්‍රියා 10:34) මේ සම්බන්ධයෙන් අපි දෙවිව අනුකරණය කරනවාද? අපේ අසල්වැසිභාවය ජාතික, සංස්කෘතික හා ආගමික බාධක අබිබවා යා යුතු බව යේසුගේ උනන්දුව අවුස්සන උපමාව පෙන්නුම් කරයි. ඇත්තෙන්ම, එකම සමාජ මට්ටමක, වර්ගයක හෝ ජාතියක ජනයා කෙරෙහි පමණක්වත්, සෙසු ඇදහිලිවන්තයන් කෙරෙහි පමණක්වත් නොව ‘සියල්ලන්ටම යහපත්කම් කිරීමට’ ක්‍රිස්තියානීන්ට උපදෙස් දී තිබේ.—ගලාති 6:10, ඇල අකුරු අපගේය.

යෙහෝවාගේ සාක්ෂිකරුවන් මෙම ශුද්ධ ලියවිලිමය අවවාදය අනුගමනය කිරීමට පරිශ්‍රමයක් දරනවා. උදාහරණයක් හැටියට, ස්වාභාවික ආපදා පහර දුන් විට, ඔවුන් තම සෙසු ඇදහිලිවන්තයන්ට මෙන්ම සාක්ෂිකරුවන් නොවන්නන්ට මානවහිතවාදී ආධාර දෙනවා.c ඊට අමතරව, ජනයාට බයිබලයේ දැනුම වඩා හොඳින් ලබාගැනීමට උපකාර කරමින්, ඔවුන් සමස්තයක් වශයෙන් සෑම වසරකම පැය බිලියනයකට වඩා ගත කරනවා. දෙවිගේ කැමැත්ත “සියලු [ආකාර, NW] මනුෂ්‍යයන් ගළවනු ලැබ සැබෑව දැනගැනීමට [පැමිණීම]” වන නිසා, රාජ්‍ය පණිවුඩය සමඟින් සෑමදෙනා වෙත ළඟාවීමට ඔවුන් පරිශ්‍රමයක් දරනවා.—1 තිමෝති 2:3; ක්‍රියා 10:35.

[පාදසටහන්වල]