Nabbawaano Xaꞌmitanno Xaꞌmo

Yesuusi reyara albaanni Daawiti Faarso 22:1te coyiꞌrinore qummi assinohu mayiraati?

Yesuusi reyara albaanni coyiꞌrinori giddo mitte, Maatewoosi 27:46te noo hedooti; qummeeshshu “Maganoꞌya, Maganoꞌya, mayira agurittoe?” yaanno. Yesuusi hatto yee coyiꞌrasi, Faarso 22:1te faarsaasinchu Daawiti coyiꞌrinori woꞌmanno gede assitino. (Maq. 15:34) Yesuusi hatto yee coyiꞌrinohu Yihowara koꞌmeeti woy shiima yanna geeshshano ikkiro ammanasi shoshshoggitino daafiraati yine heda digaraho. Yesuusi reya hasiissinosihu mayiraatiro seekke afino; qoleno reyate maahoyye yiino. (Mat. 16:21; 20:28) Hattono reyanno yannara, Yihowa isira agarooshshu ‘huxxa ikka’ agura hasiissannosita afino. (Iyo. 1:10) Yihowa, Yesuusa shinanni gari ikkihano ikkiro, isi woꞌmunni woꞌma ammanaminoha ikkinota leellishanno gede fajjino.—Maq. 14:35, 36.

Ikkina Yesuusi tenne faarsora noo hedo coyiꞌrinohu mayiraati? Tenne daafira woꞌmunni woꞌma anfoommokkiha ikkirono, hanni isi hatto yiinohu mayira ikkara dandaannoro laꞌno.a

Yesuusi hatto yee coyiꞌrinohu, Yihowa mereero eꞌꞌe reyotenni gatisannosikkita xawisateeti ikka? Yesuusi Yihowa kaaꞌlo nookkiha wodo ikka hasiissinosi. Isi “baalunku daafira” reya hasiissinosi.—Ibi. 2:9.

Isi tenne faarso giddonni boodere qummi asse coyiꞌrinohu, mannu woꞌma faarso qaaganno gede assateeti ikka? Hakka waro Yihudu mannira faarsote maxaafa wodanaho wodhate rosichi noonsa. Insa mitte faarso giddonni mitte kiiro qummi assiniro woꞌma faarso qaaggara dandiitanno. Yesuusi hatte faarso qummi assinohu isera ikkiro, Yihudu wido ikkitino harunsaanosi hatte faarsora kulloonnita Yesuusi reyo ledo xaadooshshe afidhino masaalo qaagganno gede kaaꞌlinonsaha ikkara dandaanno. (Far. 22:7, 8, 15, 16, 18, 24) Qoleno hatte faarso jeefora noo hedo, Yihowara guweenyu hasiisannositanna isi uulla woꞌmate Moote ikkinota qaagganno gede assitannonsa.—Far. 22:27-31.

Yesuusi Daawiti coyiꞌrinore qummi assinohu, beebbaataamo ikkinota xawisateeti ikka? Yesuusi reyara albaanni seerimale kassanse Magano xonino yine yoo yinoonnisi. (Mat. 26:65, 66) Yesuusi hajo laꞌnoonnihu hashsha gawa gawa assineeti; qoleno tini hakkawaro harunsinanni wodho ledo sumuu diyitannote. (Mat. 26:59; Maq. 14:56-59) Konnira Yesuusi Faarso 22:1te noo hedo qummi assi woyite “Maganoꞌya, Maganoꞌya, hunoommori nookkiha mayira agurittoe?” yaanni noohu gedeeti; isi hatto yiinohu, beebbaataamo ikkinota kulate ikkara dandaanno.

Yesuusi Daawiti coyiꞌrinore qummi assinohu, isono Maganu giwinosikkita xawisateeti ikka? Yihowa Daawitira qarru iillanno gede fajjinoha ikkirono, tini iso giwinota leellishshannota diꞌꞌikkitino. Daawiti xaꞌmino xaꞌmo ammana ajjinosita leellishshannota diꞌꞌikkitino. Daawiti hatto yee xaꞌmihu gedensaanni, Yihowa mannasi gatisannotanna iso woꞌmanka woyite maassiꞌrannosita addaxxannota coyiꞌrino. (Far. 22:23, 24, 27) Hatteente gede, “Daawiti Beetti” Yesuusino qarru haqqira shetinoha ikkirono, tini Yihowa Yesuusa giwinota leellishshannota diꞌꞌikkitino.—Mat. 21:9.

Yesuusi hatto yiinohu, woꞌmunni woꞌma ammanaminoha ikkinota leellishanno gede Yihowa iso agara agurinotera xissiisiꞌrinota xawisateeti ikka? Yihowa umo Beettisi qarramaranna reyara dihedino. Yesuusi reya hasiissinosihu Addaaminna Heewani finqilino daafiraati. Yesuusi huninori dino; ikkollana Sheexaanu kayisino xaꞌmora dawaro qolatenna mannu ooso hoogginore wirro afidhanno gede wodo ikkate isi qarramanna reya hasiissinosi. (Maq. 8:31; 1 Phe. 2:21-24) Kuni ikkara dandaannohu, Yihowa shiima yanna geeshshano ikkiro Beettosi agara aguriro callaati; heeshshosi giddo Yihowa iso agarinokkihu hakka woyiteeti.

Yesuusi hatto yee coyiꞌrinohu, Yihowa konni garinni reyara fajjinohu mayiraatiro harunsaanosi huwattanno gede kaaꞌlateeti ikka?b Yesuusi jaddo loosinohu gede assine haqqaho sunte shinannisi woyite lowo manni gufiꞌrannota afino. (1 Qor. 1:23) Harunsaanosi Yesuusi reya hasiissinosihu mayiraatiro garunni huwatturo, iso jaddo loosinohu gede ikkikkinni Gatisaanchinsa gede assite laꞌanno.—Gal. 3:13, 14.

Yesuusi Daawiti coyiꞌrino hedo qummi assino korkaati ikkihano ikkiro, isira iillanni noosiri Yihowa fajjo ikkinota huwatino. Isi hatte faarsora noo hedo coyiꞌrihu gedensaanni, “Xaate ikkino” yiino. (Yoh. 19:30; Luq. 22:37) Yihowa shiima yanna geeshshano ikkiro Yesuusa agara agurasi, Yesuusi uullate aana assara dayinore woꞌmunni woꞌma wonshanno gede assitino. Qoleno “Musera uyinoonni Seeri, Himannatenna Faarsuwate borro giddo” isi daafira borreessinoonniri woꞌmanno gede assitino.—Luq. 24:44.