Yesuusi Sambatunni Xiwantinore Hursino

Farisootu Yesuusa gibbanno daafira amaddasira hasidhino. Insa Yesuusi Sambatunni xiwantinore hursa dihasiissannosi yitino. Mitte hige Yesuusi Sambatunni mittu illiweelu beetti doogote huucciꞌranna lai. Isi soqqamaasinesira, ‘Maganu wolqa konne beetto kaaꞌlitannosi gara laꞌe’ yiinsa. Hakkiinni Yesuusi bushsha anjunni liise sabba assi; hakkiinni sabba manchu illera buuri. Yesuusi beetto, ‘Hadhe illekki Selihoomi wayira hayishshiꞌri’ yiisi. Beettu haꞌre hayishshiꞌre laꞌꞌa dandiino; isi ilaminkunni mite yee lainohu hakkawoyiteeti.

Mannu lowo geeshsha dhagge assiꞌrino. Togo yiino: ‘Kuni alba ofolle huucciꞌranno manchootinso woleho?’ Beettu qole, ‘Ee, aneeti!’ yiinsa. Mannu ‘Illekki hiitto ikkite faꞌnantuyya?’ yee xaꞌmisi. Isi ikke hurino gara kulinsata insa Farisootunniwa haadhe hadhusi.

Beettu Farisootaho togo yii: ‘Yesuusi illeꞌyara sabba buure, hadhe hayishshiꞌri yiie. Anino haꞌre hayishshiꞌre xa laꞌꞌa dandoommo.’ Farisootu togo yitu: ‘Yesuusi Sambatunni hursino daafira, wolqa uyinosihu Magano diꞌꞌikkino.’ Gamu manni kayinni ‘Isi wolqa afiꞌrinohu Maganuwiinni ikka hoogoommero hursa didandaanno’ yii.

Farisootu beettu annanna ama woshshite ‘Beettiꞌne xa hiitto ikke laꞌꞌa dandii?’ yite xaꞌmitu. Farisootu Yesuusa ammananno mancho xaadu mininni fushshine hunnanni yitino daafira, annisinna amasi lowo geeshsha waajjino. Konni daafira insa, ‘Ninke dianfoommona, iso xaꞌme’ yii. Farisootu beetto xaano ledde xaꞌmitu; hakkiinni isi, ‘Afoommore baalare kuloommoꞌne. Xaa xaa mayira xaꞌmitinannie?’ yiinsa. Farisootu lowo geeshsha hanqite xaadu mininni fushshite huntusi.

Yesuusi beettunniwa mare ‘Mesihicha ammanatto?’ yee xaꞌmisi. Beettu qole, ‘Isi ayetiro afoommoro ammaneemmo’ yii. Yesuusi, ‘Ani Mesihichaho’ yiisi. Tini, Yesuusi shaqqado ikkinota dileellishshanno? Yesuusi beettoho illesi faninoha calla ikkikkinni ammanannosi gede kaaꞌlinosi.