දවසක් නෙබුකද්නෙෂර් රජ හුඟක් බය හිතෙන හීනයක් දැක්කා. ඒකේ තේරුම දැනගන්න උගත් මිනිස්සුන්ට කතා කළත් කාටවත් ඒකේ තේරුම කියන්න පුළුවන් වුණේ නැහැ. ඒ නිසා රජ දානියෙල්ට කතා කළා.

දැකපු හීනේ රජ දානියෙල්ට විස්තර කළේ මෙහෙමයි. ‘මං ලොකු ගහක් දැක්කා. ඒක අහස උසටම වැවුණා. පොළොවේ කොහේ ඉඳන් බැලුවත් ඒක පෙනුණා. ඒ ගහේ හරිම ලස්සන කොළත් හුඟක් පලතුරුත් තිබුණා. සත්තු ඒ ගහ යටට ඇවිත් හාන්සි වෙලා හිටියා. ගහේ අතුවල කුරුල්ලන් කූඩු හදාගත්තා. එකපාරටම දේවදූතයෙක් ඇවිත් මෙහෙම කිව්වා. “ගහ කපලා දාන්න. අතුත් කපන්න. හැබැයි කඳ උගුල්ලන්න එපා. ඒක යකඩ පටිවලිනුත් තඹ පටිවලිනුත් බඳින්න. මනුස්ස හිතක් වෙනුවට ඒ ගහට කැලේ සතෙක්ගේ හිතක් දෙයි. කාලවල් හතක්ම ඒ විදිහට පහු වෙයි. සැබෑ පාලකයා දෙවියන් කියලත් ඔහු කැමති ඕනෙම කෙනෙක්ට රාජ්‍යය භාර දෙන්න ඔහුට පුළුවන් කියලත් හැමෝම දැනගනියි.”’

යෙහෝවා ඒ හීනේ තේරුම දානියෙල්ට පැහැදිලි කරලා දුන්නාම එයා හුඟක් බය වෙලා රජට මෙහෙම කිව්වා. ‘රජතුමෙනි, ඔබ දැකපු දේ ඔබේ සතුරන්ට වුණා නම් හොඳයි. ඒත් ඒ දේ වෙන්නේ ඔබට. ඔබ දැකපු ගහෙන් නියෝජනය වෙන්නේ ඔබව. ඔබේ රජකම නැති වෙනවා. කැලේ සතෙක් වගේ ඔබත් තණකොළ කයි. හැබැයි ගහේ කඳ ඉතුරු කරන්න කියලා දේවදූතයා කියපු නිසා ඔබට ආයෙත් රජකම ලැබෙනවා.’

අවුරුද්දකට පස්සේ දවසක් නෙබුකද්නෙෂර් රජ එයාගේ මාලිගාවේ සඳලුතලයේ ඉඳන් බැබිලෝනිය දිහා බලාගෙන ඇවිද ඇවිද ඉද්දී එයාටම මෙහෙම කියාගත්තා. ‘මං හදපු මේ නගරය කොච්චර ලස්සනද! මං කොච්චර බලවත්ද!’ ඒ වෙලාවේ ස්වර්ගයෙන් ආපු කඩහඬක් මෙහෙම කිව්වා. ‘නෙබුකද්නෙෂර්! රාජ්‍යය ඔබෙන් අයින් කරලා තියෙනවා.’

එතකොටම නෙබුකද්නෙෂර්ට කල්පනාව නැතුව ගිහින් කැලේ සතෙක් වගේ හැසිරෙන්න පටන්ගත්තා. එයාව රජමාලිගාවෙන් පන්නපු නිසා එයාට ජීවත් වෙන්න වුණේ සත්තුත් එක්ක. එයාගේ කොණ්ඩේ රාජාලියෙක්ගේ පිහාටු වගේ දිගට වැවුණා. නියපොතු කුරුල්ලෙක්ගේ නියපොතු වගේ වැවුණා.

අවුරුදු හතකට පස්සේ නෙබුකද්නෙෂර්ට ආපහු කල්පනාව ලැබුණාම යෙහෝවා එයාට රජකම දුන්නා. එයා ඒ ගැන කිව්වේ මෙහෙමයි. ‘ස්වර්ගයේ රජ වන යෙහෝවාට මං ප්‍රශංසා කරනවා. යෙහෝවා තමයි සැබෑ පාලකයා කියලා දැන් මං දන්නවා. ඔහු උඩඟු අයව පහත් කරනවා. ඔහු කැමති ඕනෙම කෙනෙක්ට පාලනය භාර දෙන්න ඔහුට පුළුවන්.’

බැබිලෝනියේ අලුත් රජ විදිහට බෙල්ෂසර් පත් වුණා. දවසක් රෑ රජ පවත්වපු ලොකු උත්සවයකට විශේෂ අමුත්තන් දාහකට ආරාධනා කළා. එදා ආපු අමුත්තන්ට සංග්‍රහ කළේ නෙබුකද්නෙෂර් රජ දේවමාලිගාවෙන් ගෙනාපු යෙහෝවාට අයිති රත්තරන් කෝප්පවල. ඒගොල්ලෝ ඒවාවලින් බීලා එයාලාගේ බොරු දෙවිවරුන්ටත් ප්‍රශංසා කළා. එකපාරටම මිනිසෙක්ගේ අතකින් බිත්තියේ මොනවාදෝ වචන වගයක් ලියන්න පටන්ගත්තා.

බෙල්ෂසර් රජ හොඳටම බය වෙලා එයාගේ පේන කියන්නන්ට කතා කරලා මෙහෙම කිව්වා. ‘කවුරු හරි මේ වචනවල තේරුම කිව්වොත් මම ඒ කෙනාව මේ රාජ්‍යයේ තුන්වෙනි තැනට පත් කරනවා.’ ඉතින් හැමෝම ඒ වචනවල තේරුම හොයන්න හැදුවත් එයාලට ඒක කරන්න බැරි වුණා. එතකොට රැජින ඇවිත් මෙහෙම කිව්වා. ‘දානියෙල් කියලා කෙනෙක් ඉන්නවා. එයා තමයි නෙබුකද්නෙෂර් රජගේ හීන තෝරලා දුන්නේ. එයාට පුළුවන් වෙයි මේ වචනවල තේරුම කියන්න.’

දානියෙල්, රජ ඉස්සරහට ආවා. බෙල්ෂසර් රජ දානියෙල්ට කිව්වා ‘ඔයා මේ වචනවල තේරුම කිව්වොත් මං රත්තරන් මාලයක් දීලා ඔයාව මේ රාජ්‍යයේ තුන්වෙනි තැනටත් පත් කරනවා’ කියලා. එතකොට දානියෙල් මෙහෙම කිව්වා. ‘රජතුමෙනි, මට තෑගි එපා. මං මේ වචනවල තේරුම කියන්නම්. ඔබේ තාත්තා නෙබුකද්නෙෂර් වැඩ කළේ හරිම උඩඟු විදිහට. හැබැයි යෙහෝවා එයාගේ උඩඟුකම නැති කළා. ඒ හැම දෙයක්ම දැන දැනත් ඔබ දේවමාලිගාවේ බඩු පාවිච්චි කරලා යෙහෝවාට අගෞරව කළා. ඒ නිසයි ඔහු මේ වචන ලිව්වේ: මෙනේ, මෙනේ, තෙකෙල් සහ පර්සීන්. ඒකෙන් කියන්නේ මේදියවරුයි පර්සියානුවරුයි ඇවිත් ඔයාගේ රාජ්‍යය යටත් කරගෙන ඔයාව රජකමෙන් අයින් කරලා දානවා කියන එකයි.’

බැබිලෝනිය කාටවත්ම යටත් කරගන්න බැහැ වගෙයි පේන්න තිබුණේ. නගරය වටේ ලොකු බිත්ති වගේම ගැඹුරු ගඟකුත් තිබුණා. හැබැයි එදා රෑ මේදියවරුයි පර්සියානුවරුයි බැබිලෝනිය වට කළා. පර්සියාවේ සයිරස් රජ නගරය ඇතුළට යන්න පුළුවන් වෙන විදිහට ගඟේ වතුර වෙන දිහාවකට හැරෙව්වා. ඊටපස්සේ රජ එයාගේ හමුදාවත් එක්ක ගඟේ බැහැගෙන යද්දී හැම ගේට්ටුවක්ම ඇරලයි තිබුණේ. හමුදාව ලේසියෙන්ම නගරය අල්ලගෙන රජවත් මැරුවා. ඊටපස්සේ සයිරස් රජ බැබිලෝනියේ පාලකයා වුණා.

දවසක් සයිරස් රජ මෙහෙම නිවේදනය කළා. ‘යෙහෝවා මට කිව්වා යෙරුසලමේ දේවමාලිගාව ආයෙත් හදන්න කියලා. කැමති ඕනම කෙනෙක්ට ඒකට උදව් කරන්න පුළුවන්.’ යෙරුසලම විනාශ වෙලා අවුරුදු 70කට පස්සේ යෙහෝවා පොරොන්දු වුණු විදිහටම ඊශ්‍රායෙල්වරුන්ට එයාලාගේ ගෙවල්වලට යන්න පුළුවන් වුණා. නෙබුකද්නෙෂර් දේවමාලිගාවෙන් ගෙනාපු හැම දෙයක්ම සයිරස් රජ ආයෙත් දුන්නා.