රාත්‍රිය ගෙවිලා යන්නත් කිට්ටුයි. යේසුස්ව දන්නේ නැහැ කියලා පේතෘස් තුන් වතාවක්ම කියලයි තියෙන්නේ. මන්ත්‍රණ සභාව නඩු විභාගය අවසන් කරලා නිවෙස්වලටත් ගිහින්. හැබැයි සිකුරාදා උදෙන්ම ඔවුන් ආපහු රැස් වෙනවා. ඒ, නීති විරෝධී විදිහට රාත්‍රියේදී පවත්වපු නඩු විභාගයට නීත්‍යනුකූල මුහුණුවරක් දෙන්න වෙන්න ඇති. දැන් යේසුස්ව ඔවුන් ඉදිරියට ගෙනල්ලයි තියෙන්නේ.

“ඔබ ක්‍රිස්තුස් නම් අප ඉදිරියේ ඒ බව කියන්න” කියලා මන්ත්‍රණ සභාව කියද්දී යේසුස් මෙහෙම කියනවා. “මම ඒ දේ ඔබට කිව්වත් ඔබ එය කොහොමටවත් විශ්වාස කරන්නේ නැහැ. මම ඔබෙන් ප්‍රශ්න ඇසුවත් ඔබ ඒවාට පිළිතුරු දෙන්නෙත් නැහැ.” දානියෙල් 7:13 සඳහන් වෙන තැනැත්තා තමන් බව අඟවන යේසුස් දැන් නිර්භීතව මෙහෙම කියනවා. “මෙතැන් පටන් මනුෂ්‍ය පුත්‍රයා බලවත් දෙවිගේ දකුණු පැත්තේ ඉඳගෙන සිටියි.”—ලූක් 22:67-69; මතෙව් 26:63.

ඔවුන් යේසුස්ගෙන් අහනවා “ඔබ දෙවිගේ පුත්‍රයාද” කියලා. යේසුස් පිළිතුරු දෙන්නේ “ඒ මමයි කියා ඔබ අසන ප්‍රශ්නයෙන්ම පැහැදිලියි” කියලයි. දෙවිට අපහාස කරනවා කියන චෝදනාව පිට යේසුස්ව මරන්න මේ සාක්ෂිය හොඳටම ඇති කියලා හිතන ඔවුන් “අපට තවත් සාක්ෂි අවශ්‍ය නැහැ” කියලා කියනවා. (ලූක් 22:70, 71; මාක් 14:64) ඊටපස්සේ ඔවුන් යේසුස්ව ගැටගහලා රෝම ආණ්ඩුකාර පොන්තියුස් පිලාත් ළඟට අරන් යනවා.

ඒක යූදස් දකින්න ඇති. යේසුස්ව මරන්න තීරණය කරලා කියලා දැනගත්තාම ඔහුට ලොකු දුකක් දැනෙනවා. ඒත් දෙවිගෙන් සමාව ගන්නවා වෙනුවට රිදී කාසි 30ත් අරන් නායක පූජකයන් ළඟට යන ඔහු, “මා කර තිබෙන්නේ පාපයක්! මා පාවා දුන්නේ ධර්මිෂ්ඨ කෙනෙක්ව” කියලා කියනවා. එතකොට ඔවුන් කියන්නේ “ඉතින් එයින් අපට ඇති පලේ මොකක්ද? ඒක ඔබේ ප්‍රශ්නයක්” කියලයි.—මතෙව් 27:4.

රිදී කාසි 30 දේවමාලිගාව ඇතුළට විසි කරන යූදස් තවත් වරදක් කරනවා. ඔහු උත්සාහ කරන්නේ ජීවිතය නැති කරගන්න. ඔහු එල්ලී මැරෙන්න උත්සාහ කළත් පෙනෙන විදිහට ඔහු ලණුව ගැටගහපු අත්ත කැඩෙනවා. ඔහුව ගල් ගොඩක් උඩට වැටෙන නිසා ඔහුගේ බඩවැල් පිටතට විසි වෙනවා.—ක්‍රියා 1:17, 18.

යේසුස්ව උදෙන්ම පොන්තියුස් පිලාත්ගේ මාලිගාවට අරන් ආවත් යුදෙව්වන් ඇතුළට යන්නේ නැහැ. ඔවුන් හිතන්නේ වෙනත් ජාතීන් එක්ක ඇසුරු කිරීමෙන් තමන් අපවිත්‍ර වෙයි කියලයි. එහෙම වුණොත් නීසාන් 15වෙනිදායින් ඇරඹෙන මුහුන් නොදැමූ රොටි උත්සවයට හවුල් වෙන්න ඔවුන්ට බැරි වෙනවා. පාස්කුවේම කොටසක් විදිහට තමයි ඒ උත්සවයත් සැමරුවේ.

පිලාත් පිටතට ඇවිත් ඔවුන්ගෙන් අහනවා “ඔබ මේ මිනිසාට විරුද්ධව නඟන චෝදනාව මොකක්ද” කියලා. ඔවුන් පිළිතුරු දෙන්නේ “මේ මිනිසා වරදකරුවෙක් නොවෙයි නම් අප ඔහුව ඔබට භාර දෙන්නේ නැහැ” කියලයි. එතකොට පිලාත් කියනවා “ඔහුව ගෙන ගොස් ඔබේ නීතියට අනුව ඔහුව විනිශ්චය කරන්න” කියලා. ඔහු එහෙම කියන්නේ යුදෙව්වන් තමන් පිට අනවශ්‍ය බරක් පටවනවා කියලා හිතෙන නිසා වෙන්න ඇති. යුදෙව්වන් පිළිතුරු දෙන්නේ “අපට කිසිම කෙනෙක් මරණයට පත් කිරීම තහනම්” කියලයි. (යොහන් 18:29-31) ඔවුන්ට ඕනෙ කොහොමහරි යේසුස්ව මරන්න කියලා ඒකෙන් හොඳින්ම පැහැදිලි වෙනවා.

පාස්කු සමයේ යේසුස්ව මැරුවොත් කෝලහලයක් ඇති වෙන්න පුළුවන්. හැබැයි යේසුස් රෝම ආණ්ඩුවට විරුද්ධව කටයුතු කරලා තියෙනවා කියන චෝදනාව පිට රෝමවරුන්ම ඔහුව මැරුවොත් නම් ප්‍රශ්නයක් ඇති වෙන්නේ නැහැ.

යේසුස්ව අත්අඩංගුවට ගත්තේ ඔහු දෙවිට අපහාස කරන නිසයි කියලා යුදෙව්වන් මේ වෙලාවේදී කියන්නේ නැහැ. ඔවුන් දැන් කියන මේ චෝදනා තුන ඊට හාත්පසින්ම වෙනස්. “මේ මිනිසා [1] අපේ ජාතිය අතර භේද ඇති කරනවා. [2] ඔහු සීසර්ට බදු ගෙවීම තහනම් කරනවා. [3] තමා ක්‍රිස්තුස් කියාත් තමා රජ කෙනෙක් කියාත් ප්‍රකාශ කරන ආකාරය අපට ඇහුණා.”—ලූක් 23:2.

රෝමය නියෝජනය කරන පිලාත් වැඩියෙන්ම සැලකිලිමත් වෙන්නේ යේසුස්ට විරුද්ධව තියෙන තුන්වෙනි චෝදනාව ගැනයි. මාලිගාව ඇතුළට යන ඔහු යේසුස්ව කැඳවලා “ඔබ යුදෙව්වරුන්ගේ රජද” කියලා අහනවා. වෙන විදිහකින් කියනවා නම් ඔහු යේසුස්ගෙන් අහන්නේ ‘සීසර්ට විරුද්ධ වෙමින් තමන්වම රජෙක්ට සමාන කරගෙන රෝම නීතිය කඩ කළාද’ කියලයි. යේසුස් ඔහුගෙන් මෙහෙම අහනවා. “ඔබ එහෙම අහන්නේ ඔබට එහෙම හිතෙන නිසාද? නැත්නම් වෙනත් අය මා ගැන ඔබට යම් දේවල් පැවසූ නිසාද?” (යොහන් 18:33, 34) යේසුස් එහෙම අහන්නේ පිලාත්ට තමන් ගැන අහන්න ලැබිලා තියෙන්නේ මොනවාද කියලා දැනගන්න වෙන්න ඇති.

තමන්ට කිසිම දෙයක් අහන්න ලැබුණේ නැහැ කියලත් යේසුස්ට කියන්න තියෙන දේ ගැන දැනගන්න කැමතියි කියලත් අඟවමින් පිලාත් මෙහෙම කියනවා. “මම යුදෙව්වෙක්ද? ඔබව මට භාර දුන්නේ ඔබේම ජාතියේ මිනිසුන් හා නායක පූජකයනුයි. ඔබ මොනවාද කළේ?”—යොහන් 18:35.

තමන් රජ කෙනෙක් කියලා කියාගන්න බවට නඟපු චෝදනාවෙන් යේසුස් ලිස්සලා යන්නේ නැහැ. ඔහු දැන් කියන දෙයින් පිලාත් අනිවාර්යයෙන්ම පුදුම වෙයි.

තමන් රජෙක් කියලා යේසුස් පිලාත්ගෙන් සඟවන්නේ නැහැ. කොහොමවුණත් ඔහුගේ රාජ්‍යය රෝම ආණ්ඩුවට තර්ජනයක් නෙවෙයි. යේසුස් කියන්නේ “මගේ රාජ්‍යය මේ ලෝකයට කිසිම ආකාරයකින් සම්බන්ධ නැහැ” කියලයි. ඒ වගේම ඔහු මෙහෙමත් කියනවා. “මගේ රාජ්‍යය මේ ලෝකයට සම්බන්ධ වී තිබුණා නම් මා යටතේ සිටි අය මා වෙනුවෙන් සටන් කර මාව යුදෙව්වරුන්ගේ අතට හසු වෙන්න ඉඩ දෙන්නේ නැහැ.” (යොහන් 18:36) ඔව්, යේසුස්ට වෙනම රාජ්‍යයක් තියෙනවා. ඒත් ඒක මේ ලෝකයට සම්බන්ධ නැහැ.

“එසේනම්, ඔබ රජෙක්ද” කියලා පිලාත් දැන් යේසුස්ගෙන් අහනවා. පිලාත් තේරුම්ගත්ත දේ හරියි කියලා අඟවන්න යේසුස් කියන්නේ මෙහෙමයි. “මම රජෙක් කියා ඔබ අසන ප්‍රශ්නයෙන්ම පැහැදිලියි. මා ඉපදුණෙත් මේ ලෝකයේ මිනිසුන් අතරට පැමිණියෙත් සත්‍යය ගැන සාක්ෂි දැරීමටයි. සත්‍යයට පක්ෂව සිටින සියලුදෙනාම මගේ හඬට සවන් දෙනවා.”—යොහන් 18:37.

“මාර්ගයත් සත්‍යයත් ජීවනයත් මමයි” කියලා යේසුස් තෝමස්ට කියලා තිබුණා. දැන් පිලාත්ටත් දැනගන්න ලැබෙනවා යේසුස් පොළොවට ආවේ “සත්‍යය” ගැන සාක්ෂි දරන්න කියලා. ඔව්, විශේෂයෙන්ම යේසුස් ආවේ තමන්ගේ රාජ්‍යය ගැන සාක්ෂි දරන්න. ජීවිතයට හානියක් වුණත් ඒ සත්‍යය ගැන ඔහු නොකියා ඉන්නේ නැහැ. පිලාත් යේසුස්ගෙන් අහනවා ‘සත්‍යය, ඒ මොකක්ද’ කියලා. ඒත් ඒකට උත්තරයක් දැනගන්න ඔහුට කිසිම උවමනාවක් නැහැ. විනිශ්චයක් දෙන්න දැන් ලැබිලා තියෙන තොරතුරු හොඳටම ඇති කියලා පිලාත් තේරුම් අරගෙනයි ඉන්නේ.—යොහන් 14:6; 18:38.

එළියේ රැස් වෙලා ඉන්න නායක පූජකයන්ට සහ සෙනඟට පිලාත් කියනවා “මේ මිනිසා අපරාධකාරයෙක් කියා මට නම් පෙනෙන්නේ නැහැ” කියලා. ඒක කියද්දී යේසුස් ඔහු ළඟ ඉන්න ඇති. පිලාත් කියපු දේට කේන්ති ගන්න සෙනඟ කියන්නේ මෙහෙමයි. “ඔහු යූදා දේශය පුරාම නොයෙක් දේවල් උගන්වමින් ජනයාව උසිගන්වනවා. ඔහු පටන්ගත්තේ ගලීලයෙන්. දැන් ඔහු මේ ප්‍රදේශයටත් ඇවිල්ලා.”—ලූක් 23:4, 5.

යුදෙව්වන් කටයුතු කරන විදිහ පිලාත්ට අදහාගන්නවත් බැහැ. නායක පූජකයන් සහ වැඩිමහල්ලන් දිගින් දිගටම කෑගහද්දී පිලාත් යේසුස්ගෙන් අහනවා “ඔබට විරුද්ධව ඔවුන් කොපමණ චෝදනා නඟනවාද කියා ඔබට ඇසෙනවාද” කියලා. (මතෙව් 27:13) ඒත් යේසුස් කිසිම දෙයක් කියන්නේ නැහැ. බොරු චෝදනා මැද ඔහු හරිම සන්සුන්ව ඉන්න එක ගැන පිලාත් පුදුම වෙනවා.

යේසුස් උගන්වන්න ‘පටන්ගත්තේ ගලීලයෙන්’ කියලා යුදෙව්වන් කියපු නිසා පිලාත් තේරුම්ගන්නවා යේසුස් ගලීලයේ කෙනෙක් කියලා. ඒ නිසා යේසුස්ට විනිශ්චයක් දෙන වගකීම ගලීලයේ පාලකයා වන හෙරොද් අන්තිපස්ට (මහා හෙරොද්ගේ පුතාට) පවරන්න පුළුවන් කියලා ඔහු හිතනවා. පාස්කුව සමරන්න ඔහුත් දැන් යෙරුසලමට ඇවිත් ඉන්න නිසා පිලාත් යේසුස්ව ඔහු වෙතට යවනවා. ඔහු තමයි යොහන් බව්තීස්තගේ හිස ගසා දාන්න අවසර දුන්නේ. යේසුස් කරන ආශ්චර්යයන් ගැන හෙරොද්ට දැනගන්න ලැබුණාම ඔහු හිතුවේ යොහන් මළවුන්ගෙන් නැඟිටලා කියලයි.—ලූක් 9:7-9.

යේසුස්ව දැකගන්න ලැබෙන එක ගැන හෙරොද් දැන් ඉන්නේ පුදුම සතුටකින්. ඒ යේසුස්ට උදව් කරන්නවත් ඔහුට විරුද්ධව නඟලා තියෙන චෝදනාවන් ඇත්තද කියලා විභාග කරන්නවත් නෙවෙයි. ඒ වෙනුවට ඔහු ආසාවෙන් ඉන්නේ “යම් හාස්කමක් දැකගැනීමටයි.” (ලූක් 23:8) හැබැයි ඔහුගේ බලාපොරොත්තු සුන් වෙනවා. අඩුම තරමින් ඔහු අහන ප්‍රශ්නවලටවත් යේසුස් උත්තර දෙන්නේ නැහැ. දැන් හෙරොද් සහ ඔහුගේ සෙබළුන් යේසුස්ට “අවමන් කරනවා.” (ලූක් 23:11) ඔවුන් යේසුස්ට දිදුලන වස්ත්‍රයක් අන්දලා ඔහුට සමච්චල් කරනවා. අන්තිමේදී හෙරොද් ආයෙත් ඔහුව පිලාත් ළඟට යවනවා. මේ සිද්ධිය වෙන්න කලින් සෑහෙන කාලයක් තිස්සේ හෙරොද් සහ පිලාත් අතරේ ලොකු සතුරුකමක් තිබුණා. හැබැයි දැන් නම් ඔවුන් හොඳ මිතුරන් වෙනවා.

යේසුස් ආවාම පිලාත් නායක පූජකයන්ව, පාලකයන්ව සහ ජනයාව කැඳවලා මෙහෙම කියනවා. “ඔබ මේ මිනිසා මා ළඟට ගෙනාවේ ඔහු ජනයාව කැරැල්ලකට උසිගන්වන කෙනෙක් කියා මට පවසමිනුයි. හැබැයි, ඔබ සියලුදෙනා ඉදිරියෙහිම මම ඔහුව සෝදිසි කර බැලුවත් මම කියන්නේ ඔහුට විරුද්ධව ඔබ එල්ල කරන චෝදනාවලට කිසිම පදනමක් නැති බවයි. ඇත්තෙන්ම හෙරොද්ටත් බැරි වුණා ඔහුගේ යම් වරදක් සොයාගන්න. මොහුව ආපසු අප ළඟට එවා තිබෙන්නේ ඒ නිසයි. ඇත්තෙන්ම මේ මිනිසා මරණ දඬුවම ලබන්න තරම් කිසිම දෙයක් කර නැහැ. ඒ නිසා මම ඔහුට දඬුවමක් දී නිදහස් කරන්න කැමතියි.”—ලූක් 23:14-16.

පූජකයන් යේසුස්ව තමන් අතට භාර දෙන්නේ ඔහු ගැන තියෙන ඊර්ෂ්‍යාව නිසයි කියලා පිලාත් තේරුම්ගන්නවා. ඒ නිසා තමයි ඔහු යේසුස්ව නිදහස් කරන්න හදන්නේ. ඒ විතරක් නෙවෙයි පිලාත් විනිශ්චයාසනයේ ඉද්දී ඔහුගේ බිරිඳ මේ පණිවිඩය ඔහුට එවනවා. “ඒ ධර්මිෂ්ඨ මිනිසා සම්බන්ධ කාරණයට කොහොමටවත් හවුල් වෙන්න එපා. මම මේ දේ කියන්නේ මා සිහිනයක් දුටු නිසයි. එය මගේ හිතට හුඟක් වධ දෙනවා.”—මතෙව් 27:19.

නිර්දෝෂ කෙනෙක් වන යේසුස්ව නිදහස් කරන්න පිලාත්ට පුළුවන් වෙයිද?

රැස් වෙලා ඉන්න සෙනඟට පිලාත් මෙහෙම කිව්වා. ‘ඔහුට විරුද්ධව ඔබ එල්ල කරන චෝදනාවලට කිසිම පදනමක් නැහැ. ඇත්තෙන්ම හෙරොද්ටත් බැරි වුණා ඔහුගේ යම් වරදක් සොයාගන්න.’ (ලූක් 23:14, 15) ඔහු කියපු දේට සෙනඟගෙන් හොඳ ප්‍රතිචාරයක් ලැබුණේ නැහැ. ඒ නිසා යේසුස්ව නිදහස් කරන්න වෙන විදිහක් හිතන පිලාත් දැන් මෙහෙම කියනවා. “පාස්කු කාලයේදී සාමාන්‍යයෙන් සිරිතක් හැටියට මම එක මිනිසෙක්ව නිදහස් කරනවා. ඒ නිසා මම යුදෙව්වරුන්ගේ රජුව නිදහස් කරනවාට ඔබ කැමතිද?”—යොහන් 18:39.

කොල්ලකරුවෙක්, ආණ්ඩුවට විරුද්ධව කැරලි ගහපු කෙනෙක් වගේම මිනී මරුවෙක් වුණු බරබ්බස් ගැන පිලාත් දන්න නිසා ඔහු මෙහෙම අහනවා. “ඔබ කැමති මා කවුරු නිදහස් කර දෙනවාටද? බරබ්බස්වද නැත්නම් ක්‍රිස්තුස් ලෙස හඳුන්වන යේසුස්වද?” නායක පූජකයන්ගේ උසිගැන්වීම නිසා මිනිසුන් හැමෝම යේසුස් වෙනුවට බරබ්බස්ව නිදහස් කරන්න කියලා ඉල්ලනවා. ඒ නිසා පිලාත් ආයෙත් වතාවක් අහනවා “ඔබ කැමති වන්නේ මේ දෙදෙනාගෙන් මා කවුරු නිදහස් කරනවාටද” කියලා. මේ වතාවෙත් මිනිසුන් කියන්නේ “බරබ්බස්ව” නිදහස් කරන්න කියලයි.—මතෙව් 27:17, 21.

අධෛර්යයට පත් වුණු පිලාත් “එසේනම් ක්‍රිස්තුස් ලෙස හඳුන්වන යේසුස්ට මම මොනවාද කරන්නේ” කියලා අහනවා. මිනිසුන් කියන්නේ “ඔහුව කණුවක ඇණ ගසා මරන්න” කියලයි. (මතෙව් 27:22) ඇත්තටම ඔවුන් මේ ඉල්ලන්නේ කිසිම වරදක් නොකරපු මිනිසෙක්ව මරා දාන්න කියලයි. ඒ නිසා තමයි පිලාත් දැන් මෙහෙම කියන්නේ. “ඇයි? මේ මිනිසා කළ වරද මොකක්ද? මරණයට පත් කරන්න තරම් කිසි වරදක් ඔහු කර නැහැ. මම කැමතියි ඔහුට දඬුවමක් දී ඔහුව නිදහස් කරන්න.”—ලූක් 23:22.

ඒ ගැන කිසිම තැකීමක් කරන්නේ නැති මිනිසුන් එකා මෙන් කෑගසන්නේ “ඔහුව කණුවක ඇණ ගසා මරන්න” කියලයි. (මතෙව් 27:23) ඒත් යේසුස් අපරාධකාරයෙක්වත් මිනී මරුවෙක්වත් නෙවෙයි. මීට දවස් පහකට කලින් යෙරුසලමේ අය රජෙක් හැටියට පිළිගත්ත කිසිම වරදක් නොකරපු කෙනෙක්. ආගමික නායකයන්ගේ උසිගැන්වීම නිසයි මිනිසුන් ඔහුව මරන්න කියලා ඉල්ලන්නේ. යේසුස්ගේ ගෝලයන් මේ වෙලාවේ ඉන්නවා නම් ඔවුන් දැන් කිසිවක් කරකියාගන්න බැරි තත්වයකට පත් වෙලා ඇති.

තමා දරපු උත්සාහයෙන් කිසිම පලක් වුණේ නැහැ කියලා පිලාත් තේරුම්ගන්නවා. මිනිසුන් අතරේ කෝලහලයක් ඇති වේගෙන එනවා කියලා තේරුම්ගන්න ඔහු සෙනඟට පෙනෙන්න වතුර අරන් අත් හෝදමින් මෙහෙම කියනවා. “මේ මිනිසාගේ මරණයට මම නම් වග කියන්නේ නැහැ. එයට වග කිව යුත්තේ ඔබයි.” ඒත් තමන්ගේ අදහස වෙනස් කරගන්නවා වෙනුවට මිනිසුන් කියන්නේ “ඔහුගේ මරණයේ වගකීම අපිත් අපේ දරුවනුත් භාරගන්න සූදානම්” කියලයි.—මතෙව් 27:24, 25.

ආණ්ඩුකාරයා විදිහට පිලාත් මේ කාරණයේදී හරි තීරණයක් දෙන්න ඕනේ. ඒත් එහෙම කරනවා වෙනුවට මිනිසුන්ව සතුටු කරන ඔහු බරබ්බස්ව නිදහස් කරනවා. ඊටපස්සේ යේසුස්ගේ ඇඳුම් ඉවත් කරලා ඔහුට කසයෙන් තලන්න කියලා අණ කරනවා.

අමානුෂික විදිහට යේසුස්ට පහර දුන්නාට පස්සේ සෙබළුන් ඔහුව ආණ්ඩුකාරයාගේ මාලිගාවට එක්කගෙන යනවා. හේවායන් යේසුස්ගේ පිට වස්ත්‍රය ගලවලා රජවරුන්ට අන්දන තද රතු පාට සළුවක් ඔහුට අන්දනවා. ඊටපස්සේ කටු අතුවලින් ඔටුන්නක් යේසුස්ගේ ඔළුවට දානවා. ඔහුගේ දකුණු අතට බට දණ්ඩක් දීලා ඔහුට සමච්චල් කරමින් ඔවුන් කියන්නේ “යුදෙව්වරුන්ගේ රජ්ජුරුවෙනි, ඔබට සුබ දවසක් වේවා” කියලයි. (මතෙව් 27:28, 29) ඒ විතරක් නෙවෙයි ඔවුන් යේසුස්ට කෙළ ගහලා කම්මුලටත් ගහනවා. ඔහු අතේ තියෙන බට දණ්ඩ අරන් ඒකෙන් ඔහුගේ ඔළුවට ගහද්දී ‘ඔටුන්නේ’ තියෙන කටු හිස පසාරු කරගෙන යනවා.

ඒ වගේ තත්වයක් මැද වුණත් යේසුස් කලබල වෙන්නේ නැතුව සන්සුන්ව ඉන්න එක ගැන පුදුම වෙන පිලාත් ආයෙත් සැරයක් සෙනඟට මෙහෙම කියනවා. “මෙන්න මම නැවතත් ඔහුව ඔබ ඉදිරියට ගෙනෙනවා. ඇත්තෙන්ම ඔහු තුළ කිසි වරදක් මට පෙනෙන්නේ නැහැ.” ලේ ගලමින් ඉන්න යේසුස්ව සෙනඟ ඉදිරියට ගෙනාවාම ඔවුන්ගේ හිත් වෙනස් වෙයි කියලා පිලාත් හිතන්න ඇද්ද? කිසිම හිතක් පපුවක් නැති සෙනඟ ඉදිරියේ යේසුස් ඉද්දී “බලන්න! මේ තමයි ඒ මිනිසා” කියලා පිලාත් කියනවා.—යොහන් 19:4, 5.

යේසුස් කොච්චර තුවාල වෙලා හිටියත් ඔහු හිටියේ හරිම සන්සුන් විදිහට. ඒක පිලාත්ට පැහැදිලිවම පෙනුණා. ඔහු සෙනඟට කියපු දෙයින් ඔහුට යේසුස් ගැන දුකක් වගේම ගෞරවනීය හැඟීමක් දැනෙන්න ඇති කියලා හිතන්න පුළුවන්.

දරුණු විදිහට වධ දීලා සමච්චලයට ලක් කරපු යේසුස්ව නිදහස් කරන්න පිලාත් වෑයම් කළත් නායක පූජකයන්ගේ සහ මිනිසුන්ගේ හිත් පොඩ්ඩක්වත් උණු වෙන්නේ නැහැ. ඔවුන් දිගටම කෑගසන්නේ “ඔහුව කණුවක ඇණ ගසා මරා දමන්න! ඔහුව කණුවක ඇණ ගසා මරා දමන්න” කියලයි. ඒත් පිලාත් මෙහෙම කියනවා. “මට නම් ඔහුගේ කිසි වරදක් පෙනෙන්නේ නැහැ. ඔහුව කණුවක ඇණ ගසා මරා දමන්න ඔබට අවශ්‍ය නම් ඔබම ඔහුව ගෙන ගොස් ඒ දේ කරන්න.”—යොහන් 19:6.

ආණ්ඩුවට විරුද්ධව කැරලිගහනවා කියන චෝදනාව මත යේසුස්ව මරන්න යුදෙව්වන් උත්සාහ කළත් පිලාත් ඒකට එකඟ වෙන්නේ නැහැ. ඒ නිසා මන්ත්‍රණ සභාවේදී යේසුස්ට විරුද්ධව නඟපු චෝදනාව ගැන දැන් ඔවුන් පිලාත්ට මෙහෙම කියනවා. “තමා දෙවිගේ පුත්‍රයා කියා ඔහු පවසා තිබෙනවා. අපේ නීතියට අනුව එය මරණ දණ්ඩනය ලැබිය යුතු වරදක්.” (යොහන් 19:7) දැන් තමයි පිලාත් මුල්ම වතාවට ඒ ගැන දැනගන්නේ.

ආපහු මාලිගාවට යන පිලාත් කල්පනා කරන්නේ වධ හිංසා මැද සන්සුන්ව හිටිය යේසුස්ව නිදහස් කරන්න පුළුවන් විදිහක් ගැනයි. යේසුස් ගැන තමන්ගේ බිරිඳ දැකපු හීනයත් ඔහු දන්නවා. (මතෙව් 27:19) යේසුස් තමන්වම “දෙවිගේ පුත්‍රයා” විදිහට හැඳින්නුවා කියලා යුදෙව්වන් කරන චෝදනාව ගැන පිලාත්ට කොහොම හැඟෙනවා ඇද්ද? යේසුස් ගලීලයේ කෙනෙක් කියලා ඔහු දන්නවා. (ලූක් 23:5-7) ඒත් ඔහු යේසුස්ගෙන් අහනවා “ඔබ ආවේ කොහෙන්ද” කියලා. (යොහන් 19:9) යේසුස්, දෙවි කෙනෙක්ද කියලත් පොළොවට එන්න කලින් ඔහු වෙන කොහේ හරි ජීවත් වුණාද කියලත් පිලාත් හිතනවා ඇද්ද?

තමන් රජෙක් කියලත් තමන්ගේ රාජ්‍යය මේ ලෝකයට සම්බන්ධ නැහැ කියලත් යේසුස් පිලාත්ට කියලා තිබුණා. ඒ නිසා ඔහු දැන් කිසිම දෙයක් කියන්නේ නැහැ. ඒක තමන්ට කරන අගෞරවයක් කියලා හිතන පිලාත් කේන්තියෙන් මෙහෙම අහනවා. “ඔබ මට කිසිවක් කියන්නේ නැද්ද? ඔබව නිදහස් කර හරින්නත් ඔබව කණුවක ඇණ ගසා මරා දමන්නත් මට බලය තිබෙන බව ඔබ දන්නේ නැද්ද?”—යොහන් 19:10.

යේසුස් පිළිතුරු දෙන්නේ මෙහෙමයි. “ඔබට ඉහළින් ඒ සඳහා අවසර ලබා දී තිබුණේ නැත්නම් මට විරුද්ධව කිසිම පියවරක් ගන්න ඔබට බලයක් නැහැ. නමුත් ඔබට මාව භාර දුන් මිනිසාගේ පාපය ඊටත් වඩා බරපතළයි.” (යොහන් 19:11) යේසුස් ඒ දේ කියන්න ඇත්තේ නිශ්චිත පුද්ගලයෙක්ව මනසේ තියාගෙන නෙවෙයි. කායෆස් සහ ඔහුට සහාය දීපු අය වගේම යූදස් ඉස්කාරියොත් පිලාත්ට වඩා බරපතළ වරදක් කරලා තියෙනවා කියලයි ඔහු අදහස් කළේ.

යේසුස් හැසිරෙන විදිහ සහ කතා කරන විදිහ නිසාත් ඔහු දෙවි කෙනෙක් වෙන්න ඇති කියලා පිලාත්ට ලොකු බයක් දැනෙන නිසාත් පිලාත් ආපහු ඔහුව නිදහස් කරන්න මඟක් හොයනවා. හැබැයි යුදෙව්වන් කියන මේ දේ ගැනත් ඔහුට බයක් දැනෙනවා. “ඔබ මේ මිනිසාව නිදහස් කර හැරියොත් ඔබ සීසර්ගේ මිත්‍රයෙක් වන්නේ නැහැ. රජෙක් හැටියට පත් වෙන්න උත්සාහ කරන ඕනෑම කෙනෙක් වැඩ කරන්නේ සීසර්ට විරුද්ධවයි.”—යොහන් 19:12.

ආපහු යේසුස්ව පිටතට ගෙනෙන පිලාත් විනිශ්චයාසනයේ ඉඳගෙන “බලන්න, ඔබේ රජ” කියලා සෙනඟට කියනවා. ඒත් සෙනඟ කෑගහන්නේ “ඔහුව මරා දමන්න! මරා දමන්න! ඔහුව කණුවක ඇණ ගසා මරා දමන්න” කියලයි. “මම ඔබේ රජුව කණුවක ඇණ ගසා මරා දමනවාට ඔබ කැමතිද” කියලා පිලාත් ඔවුන්ගෙන් අහනවා. සෑහෙන කාලයක් තිස්සේ යුදෙව්වන් රෝම පාලකයන්ගෙන් පීඩා විඳිමින් හිටියත් නායක පූජකයන් කියන්නේ “අපට සීසර් හැර වෙන කිසි රජෙක් නැහැ” කියලයි.—යොහන් 19:14, 15.

යේසුස්ව මරන්න කියලා යුදෙව්වන් දිගටම ඉල්ලන නිසා බියගුලු පිලාත් අන්තිමේදී ඒකට එකඟ වෙනවා. ඒ නිසා හේවායන් යේසුස්ගේ තද රතු පාට සළුව ගලවලා ඔහුගේ පිට වස්ත්‍රය අන්දනවා. යේසුස්ව ගෙනියද්දී ඔහුගේ වධකණුව අරන් යන්න දෙන්නෙත් ඔහුටමයි.

මේ වෙද්දී නීසාන් 14වෙනි සිකුරාදා දවසේ උදේ වරුවත් ගෙවිලා ඉවරයි. බ්‍රහස්පතින්දා උදේ ඉඳන් යේසුස්ට ටිකකටවත් නිදාගන්න ලැබුණේ නැහැ. ඔහු දරුණු හිංසා පීඩාවලටත් මුහුණ දුන්නා. හොඳටම වෙහෙසිලා ඉන්න යේසුස්ට දැන් වධකණුව උස්සගෙන යන එක ලෙහෙසි නැහැ. ඒ නිසා හේවායන් පාරේ ගමන් කරමින් ඉන්න සීමොන්ට වධකණුව අරන් යන්න කියලා බල කරනවා. ඔහු අප්‍රිකාවේ සිරේනිය නම් නුවරේ උපන් කෙනෙක්. යේසුස් පසුපසින් ගමන් කරන හුඟක් අය ශෝකයෙන් පපුවට ගසාගනිමින් හඬා වැලපෙනවා.

යේසුස් හඬා වැලපෙන ස්ත්‍රීන්ට කියන්නේ මෙහෙමයි. “යෙරුසලමේ දූවරුනි, මා නිසා හඬන්න එපා. ඒ වෙනුවට ඔබටයි ඔබේ දරුවන්ටයි සිදු වෙන්න යන දේ ගැන හඬා වැලපෙන්න. මන්ද ඉදිරියේදී ඉතා අසීරු කාලයක් එයි. එදාට මිනිස්සු, ‘දරුවන් බිහි නොකළ, දරුවෙකුට කිරි නොදුන් වඳ ස්ත්‍රියට සතුටු විය හැකියි’ කියා පවසයි. ඒ කාලයේදී ඔවුහු කඳු ළඟට ගොස්, ‘අප පිට වැටෙන්න’ කියාත් හෙල්වලට, ‘අපව වසාගන්න’ කියාත් පවසයි. මන්ද ගස හොඳට වැඩී තිබෙන විට ඔවුන් මෙසේ හඬා වැලපෙනවා නම් එය වියළී යන විට ඔවුන් මොනව නොකරයිද?”—ලූක් 23:28-31.

යේසුස් කතා කළේ යුදෙව් ජාතිය ගැනයි. ඔව්, මැරිලා යන්න ඔන්න මෙන්න තියෙන ගහකට යේසුස් ඔවුන්ව සමාන කරනවා. යේසුස් ඔවුන් අතර ඉන්න නිසාත්, යුදෙව්වන් අතරින් සමහර අය ඔහු ගැන විශ්වාසය තියලා තියෙන නිසාත් තමයි තවමත් ඒ ගහේ පණ ටිකක් හරි තියෙන්නේ. ඒ අයත් නැති වුණාට පස්සේ ඉතුරු වෙන්නේ දෙවියන් එක්ක කිසිම සම්බන්ධයක් නැති සෙනඟක් විතරයි. ඔවුන් මැරුණු ගහකට සමානයි. ඉදිරියේදී යුදෙව්වන්ව විනාශ කරන්න දෙවියන් රෝම හමුදාවට ඉඩහැරියාම ඔවුන්ට මොන තරම් වැලපෙන්න වෙයිද!

යේසුස්ව දැන් අරගෙන යන්නේ තවත් කොල්ලකරුවන් දෙන්නෙක්වත් වධකණුවල ඇණ ගහන්න නියමිත තැනකට. ගොල්ගොතා නැත්නම් හිස්කබල විදිහට හඳුන්වන ඒ තැනට නගරයේ ඉඳන් ඒ හැටි දුරක් නැහැ. “යම් දුරක” ඉඳන් වුණත් එතැන වෙන දේ හොඳින් දැකගන්න පුළුවන්.—මාක් 15:40.

මරණ දඬුවම ලැබිලා තියෙන තුන්දෙනාගේම ඇඳුම් ගලවලයි තියෙන්නේ. සුවඳ ලාටුවලින් හදපු මත්ද්‍රව්‍යයක් සහ තිත්ත යමක් මිශ්‍ර කරපු වයින් දැන් ඔවුන්ට බොන්න දෙනවා. පෙනෙන විදිහට යෙරුසලමේ ස්ත්‍රීන් හදලා තියෙන මේ මිශ්‍රණය වේදනා නාශකයක් නිසා මරණ දඬුවම ලැබෙන අයට ඒවා දෙන එකට රෝමවරුන් විරුද්ධ නැහැ. කොහොමවුණත් ඒකේ රස දැනුණාම යේසුස් ඒක ප්‍රතික්ෂේප කරනවා. මේ වගේ අසීරු තත්වයක් මැද සිහිකල්පනාවෙන් ඉඳිමින් මරණය දක්වාම දෙවියන්ට විශ්වාසවන්තව ඉන්නයි ඔහුට ඕනේ.

හේවායන් දැන් යේසුස්ව කණුවක දිගා කරනවා. (මාක් 15:25) ඔවුන් යේසුස්ගේ අත් සහ කකුල්වලට ඇණ ගහද්දී ඒවා ඔහුගේ මාංස පේශීන් පසාරු කරගෙන යනවා. වධකණුව කෙළින් කරද්දී ශරීරයේ බරට ඇණ ගහපු තැන්වල තුවාල ඇදිලා ඉරෙනවා. ඔහුට මොන තරම් වේදනාවක් දැනෙනවා ඇද්ද! ඒත් යේසුස්, හේවායන් ගැන කේන්ති ගන්නේ නැහැ. ඔවුන් වෙනුවෙන් යාච්ඤා කරමින් ඔහු කියන්නේ මෙහෙමයි. “පියාණෙනි, ඔවුන්ට සමාව දෙන්න. මන්ද ඔවුන් කරන දේ ගැන ඔවුන්ට අවබෝධයක් නැහැ.”—ලූක් 23:34.

සාමාන්‍යයෙන් රෝමවරු මරණ දඬුවම ලැබෙන අය කරපු අපරාධය ගැන සටහනක් කණුවේ එල්ලනවා. යේසුස්ගේ සටහනේ පිලාත් ලියන්නේ “යුදෙව්වරුන්ගේ රජු වන නාසරෙත් නුවරේ යේසුස්” කියලයි. හෙබ්‍රෙව්, ලතින් සහ ග්‍රීක කියන භාෂා තුනෙන්ම ඒක ලියලා තියෙන නිසා හැම කෙනෙක්ටම වගේ ඒක කියවන්න පුළුවන්. යේසුස්ව මරන්න කියලා ඉල්ලපු යුදෙව්වන් ගැන පිලාත්ගේ හිතේ මොන තරම් තරහක් තියෙනවාද කියලා ඒකෙන් පැහැදිලියි. නායක පූජකයන් ඔහුට මෙහෙම කියනවා. “යුදෙව්වරුන්ගේ රජ කියා ලියන්න එපා. ‘මම යුදෙව්වරුන්ගේ රජු’ කියා ඔහු පැවසූ බව ලියන්න.” හැබැයි මේ වතාවේදී පිලාත් ඔවුන්ට කෙළින්ම කියනවා “මම ලියූ දේ වෙනස් කරන්නේ නැහැ” කියලා.—යොහන් 19:19-22.

කේන්තියෙන් පුපුරන පූජකයන් මන්ත්‍රණ සභාවේදී ඔවුන් නඟපු බොරු චෝදනාව දැන් ආපහු මතක් කරනවා. ඒ නිසා මේ ස්ථානයෙන් එහා මෙහා යන අය තම හිස් වනවනා යේසුස්ට නින්දා කරමින් කියන්නේ මෙහෙමයි. “දේවමාලිගාව කඩා දමා දවස් තුනකින් ගොඩනඟන බව ඔබ කිව්වා නේද? ඉතින් ඔබට පුළුවන්නේ ඔය වධකණුවෙන් බැහැලා එන්න.” නායක පූජකයන් සහ නීතිය පිටපත් කරන අයත් මෙහෙම කතා වෙනවා. “ඔහු ඊශ්‍රායෙලයෙහි රජු වන ක්‍රිස්තුස් නේද? ඔහු දැන් වධකණුවෙන් බැස ආවොත් අපි අනිවාර්යයෙන්ම ඔහුව විශ්වාස කරනවා.” (මාක් 15:29-32) ඒ විතරක් නෙවෙයි වධකණුවල එල්ලලා ඉන්න කොල්ලකරුවන් දෙන්නත් කිසිම වරදක් නොකරපු යේසුස්ට නින්දා කරනවා.

රෝම හේවායන් හතරදෙනාත් දැන් යේසුස්ට සමච්චල් කරන්න පටන්ගන්නවා. ඇඹුල් වයින් බොන ඔවුන් වධකණුවේ ඉන්න යේසුස්ටත් වයින් බොන්න එන්න කියලා කවටකම් කරනවා. වධකණුවේ තියෙන සටහන නිසා යේසුස්ට සමච්චල් කරන ඔවුන් කියන්නේ “ඔබ යුදෙව්වරුන්ගේ රජු නම් ඔබ ඔබවම ගලවාගන්න” කියලයි. (ලූක් 23:36, 37) මාර්ගයත් සත්‍යයත් ජීවනයත් තමන් කියලා ඔප්පු කරපු මිනිසාටයි ඔවුන් මේ හැම දෙයක්ම කරන්නේ. ඒත් යේසුස් ඒ හැම දෙයක්ම දරාගන්නවා. අවට ඉන්න යුදෙව්වන්ටවත් තමන්ට නින්දා කරන රෝම හේවායන්ටවත් දෙපැත්තේ ඉන්න අපරාධකරුවන්ටවත් ඔහු දොස් කියන්නේ නැහැ.

හේවායන් හතරදෙනා යේසුස්ගේ පිට වස්ත්‍රය කොටස් හතරකට වෙන් කරලා දාදු දාලා ඒවා බෙදාගන්නවා. යේසුස්ගේ ඇතුල් වස්ත්‍රය හුඟක් වටින එකක්. ‘ඒ වස්ත්‍රයට මූට්ටුවක් තිබුණේ නැහැ. එය උඩ සිට පහළට මුළුමනින්ම එකට වියා තිබුණා.’ ඒ නිසා හේවායන් කතා වෙන්නේ “අපි එය ඉරන්නේ නැතුව එය අයිති වෙන්නේ කාටද කියා තීරණය කරන්න දාදු දමමු” කියලයි. ඔවුන් ඒ විදිහට ක්‍රියා කරන නිසා “ඔවුහු මාගේ පිට වස්ත්‍ර තමන් අතරේ බෙදාගෙන මාගේ ඇඳුම් සඳහා දාදු දැමුවෝය” කියලා බයිබලයේ සඳහන් අනාවැකිය ඉටු වෙනවා.—යොහන් 19:23, 24; ගීතාවලිය 22:18.

ටික වෙලාවකට පස්සේ එක අපරාධකරුවෙක් තේරුම්ගන්නවා යේසුස් ඇත්තටම රජෙක් වෙන්න ඇති කියලා. ඒ නිසා අනිත් අපරාධකරුට තදින් කතා කරන ඔහු මෙහෙම කියනවා. “මේ මිනිසාට සමාන දඬුවමක් ඔබට ලැබිලත් ඔබට දෙවි සඳහා කිසි ගරුබියක් නැද්ද? අපට ලැබුණු විනිශ්චය සාධාරණයි. අපට දැන් ලැබිලා තිබෙන්නේ අප කළ දේවලට ලැබිය යුතු දඬුවමයි. නමුත් මේ මිනිසා කිසි වරදක් කර නැහැ.” ඊළඟට ඔහු යේසුස්ට කියනවා “ඔබේ රාජ්‍යයට ඔබ ඇතුල් වන විට මාව අමතක කරන්න එපා” කියලා.—ලූක් 23:40-42.

එතකොට යේසුස් ඔහුට කියන්නේ “ඔබ මා සමඟ පාරාදීසයේ සිටින බවට අද මම ඔබට සහතිකවම පොරොන්දු වෙනවා” කියලයි. (ලූක් 23:43) යේසුස් නියෝජිතයන්ට දීපු පොරොන්දුවට වඩා ඒක වෙනස්. මොකද ඔහු ඔවුන්ට පොරොන්දු වුණේ තමන් එක්ක දෙවිගේ රාජ්‍යයේ සිංහාසනවල ඉඳගන්න අවස්ථාව දෙනවා කියලයි. (මතෙව් 19:28; ලූක් 22:29, 30) යෙහෝවා දෙවියන් ආදම් සහ ඒවටත් ඔවුන්ගෙන් පැවතෙන අයටත් පාරාදීස පොළොවක ජීවත් වෙන්න අවස්ථාව දීපු එක ගැන යුදෙව් අපරාධකරුවා දැනගෙන ඉන්න ඇති. දැන් මරණය අද්දර ඉන්න ඔහුට පාරාදීසය ගැන බලාපොරොත්තුවක් තියාගන්න පුළුවන්.

දැන් වෙලාව දවල් 12යි. එකපාරටම ‘මුළු පොළොවම අන්ධකාරයෙන් වැහිලා’ යනවා. පැය තුනක් පුරාම මේ අන්ධකාරය පවතිනවා. (මාක් 15:33) මෙහෙම වෙන්නේ සූර්ය ග්‍රහණයක් නිසා කියලා නම් හිතන්න බැහැ. මොකද සාමාන්‍යයෙන් සූර්ය ග්‍රහණයක් ඇති වෙන්නේ නව සඳ තියෙන කාලවලදියි. ඒක පවතින්නේ විනාඩි කිහිපයකට විතරයි. හැබැයි පාස්කුව පවත්වන මේ කාලයේ දකින්න ලැබෙන්නේ පුර සඳ. ඒ විතරක් නෙවෙයි මේ අන්ධකාරය පැය තුනක්ම පවතිනවා. ඒ නිසා මේ අන්ධකාරය ඇති වෙන්න සලස්වලා තියෙන්නේ දෙවියන් කියලා පැහැදිලියි.

යේසුස්ට සමච්චල් කරපු අයට දැන් කොහොම හැඟෙනවා ඇද්ද! මේ වෙලාවේ යේසුස්ගේ අම්මා, සලෝමි, මරියා මග්දලේනා සහ යේසුස්ගේ නියෝජිතයෙක් වූ කුඩා යාකොබ්ගේ අම්මා වන මරියාත් යේසුස්ගේ වධකණුව ළඟට එනවා.

“වධකණුව” ළඟට වෙලා දුක් වෙන යේසුස්ගේ අම්මා ළඟින්ම ඉන්නේ යේසුස්ගේ නියෝජිතයෙක් වන යොහන්. ඉපදුණු දවසේ ඉඳන් හරිම ආදරෙන් හදා වඩා ගත්ත දරුවා දැන් ලොකු වේදනාවකින් ඉන්නවා දකිද්දී මරියාට දැනෙන්නේ ‘දිග කඩුවක් හදවත පසාරු කරගෙන’ යනවා වගෙයි. (යොහන් 19:25; ලූක් 2:35) දරාගන්න බැරි තරම් වේදනාවකින් හිටියත් යේසුස් අම්මා ගැන හිතනවා. ලොකු වෑයමක් දරමින් හිසෙන් සංඥා කරලා යොහන්ව පෙන්වන ඔහු මරියාට කියන්නේ “මේ සිටින්නේ ඔබේ පුතා” කියලයි. ඒ විදිහටම මරියාව පෙන්වන ඔහු “මේ සිටින්නේ ඔබේ මව” කියලා යොහන්ට කියනවා.—යොහන් 19:26, 27.

මේ වෙනකනුත් යේසුස්ගේ සහෝදරයන් කවුරුත් යේසුස් ගැන විශ්වාසය තියලා නැහැ. ඒ නිසා තමයි මේ වෙද්දී වැන්දඹුවක් වෙලා ඉන්න අම්මාව තමන් වැඩියෙන්ම ආදරය කරන නියෝජිතයාට ඔහු භාර දෙන්නේ. අම්මාව රැකබලා ගන්න එක ගැන වගේම නමස්කාර කටයුතු කරගෙන යන්න ඇයට උදව් කරන එක ගැනත් ඔහු හිතලා තියෙනවා. ඒක අපි හැමෝටම කදිම ආදර්ශයක් නෙවෙයිද!

“මට තිබහයි” කියලා යේසුස් දැන් කියද්දී බයිබලයේ සඳහන් අනාවැකියකුත් ඉටු වෙනවා. (යොහන් 19:28; ගීතාවලිය 22:15) සමහරවිට මේ වෙද්දී අන්ධකාරයත් නැති වේගෙන යනවා ඇති. යේසුස් ඔහුගේ පියාට කොයි තරම් විශ්වාසවන්තව ඉන්නවාද කියන එක දැන් උපරිමයෙන් සෝදිසියට ලක් වෙනවා. ඔහුට දැනෙන්නේ පියාගේ රැකවරණය තමන්ට අහිමි වුණා කියලයි. ඔහු මහත් හඬින් “ඒලී, ඒලී, ලාමා සබක්තානි” කියලා කියනවා. ඔහු ඒ විදිහට අහන්නේ “මාගේ දෙවියනි, මාගේ දෙවියනි, ඔබ මාව අත්හැරියේ ඇයි” කියලයි. ඒක හරියට තේරෙන්නේ නැති නිසා සමහර අය කියනවා “අර බලන්න! ඔහු එලියාට අඬගසනවා” කියලා. ඒ අයගෙන් කෙනෙක් දුවගෙන ගිහින් ස්පොන්ජියක් හා සමාන දෙයක් අරන් ඒක ඇඹුල් වයින්වල පොඟවලා බට දණ්ඩක ගහලා යේසුස්ට බොන්න දෙනවා. එතකොට තවත් අය කියන්නේ “ඔහුට ඉන්න හරින්න! එලියා ඇවිත් ඔහුව කණුවෙන් පහතට ගනීවිද කියා බලමු” කියලයි.—මාක් 15:34-36.

“ඔබ පැවසූ සෑම දෙයක්ම මම ඉටු කළා” කියලා යේසුස් දැන් කියනවා. (යොහන් 19:30) පොළොවට ඇවිත් ඉටු කරන්න පියාණන් යේසුස්ට භාර දීපු හැම වැඩ කොටසක්ම යේසුස් ඉටු කරලයි තියෙන්නේ. අවසාන වතාවට ඔහු කියන්නේ “පියාණෙනි, මගේ ජීවිතය ඔබේ අතේ” කියලයි. (ලූක් 23:46) දෙවියන් තමන්ට ආයෙත් ජීවත් වෙන්න අවස්ථාව දෙනවා කියන පූර්ණ විශ්වාසය ඇතුව තමන්ගේ ජීවිතය දෙවිට භාර දෙන යේසුස් දැන් අවසන් හුස්ම හෙළනවා.

ඒත් එක්කම ඇති වෙන්නේ දරුණු භූමිකම්පාවක්. ප්‍රතිඵලයක් විදිහට පර්වත පැළෙනවා. සොහොන් ගෙවල් විවර වෙලා මළ මිනී එළියට විසි වෙනවා. ඒ දේවල් දකින මිනිසුන් “ශුද්ධ නුවරට” ඇවිත් ඒ ගැන දැනුම් දෙනවා.—මතෙව් 12:11; 27:51-53.

යේසුස් මැරුණු මොහොතේම දේවමාලිගාවේ ශුද්ධස්ථානය සහ අතිශුද්ධස්ථානය වෙන් කරන දැවැන්ත තිරය ඉහළ ඉඳන් පහළටම ඉරෙනවා. තමන්ගේ පුතාව මරපු අය ගැන දෙවිට මොන තරම් කේන්තියක් දැනෙනවාද කියලා ඒකෙන් පැහැදිලියි. ඒ වගේම අතිශුද්ධස්ථානයෙන් නියෝජනය වෙන ස්වර්ගයට යන මඟ දැන් විවර වෙලා කියලත් ඒකෙන් පැහැදිලි වෙනවා.—හෙබ්‍රෙව් 9:2, 3; 10:19, 20.

මේ දේවල් ගැන මිනිසුන්ට මොන තරම් බයක් දැනෙන්න ඇද්ද! යේසුස්ගේ මරණ දඬුවම ක්‍රියාත්මක කිරීම භාරව හිටිය හමුදා නිලධාරියා කියනවා “ඇත්තෙන්ම මේ දෙවිගේ පුත්‍රයාමයි” කියලා. (මාක් 15:39) තමන් දෙවිගේ පුතා කියලා යේසුස් කියාගන්න බවට එල්ල වෙලා තිබුණු චෝදනාව ගැන පිලාත් විභාග කරද්දී ඔහුත් එතැන ඉන්න ඇති. යේසුස් ධර්මිෂ්ඨයි කියලත් ඔහු දෙවිගේ පුතා කියලත් පිළිගන්න දැන් ඔහුට ඇති තරම් සාක්ෂි ලැබිලයි තියෙන්නේ.

සිද්ධ වෙන දේවල් දැකපු තවත් හුඟක් අය ඒ ගැන දැනෙන ශෝකයත් ලැජ්ජාවත් නිසා “පපුවට ගසාගනිමින්” තමන්ගේ නිවෙස්වලට යනවා. (ලූක් 23:48) යම් දුරක ඉඳන් සිද්ධ වෙන දේවල් දිහා බලන් ඉන්න අය අතරේ යේසුස් දේශනා කරන්න ගිය සංචාරවලට හවුල් වුණු ස්ත්‍රීන් හුඟදෙනෙකුත් ඉන්නවා. දැන් සිද්ධ වුණු පුදුමාකාර දේවල් යේසුස්ගේ ගෝලයන් වුණු ඔවුන්ගේ හිත්වලට තදින්ම බලපානවා.

නීසාන් 14වෙනි සිකුරාදා දවසේ දවල් වරුවත් ගෙවීගෙන යනවා. හිරු බැස ගියාම උදා වෙන නීසාන් 15වෙනි දවස සබත් දවසක්. මේ වෙද්දී යේසුස් මිය ගිහින් තිබුණත් ඔහු ළඟ ඉන්න කොල්ලකරුවන් දෙන්නාට නම් තවමත් පණ තියෙනවා. දෙවියන් දීපු නීතියට අනුව මළ සිරුරු ‘මුළු රාත්‍රිය පුරාම කණුවල එල්ලා තියන්න’ බැහැ. ‘දවසක් ඇතුළත’ ඒවා තැන්පත් කරන්න ඕනේ.—ද්විතීය කතාව 21:22, 23.

සබත් දවසේදී කිසිම වැඩක් කරන්න බැරි නිසා ඒ දවසට අවශ්‍ය දේවල් කලින් දවසේ ලෑස්ති කරනවා. ඒ නිසා තමයි සබතට කලින් දවස සූදානම් වීමේ දවස විදිහට හඳුන්වන්නේ. නීසාන් 15වෙනිදායින් ඇරඹෙන මුහුන් නොදැමූ රොටි උත්සවයේ පළවෙනි දවස සැලකුවේ සබත් දවසක් විදිහට. (ලෙවී කතාව 23:5, 6) මේ වතාවේ ඒ දවස වැටිලා තියෙන්නේ යුදෙව්වන් සාමාන්‍යයෙන් සබතක් විදිහට සලකපු සෙනසුරාදා දවසකමයි. ඒ අනුව නීසාන් 14වෙනි සිකුරාදා හිරු බැස යෑමත් එක්කම ඇරඹෙන සබත මහ සබතක් වෙනවා.—යොහන් 19:31.

ඒ නිසා යුදෙව්වන් පිලාත්ට කියනවා යේසුස්වත් අනිත් කොල්ලකරුවන් දෙන්නාවත් ඉක්මනින්ම මරන්න කියලා. සාමාන්‍යයෙන් ඒක කරන්නේ කකුල් කඩා දැමීමෙනුයි. එහෙම කළාම හුස්ම ගන්න උදව්වක් විදිහට කකුල් දෙකෙන් වැර දාලා ශරීරය ඉහළට ඔසවන්න ඔවුන්ට බැරි වෙනවා. දැන් හේවායන් ඇවිත් කොල්ලකරුවන් දෙන්නාගේ කකුල් කඩනවා. හැබැයි මේ වෙද්දී යේසුස් මැරිලා නිසා ඔවුන් ඔහුගේ කකුල් කඩන්නේ නැහැ. ඒ නිසා ගීතාවලිය 34:20 සඳහන් මේ අනාවැකිය ඉටු වෙනවා. “ඔහු ධර්මිෂ්ඨයාගේ සෑම ඇටකටුවක්ම ආරක්ෂා කරයි. එයින් එකක්වත් නොබිඳෙයි.”

යේසුස් ඇත්තටම මැරිලාද කියලා දැනගන්න හේවායෙක් හෙල්ලයකින් ඔහුගේ ළයට පහළින් තියෙන පෙදෙසට අනිනවා. එතකොට ‘එතැනින් ලේත් වතුරත් පිටතට’ එනවා. (යොහන් 19:34) ‘ඔවුහු තම හෙල්ලයෙන් තුවාල කළ තැනැත්තා දෙස බලයි’ කියලා සඳහන් අනාවැකියත් දැන් ඉටු වෙනවා.—සෙකරියා 12:10.

අරිමාතිය නම් නුවරේ විසූ “ධනවතෙකු” වගේම මන්ත්‍රණ සභාවේ ප්‍රකට සාමාජිකයෙක් වන යෝසෙප් මේ වෙලාවේ මෙතැන ඉන්නවා. (මතෙව් 27:57) ‘දෙවිගේ රාජ්‍යය ගැන බලා සිටින’ ඔහුව හඳුන්වන්නේ “යහපත් සහ ධර්මිෂ්ඨ තැනැත්තෙක්” විදිහටයි. “යුදෙව්වරුන්ට ඇති බිය නිසා රහසින් යේසුස්ගේ ගෝලයෙකුව” සිටින ඔහු යේසුස්ට විරුද්ධව මන්ත්‍රණ සභාව ගත්ත ක්‍රියාමාර්ගයට අනුමැතිය දුන්නේ නැහැ. (ලූක් 23:50; මාක් 15:43; යොහන් 19:38) දැන් ඔහු ධෛර්යය වඩවාගෙන යේසුස්ගේ දේහය භාරගන්න පිලාත්ගෙන් අවසර ඉල්ලනවා. යේසුස් මිය ගිහින් කියලා හමුදා නිලධාරියාගෙන් ස්ථිර කරගත්තාට පස්සේ පිලාත් යෝසෙප්ගේ ඉල්ලීමට අවසර දෙනවා.

පිරිසිදු අනර්ඝ ලිනන් රෙදි අරන් එන යෝසෙප් යේසුස්ගේ දේහය කණුවෙන් පහළට අරන් ඔහුගේ දේහය ලිනන් රෙදිවලින් ඔතනවා. මුල්ම වතාවේදී රාත්‍රියක යේසුස්ව හමු වුණු නිකදේමස් ඒකට උදව් කරන්න ඇවිත්. (යොහන් 19:39) ඔහු සුවඳ ලාටු සහ අගිල් රාත්තල් සියයක් (කිලෝග්‍රෑම් 33ක්) විතර ගෙනල්ලා. යුදෙව්වන්ගේ සිරිතට අනුව දැන් යේසුස්ගේ දේහය සුවඳ ද්‍රව්‍ය එක්ක රෙදි පටිවලින් ඔතලයි තියෙන්නේ.

ළඟපාත තිබුණු පර්වතයක කපපු අලුත්ම සොහොන් ගෙයක් යෝසෙප්ට තියෙනවා. යේසුස්ව ඒකේ තැන්පත් කරන ඔවුන් ලොකු ගලකින් ඒකේ දොරකඩ වහනවා. ඔවුන් මේ හැම දෙයක්ම කඩිමුඩියේ කරන්නේ සබත් දවස ඇරඹෙන්න තව වැඩි වෙලාවක් නැති නිසයි. සමහරවිට යේසුස්ගේ දේහය සූදානම් කරන්න මරියා මග්දලේනාත් කුඩා යාකොබ්ගේ අම්මා වන මරියාත් උදව් කරන්න ඇති. ඔවුන් දැන් ඉක්මනින්ම නිවෙස් බලා යන්නේ සබත් දවසට පස්සේ දවසේ යේසුස්ගේ දේහයට ගල්වන්න අවශ්‍ය කරන “සුවඳ ද්‍රව්‍ය සහ සුවඳ තෙල් සූදානම් කිරීමටයි.”—ලූක් 23:56.

සබත් දවසේදී පිලාත් ළඟට යන නායක පූජකයන් සහ පරිසිවරු ඔහුට මෙහෙම කියනවා. “ඒ ප්‍රෝඩාකාරයා ජීවත්ව සිටියදී, ‘දවස් තුනකට පසු මාව මරණයෙන් නැඟිටුවනු ලබනවා’ කියා පැවසූ බව අපට මතක් වුණා. එමනිසා තුන්වෙනි දවස දක්වා සොහොන් ගෙය ආරක්ෂා කරන ලෙස අණ කරන්න. නැතහොත් සමහරවිට ඔහුගේ ගෝලයන් ඇවිත් ඔහුගේ දේහය සොරාගෙන ගොස්, ‘ඔහුව මරණයෙන් නැඟිටුවනු ලැබුවා’ කියා ජනයාට කියන්න පුළුවන්. එවිට මේ අවසන් වංචාව මුලින් සිදු වූ වංචාවටත් වඩා දරුණු වෙයි.” ඔවුන්ට පිළිතුරු දෙන පිලාත් “ඔබට මුරකරුවන් සිටිනවා නේද? ඉතින්, ගොස් ඔබට පුළුවන් විදිහට සොහොන ආරක්ෂා කරගන්න” කියලා කියනවා.—මතෙව් 27:63-65.

මරියා මග්දලේනා, යාකොබ්ගේ අම්මා වන මරියා සහ තවත් ස්ත්‍රීන් ඉරිදා උදෙන්ම යේසුස්ගේ දේහයට ගල්වන්න සුවඳ ද්‍රව්‍ය අරන් එනවා. ඔවුන් දැන් කතා වෙන්නේ “අපි කාට කියලද සොහොන් ගෙයි දොරකඩ තබා තිබෙන ගල පෙරළාගන්නේ” කියලයි. (මාක් 16:3) ඔවුන් එන්න කලින් භූමිකම්පාවක් ඇති වෙලා තියෙනවා. ඒ විතරක් නෙවෙයි දේවදූතයෙක් සොහොන් ගෙය වහලා තිබුණු ගලත් පෙරළලා දාලා. මුරකරුවනුත් පේන්න නැහැ. සොහොන් ගෙයත් හිස් වෙලා වගෙයි පෙනෙන්නේ.