දීප්තිමත් බලාපොරොත්තුවක් ඇති දැරියක්
ස්ටෙෆනි නම් 12-හැවිරිදි දැරියගෙන් පිබිදෙව්! ප්‍රකාශකයන්ට ලිපියක් ලැබුණි. “පාසැල් වැඩ සඳහා මේ ප්‍රකාශන මට කොයිතරම් උපකාරවත් වුණාද කියා ඔබට පවසන්න මා කැමතියි” කියා ඇය ලීවාය. “‘සංස්කෘතික විවිධත්වය’ යන මාතෘකාව යටතේ ව්‍යාපෘතියක් කිරීමට මෑතකදී මට පැවරුමක් ලැබුණා. මගේ පවුලේ අයයි, මායි එකතු වී මාතෘකාවට ගැළපෙන ලිපිවල කොටස් හා පින්තූරු, පොත් පත්වලින් කපාගත්තා. ඊට පස්සේ මම ඒවා පුවරුවක ඇලෙව්වා.” තමන් කැමති හොඳම ව්‍යාපෘති පහ තෝරන්න කියා ස්ටෙෆනිගේ ගුරුවරිය පංතියේ ළමුන්ට උපදෙස් දුන්නාය. “පළවෙනි පහ අතරට මගේ එකත් තේරිලා තියෙන බව ඊළඟ දවසේ මම දැක්කා.”
ස්ටෙෆනි තෝරාගත් එක් ප්‍රකාශනයක් වූයේ “සියලුම ජනයා කවදා හෝ එකිනෙකාට ප්‍රේම කරාවිද?” යන මැයෙන් යුත් 1998 නොවැම්බර් 8 පිබිදෙව්! කලාපයයි. විවිධ සංස්කෘතීන්ට අයත් ජනයාට සාමකාමීව එකට විසිය හැකි බව යෙහෝවාගේ සාක්ෂිකාරියක වූ ස්ටෙෆනි තරයේම විශ්වාස කරන්නීය. ඇත්තවශයෙන්ම ඇය, කලින් සතුරන්ව සිටි ටුට්සි හා හුටු, ජර්මන් හා රුසියානු, ආමේනියන් හා තුර්කි, ජපන් හා අමෙරිකානු ජාතිකයන් අතරින් බයිබල් සත්‍යය නිසා එකමුතු වී සිටින්නන්ගෙන් සමන්විත ජාත්‍යන්තර සහෝදරත්වයක සාමාජිකාවකි. ඔවුහු එක්ව තම මැවුම්කරු අනුකරණය කිරීමට වෙර දරති. කෙලෙසද? ස්ටෙෆනි ඇගේ ව්‍යාපෘතියේ යෙදූ එක් බයිබල් පාඨයකින් ඊට පිළිතුරු සැපයේ. ‘එවිට පේතෘස් තමාගේ මුඛය හැර කථාකොට: සැබවින් දෙවි මනුෂ්‍යයන්ගේ තරාතිරම් නොබලන කෙනෙක්ය. සියලු ජාතීන් අතරේ ඔහු කෙරෙහි භය ඇතිව ධර්මිෂ්ඨකම් කරන තැනැත්තේ ඔහුට ප්‍රසන්න බව සැබවින්ම මට පෙනේ.’ (ක්‍රියා10:34,35) යෙහෝවාගේ සාක්ෂිකරුවෝ අන්‍යයන් සමඟ කටයුතු කරන විට එවැනිම අපක්ෂපාතිත්වයක් දැක්වීමට පරිශ්‍රමයක් දරති.
නොබෝ කලකින් දෙවිගේ රාජ්‍යය මගින් අපේ මිහිතලයට ගෙනෙනු ලබන ධර්මිෂ්ඨ තත්වයන් පිළිබඳ බයිබල් පොරොන්දුව ඉටු වන කාලය එන තෙක් ස්ටෙෆනි ආශාවෙන් බලා සිටින්නීය. (එළිදරව් 21:3, 4) බියෙන් හා අස්ථිරත්වයෙන් අනාගතයට මූණ දෙන යෞවනයන්ගෙන් පිරි ලෝකයක ඇය දීප්තිමත් බලාපොරොත්තුවක් ඇති තැනැත්තියක් හැටියට කැපීපෙනෙයි.