නිනිවය කියන නගරයේ හිටියේ හුඟක් නරක මිනිස්සු. අනාගතවක්තෘවරයෙක් වන යෝනාට යෙහෝවා කිව්වා නිනිවයට ගිහින් ඒ සෙනඟ කරන නරක වැඩ නවත්තන්න කියන්න කියලා. ඒත් යෝනා ඒක කරන්නේ නැතුව තර්ෂිෂ්වලට යන නැවක නැඟලා ගියා.

හැබැයි අතරමඟදී ලොකු කුණාටුවක් ආවා. නැවේ හිටපු හැමෝම හුඟක් බය වුණා. ඒ අය එයාලාගේ දෙවිවරුන්ගෙන් ඇහුවා ‘ඇයි මෙහෙම වෙන්නේ’ කියලා. අන්තිමේදී යෝනා එයාලට මෙහෙම කිව්වා. ‘මේ කුණාටුව ඇති වුණේ මං නිසයි. යෙහෝවා දෙවියන් මට කරන්න කිව්ව වැඩක් මං කළේ නැහැ. මාව මුහුදට දාන්න. එතකොට කුණාටුව නතර වෙයි.’ ඒත් නැවේ හිටපු අය ඒකට කැමති වුණේ නැහැ. හැබැයි යෝනා බල කරපු නිසා එයාලා යෝනාව මුහුදට දැම්මා. එතකොටම කුණාටුව නැවතුණා.

මුහුදේ ගිලෙද්දී යෝනා යෙහෝවාට යාච්ඤා කළා. එතකොට යෙහෝවා ලොකු මාළුවෙක්ව එව්වා. ඒ මාළුවා යෝනාව ගිල්ලත් එයා මැරුණේ නැහැ. එයා මාළුවාගේ බඩේ ඉඳන් යෙහෝවාට පොරොන්දු වුණා ‘ඔබ කියන ඕනෙම දෙයක් කරන්නම්’ කියලා. යෝනා මාළුවාගේ බඩේ දවස් තුනක් හිටියාට පස්සේ මාළුවා මුහුදු වෙරළ ළඟට ඇවිත් යෝනාව කටෙන් එළියට දැම්මා. යෙහෝවා තමයි එහෙම කළේ.

යෙහෝවා යෝනාට ආයෙත් කිව්වා නිනිවයට යන්න කියලා. මේ පාර නම් යෝනා කීකරු වුණා. එයා නිනිවයට ගිහින් එහේ හිටිය මිනිස්සුන්ට කිව්වා “තව දවස් 40කින් නිනිවය විනාශ වෙනවා” කියලා. ඒත් සිද්ධ වුණේ හිතපු නැති දෙයක්. නිනිවයේ හිටපු හැමෝම යෝනා කියපු දේ අහලා නරක වැඩ කරන එක නැවැත්තුවා. නිනිවයේ රජ සෙනඟට කිව්වා ‘දෙවියන්ට යාච්ඤා කරලා, කරපු වැරදි ගැන දුක් වෙන්න, සමහරවිට ඔහු අපිට සමාව දෙයි’ කියලා. සෙනඟ දුක් වෙන හැටි දැකපු යෙහෝවා නිනිවය විනාශ කරන්නේ නැහැ කියලා තීරණය කළා.

නිනිවය විනාශ කළේ නැති එක ගැන යෝනා හිටියේ තරහෙන්. පොඩ්ඩක් හිතන්න. යෙහෝවා යෝනා ගැන ඉවසුවා, එයාට සමාව දුන්නා. ඒත් යෝනා නිනිවයේ අයට එහෙම සැලකුවේ නැහැ. එයා නගරෙන් පිට තැනක තිබුණු ලබු වැලක් යටට වෙලා නගරේ දිහා බලාගෙන හිටියා. ඒ ලබු වැල මැරුණාම යෝනාට හුඟක් කේන්ති ගියා. යෙහෝවා යෝනාට මෙහෙම කිව්වා. ‘ඔයා නිනිවයේ මිනිස්සු ගැන හිතනවාට වඩා මේ ලබු වැල ගැන හිතනවා. එයාලා ගැන දුකක් දැනිලා මං එයාලට සමාව දුන්නා.’ ඒකෙන් දෙවියන් පෙන්නුවේ ඕනෙම ගහකට වඩා නිනිවයේ හිටපු මිනිස්සු ඔහුට වටිනවා කියන එකයි.

ඇසිරියාවේ සෙනකෙරිබ් රජ ඊශ්‍රායෙල් රාජ්‍යය අල්ලගත්තා. එයාට ඕනෙ වුණා යූදා රාජ්‍යයත් අල්ලගන්න. එයා යූදා රාජ්‍යයේ නගර එකින් එක අල්ලගන්න පටන්ගත්තා. එයාට වැඩියෙන්ම ඕනෙ වුණේ යෙරුසලම අල්ලගන්න. ඒත් යෙහෝවා යෙරුසලම ආරක්ෂා කරනවා කියලා සෙනකෙරිබ් දැනගෙන හිටියේ නැහැ.

ඒ කාලේ යූදා රාජ්‍යයේ රජ වෙලා හිටියේ හෙසකියා. යෙරුසලම අල්ලගන්න එපා කියලා එයා සෙනකෙරිබ්ට හුඟක් සල්ලි දුන්නා. ඒත් එයා යෙරුසලම අල්ලගන්න එක නතර කළේ නැහැ. එයා එවපු හමුදාව යෙරුසලමට ළං වෙද්දී එහේ හිටපු අය හුඟක් බය වුණා. ඒත් හෙසකියා එයාලට මෙහෙම කිව්වා. ‘බය වෙන්න එපා. ඇසිරියානු හමුදාව බලවත් තමයි. ඒත් එයාලව පරද්දන්න යෙහෝවා අපිට උදව් කරයි.’

සෙනකෙරිබ් රබ්ෂාකේ නිලධාරියාව යෙරුසලමට එවලා සෙනඟව සවුත්තු කරලා මෙහෙම කිව්වා. ‘ඔයාලට උදව් කරන්න යෙහෝවාට බැහැ. හෙසකියාට රැවටෙන්න එපා. කිසිම දෙවියෙක්ටවත් බැහැ ඔයාලව අපෙන් බේරගන්න.’

කරන්න ඕනෙ දේ හෙසකියා යෙහෝවාගෙන් ඇහුවාම ඔහු මෙහෙම කිව්වා. ‘රබ්ෂාකේට බය වෙන්න එපා. සෙනකෙරිබ්ට යෙරුසලම අල්ලගන්න ලැබෙන්නෑ.’ ඊටපස්සේ සෙනකෙරිබ් හෙසකියාට ලියුම් එවලා කිව්වා ‘දැන් යටත් වෙන්න, ඔයාලව බේරගන්න යෙහෝවාට බෑ’ කියලා. හෙසකියා මෙහෙම යාච්ඤා කළා. ‘අනේ යෙහෝවා, අපිව බේරගන්න. එතකොට ඔබ තමයි සැබෑ දෙවියන් කියලා හැමෝම දැනගනියි.’ යෙහෝවා කිව්වා ‘ඇසිරියාවේ රජට යෙරුසලමට එන්න ලැබෙන්නෑ. මං මගේ නගරේ ආරක්ෂා කරනවා’ කියලා.

යෙරුසලම අල්ලගන්න පුළුවන් කියලයි සෙනකෙරිබ් හිතුවේ. ඒත් දවසක් රෑ ඇසිරියානු හමුදාව කඳවුරේ ඉද්දී යෙහෝවා දූතයෙක්ව එවලා සෙබළු 1,85,000ක් මරලා දැම්මා. සෙනකෙරිබ්ට වුණේ පැරදිලා හිස් අතින් හැරිලා යන්න. යෙහෝවා පොරොන්දු වුණා වගේම හෙසකියාවයි යෙරුසලමයි ආරක්ෂා කළා. ඔයා යෙරුසලමේ හිටියා නම් ඔයාත් යෙහෝවාව විශ්වාස කරයිද?