Yaiqoobi Ragge Adhi

Yisihaaqi 40 diro ikkisita Ribiqa yinanni beetto adhino. Isi Ribiqa lowo geeshsha baxanno. Gedensaanni Yisihaaqinna Ribiqa labballo lakkuwa ilino.

Bayiriidihu suꞌmi Eesawuuti; maaꞌniidihu suꞌmi Yaiqoobiiti. Eesawu gobba hosa baxanno; isi worba ugaaxaanchooti. Yaiqoobi kayinni mine hosa baxanno.

Hatte yannara, annu reyanno woyite bayiriidi beetti rooriidi baattonna woxe adhanno. Tenne raggete yinanni. Yisihaaqi ooso, Yihowa Abirihaamira uyino hexxono ragidhanno. Eesawu, Maganu Abirihaamira coyiꞌrino qaale mulluri gede asse kiirino; Yaiqoobi kayinni Yihowa coyiꞌrino qaali lowore ikkinota afino.

Mitto barra Eesawu ugaaxanni hose daafurinohu minira dayi. Isi Yaiqoobi ganino woxi fooli eꞌꞌeennasi togo yii: “Hude shituena rakke tenne duume woxi uyie.” Hakkiinni Yaiqoobi, ‘Balaxxe raggekki uyiexa’ yiisi. Eesawu qole, ‘Ragge ma assiꞌreemmo? Adhite anera sagalella uyie’ yii. Eesawu hatto yaasi garahoni? Digaraho. Eesawu mitte hige itanno sagalera yee lowo geeshsha dancha ikkino coye huꞌnino.

Yisihaaqi geedhino daafira bayiriidi beettosi maassiꞌranno yanna iillitu. Ribiqa kayinni maasso maaꞌniidi beetti Yaiqoobi adhanno gede assitino. Eesawu tenne afiti lowo geeshsha hanqi; hakkiinni lakkicha rodoosi Yaiqoobi shaara hedi. Yisihaaqinna Ribiqa Yaiqoobi gatisa hasiꞌrino daafira togo yitusi: ‘Rakke abbikki Laabawa haꞌri; rodiikki hanqi qiida geeshsha isiwa heeꞌri.’ Yaiqoobi annisinna amasi amaale macciishshe abbisiwa xooqino.