Shiimmaaddu Woshshiꞌyara Busukuute Uyitino
YUNAYITIDI ISTEETISETE, Oregooni yinanniwa heeꞌrannohu Niiki yinanni manchi togo yee borreessino: “Badheessu woggara 2014nni, heeꞌreemmo katamira lame shiimmaadda woshshaꞌya adhe katamu giddo milli yaanni noommo. Yihowa Farciꞌraasine duucha woyite katamu mereero borrote gaare mule uurritanno. Insa dancha gede uddidhinoreeti hattono manna baalanka faasiiqqe keere haadhanno.
“Kuri Yihowa Farciꞌraasine mannaho calla ikkikkinni woshshiꞌyara nafa danchare assitino. Mitto barra Ilaani yinanniti borrote gaare mule uurritino mancho lamu woshshiꞌyara busukuute uyitino. Wole woyiteno hakkaa hige saeemmo woyite woshshu busukuute hasiꞌranni insawa hige haꞌra hanafi.
“Hakkiinni boode aganna saꞌu. Woshshiꞌya busukuute itanno; anino Yihowa Farciꞌraasine ledo shiima geeshsha hasaawe kae haꞌreemmo. Kayinni insa ledo lowore hasaawa dihasiꞌroommo. Anera 70 diro saꞌꞌannoe; qoleno Yihowa Farciꞌraasine mayite ammantannoro dibuuxoommo. Batinye ammaꞌno assitannori hexxo mudheemmo gede assinoe daafira Qullaawa Maxaafa umiꞌyanni xiinxalla woyyitanno yee hedoommo.
“Tenne yannara, wole Yihowa Farciꞌraasineno katamu giddo addi addi bayicho borrote gaare mule uurrite noore laummo. Insano woꞌmanka woyite faasiiqootaho. Qoleno xaꞌmuwaꞌyara dawaro Qullaawu Maxaafi giddonni qoltinoe; hakko daafira insa roore ammanoommo.
“Mitto barra Ilaani, ‘Saada Maganu uyinonke elto ikkitinota ammanatto?’ yite xaꞌmitinoe. ‘Ee ammaneemmo!’ yee qolummose. Hakkiinni ise, Isayaasi 11:6-9 nabbabbinoe. Hakko barrinni hanafe Qullaawa Maxaafa xiinxalla hasiꞌroommo; kayinni borronsa adha dihasiꞌroommo.
“Hakkiinni aane noo barra, Ilaaninna minaannise Birenti ledo shiima yanna dancha hasaawa hasaamboommo. Insa addu Kiristaana ikkate maa assa hasiissannoro huwatate Maatewoosi maxaafinni kayise Soqqamaasinete Loosi maxaafi geeshsha nabbaweemmo gede amaaltue. Hakkiinni nabbawummo. Mulenni Birentinna Ilaani ledo Qullaawa Maxaafa xiinxalla hanafummo. Hatti yanna 2016nni arru woggaati.
“Lamalate kiiro Qullaawa Maxaafa xiinxalleemmotanna songote gambooshshe haꞌreemmo yanna quqquxame agadheemmo. Addanka Qullaawu Maxaafi kulannore rosanni noommo daafira lowo geeshsha hagiidhoommo. Mittu diri gedensaanni cuuame Yihowa Farciꞌraasincho ikkoommo. Xa anera 79 diro ikkannoe; qoleno addu ammaꞌno afiꞌroommo daafira tashshi yiinoe. Yihowa heeshshonsa isira sayisse uyitino maatesi wido ikkeemmo gede asse maassiꞌrinoe.”