Sabbakate Dandooꞌne Woyyeessiꞌra Agurtinoonte
1. Sabbakate dandoonke woyyeessiꞌra hasiissannonketa leellishshannota umi xibbi diri lawishshuwa kuli.
1 Kiristaanu sabbakate dandoonsa woyyeessiꞌra hasiissannonsa. Yesuusi harunsaanosira sabbakate dandoonsa woyyeessiꞌrate kaaꞌlannonsa qajeelsha uyinonsahu iseraati. (Luq. 9:1-5; 10:1-11) Aqiilanna Phirisqilano Aphiloosi haadhe hadhe “Maganu doogo albinni roore garunni huwatanno gede” kaaꞌlitinosihu konniraati. (Looso 18:24-26) Phaawuloosino, dandoo noosi wongeelaawichi Ximootewosi, lophosi “manna baalaho xabbe leeltanno” gede rosiisanno gara woyyeessiꞌrate sharrama agurannokki gede amaalinosihu iseraati. (1 Xim. 4:13-15) Danchu duduwi halashshaano ikkine, Mootichaho soqqammanni keeshshinoommo diri baxi geeshshihano ikkiro, sabbakate dandoonke woyyeessiꞌnanni haꞌra hasiissannonke.
2. Wolootuwiinni rosa dandiineemmohu hiittoonniiti?
2 Wolootuwiinni Rosse: Sabbakate dandoonke woyyeessiꞌneemmoti mitte doogo wolootuwiinni rosate. (Law. 27:17) Konni daafira, roduuwu hasaawa jammartanno gara seekkitine macciishshe. Kaajja sabbakate dandoo noonsa roduuwi, kiꞌnera roore kaaꞌlitannoꞌne assaawe badde kultannoꞌne gede xaꞌme, hattono yitannore seekkitine macciishshe. (Law. 1:5) Manna galagaltine martine hasaawissinanni gari, woy Qullaawu Maxaafi xiinxallo jammarsiissinanni gari woy wolu soqqanshote gari leella giwinoꞌne? Simirritete gaamoꞌneha aliidi laꞌꞌaancho woy temokkiro noosi halashshaancho shiqqine kaaꞌlo xaꞌmidhe. Yihowahu qullaawu ayyaanino dandoonke lexxitanno gede assara dandaannota deꞌinoonte; konni daafira Yihowa ayyaana afiꞌrate ganyitine huuccidhe.—Luq. 11:13.
3. Amaale ninke xaꞌmiꞌnummokkinni uyininkero nafa ma assa hasiissannonke?
3 Mito coye woyyeessidhinanni gede kulliꞌnero, amaale uyinoonniꞌnehu kiꞌne xaꞌmidhinikki ikkiro nafa koffi yitinoonte. (Mek. 7:9) Aphiloosi gede uyinanniꞌne kaaꞌlo shooshanqetenni galattine adhe. Togo assa hayyote.—Law. 12:15.
4. Yesuusi wongeelu looso loosate dandoonke woyyeesiꞌrate kaꞌneemmo gede assannonkehu qaru korkaati maati yiino?
4 Dandoonke Woyyeessiꞌra Maganu Ayirranno Gede Assitanno: Yesuusi lawishsha horoonsiꞌre harunsaanosi sabbakate dandoonsa woyyeessidhanno gede jawaachishino. Yesuusi isonooto woyinete haqqicho ledo, buurantino harunsaanosi kayinni sinnate ledo lawise coyiꞌrino. Isi Annisi guma laaltanno sinna baalanta ‘roore guma laaltanno gede’ maxannota kulino. (Yoh. 15:2) Woyinete irshi anni woyinete sinna roore guma laaltara hasiꞌrannonte gede, Yihowano “suumenke guma” albinni roore laalate dandoonke woyyeessiꞌnammora hasiꞌranno. (Ibi. 13:15) Wongeelu looso loosate dandoonke woyyeessiꞌnummoro afiꞌneemmohu hagiirsiisanno gumi maati? Yesuusi togo yee qolino: “Lowo guma laalaꞌne agura hoogginiro . . . konninni Anniꞌya ayirranno.”—Yoh. 15:8.