සොහොන් ගෙය ඇතුළේ යේසුස් නැහැ කියලා දකින ස්ත්‍රීන්ට කොහොම හැඟෙනවා ඇද්ද! මරියා මග්දලේනා දැන් දුවගෙන යන්නේ ඒ ගැන ‘සීමොන් පේතෘස්ට සහ යේසුස් බොහෝ සෙයින් ප්‍රේම කළ අනික් ගෝලයා’ වන යොහන්ට දැනුම් දෙන්න. (යොහන් 20:2) ඒ අතරතුරේදී සොහොන් ගෙය ළඟ ඉන්න අනිත් ස්ත්‍රීන් දේවදූතයෙක්ව දකිනවා. සොහොන් ගෙය ඇතුළේ ‘සුදු සළුවක් ඇඳන්’ ඉන්න තවත් දේවදූතයෙක් ඉන්නවා.—මාක් 16:5.

එක දේවදූතයෙක් ඔවුන්ට කියන්නේ මෙහෙමයි. “බිය නොවන්න. ඔබ සොයන්නේ කණුවක ඇණ ගසා මරා දැමූ යේසුස්ව බව මම දන්නවා. ඔහු මෙහි නැහැ. ඔහු කී ලෙසම ඔහුව මරණයෙන් නැඟිටුවා තිබෙනවා. ඇවිත් ඔහුව තැන්පත් කළ ස්ථානය බලන්න. දැන් ඉක්මනින් ගොස් ඔහුව මරණයෙන් නැඟිටුවනු ලැබූ බව ඔහුගේ ගෝලයන්ට කියන්න. ඔහු ඔවුන්ට කලින් ගලීලයට යනවා කියාත් කියන්න.” (මතෙව් 28:5-7) “බියෙන් වෙවුලමින් මහත් පුදුමයකින්” ඒ ස්ත්‍රීන් දැන් දුවගෙන යන්නේ මේ ගැන ගෝලයන්ට දැනුම් දෙන්නයි.—මාක් 16:8.

පේතෘස්ව සහ යොහන්ව මුණගැහුණාම මරියා හති දාගෙන මෙහෙම කියනවා. “කවුරු හරි අපේ ස්වාමීන්ව සොහොන් ගෙයින් ඉවත් කර තිබෙනවා. ඔහුව කොහේ තැන්පත් කළාද කියා අපි දන්නේ නැහැ.” (යොහන් 20:2) ඒ වෙලාවේම ඔවුන් දෙන්නා සොහොන් ගෙය ළඟට දුවගෙන යනවා. පේතෘස්ට වඩා වේගයෙන් දුවන යොහන් තමයි මුලින්ම එතැනට යන්නේ. එළියේ ඉඳන් එබිලා බලද්දී ඇතුළේ තියෙන රෙදි පටි දැක්කත් ඔහු ඇතුළට යන්නේ නැහැ.

හැබැයි පේතෘස් නම් ඇතුළටම යනවා. එතැන තියෙන රෙදි පටි වගේම යේසුස්ගේ හිසට දාලා තිබුණු රෙදිකඩත් ඔහු දකිනවා. දැන් යොහන් ඇතුළට ආවාම මරියා කියපු දේ ඇත්තක් කියලා ඔහුත් තේරුම්ගන්නවා. තමන් නැවත නැඟිටිනවා කියලා යේසුස් කලින් කියලා තිබුණත් ඒක දැන් ඇත්තටම වෙලා කියලා මේ අය තේරුම්ගන්නේ නැහැ. (මතෙව් 16:21) අන්තිමේදී ඔවුන් නිවෙස්වලට යනවා. හැබැයි ආපහු සොහොන් ගෙය ළඟට එන මරියා එතැනටම වෙලා ඉන්නවා.

සොහොන් ගෙට ආපු අනිත් ස්ත්‍රීන් ගෝලයන්ව හොයාගෙන යද්දී ඔවුන්ට යේසුස්ව මුණගැහෙනවා. “සුබ දවසක් වේවා” කියලා ඔහු කිව්වාම ඒ ස්ත්‍රීන් ඔහුගේ පාද අල්ලාගෙන ‘දණින් වැටෙනවා.’ එතකොට යේසුස් ඔවුන්ට කියන්නේ මෙහෙමයි. “බිය නොවන්න! ගොස් මගේ සහෝදරයන්ට මේ ගැන දන්වන්න. එවිට ඔවුන් ගලීලයට යයි. එහිදී මාව දකින්න ඔවුන්ට අවස්ථාවක් ලැබෙයි.”—මතෙව් 28:9, 10.

භූමිකම්පාව ඇති වුණු වෙලේ සොහොන් ගෙය ළඟ හිටිය සෙබළුන් දේවදූතයන්ව දැකලා “බියෙන් වෙවුලන්න” පටන්ගත්තා. ඔවුන් ‘බිම ඇද වැටුණේ’ හරියට මිය ගිය අය වගෙයි. පියවි සිහියට ආවාම ඔවුන් නගරයට ගිහින් “සිදු වූ සෑම දෙයක්ම නායක පූජකයන්ට” කිව්වා. නායක පූජකයන් සහ වැඩිමහල්ලන් ඒ ගැන සාකච්ඡා කරලා සෙබළුන්ට අල්ලසක් දෙන්න තීරණය කළා. ඔවුන් සෙබළුන්ට කිව්වේ ඇත්ත වසං කරලා මෙහෙම කියන්න කියලයි. “ඔහුගේ ගෝලයන් රාත්‍රියෙහි ඇවිත් අප නිදා සිටියදී ඔහුගේ දේහය සොරාගෙන ගියා.”—මතෙව් 28:4, 11, 13.

රෝම සෙබළෙක් රාජකාරිය අතරතුරේදී නිදාගන්නවා කියන්නේ මරණ දඬුවම ලැබෙන තරම් බරපතළ වරදක්. ඒක හොඳින්ම දන්න නායක පූජකයන් මෙහෙමත් කියනවා. “මේ ගැන [නිදාගෙන සිටියා කියන බොරු කතාව] ආණ්ඩුකාරයාට ආරංචි වුණොත් අපි ඔහු සමඟ එය බේරුමක් කරගන්නම්. ඔබට කරදරයක් වෙන්න අපි ඉඩ දෙන්නේ නැහැ.” (මතෙව් 28:14) ඒකට එකඟ වෙන සෙබළුන් අල්ලස් අරන් ඔවුන් කියපු දේ ඒ විදිහටම කරනවා. ප්‍රතිඵලයක් විදිහට යේසුස්ගේ දේහය ගැන ගොතපු බොරුව යුදෙව්වන් අතරේ පැතිරෙනවා.

මරියා මග්දලේනා අඬමින් තවමත් ඉන්නේ සොහොන් ගෙය ළඟ. ඇය සොහොන් ගෙට එබිලා බලද්දී සුදු වස්ත්‍ර ඇඳගත්ත දේවදූතයන් දෙන්නෙක්ව දකිනවා. එක් කෙනෙක් ඉන්නේ යේසුස්ගේ ඔළුව තිබුණු පැත්තේ. අනිත් කෙනා ඉන්නේ යේසුස්ගේ කකුල් තිබුණු පැත්තේ. ඔවුන් දැන් මරියාගෙන් අහනවා “ඔබ හඬන්නේ ඇයි” කියලා. ඇය පිළිතුරු දෙන්නේ මෙහෙමයි. “කවුරු හරි මගේ ස්වාමීන්ව අරගෙන ගිහිල්ලා. ඔවුන් ඔහුව දැන් කොහේ තැන්පත් කළාද කියා මම දන්නේ නැහැ.” ඇය හැරිලා බැලුවාම තවත් කෙනෙක්ව ඇය දකිනවා. ඔහු අහන්නේ “ඔබ හඬන්නේ ඇයි? ඔබ සොයන්නේ කාවද” කියලයි. ඔහු උයනේ සේවකයෙක් කියලා හිතන මරියා කියන්නේ මෙහෙමයි. “මහත්මයාණෙනි, ඔබ ඔහුව ගෙන ගියා නම් ඔහුව තැන්පත් කළේ කොහේද කියා මට කියන්න. එතකොට මට පුළුවන් ඔහුව රැගෙන යන්න.”—යොහන් 20:13-15.

ඇත්තටම දැන් මරියා කතා කරන්නේ නැවත නැඟිටලා ඉන්න යේසුස් එක්ක. ඒත් ඇය ඒ බව දන්නේ නැහැ. කොහොමවුණත් “මරියා” කියලා ඔහු කියද්දී ඒ යේසුස් කියලා තේරුම්ගන්නා ඇය හද පිරි සතුටින් “රබ්බෝනි” (ගුරුතුමනි) කියලා කියනවා. යේසුස් ස්වර්ගයට යයිද කියලා බය වෙන ඇය ඔහුව අල්ලාගන්නවා. යේසුස් දැන් ඇයට කියන්නේ මෙහෙමයි. “මම දැන්මම පියාණන් ළඟට යන්නේ නැහැ. ඒ නිසා මාව දැන් අතහරින්න. දැන් මෙතැනින් පිටත් වී මගේ සහෝදරයන් ළඟට ගිහින්, ‘මම මගේ පියාණන් හා ඔබේ පියාණන් ළඟටත් මගේ දෙවි හා ඔබේ දෙවි ළඟටත් යනවා’ කියා ඔවුන්ට කියන්න.”—යොහන් 20:16, 17.

මේ ගැන කියන්න මරියා දැන් නියෝජිතයන් සහ ගෝලයන් රැස් වෙලා ඉන්න තැනට දුවගෙන යනවා. ඇය ඔවුන්ට කියන්නේ “මම අපේ ස්වාමීන්ව දැක්කා” කියලයි. (යොහන් 20:18) ඇය කියපු දේත් යේසුස්ව දැකපු අනිත් ස්ත්‍රීන් කියපු දේත් ඔවුන් සලකන්නේ ‘විකාර දේවල්’ විදිහටයි.—ලූක් 24:11.

නීසාන් 16වෙනි ඉරිදා දවසේ ගෝලයන් ඉන්නේ හරිම දුකින්. යේසුස්ගේ දේහය සොහොන් ගෙයි නැත්තේ ඇයි කියලා ඒ අයට හිතාගන්න බැහැ. (මතෙව් 28:9, 10; ලූක් 24:11) ක්ලෙයෝපස් සහ තවත් ගෝලයෙක් දැන් යෙරුසලමේ ඉඳන් කිලෝමීටර් 11ක විතර දුරකින් තියෙන එම්මාවුස්වලට යනවා.

ඔවුන් කතා වෙන්නේ සිද්ධ වෙලා තියෙන දේවල් ගැනයි. අතරමඟදී තවත් කෙනෙක් ඔවුන්ට එකතු වෙනවා. “ඔබ මෙතරම් වේලාවක් කතා කරමින් යන්නේ මොනව ගැනද” කියලා ඔහු ඇහුවාම ක්ලෙයෝපස් පිළිතුරු දෙන්නේ මෙහෙමයි. “ඔබ කතා කරන්නේ හරියට පිට ගමකින් ඇවිත් කිසි කෙනෙක් එක්ක කතාබහ නොකර තනියෙන් වාසය කරන කෙනෙක් වගෙයි. මේ දිනවල යෙරුසලමේ සිදු වූ දේවල් ගැන ඔබට ආරංචි වුණේ නැද්ද?” එතකොට ඔහු අහනවා “මොන දේවල්ද” කියලා.—ලූක් 24:17-19.

“අපි කතා කළේ නාසරෙත් නුවරින් පැමිණි යේසුස් ගැනයි” කියලා ඔවුන් කියනවා. ඊටපස්සේ ඔවුන් මෙහෙමත් කියනවා. “අප සිතාගෙන සිටියේ ඊශ්‍රායෙල් සෙනඟට ගැලවීම ලබා දෙන්න නියමිත තැනැත්තා ඔහු කියායි.”—ලූක් 24:19-21.

දැන් ඔවුන් දෙන්නා සිද්ධ වුණු දේවල් ගැන ඔහුට විස්තර කරනවා. යේසුස්ව තැන්පත් කරපු සොහොන් ගෙය ළඟට ගිය ස්ත්‍රීන් සොහොන් ගෙය හිස් වෙලා කියලා දැකපු එක ගැනත් යේසුස් නැවත නැඟිටලා කියලා දේවදූතයන් ඒ ස්ත්‍රීන්ට කියපු එක ගැනත් ඔවුන් කියනවා. ඒ වගේම සොහොන් ගෙය ළඟට ගිය තවත් අය “ස්ත්‍රීන් පැවසූ ආකාරයටම” සොහොන් ගෙය හිස්ව තියෙනවා දැක්කා කියලත් ඔවුන් කියනවා.—ලූක් 24:24.

සිද්ධ වෙලා තියෙන්නේ මොනවාද කියලා මේ ගෝලයන් දෙන්නා හරියටම තේරුම් අරන් නැහැ. ඔවුන් එක්ක ඉන්න අනිත් කෙනා දැන් ඔවුන්ව නිවැරදි කරමින් මෙහෙම කියනවා. “ඔබට කිසිම දෙයක් තේරුණේ නැද්ද? අනාගතවක්තෘවරුන් පැවසූ දේවල් විශ්වාස කරන්න ඔබ මැළි වන්නේ ඇයි? ක්‍රිස්තුස් තේජසට පත් වෙන්න නම් ඒ සෑම දුකක්ම ඔහුට අනිවාර්යයෙන්ම විඳින්න සිදු වෙනවා.” (ලූක් 24:25, 26) ඊටපස්සේ ශුද්ධ ලියවිල්ලේ ක්‍රිස්තුස් ගැන තියෙන හුඟක් දේවල් ඔහු ඔවුන්ට පැහැදිලි කරනවා.

ටික වෙලාවකින් ඔවුන් තුන්දෙනාම එම්මාවුස් නගරයට ළං වෙනවා. තවත් දේවල් ගැන දැනගන්න තියෙන උවමනාව නිසා ගෝලයන් දෙන්නා ඔහුට කියනවා “දැන් හොඳටම හවස් වී ඇති නිසා අපත් සමඟ නැවතී සිටින්න” කියලා. ඒකට එකඟ වෙන ඔහු ඔවුන් එක්ක නතර වෙනවා. කෑම කන්න කලින් ඔහු දෙවිට ස්තුති කරලා රොටි කඩලා ඔවුන්ට දෙනවා. දැන් ඔවුන් තේරුම්ගන්නවා ඒ යේසුස් කියලා. එතකොටම ඔහු අතුරුදහන් වෙනවා. (ලූක් 24:29-31) යේසුස් නැවත නැඟිටලා කියලා දැන් නම් ඔවුන්ට කිසිම සැකයක් නැහැ.

ඔවුන් මෙහෙම කතා වෙනවා. “අප පාර දිගේ එන විට ඔහු අපට ශුද්ධ ලියවිල්ලේ දේවල් කොතරම් හොඳින් පැහැදිලි කර දුන්නාද! ඔහු කතා කළ විට අපේ සිත් මොන තරම් සතුටකින් පිරී ගියාද!” (ලූක් 24:32) ගෝලයන් දෙන්නා දැන් ඉක්මනින්ම යෙරුසලමට ගිහින් නියෝජිතයන්ව සහ ඔවුන් එක්ක ඉන්න අයව මුණගැහෙනවා. හැබැයි සිද්ධ වුණු දේ ගැන කියන්න කලින් “ස්වාමි වූ යේසුස් ඇත්තටම මරණයෙන් නැවත නැඟිටලා! සීමොනුත් ඔහුව දැක්කා” කියලා එතැන ඉන්න අය ඔවුන්ට කියනවා. (ලූක් 24:34) ඊටපස්සේ ගෝලයන් දෙන්නත් තමන්ට යේසුස්ව දැකගන්න ලැබුණු විදිහ ගැන විස්තර ඔවුන්ට කියනවා.

යුදෙව්වන්ට තියෙන බය නිසා මේ වෙලාවේ නියෝජිතයන් දොරගුලු දාගෙනයි ඉන්නේ. හැබැයි එකපාරටම යේසුස් ඔවුන් අතරට එනවා. ඔහු කියන්නේ “ඔබට සමාදානය වේවා” කියලයි. ඒත් හොඳටම බය වෙන ඔවුන් හිතන්නේ තමන් අතරට දේවදූතයෙක් ඇවිල්ලා කියලයි.—ලූක් 24:36, 37.

ඔවුන්ගේ බිය සැක නැති කරන්න තමන්ගේ ශරීරය අල්ලලා බලන්න කියා පවසන ඔහු මෙහෙමත් කියනවා. “ඔබ කලබල වී සිටින්නේ ඇයි? ඔබ සැකයෙන් බලන්නේ ඇයි? මගේ අත් පා දෙස බලන්න. මේ මා බව තේරුම්ගන්න. මාව අල්ලා බලන්න. මටත් තිබෙන්නේ ඇට මස් නහරවලින් යුත් ශරීරයක්. දේවදූතයෙකුට මෙවැනි ශරීරයක් නැහැ.” (ලූක් 24:36-39) සිද්ධ වුණු දේ ගැන ප්‍රීතියක් සහ පුදුමයක් දැනුණත් තවමත් ඔවුන්ට ඒක විශ්වාස කරන්න බැහැ.

දැන් යේසුස් ඔවුන්ගෙන් අහනවා “ඔබ ළඟ කෑමට යමක් තිබෙනවාද” කියලා. ඔහු එහෙම අහන්නේ තමන් ඇත්තටම නැවත නැඟිටලා කියලා ඔවුන්ට තවත් තහවුරු කරන්නයි. ඔවුන් ඔහුට පිලිස්සූ මාළු කැබැල්ලක් දුන්නාම ඒක කන ඔහු මෙහෙම කියනවා. “මා ඔබ සමඟ සිටියදී ඔබට පැවසූ දේවල් ඔබට මතක ඇති. එනම් මෝසෙස්ට දෙන ලද නීතියෙත් අනාගතවක්තෘවරුන්ගේ ලියවිලිවලත් ගීතාවලියෙත් මා ගැන ලියා තිබෙන සියල්ල ඉටු විය යුතු බවයි.”—ලූක් 24:41-44.

ශුද්ධ ලියවිල්ලේ තියෙන දේවල් තේරුම්ගන්න යේසුස් ක්ලෙයෝපස්ට සහ ඔහු එක්ක හිටිය අනිත් ගෝලයාට උදව් කරලා තිබුණා. දැන් රැස් වෙලා ඉන්න හැමෝටමත් ඔහු ඒ දේවල් තේරුම් කරන්න මෙහෙම කියනවා. “ශුද්ධ ලියවිල්ලේ ලියා තිබුණු ආකාරයට ක්‍රිස්තුස් දුක් විඳ මිය ගියත් තුන්වෙනි දවසේදී මරණයෙන් නැඟිටිය යුතුයි. ඒ වගේම ඔහුව පිළිගෙන පසුතැවිලි වන සියලුදෙනාගේ පව්වලට සමාව ලැබෙනවා. මේ දේවල් යෙරුසලමෙන් පටන්ගෙන සියලු ජාතීන්ට දේශනා කරන්න අවශ්‍යයි. මේ සෑම දෙයකටම සාක්ෂිකරුවන් වුණේ ඔබයි.”—ලූක් 24:46-48.

මොකක් හරි හේතුවක් නිසා මේ වෙලාවේ තෝමස් මෙතැන නැහැ. ඒ නිසා ඊළඟ දවසේදී ගෝලයන් හරිම සතුටින් ඔහුට කියනවා “අපි ස්වාමීන්ව දැක්කා” කියලා. එතකොට ඔහු කියන්නේ මෙහෙමයි. “මම ඒ දේ විශ්වාස කරන්නේ ඔහුගේ අත්වල ඇණ සලකුණු දැක, ඔහුගේ ළයට පහළින් ඇති පෙදෙසට මගේ අත තබා බැලුවාට පසුව විතරයි.”—යොහන් 20:25.

දවස් අටකට පස්සේ ගෝලයන් ආපහු නිවසක රැස් වෙලා දොරගුලු දාගන්නවා. මේ වතාවේ නම් තෝමස් ගෝලයන් එක්ක ඉන්නවා. ආයෙත් වතාවක් ඔවුන් අතරට එන යේසුස් කියන්නේ “ඔබට සමාදානය වේවා” කියලයි. තෝමස් වෙතට හැරෙන ඔහු මෙහෙම කියනවා. “ඇවිත් ඔබේ අත් දෙකෙන්ම මගේ අත් අල්ලා බලන්න. ඔබේ අත මගේ ළයට පහළින් ඇති පෙදෙසටත් තබා බලන්න. දැන් අවිශ්වාස කරන්නේ නැතුව විශ්වාස කරන්න.” පිළිතුරු දෙමින් තෝමස් කියන්නේ “මගේ ස්වාමීනි, මගේ දෙවියනි” කියලයි. (යොහන් 20:26-28) යෙහෝවා දෙවිගේ නියෝජිතයෙක් වන යේසුස් දෙවිට යම් සමානකමක් තියෙන බලවත් කෙනෙක් විදිහට නැවත නැඟිටලා තියෙනවා කියලා දැන් නම් ඔහුට ස්ථිරයි.

යේසුස් දැන් ඔහුට මෙහෙම කියනවා. “ඔබ විශ්වාස කරන්නේ මාව දුටු නිසාද? ඒත් දකින්නේ නැතුව විශ්වාස කරන අය කොතරම් සන්තෝෂවත්ද!”—යොහන් 20:29.