Goofimarchu Barra Lowo Manni Gatanno Atino gata dandaatto

Qullaawu Maxaafi goofimarchu daanno wote baono heedhannota kulanno: “Alamete hanafonni kayise xaa geeshsha ikke egenninokkihu layinkitano ikkannokkihu bayiru qarri daanno . . . Isinni hatti barruwa haraꞌma hooggoommero, maala uddiꞌrinohu mittuno digatanno.” (Maatewoosi 24:21, 22) Ikkirono, Maganu gatannohu lowo manni heeꞌrannota kulanni togo yiino: “Alame saꞌanni no . . . , Maganu fajjo assannohu kayinni hegerera heeꞌranno.”—1 Yohaannisi 2:17.

Tini alame saꞌanno wote gatte ‘hegerera heeꞌrate,’ maa assa hasiissannohe? Maalaamittete coye gamba assiꞌra woy cibbiꞌra hasiissannohe? Deeꞌni. Qullaawu Maxaafi wolu garinni qixxaawa hasiissannonketa seekke amaalannonke. Togo yaanno: “Tini baalanti coyibba konni garinni daaqqannoha ikkiro, keeraancho amanyoote harunsitinanni hattono Maganoho galtinoonnire ikkitinoonnita leellishannoha qullaawa looso loossinanni hiittoo manna ikka hasiissannoꞌnero heda hasiissannoꞌne; Yihowa barri daa agadhitinanninna gambise dayinota heddinanni heeꞌra hasiissannoꞌne.” (2 Pheexiroosi 3:10-12) Tenne xiqisera qooxote noo assaawe, daaqqanno yinite ‘tenne baalante coyibba’ giddo gamu, tenne busha alame gashshaanonna Maganu gashshoote agure uullate gashshoote doodhanno manna ikkinota xawissanno. Maalaamittete coyibba cibbiꞌneemmoha ikkiro, hattoori baote barra digatisannonke.

Ee, baotenni gatate Yihowara galloommore ikkanna iso hagiirsiisanno akatinna loosi daafira rosa hasiissannonke. (Sofooniyaasi 2:3) Yannankera noohu rooru manni faale harunsine gooffe daggino yanna giddo heeꞌnoommota leellishanno malaate lashshi assine agurantenni, ‘Yihowa barri gambise dayinota heda hasiissannonke.’ Yihowa Farciꞌraasine konni daanni noo barrinni gatte saꞌꞌa dandaatto gara Qullaawu Maxaafinni kultannohe.