Masaalaanote Haꞌruma Hadhe—Naahoomi
1. Naahoomi maxaafinni maa ronseemmo?
1 Hundihu Nennewete katami diigamino kinna Naahoomi masaalinonte gede, Yihowa diinnasi rabbisannotanna, waajjishanno manni woy gashshooti nafa albasiinni uurre afannokkita leellishshanno tajeeti. (Nah. 1:2, 6) Naahoomi masaalo seekkine xiinxallinummoro soqqanshonkera kaaꞌlannonkere lowore ronseemmo.
2. Sabbankeemmori dancha sokka amadinoti leeltanno gede assa dandiineemmohu hiittoonniiti?
2 Sheshifachishanna Hexxo Aa: Iimi adda laꞌniro, Naahoomi maxaafi hundihu booꞌnaleessu Asooru manni katami baore kultanno lallawo calla amadinoha lawanno. (Nah. 1:1; 3:7) Ikkollana, tini lallawo hakkawaro Yihowa mannira kayinni dancha duduwooti. Naahoomi (“Sheshifachishaancho” yitanno tiro afiꞌrino), gaꞌresi ikkinohu Yihudu mannira diinnansa mulenni baꞌannota kule sheshifachishinonsa. Hakkiinni saeno, Naahoomi Yihowa “qarru yannara golo” ikkinota coyiꞌrino. (Nah. 1:7) Ninkeno sabbankeemmo wote dancha duduwo duduwanna mannu Yihowa golonsa assiꞌranno gede jawaachisha hasiissannonke.—Nah. 1:15.
3. Naahoomi gede lawishsha horoonsiꞌra dandiineemmohu hiittoonniiti?
3 Lawishsha Horoonsiꞌra: Yihowa, Naahoomi Nennewete bao, hakkuyira albaanni Asooru daga uminsa huntinohu Tebisi (Noi-amooni) yinannihu Gibitsete katami bao ledo heewisiise borreessanno gede ayyaanunni marrainosi. (Nah. 3:8-10) Ninkeno tini busha alame baꞌannota mannaho kulleemmo wote, Yihowa coyiꞌrinore hilirino gatikki wonshannota buuxissannota Qullaawu Maxaafi giddo noota addi addi masaalo horoonsiꞌra dandiineemmo. Lawishshaho, Baabiloonetenna Medooni daga Nennewete katama hunate 632 K.A. daggu wote, biite xeena ganino daafira Xeegiroosi lagi akkimale daye eate lowo geeshsha qarrisannoha katamunniha gimbete huxxa gama raga diigino. Hakkiinnino Yihowa balaxe kulinonte gede, Nennewete katami bayichonko horrami.—Nah. 1:8; 2:6.
4. Soqqanshote yannara coye xawinsenna leellanno garinni coyiꞌra dandiineemmohu hiittoonniiti?
4 Xawinsenna Leellanno Garinni Coyiꞌra: Naahoomi sokkasi xawisenna hambannikki gede asse borreessino. Isi rosiisara hasiꞌrinori goꞌlinoha diꞌꞌikkino. (Nah. 1:14; 3:1) Ninkeno huwatate qarrisannokki garinni coyiꞌra hasiissannonke. (1 Qor. 14:9) Manna umo coyishiishshinanni wote, martinoonnihu mayiraatiro xawissine kulle. Qullaawa Maxaafa xiinxallissinanni wote, xiinxallanno manchi Yihowaranna Qaalisira noosi ammana lexxitanno gedenna rosino rosi isira gilletenni kaaꞌlannosihu hiittoonniitiro huwatanno gede kaaꞌlesi.—Rom. 10:14.
5. Naahoomi masaalonni mayi shesho afiꞌneemmo?
5 Naahoomi Yihowa coyiꞌrino qaali woꞌmannota ammanannoti, isi suꞌminni borreessamino maxaafi giddo xabbe leeltanno. Sheexaanu alame baꞌꞌate gambissinote tenne yannara, Maganu “Qarru layinkimeeshsho diheeꞌranno” yee coyiꞌrino qaali sheshifachishannonke.—Nah. 1:9.