AANIIDI QOOLIHA COYI UMO | YIHOWA FARCIꞌRAASINE HIITTOO MANNAATI?
Yihowa Farciꞌraasine Ayimma
Ninke wole ammaꞌno ledo karsammummokki alame woꞌmate heeꞌneemmo dirijjiteeti. Qara biironke Ameerikaho nooha ikkirono, rooriiditi Yihowa Farciꞌraasine heedhannohu wole babbaxxitino gobbuwaraati. Isinni sette miliyoone aleenni ikkineemmori Yihowa Farciꞌraasine 230 saꞌanno gobbuwara mannaho Qullaawa Maxaafa rosiinseemmo. Konne assineemmohu Yesuusi togo yee hajajino daafiraati: “Daga baalantera naqaashe ikkanno gede, kuni Mangistennihu danchu duduwi uulla woꞌmate sabbakamanno.”—Maatewoosi 24:14.
Heeꞌneemmo gobba ikkitutano ikkituro, hatti gobba fushshitino higgera hajajammeemmo. Hakkoyeno ikkiro, poletiku hajora anga diwodhineemmo. Hatto assineemmokkihu Yesuusi Kiristaanu “alamete wido ikkannokki” gede kulinohuraati. Konni daafira poletiku coyira dikarsammeemmo, hattono olu giddora dieꞌneemmo. (Yohaannisi 15:19; 17:16) Layinkihu Alamete Oli yannara Yihowa Farciꞌraasine poletiku hajora anga wodha gibbinohura usurroonninsa, gannoonninsa, hattono hakkiinni sainore assinoonninsa. Albihu Jarmanete qeesichi togo yiino: “Sayikki rayike [woy Hitileri gashshooti] yannara olaho dikarsammoommo yite coyiꞌra dandiitannori Yihowa Farciꞌraasine callaati.”
“[Yihowa Farciꞌraasine] danchu amanyooti noonsa mannaati. Konni uminsara roorsiꞌrannokki mannira lowota poletiku silxaane nafa uyinansara dandiinanni; insa kayinni horonta tenne dihasidhanno. . . . Insa mangiste fushshitanno higge ayirrissannoha ikkirono, mannu ooso qarra baalanka tirtannoti Maganu Mangiste calla ikkitinota ammantanno.”—Nova Siwobooda gaazeexa, Cheki Rippaabilike.
Hatto yaa kayinni ninke mannu ledo dixaandeemmoreeti yaa diꞌꞌikkino. Yesuusi harunsaanosi daafira Magano togo yee huuccino: ‘Huucciꞌreemmohehu alamete giddonni fushshattonsara diꞌꞌikkino.’ (Yohaannisi 17:15) Konni daafira ninke loosiꞌnanna, dikkiꞌnanna hattono qooxeessinkera noo rosi mine ronsanna afattonkera dandaatto.