Reyini Gedensaanni Hiikkinanni?

MANNU heeshshotenna reyote daafira duuchare coyiꞌranno. Mitu mannira reyini gedensaanni wolu garinni wole bayicho haꞌne heeꞌnanniha lawannonsa. Mitu mannira qole, wolericho ikkine kalaqammanniha lawannonsa. Reyo baalunku coyi goofimarchooti yee hedanno mannino no.

Lossinoonnihenna budikki garinni, tenne hajo daafira umikki hedo heedhahera dandiitanno. Mannu reyote daafira hedannori duuchare ikkina, “Reyini gedensaanni hiikkinanni?” yitanno xaꞌmora garu dawaro afiꞌra dandiineemmohu ayewiinniiti? woy hiikkiinniiti?

Lowo xibbe diro ammaꞌnote murrooti lubbo direyitanno yite rosiissanni keeshshitino. Baalanta qara qara ammaꞌno lawishshaho, Kiristaanu, Hindete, Ayihudootu, Isilaamunna wole ammaꞌno harunsanno manni, lubbo direyitanno yee ammananno; kuni manni maalu reyiro lubbo ayyaanaamittete alamera heedhanno yee hedanno. Budistete ammaꞌno kayinni mannu duucha hige ilami gedensaanni, manchu giddo noo wolqa woy ayyaani lowo geeshsha hagiirsiisannowa Nirwaana yinanni deerra iillanno yite ammantanno.

Aleenni laꞌnummo taje leellishshanno garinni, alamete aana noohu rooru manni, reyo wole alamera haꞌne heeꞌnanni faro fantanno yee ammananno. Batinyu manni reyo heeshshote doyichora hasiissannote yee hedanno, hattono Maganu kalaqinonkehu reyinammoraati yaanno. Ikkina Qullaawu Maxaafi tenne hajo daafira mayyaanno? Aane noo birxicho nabbawattora koyinsoommohe. Qullaawu Maxaafi qolanno dawaro dhagge ikkitahera dandiitanno.